MARIKA 14
14
Sa bukiveretaki ko Jisu, 1,2. Sa lumuti koya e dua na yalewa, 39. Sa volitaki koya ko Jutasa, 10,11. Sa ia ko Jisu na kana vata ni lako-sivia, 1225. Sa tukuna ni ra na dro na nona tisaipeli, ka cakitaki koya ko Pita, 2631. Sa masu mai Kecisemani, 3242. Sa soli koya ko Jutasa, a sa tauri koya ko ira na kai Jutia, 4352. Era sa qai vakacacani koya, 5365. Sa cakitaki koya ko Pita, 6672.
1Ia sa vo e rua na bogi me qai ia na kana vata ni lako-sivia kei na kana madrai sa sega ni vakaleveni: a ra sa vakasaqara ko ira na bete levu kei ira na vunivola me ra lawakitaki koya me ra taura, ka vakamatea. 2A ra sa kaya, Me kakua e na gauna ni kana vata, de ra ue kina na tamata.
3Ia ni sa tiko ko koya mai Pecani e na vale i Saimoni na vukavuka, ni sa kana tiko, sa lako mai e dua na yalewa sa taura e dua na tavaya alapasita waiwai, na narita dina, sa talei sara; a sa vorota na tavaya, ka livia ki na uluna. 4A sa cudru sara eso vakai ira, ka kaya, Sa biu walega na waiwai oqo e na vuku ni cava? 5sa rawarawa me volitaki oqo e na pene e tolu na drau ka vakacaca, ka soli vei ira na dravudravua. A ra sa kudruva na yalewa.
6A sa kaya ko Jisu, Laivi koya ga; dou sa saga e na vuku ni cava? sa cakava vei au e dua na cakacaka vinaka: 7sa tiko vakadua kei kemudou ko ira na dravudravua; ia ni dou sa via cakava na ka sa yaga vei ira, sa rawarawa ga: ia koi au, kau na sega ni tiko vakadua kei kemudou. 8Sa kitaka ko koya na ka sa rawata: sa lako mai eliu ko koya me lumuta na yagoqu me bulu. 9Au sa kaya vakaidina vei kemudou, E na veiyasana kecega e vuravura taucoko ena vunautaki kina nai tukutuku-vinaka oqo, ena bau tukuni talega kina na ka sa kitaka na yalewa oqo, me kenai divi.
10Ia ko Jutasa Isikarioti, e dua vei ira na lewe tinikarua, sa lako vei ira na bete levu, me soli koya vei ira. 11Ia ni ra sa rogoca, era sa reki, a ra sa yalayala me ra soli lavo vua. Sa qai vakasaqara ko koya na gauna e rawarawa me soli koya kina.
12Ia e nai matai ni siga ni kana madrai sa sega ni vakaleveni, ni ra sa vakamatea na lami ni lako-sivia, sa kaya vua ko ira na nona tisaipeli, Evei na tikina ko sa vinakata me keitou lako kina me vakarautaka mo ia kina na kana vata ni lako-sivia? 13A sa tala ko koya e lewe rua vei ira na nona tisaipeli, ka kaya vei rau, Drau lako ki na koro, drau na qai sota kaya e dua na tamata sa colata e dua na saqa wai: muri koya; 14ia na vale ena curu kina ko koya, drau kaya vua na kenai taukei, Sa taroga nai Vakavuvuli, Evei na tiki-ni-vale meu ia kina na kana vata ni lako-sivia kei ira na noqu tisaipeli? 15Ena qai vakatakila vei kemudrau e dua na tikina levu ecake e na vale sa vakarautaki tu na kenai yaya: drau vakarautaka kina na keda. 16A rau sa lako yani na nona tisaipeli, ka yaco ki na koro; a rau sa kunea me vaka ka kaya vei rau ko koya: a rau sa vakarautaka na kakana ni lako-sivia.
17Ia ni sa yakavi mai, sa lako mai ko koya kei ira na le tinikarua. 18Ia ni ra sa tiko ka kana, sa kaya ko Jisu, Au sa kaya vakaidina vei kemudou, ena soli au yani e dua vei kemudou, io ko koya sa kana vata kei au. 19Sa qai rarawa na lomadra, ka ra dui kaya yadua vei koya, Oi au beka? ka dua tale, Oi au beka? 20A sa kaya vei ira ko koya, E dua vei kemudou na lewe tinikarua, ko koya sa tokoca vata kei au na kena e na bilo. 21Sa lako na Luve ni tamata, me vaka sa volai e na vukuna: ia ka ca vua na tamata ko ya sa solia yani na Luve ni tamata! ke sa sega ni sucu na tamata ko ya ke sa vinaka vua.
