MARIKA 12

Sa vunauci ira na kai Jutia ko Jisu, ni ra sa bese ni muria na vosa ni Kalou, 112. Sa vakavulici ira me ra solia na ka e dodonu vei Sisa, vua talega na Kalou, 1317. Sa vakavulici ira nai tokani i Setoki, kei ira na vunivola, 1840. Sa doka na yada sa solia na nonai yau kece, 4144.

1A sa vakatekivu ko koya me kaya vei ira e na vosa vakatautauvata, Sa dua na tamata sa tea e dua na were-ni-vaini, a sa viribaita vakavolivolita, a sa kelia na keli-ni-waini, a sa tara na nodra vale nai vakatawa, a sa lisitaka vei ira eso nai vakatau-ni-were, a sa qai lako ki na vanua tani. 2Ia ni sa yaco na kena gauna sa tala ko koya e dua na tamata vei ira nai vakatau-ni-were, me kauta maivei ira nai vakatau-ni-were eso na vua ni were-ni-vaini. 3A ra sa taura, ka yaviti koya, ka vakatala tani wale. 4Sa qai tala tale vei ira ko koya e dua na tamata tani; a ra sa vakamavoataka na uluna, ka vakacacana vakalevu. 5A sa tala tale ko koya e dua tani; a ra sa vakamatei koya, kei ira na lewe vuqa tani; eso era sa yavita, ka so era sa vakamatea. 6A sa vo ga e dua bauga na luvena, na nona gone ni toko, a sa talai koya talega emuri vei ira, ka kaya, Era na vakarokorokotaka na luvequ. 7Ia ko ira nai vakatau-ni-were ko ya era sa kaya vakai ira, O koya oqo nai taukei emuri; tou mai vakamatea, ena qai noda ga na were-ni-vaini. 8A ra sa taura, ka vakamatea, ka biuta ki taudaku ni were-ni-vaini. 9A cava beka ena qai kitaka na turaga ni were-ni-vaini? ena lako ga mai ka vakamatei ira nai vakatau-ni-were, ka solia na were-ni-vaini vei ira na tani. 10Dou sa sega beka ni wilika na tiki ni Vola Tabu oqo: A vatu era sa cata ko ira na matai ni vale, Sa yaco me kenai vakadei e na tutu-ni-vale: 11Oqo na cakacaka i Jiova, A sa ka e veivakurabuitaki vei keda?

12A ra sa via tauri koya, ka ra sa rerevaki ira na lewe vuqa; ni ra sa kila sa vosataki ira ko koya e na vosa vakatautauvata ko ya; a ra sa qai biuti koya, ka lako yani.

13A ra sa tala vua eso na Farisi, kei nai tokani i Eroti, me ra coriti koya e na nona vosa. 14Ia ni ra sa yaco mai, era sa kaya vua, Vakavuvuli, keitou sa kila ko sa dina ga, ka sa sega ni rerevaka e dua; ni ko sa sega ni doka na matadra na tamata, ia ko sa vakatavuvulitaka vakaidina ga nai valavala sa vinaka vua na Kalou: sa tara me da soli ka ni matanitu vei Sisa, se segai? 15me da solia, se me da kakua ni solia? Ia sa kila ko koya na nodrai lawaki, a sa kaya vei ira, Dou sa dauveretaki au e na vuku ni cava? kauta mai vei au e dua na pene, meu raica. 16A ra sa kauta mai. A sa tarogi ira ko koya, A mata i cei oqo, kei na yaca i cei sa volai tu? A ra kaya vua, A nei Sisa. 17Sa qai kaya vei ira ko Jisu, Mo dou solia vei Sisa na ka sa nei Sisa, vei koya talega na Kalou na ka sa nona na Kalou. A ra sa kurabuitaki koya.

18Era sa qai lako mai vei koya eso nai tokani i Setoki, ko ira era sa daukaya ena sega ni tu cake tale na mate: a ra sa taroga, ka kaya, 19Vakavuvuli, sa vola vei keda ko Mosese, Kevaka sa dua na tamata sa mate na tuakana se tacina, ka biuta na watina, ka sega na luvena, me rau qai veiwatini kei na nona yada na tacina se tuakana, me vakaivakawa kina vua na tuakana se tacina. 20Sa tiko na mataveitacini eratou lewe vitu: a sa vakawati ko koya sa qase, a sa mate, ka sega na luvena: 21erau sa qai veiwatini kaya nai karua, a sa mate ga, ka sega na luvena: sa vaka talega kina nai katolu: 22ia eratou sa veiwatini kaya ko iratou na lewe vitu, ka sega na luvedratou: sa qai mate talega emuri na yalewa: 23ia ni sa tu cake tale na mate, ena wati i cei vei iratou ko koya? ni ratou sa curuma ko iratou na lewe vitu.

