MARIKA 16

Sa tukuna vei iratou na yalewa e dua na agilose ni sa tu cake tale ko Jisu, 18. Sa qai rairai vei iratou eso ko Jisu, 914. Sa qai kaya me ia na lako ki na veivanua kecega me tukuni koya, 1520.

1Ia ni sa oti na siga ni vakacecegu, ko iratou ko Meri na yalewa ni Makitala, kei Meri na tina i Jemesa, kei Salomi, eratou sa volia na waiwai vakaisaluaki, me ratou laki lumuti koya. 2Ia e na mataka caca e nai matai ni siga ni wiki, eratou sa lako mai ki nai bulubulu ni sa qai cabe na siga. 3A ratou sa kaya vakai iratou, Ko cei ena vaqiqica tani na vatu e na vukuda mai na katuba ni bulubulu? 4Ia ni ratou sa raica, eratou sa kunea ni sa vaqiqici tani na vatu: ni sa vatu levu sara.

5Ia ni ratou sa curu ki nai bulubulu, eratou sa kunea e dua na cauravou sa tiko e na tikina i matau, sa vakaisulu e nai sulu balavu ka vulavula; a ratou sa rere. 6A sa kaya vei iratou ko koya, Dou kakua ni rere: dou sa vakasaqarai Jisu na kai Nasareci, ko koya ka lauvako ki na kauveilatai: sa tu cake tale ko koya: sa sega eke: raica na tikina era a vakotora kina! 7ia dou lako, tukuna vei ira na nona tisaipeli, vei Pita talega, ni sa liutaki kemudou ko koya ki Kalili; dou na raici koya kina, me vaka na nona vosa vei kemudou. 8A ratou sa lako kusarawa yani, ka dro mai nai bulubulu; ia eratou sa sautaninini ka kidroa; eratou sa sega talega ni kaya e dua na ka vua e dua; ni ratou sa rere.

9Ia ni sa tu cake tale ko koya e na mataka lailai e nai matai ni siga ni wiki, sa rairai eliu ko koya vei Meri na yalewa ni Makitala, ko koya ka vakaseva tani vua ko koya e lewe vitu na tevoro. 10Sa qai lako ko koya ka tukuna vei ira era dautiko vata kaya eliu, ni ra sa rarawa ka tagi. 11Ia ko ira, ni ra sa rogoca sa bula ko koya ka sa rairai vei koya, era sa sega ni vakadinata. 12Sa qai rairai ko koya ia sa dua tani na yagona ki na lewe rua vei ira, ni rau sa lako tiko ki na dua na yasana ki vanua: 13a rau sa lako ka tukuna vei ira sa vo; a ra sa sega talega ni vakadinati rau.

14Sa oti, sa rairai ko koya vei ira na lewe tinikadua ni ra sa kana tiko, a sa vunauci ira e na vuku ni nodra sega ni vakabauta kei na nodra lomakaukauwa, ni ra sa sega ni vakadinati iratou eratou sa raici koya ni sa tu cake tale.

15A sa kaya vei ira, Dou lako yani ki vuravura taucoko, ka vunautaka nai tukutuku-vinaka kivei ira na tamata kecega. 16O koya sa vakabauta ka sa papitaisotaki ena bula: ia ena cudruvi ga ko koya sa sega ni vakabauta. 17Ia na veivakatakilakila oqo era na cakava ko ira sa vakabauta: Era na vakaseva tani na tevoro eso e na yacaqu; era na vosataka na vosa ni veivanua tani; 18era na tomika na gata eso; ia kevaka era gunuva na ka e gaga sara, era na sega ni ca kina; era na tabaki ira talega sa tauvi-mate e na ligadra, a ra na bula kina. 19Ia ni sa vosa oti vei ira na Turaga ko Jisu, sa kau cake ki lomalagi, ka sa tiko sobu e na liga i matau ni Kalou.

20Ia ko ira, era sa lako yani, ka vunau e na veiyasana kecega, a sa cakacaka vata kei ira na Turaga, a sa vakadinadinataka na vosa e na veivakatakilakila sa muri. Emeni.

Currently Selected:

MARIKA 16: FOV

Highlight

Copy