22Ia ni ra sa kana tiko, sa taura na madrai ko Jisu, ka lotutaka, ka dovia, ka solia vei ira, ka kaya, Dou taura, kania: oqo na yagoqu. 23Sa qai taura na bilo ko koya, ia ni sa vakavinavinaka oti, sa solia vei ira; a ra sa gunu kece kina. 24A sa kaya vei ira, Sa noqu dra oqo ni veiyalayalati vou, sa liviraki e na vukudra e lewe vuqa. 25Au sa kaya vakaidina vei kemudou, Au na sega ni gunuva tale na vua ni vaini, ka malua me yaco mada na siga kau na gunuva vou kina e na matanitu ni Kalou.
26Ia ni ra sa sere oti, era sa lako yani ki na ulu-ni-vanua ni veiolive. 27A sa kaya vei ira ko Jisu, Dou na tarabe kecega e na vukuqu e na bogi edaidai; ni sa volai, Au na yavita nai vakatawa ni sipi, ka ra na dui vakasesei na qele ni sipi. 28Ia ni kau sa tu cake tale, au na qai liutaki kemudou ki Kalili.
29Sa qai kaya vua ko Pita, Kevaka ena tarabe ko ira kecega, koi au, kau na segai. 30A sa kaya vua ko Jisu, Au sa kaya vakaidina vei iko, E na siga oqo, e na bogi ga edaidai, ni sa sega ni tagi mada vakarua na toa, ko na cakitaki au vakatolu. 31Sa qai kaya vakayalokatakata mai ko koya, Kevaka edrau na mate vata, au na sega sara ni cakitaki kemuni. Sa kaya vaka talega kina ko ira kecega.
32A ra sa lako ki na dua na yasana na yacana ko Kecisemani: a sa kaya ko koya vei ira na nona tisaipeli, Dou tiko ga eke, meu masu mada.
33A sa kauti Pita vata kaya ko koya, kei Jemesa kei Joni, a sa vakatekivu me kidacala sara, ka yaluma sara. 34A sa kaya vei ira ko koya, Sa rarawa vakalevu na yaloqu, me vaka kau na mate; dou tiko ga eke, ka vakatawa. 35A sa lako vakalailai kiliu ko koya, a sa cuva ki na soso, a sa masu, kevaka e rawarawa, me lako tani na gauna ko ya vei koya. 36A sa kaya; Apa, Tamaqu, sa rawarawa vei kemuni na ka kecega; ni kauta tani vei au na bilo oqo; ia me kakua ga ni vaka na lomaqu, me vaka ga na lomamuni. 37A sa baci lako tale mai, ka kunei ira ni ra sa moce tu, a sa kaya vei Pita, I Saimoni, ko sa moce, ne? ko sa sega ni rawata mo vakatawa ka dua bauga na aua, ne? 38Dou vakatawa ka masu, me kakua ni rawai kemudou na vere: e dina ga sa gu na yalo, ia na yago sa malumalumu.
39A sa lako tani tale ko koya, ka masu, ka sa cavuta tale na vosa ko ya. 40Ia ni sa lesu tale mai, sa kunei ira ni ra sa moce tiko, ni sa bibi na matadra, a ra sa sega ni kila e dua na ka me ra kaya vua.
41A sa lako vakatolu mai, a sa kaya vei ira, Dou qai moce ga, ka dou vakacegu; sa levu ga, sa yaco na gauna; raica, sa soli yani na Luve ni tamata ki na ligadra na tamata ca: 42tu cake, me da lako; raica, sa voleka mai ko koya sa soli au yani.
43Ia ni sa vosa tiko ko koya, sa lako sara mai ko Jutasa, e dua vei ira na le tinikarua, kei ira vata kaya e lewe vuqa sara era sa vakaiseleiwau ka vakaiwau, maivei ira na bete levu kei ira na vunivola kei ira na qase. 44Ia ko koya sa soli koya yani sa tukuna oti vei ira e dua nai vakatakilakila, ka kaya, O koya kau na reguca, sai koya; taura, ka kauta vakavinaka yani. 45Ia ni sa tadu ko koya, sa lako sara vua, a sa kaya, Vakavuvuli: a sa reguca. 46A ra sa qai tauri koya ka kauta yani.
