MARIKA 15

Sa lewai Jisu ko Pailato, a sa sereki Parapa, a sa soli Jisu vei ira na tamata, 115. Era sa qai vakacacana, ka vakota ki na kauveilatai, 1641. Sa buluti Jisu ko Josefa, 4247.

1Ia e na mataka era sa qai bose vata ko ira na bete levu kei ira na qase kei ira na vunivola kei ira kece na mataveilewai, ka vesuki Jisu, ka kauta tani, ka solia vei Pailato.

2A sa tarogi koya ko Pailato, Ko sa nodra Tui na kai Jutia, se segai? A sa vosa ko koya, ka kaya vua, Ko sa kaya dina mai. 3A sa vuqa na ka era sa beitaki koya kina ko ira na bete levu. 4Sa qai tarogi koya tale ko Pailato, ka kaya, Ko sa sega ni kaya e dua na ka ne? raica na kena levu ni ka era sa beitaka vei iko. 5A sa sega na ka sa kaya ko Jisu; a sa kurabui kina ko Pailato.

6A sa dau nonai valavala e na solevu ko ya me sereka vei ira e dua na tamata vesu, ko koya era sa digitaka. 7A sa tiko e dua, na yacana ko Parapa, sa vesuki vata kei ira eso na tamata era sa ue, ka laba kina. 8A ra sa kaci tiko na lewe vuqa, ka vakamasuta me kitaka vei ira me vaka sa dau nonai valavala. 9A sa vosa vei ira ko Pailato, ka kaya, Dou sa vinakata meu sereka vei kemudou na nodra Tui na kai Jutia, se segai? 10ni sa kila ko koya era sa soli koya yani ko ira na bete levu ni ra sa vuvutaka.

11A ra sa vakauqeti ira na lewe vuqa ko ira na bete levu, me sereki Parapa ga vei ira ko koya. 12Sa qai vosa ko Pailato, ka kaya tale vei ira, A cava dou sa qai vinakata meu kitaka vua dou sa vakatoka me nodra Tui na kai Jutia? 13A ra sa qoqolou tale, Vakota ki na kauveilatai. 14Sa qai kaya vei ira ko Pailato, A cava na ka ca sa cakava ko koya? A ra sa qai qoqolou vakalevu cake, Vakota ki na kauveilatai.

15Ia ni sa vinakata ko Pailato me vakalomavinakataki ira na lewe vuqa, sa sereki Parapa vei ira, a sa soli Jisu yani, ni sa vakanakuitataka mada eliu, me vakoti ki na kauveilatai.

16A ra sa kauta tani ko ira na sotia ki na yasana ni vale ni turaga, ka vakasoqoni ira vata na mata sotia taucoko. 17A ra sa vakasulumi koya e nai sulu lokaloka, a ra sa talia e dua nai sala e na veiwa-vakavotona, ka vakaisalataki koya kina. 18A ra sa vakatekivu me kidavaka, Sa loloma, na nodra Tui na kai Jutia! 19A ra sa warolaka na uluna e na dua na gasau, a ra sa kasivita, ka tekiduru ka vakarokoroko vua. 20Ia ni ra sa vakalialia oti, era sa luvata vua nai sulu lokaloka, ka vakasuluma e na nonai sulu dina, ka kauta yani me ra vakota ki na kauveilatai.

21A sa dua na kai Kirini, ko Saimoni, a tamadrau ko Alekisada kei Rufo, ko koya sa lako tu, ni sa lako tiko mai vanua, a ra sa vakasaurarataki koya me colata na nona kauveilatai.

22A ra sa kauti koya ki na dua na yasana, ko Kolikoca, a kenai balebale, A vanua ni qavokavoka. 23A ra sa solia vua na waini sa veiwaki vata kei na mura me gunuva; a sa sega ni gunuva ko koya.

24Ia ni ra vakota ki na kauveilatai, era sa qai vota na nona veisulu, ni ra vakawiri madigi, me ra dui kila nodrai votavota.