24A sa vosa ko Jisu, ka kaya vei ira, Sa sega li ni vu ni nomudou sese oqo, ni dou sa sega ni kila nai Vola Tabu, se na kaukauwa ni Kalou? 25Ni ra na tu cake tale mai na mate, era na sega ni vakawati, se veimusumusukitaki me ra vakawati; era na vakataki ira na agilose mai lomalagi. 26Ia ni ra na tu cake tale na mate, dou sa sega li ni wilika e nai vola i Mosese, ni sa vosa na Kalou vei koya, mai na kau, ka kaya, Oi au na Kalou i Eparaama, kei na Kalou i Aisake, kei na Kalou i Jekope? 27Ia sa sega ni nodra Kalou na mate ko koya, a nodra Kalou ga era sa bula tiko: dou sa sese vakalevu kina.

28Ka sa dua na vunivola, ni sa rogoca na nodra veileti, a sa kunea ni sa vosa vakavuku vei ira ko koya, sa qai lako mai ka tarogi koya, Ai vakaro cava sa kenai matai e nai vakaro kecega? 29A sa kaya vua ko Jisu, Sai matai ni vakaro kecega, Mo rogoca, na Isireli: O Jiova na noda Kalou Ko Jiova sa dua bau: 30ia mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece. 31Na kenai karua oqo, Mo lomana na kai nomu me vaka ko sa lomani iko. Sa sega e dua nai vakaro sa uasivi e nai vakaro ruarua oqo.

32A sa kaya vei koya na vunivola, E vinaka, Vakavuvuli, ko sa kaya dina ni sa dua bauga na Kalou; a sa sega tale e dua me rau le rua kaya; 33ia me da lomani koya e na lomada taucoko, kei na noda vakasama kece, kei na yaloda taucoko, kei na noda kaukauwa kece, ka me lomana na kai noda me vaka eda lomani keda, oqo na ka levu, ia na ka lailai nai soro kama kecega, kei nai soro kecega. 34Ia ni sa raica ko Jisu ni sa vosa vakavuku ko koya, sa kaya vua, O sa sega ni yawa ki na matanitu ni Kalou. A sa sega e dua sa doudou emuri me vakatarogi koya.

35A sa vosa ko Jisu ni sa vakatavuvuli tiko e na vale ni soro, ka kaya, Sa vakaevei ni ra kaya ko ira na vunivola sa luve i Tevita na Karisito? 36Ni sa kaya ko Tevita, ka sa vuna na Yalo Tabu, Sa kaya ko Jiova vua na noqu Turaga, Mo tiko e na ligaqu i matau, Meu vakamalumalumutaki ira mada na nomu meca me ra sai tutu-ni-yavamu.

37Sa vakatokai koya ko Tevita me Turaga; sa qai luvena vakaevei? A ra sa lewe vuqa vei ira na tamata, sa vinakata me ra rogoci koya.

38A sa kaya vei ira e na nonai vakavuvuli, Dou qarauni kemudou maivei ira na vunivola, era sa vinakata me ra lako voli e nai sulu balabalavu, kei na veikidavaki e na rara ni veivoli, 39kei nai tikotiko ni qase e na veivale ni lotu, kei nai tikotiko vakaturaga e na kana magiti; 40era sa kovea na nodrai yau na yada, a ra masu vakabalavu tiko me veivakaisini; ko ira oqo era na cudruvi vakalevu.

41A sa tiko ko Jisu e na yasana sa donuya na kato ni lavo, a sa raici ira na lewe levu ni ra sa biuta nai lavo ki na kato ni lavo: ka lewe vuqa era sa vutuniyau era sa biuta vakalevu. 42A sa lako mai e dua na yada dravudravua, a sa biuta kina e rua nai lavo lalai sara, sa rauta e dua na facigi. 43A sa kacivi ira na nona tisaipeli ko koya, ka kaya vei ira, Au sa kaya vakaidina vei kemudou, Na yada dravudravua oqo sa biuta vakalevu ki na kato ni lavo, ko ira kecega era sa biuta vakalailai ga: 44ni ra sa biuta kina eso ko ira kecega mai na nodra ka e vuqa: ia ko koya oqo, sa dravudravua, ka sa biuta na nona ka kecega, io na nona ka kece e bula kina.

Currently Selected:

MARIKA 12: FOV

Highlight

Copy