MARIKA 11

Sa vodoka na asa ko Jisu, ka lako ki Jerusalemi, 111. Sa lewa me ca na vu ni lolo sa sega ni vua, 1214. Sa vakasevi ira era sa veivoli e na vale ni soro, 1519. Sa vakavulici ira na nona tisaipeli me ra masu e na vakabauta, kei na yalo e loloma, 2026. Sa veileti kei ira na Farisi, 2733.

1Ia ni ra sa toro voleka ki Jerusalemi, ki Pecifaki kei Pecani, e na ulu-ni-vanua ni veiolive, sa tala ko koya e lewe rua na nona tisaipeli, 2a sa kaya vei rau, Drau lako ki na koro lailai sa donui kemudrau: ia ni drau sa curu kina, drau na kunea sara e dua na luve ni asa sa noka tu, sa sega ni vodoka e dua na tamata; drau sereka, ka kauta mai. 3Ia kevaka sa dua e kaya vei kemudrau, Drau sa kitaka oqo e na vuku ni cava? drau kaya sa yaga vua na Turaga; ena qai talai koya sara mai kike.

4A rau sa lako, ka kunea na luve ni asa, sa noka tu e na mata ni katuba e na tikina sa sota vata kina e rua na sala; a rau sa sereka. 5Ia ka so vei ira era sa tu kina, era sa kaya vei rau, A cava drau sa sereka kina na luve ni asa? 6A rau sa kaya vei ira me vaka ka vakarota ko Jisu: a ra sa qai laivi rau me lako. 7A rau sa kauta na luve ni asa vei Jisu, ka tevuka kina na nodraui sulu, a sa vodoka ko koya,

8A ra sa lewe vuqa era sa tevuka na nodrai sulu e na gau-ni-sala: ka so tale era tamusuka eso na taba ni kau, ka biuta e na gau-ni-sala. 9Ia ko ira sa liu, kei ira sa muri, era sa kaci, ka kaya, Osana! sa kalougata ko koya sa lako mai e na yaca ni Turaga! 10sa kalougata na matanitu nei Tevita na noda qase, ko koya sa yaco mai! Osana kicake sara!

11A sa curu ko koya ki Jerusalemi, ki na vale ni soro talega: ia ni sa vakaraica voli na ka kecega, a sa qai yakavi mai, sa lako yani ko koya ki Pecani, kei ira na lewe tinikarua.

12Ia e na sabogibogi, ni ra sa lako mai Pecani, sa viakana ko koya: 13ia ni sa raica vakayawa e dua na vu ni lolo sa vakadrauna, sa lako, de kunea kina e dua na ka: ia ni sa yaco kina, sa sega ni kunea e dua na ka, a drauna walega; ni sa sega ni yaco na vula i lolo. 14A sa vosa ko Jisu, ka kaya kina, Me kakua na vuamu e kani emuri ka sega ni mudu. A ra sa rogoca na nona tisaipeli.

15A ra sa yaco ki Jerusalemi: a sa curu ki na vale ni soro ko Jisu, ka vakatekivu me vakasevi ira tani kina era sa veivoli e na vale ni soro; sa vukica talega na nodra tepeli era sa veisau i lavo, kei na nodra veitikotiko era volitaki ruve; 16a sa sega ni laiva e dua me colata e dua na ka e loma ni vale ni soro. 17A sa vakavulici ira, ka kaya, Sa sega li ni volai, A noqu vale ena vakatokai me nodra vale ni masu, na veimatanitu kecega? ia dou sa cakava me nodra qara na daubutako.

18A ra sa rogoca ko ira na vunivola kei ira na bete levu, a ra sa segata me ra vakamatei koya: ni ra sa rerevaka, ni ra sa kurabui ko ira kecega na lewe vuqa e na nonai vakavuvuli.

19Ia e na veiyakavi, sa lako tani e na koro ko koya.

20Ia e na mataka, ni ra sa lako voli, era sa raica sa malai sara mai na wakana na vu ni lolo. 21Ia ni sa nanuma ko Pita, sa kaya vei koya, Vakavuvuli, raica, na lolo ko sa lewa me ca sa malai sara. 22A sa kaya vei ira ko Jisu, Dou vakadinata na Kalou. 23Niu sa kaya vakaidina vei kemudou, Kevaka sa dua e kaya ki na ulu-ni-vanua oqo, Mo cavu tani, ka biu ki na wasaliwa, ia ka sega ni vakatitiqa na yalona, a sa vakadinata ga ni na yaco na ka sa kaya; ena rawata na ka kecega sa kaya ko koya. 24O koya oqo kau sa kaya kina vei kemudou, A ka kecega dou sa kerea, ni dou sa masu, dou vakadinata ni dou sa rawata, ena qai nomudou ga. 25Ia ni dou sa tu me masu, kakua ni cudruvi koya sa cala vei kemudou; me kakua talega ni cudruvi kemudou e na vuku ni nomudoui valavala ca na Tamamudou sa tiko mai lomalagi. 26Ia kevaka dou sa cudruva ga, ena sega talega ni bokoca na nomudoui valavala ca na Tamamudou sa tiko mai lomalagi.

27A ra sa lako tale mai ki Jerusalemi: ia ni sa lako voli ko koya e na vale ni soro, sa lako mai vua ko ira na bete levu, kei ira na vunivola, kei ira na qase, 28a ra sa kaya vua, Ko sa lesi maivei mo cakava na veika oqo? ia ko cei sa solia vei iko nai lesilesi oqo mo cakava kina na veika oqo?

29A sa vosa ko Jisu, ka kaya vei ira, Au na tarogi kemudou talega e na dua na ka, ia dou tukuna vei au; au na qai tukuna talega vei kemudou se kau sa lesi maivei meu cakava na veika oqo: 30A papitaiso i Joni, sa ka mai lomalagi, se ka mai na tamata? tukuna mai vei au. 31A ra sa veivosakitaka vakai ira, ka kaya, Kevaka eda na kaya, Sa vu mai lomalagi; ena qai kaya ko koya, Ia dou a sega ni vakadinati koya e na vuku ni cava? 32Ia kevaka eda na kaya, sa vu mai na tamata; era sa rerevaki ira na tamata; ni ra sa vakasama kecega sa parofita dina ko Joni. 33A ra sa vosa, ka kaya vei Jisu, Keitou sa sega ni kila. Sa qai vosa ko Jisu, ka kaya vei ira, Au na sega talega ni tukuna vei kemudou se kau sa lesi maivei meu cakava na veika oqo.

Currently Selected:

MARIKA 11: FOV

Highlight

Copy