Táre-woo-ŋa 17
17
1Kpólo kpala miɛɛ lii-see su lɛ̂lɛɛi é tɛ́ɛ kúu kɛ́ɛ ma ípɛrɛi mu ƃɛ́i laa-saa káa naai.
2Táre-luɛ a pâi kɛ̂i bɛ́rɛ namui ǹóŋ mɛi nyii táre fé ŋuŋ sui. A pâi kɛ̂i a bɔɔ-sɛŋ ǹâmu da.
3Da káne da gôo kɔ̀ɔŋ ŋɔŋ su, kɛ́lɛ Ɣâla Yâwɛɛ ƃa núu líi su kɔ̀ɔŋ.
4Ŋwana lɔ̂ɔ-nuu a ŋ̀óli tɔ̀ɔ ŋwana lɔ̂ɔ-woo ma, lɛ́ɛ-nuu kɛ́ ŋ̀óli tɔ̀ɔ lɛ́ɛ-woo ma.
5Ǹúui a ɣɛ́lɛ-maa kùla kôlo-nuu kponôi, a Ŋɔkpɛtɛ-nuui ƃɛlɛ tôo. Ǹúui ǹíi a nɛ̃ɛ m̀arâŋ-nuu ŋɔmɛni sôli káa sui, a tɔŋ-kpɛ-maa sɔlɔ ƃô.
6Ǹúu pɔ̂lɔ-ŋai dílii-nɛ̃ɛi ƃa dílônii díwɔ̂ lônii. Dílônii dia máŋ dílii-nɛ̃ɛi ƃa díkaa-ƃela.
7Gáa a mɛni kuláa a núu a gɛɛ ƃoo-nuu é táre-woo ƃó, gúlaa a núu a kâloŋ é lɛ́ɛ kɛ́.
8Yee-pɛlɛ ǹá sɛŋ-kao káa yɛ̂ɛ sále dɛɛ-nuu ŋɛ́i, a gàa yɛ̂ɛ ƃɛ́i kélee a lî naai, a pɔ̂ri sɛŋ sɔlɔ ƃôi.
9Ǹúui a m̀arâŋ-nuu ŋɔsɔnyɔ̂ŋ su-mɛni lɛ̀ɛi, a nɛ̃ɛ-laa su kpànaŋ, kɛ́lɛ ǹúui a m̀arâŋ-nuu ŋɔmɛni nyɔ́mɔɔi tàa-taai, a nɛ̃ɛ-laa su kàra.
10Lia-woo tɔnɔ a kpɔŋ-maa tɛ̀ɛ táre-nuu pɔ́ é tɛ́ɛ la ƃoo-nuu lókwaa ma a ŋuŋ tɔ̂nɔ.
11Ŋwana-lɔ̂ɔ-nuu ŋɔtíi ƃa tɔɔ-maa kɛ́ɛ, kɛ́lɛ da pâi kéla ŋwana-lɔɔ tɛɛ̂i a gɛɛ é gula maa kɛ́.
12Núu da yala-sulu kɔ̃ɔ-lee nyii da ǹônii kùla yêei, díkɔ̃yaŋɔɔ lɛ̂lɛɛi é tɛ́ɛ la ƃoo-nuu da núu díkɔ̃yaŋɔɔ ma gɛ́ ƃoo-tua kɛ̀.
13Ƃa mɛni lɛ́lɛɛ su tòo a mɛni nyɔ́mɔɔ, mɛni nyɔ́mɔɔ fa kpɛ̀ɛ ípɛrɛi mu.
14Laa-saa kɔ́ɔ pîlanii káa yɛ̂ɛ yá a ya-gaaŋ ƃɔ̀ a guro, gbera, à wàla kɛ̀ tí, zu a kɛ̂tɛ.
15Ɣâla Yâwɛɛ fa ǹyée sèe mɛni ŋá-tee-nuui mu nyii a tɔ̃yâ-nuu ŋɔmɛni lɛ́lɛɛ pène a mɛni nyɔ́mɔɔi, kpaa máŋ é wôya-nuu ŋɔmɛni nyɔ́mɔɔi pene a mɛni lɛ́lɛɛ.
16Gáa a ƃoo mɛ̂ni a gɛɛ í sɛŋ kɔ́lɛ ƃoo-nuu ŋɔsɛŋ kɔ́lɔŋ mɛni ma kpɛ́ni fêi táre fé ŋuŋ su.
17Núu ŋɔnɛ̃ɛ-nuu ŋɔtíi ƃa a gɛɛ é ŋɔwɛli-kɛ-maai lɛ́ a tãi kélee. Káa-laa su-ƃela dítii ƃa a gɛɛ dí díkîe-ni kula mɛnîi.
18Ǹúui táre fé ŋuŋ sui, a gbîŋ sèe a sɛ́ɣɛ núu da kpɛ́ni ŋɔkpâi mɛ̂ni ma.
19Sɔnyɔ̂ŋ-nuu è laa-saa wɛli-ni. Yoŋka-nuu wóo a pâ a mɛni kpɔ̂lu bɔ́.
20Wôya-nuu ŋɔmɛni fa lɛ̂lɛ. Lɛ́ɛ-nuu a pîli mɛni kpɔ̂lu su.
21Ƃoo lôloŋ a gáa-ƃela líi sòli, ǹâŋ líi fa nɛ̃ɛ.
22Lii-nɛ̃ɛ a pâ a kɔlɔi-pono, kɛ́lɛ lii-too pôlu a núu kpàla.
23Wôya mɛni-saa ƃó nuu a ǹyée sèe yee-pɛlɛ-ǹá-sɛŋ-kao mu a gɛɛ é dɔ̃yâi perêi kpáaŋ.
24Mɛni-ŋa-kaa-nuu a gíli pù táre ma, kɛ́lɛ ƃoo-nuu ŋɛ́i tâmaai ma.
25Ƃoo lôloŋ a ǹâŋ líi su kàra, gɛ́ ǹee líi tòo pôlu.
26Vé lɛ́lɛ ní a gɛɛ tɔ̃yâ-nuu é tɔŋ-kpɛ-maa sɛŋ-kao kɔlɛ, kpaa máŋ dí ǹókwa m̀ɛnii ma nyii zɔŋ fê zui.
27Táre-nuu fa lôno a dámaa. Mɛni-ŋa-kaa nuu líi fa ŋwâna a maa félaa.
28À kɛ̀ ƃoo-nuu à mɛi sâa, da zìɣe a táre-nuu da mɛni-ŋa-kaa-nuu.
Currently Selected:
Táre-woo-ŋa 17: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
