Táre-woo-ŋa 16
16
1Núu-kpune ŋɔmɛni-kpɛtɛɛ a kûla ǹíi su, kɛ́lɛ Ɣâla Yâwɛɛ ƃa ŋɔmɛni gbɛɛ-ŋai kpɛtɛ-nuu.
2Núu-kpune tûa-pere kélee lɛ̂lɛɛi gbîŋ ŋ̀ɛ́i, kɛ́lɛ Ɣâla Yâwɛɛ è mɛnii kpîŋ kɔ́lɔŋ ǹíi sui.
3Ítii-ŋai kélee tɛ́ɛ Ɣâla Yâwɛɛ pɔ́, gɛ̀ ní ǹáa a pâi kulâi.
4Ɣâla Yâwɛɛ ŋɔmɛni-kpɛtɛɛi kélee ŋuŋ káa ma. Ŋwana-lɔ̂ɔ-nuu káa naa mɛni ŋá-tee mɛni ma.
5Ɣâla Yâwɛɛ ŋɛ́i seɛɛ̂i tɛ-ŋɛi kɛ́-nuu ma, vé pâi pûi ŋɔtɔ̂ŋ-kpɛ-maai yêei.
6Ɣâla Yâwɛɛ a laa-la-nuu da tɔ̃yâ-tua kɛ́-nuu dísɔnyɔ̂ŋ su-mɛni lɛ̀ɛ. Núu a yào Ɣâla Yâwɛɛ ma, a ǹyée kùla sɔnyɔ̂ŋ su.
7Ɣâla Yâwɛɛ líi à làa ítûa-pere su, a gɛ̀ ka íkpɔara-ƃelai ká kɛ́ kákîe ma lii-see su.
8Sɛŋ-loŋ sɔlɔ ƃóɔɔ tɔ̃yâ-pere su lɛ̂lɛɛi é tɛ́ɛ gɛ́tɛ sɔlɔ ƃóɔɔ ma wôya-pere su.
9Núu ŋɔmɛni-kpɛtɛɛ a kûla ǹíi su, kɛ́lɛ Ɣâla Yâwɛɛ ƃa déniŋ tɔ̀ɔ a berei é sía lai.
10Kâloŋ-ŋa da lôno a wála-wala-laa. Da mɛni ŋá tèe a zã́a.
11Ɣâla Yâwɛɛ a ŋ̀wɛ̂lii a gɛɛ kúsɛŋ kɔ̂ɔŋɔɔi kélee é kɛ́ a zã́a kú tela gɔ̀lɛ a teniŋ ƃô-pere.
12Kâloŋ fé wôya wɛli ní, kpɛ́ni fêi, tɔ̃yâ-laa ƃa kâloŋ-laa kpànaŋ.
13Tɔ̃yâ ƃóɔɔ a kâloŋ líi làa, gɛ́ ƃò a tɔ̃yâ-nuu wɛliɛ.
14Kâloŋ ŋɔlii-ŋwanai a pâ a saa, táre-nuu a gɛ̀ kâloŋ líi ŋá é yèŋ.
15Kâloŋ ŋɛ́i ponoɔ a pâ a fúlu-laa. Ŋɔkpɔŋ-maai káa yɛ̂ɛ ɣele-kɔlɔŋ nyii a pâ a tuna a fólo láa ƃóɔɔi.
16Táre sɔlɔ ƃóɔɔ lɛ̂lɛɛi é tɛ́ɛ gôo ma. Mɛni-ŋa-kaa lɛ́lɛɛ é tɛ́ɛ káne sɔlɔ ƃóɔɔ ma.
17Tɔ̃yâ-nuu a bôlu tɔ̀ɔ sɔnyɔ̂ŋ m̀a. Ǹúui a zia pere maa kpɛ̂ɛi, a ŋɔfúlu-laai lâai kɛ̀.
18Su-mɛni kɛ̂tɛ a núu su-kara. Ŋɛ́i-naɣiŋ-mɛi a gɛ̀ núu é tóo.
19Ǹɛ̂lɛɛi a gɛɛ núu é kɛ́ a maa-yeŋɔɔ, gôloɔɔ é tɛ́ɛ la núu kɛ́ɛ é tɔɔ-laa sɔlɔ ƃó wôya-pere su.
20Ǹúui a ŋ̀óli tɔ̀ɔ táre sɛŋ-lɛɛ-mai, a mɛni lɛ́lɛɛ sɔlɔ ƃô. Lûwa káa ǹúui ma ǹâai a Ɣâla Yâwɛɛ.
21Da táre-nuu tòli a mɛni-ŋa-kaa-nuu, wòo-lɛ́lɛ ǹá-woo a núu líi mù sìɣe.
22Táre káa yɛ̂ɛ fúlu-laa ya-toŋ táre-nuu mɛni ma, kɛ́lɛ da ƃoo-nuu kula maa kɛ́ ŋɔƃoo-tuai mɛ̂ni ma.
23Táre-nuu a gíli-ŋa sìa é lɛ́ɛ pâi lônoi, maa wôoi a núu líi mu sìɣe.
24Wóo lɛ́lɛɛ káa yɛ̂ɛ kɔ̃́iŋ-wulɔ, a lâa núu líi ma gɛ́ núu ƃàlo.
25Berei nyii ílâai la ǹɛ̂lɛɛi íkili ŋái, a lî a yá su-kara-pere su.
26Puru a gɛ̀ núu é tíi kɛ́ a gbanaŋɔɔ kpɛ́ni fêi a ŋ̀wɛ̂lii é mii-sɛŋ mii.
27Ŋwana-lɔ̂ɔ-nuu a mɛni nyɔ́mɔɔ kpɛ̀tɛ ǹíi su, ǹyaŋ ǹóno-woo káa yɛ̂ɛ ŋɔŋ.
28Ŋwana-lɔ̂ɔ-nuu a laa-saa tèe, láa-ƃo kɛ́-nuu laoi-laa su kàra.
29Ŋwana-lɔ̂ɔ-nuu a ŋɔkɔlɛ-ma-nuui pɛ̂lɛ é pá a su-kara bɔ́.
30Ŋɛ́i-gbana-too-nuu a mɛni nyɔ́mɔɔ kpɛ̀tɛ ǹíi su. Ǹúui a ǹá-gbɔ ma nyîŋ a m̀arâŋ-nuui, a núu láa ƃò bôlu.
31Ŋuŋ-poa káa a ƃaa-kɛ-maa ƃɔrɔ, núu a zɔlɔ ƃô teniŋ ƃô-laa sârai.
32Lii-kpele lɛ̂lɛɛi é tɛ́ɛ wála-wala-laa ma. Ǹúui a ǹíi maa sòŋ ǹɛ́lɛɛi é tɛ́ɛ ǹúui ma a taa yée mɛi ɣâlei.
33Núu-kpune a kpɛɛŋ tôo a gɛɛ é táre mɛni da su, kɛ́lɛ a nɛ̃ɛ yɛ̂ɛ berei Ɣâla a ŋ̀wɛ̂lii lai.
Currently Selected:
Táre-woo-ŋa 16: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