25Ia sa kenai katolu ni aua, ni ra sa vakota ki na kauveilatai.

26A sa volai ecake na ka sa beitaki vua: A NODRA TUI NA KAI JUTIA.

27A ra sa vakota vata kaya ki na kauveilatai e lewe rua na daubutako; e dua e na ligana i matau, ka dua e na ligana i mawi. 28A sa vakayacori kina nai Vola Tabu, sa kaya, Sa wili vata kei ira na tamatai valavala ca ko koya.

29Ia ko ira sa lako voli, era sa vosavakacacataki koya, ni ra sa kuretaka na uludra, ka kaya, Drasa, ko iko sa basuka na vale ni soro, ka tara e na bogi e tolu, 30vakabulai iko mada, ka kevu sobu mai na kauveilatai. 31Sa vaka kina ko ira na bete levu, era sa vakalialia vakai ira, kei ira talega na vunivola, ka kaya, O koya sa dauvakabulai ira na tani; ia sa sega ni vakabulai koya rawa: 32me kevu sobu edaidai mai na kauveilatai na Karisito na nodra Tui na Isireli, me keimami raica ka vakabauta. Koi rau talega eratou a vakoti vata kaya ki na kauveilatai, erau sa vakalialiai koya.

33Ia ni sa yaco nai kaono ni aua, sa butobuto na vanua taucoko, ka yacova nai kaciwa ni aua.

34Ia e nai kaciwa ni aua sa kaci ko Jisu e na domo levu, ka kaya, Ilai, Ilai, lama sapakicani? a kenai balebale, Noqu Kalou, noqu Kalou, ko sa biuti au e na vuku ni cava? 35Ia ka so vei ira sa tu voleka, ni ra sa rogoca, era sa kaya, Raica, sa kacivi Ilaija ko koya. 36A sa cici e dua, ka tonisua e dua na vutovuto e na wai wiwi, ka vivia ki na dua na gasau, a sa vagunuvi koya, ka kaya, Laiva mada; me da raica se na lako mai ko Ilaija me kevutaki koya sobu mai, se segai.

37Ia ko Jisu, ni sa kaci e na domo levu, sa qai ciba yani.

38A sa sei rua nai lati ni vale ni soro mai na tikina ecake ka kauta ki ra.

39Ia ni sa raica na turaga ni valu, ko koya sa tu voleka ka donui koya, ni sa kaci vakaoqo ko koya, ka qai ciba yani, sa kaya, E dina ga sa Luve ni Kalou na tamata oqo.

40Eso talega na yalewa era sa vakaraica vakayawa; e dua vei ira ko Meri na yalewa ni Makitala, kei Meri na tinadrau ko Jemesa ka gone kei Josese, ko Salomi talega; 41eratou a daumuria, ka dauqarava, ni sa tiko mai Kalili ko koya; kei ira talega na yalewa e lewe vuqa era a lako vata kaya ki Jerusalemi.

42Ia ni sa yakavi mai, ni sa siga vakarau, na siga sa tarava na Siga ni Vakacecegu, 43sa lako mai ko Josefa, na kai Arimacea, a matanivanua, a sa dua vei ira na mataveilewai, a sa waraka na kena yaco na matanitu ni Kalou, a sa lako doudou vei Pailato, ka kerea na yago i Jisu. 44A sa kidacala ko Pailato ni sa mate ko koya; a sa kaciva na turaga ni valu, ka taroga se sa mate vakadede ko koya, se segai? 45Ia ni sa kila vua na turaga ni valu, sa solia na yagona vei Josefa: 46a sa volia ko koya e dua nai sole lineni, a sa kevutaki koya sobu, ka solega kina, a sa vakotora e na dua nai bulubulu sa ta e na vatu; a sa vaqiqica e dua na vatu ki na katuba ni bulubulu. 47A rau sa raica na yasana sa vakotori kina ko koya, koi rau ko Meri na yalewa ni Makitala kei Meri na tina i Josese.

Currently Selected:

MARIKA 15: FOV

Highlight

Copy