47A sa dua vei ira sa tu voleka sa ucuna na nonai seleiwau, a sa yavita na nona tamata na bete levu, ka sa taya laivi na daligana.
48A sa tarogi ira ko Jisu, ka kaya, Dou sa lakova beka mai e dua na daubutako, ni dou sa vakaiseleiwau ka vakaiwau, mo dou tauri au? 49Au a tiko vata kei kemudou e na veisiga e na vale ni soro ka vakatavuvuli, ia dou a sega ni tauri au: ia nai Vola Tabu ena vakayacori ga. 50Sa qai biuti koya ko ira kecega, ka dro. 51A sa muri koya e dua na cauravou, a sa vakaitutuvi wale na yagona e nai tutuvi lineni; a ra sa tauri koya: 52a sa biuta nai tutuvi lineni ko koya, ka dro luvawale tani.
53A ra sa kauti Jisu vua na bete levu: a ra sa soqoni vata kaya ko ira kecega na bete levu kei ira na qase kei ira na vunivola.
54A sa muri koya vakayawa ko Pita, ka yaco sara ki na vale ni bete levu; a sa tiko sobu vata kei ira na ovisa, ka tatalai e na buka.
55Ia ko ira na bete levu, kei ira kecega na mataveilewai, era vakasaqara eso me ra beitaki Jisu, me mate kina ko koya; a ra sa sega ni kunea: 56ni ra sa lewe vuqa sa beitaka vakailasu, ia sa sega ni lako vata na nodrai tukutuku. 57Sa qai tu eso, a ratou sa beitaka vakailasu, ka kaya, 58Keitou sa rogoci koya ni sa kaya, Au na basuka na vale ni soro oqo sa caka ena liga, ia kau na tara e dua tale sa sega ni caka e na liga, e na bogi e tolu. 59A sa sega talega ni lako vata na nodratoui tukutuku. 60Sa qai tu cake na bete levu e na kedra maliwa, ka tarogi Jisu, ka kaya, Sa sega na ka ko kaya mai? a cava oqo eratou sa beitaki iko kina ko iratou oqo? 61A sa galu tu ga ko koya, ka sa sega na ka sa kaya. Sa tarogi koya tale na bete levu, ka kaya vua, O iko beka na Karisito, na Luve i Koya sa nona na vakarokoroko, se segai? 62A sa kaya ko Jisu, Oi au ga: ia dou na raica na Luve ni tamata ni sa tiko e na liga i matau i Koya sa kaukauwa, ni sa lako talega mai e na veio ni lomalagi.
63Sa qai dresulaka na nonai sulu na bete levu, ka kaya, Sa yaga vakacava me so tale nai vakadinadina? 64dou sa rogoca ga ni vosavakacacataki na Kalou; a cava dou lewa? A ra sa lewai koya kecega, ni sa dodonu me vakamatei. 65A ra sa qai ia eso me kasivita, ka tabonaka na matana, ka vaculaka, ka kaya vua, Tukuna mai se ko cei; a ra sa sabica ko ira na ovisa.
66Ia sa tiko e ra ko Pita e na rara ni vale, a sa lako mai e dua na vada ni bete levu; 67ia ni sa kunei Pita ni sa tatalai, sa vakaraici koya, ka kaya, Ko iko talega sa tiko vata kei Jisu na kai Nasareci. 68A sa cakitaka ko koya, ka kaya, Au sa sega ni kila, au sa lecava tu na ka ko sa kaya. A sa qai lako yani vaka ki na katuba; a sa tagi na toa. 69A sa raici koya tale na vada, a sa kaya vei ira sa tu voleka, Sa dua vei ira ko koya oqo. 70A sa cakitaka tale ko koya. A sa dede vakalailai ga, a ra sa kaya vei Pita ko ira sa tu voleka, Sa dina ga sa dua vei ira ko iko; ni ko sa kai Kalili. 71Sa qai vakatekivu ko koya me ruru ka bubului, ka vaka, Au sa sega ni kila na tamata oqo dou sa vosa kina. 72Sa qai tagi vakarua na toa. Sa qai nanuma ko Pita na vosa ka kaya vua ko Jisu, Ni sa sega ni tagi mada vakarua na toa, ko na cakitaki au vakatolu. Ia ni sa vakasama, sa tagi.
Currently Selected:
MARIKA 14: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
