Popular Bible Verses from Táre-woo-ŋa 17

Share

Núu ŋɔnɛ̃ɛ-nuu ŋɔtíi ƃa a gɛɛ é ŋɔwɛli-kɛ-maai lɛ́ a tãi kélee. Káa-laa su-ƃela dítii ƃa a gɛɛ dí díkîe-ni kula mɛnîi.

Lii-nɛ̃ɛ a pâ a kɔlɔi-pono, kɛ́lɛ lii-too pôlu a núu kpàla.

Ǹúui a m̀arâŋ-nuu ŋɔsɔnyɔ̂ŋ su-mɛni lɛ̀ɛi, a nɛ̃ɛ-laa su kpànaŋ, kɛ́lɛ ǹúui a m̀arâŋ-nuu ŋɔmɛni nyɔ́mɔɔi tàa-taai, a nɛ̃ɛ-laa su kàra.

Táre-nuu fa lôno a dámaa. Mɛni-ŋa-kaa nuu líi fa ŋwâna a maa félaa.

À kɛ̀ ƃoo-nuu à mɛi sâa, da zìɣe a táre-nuu da mɛni-ŋa-kaa-nuu.

Kpólo kpala miɛɛ lii-see su lɛ̂lɛɛi é tɛ́ɛ kúu kɛ́ɛ ma ípɛrɛi mu ƃɛ́i laa-saa káa naai.

Laa-saa kɔ́ɔ pîlanii káa yɛ̂ɛ yá a ya-gaaŋ ƃɔ̀ a guro, gbera, à wàla kɛ̀ tí, zu a kɛ̂tɛ.

Ɣâla Yâwɛɛ fa ǹyée sèe mɛni ŋá-tee-nuui mu nyii a tɔ̃yâ-nuu ŋɔmɛni lɛ́lɛɛ pène a mɛni nyɔ́mɔɔi, kpaa máŋ é wôya-nuu ŋɔmɛni nyɔ́mɔɔi pene a mɛni lɛ́lɛɛ.