Táre-woo-ŋa 15
15
1Lóno lɛ́lɛɛ a lii-ŋwana kpèra, kɛ́lɛ lóno nyɔ́mɔɔ a núu ŋɛ́i tɛ̀.
2Táre-nuu wóo a núu kíli kùla a gɛɛ é ŋ̀óli tɔ́ɔ a gɛɛ é ŋ̀óo dámaa mɛ́ni, kɛ́lɛ ƃoo-nuu woo káa nɔ́ kpɛ́ni-kpɛni.
3Ɣâla Yâwɛɛ a kúmɛni-ŋai kélee kàa, kúmɛni nyɔ́mɔɔ-ŋai da kúmɛni lɛ́lɛɛ-ŋai.
4Ŋanɛ̂nɛ-woo a pâ a ƃalo-laa, kɛ́lɛ ŋwana-lɔ̂ɔ-woo a núu líi su kàra.
5Ƃoo-loloŋ a ŋ̀ɛ́i nàɣiŋ ǹâŋ ŋɔsɛŋ-lɛɛi mɛi, kɛ́lɛ táre-nuu a lia-woo mɛ̀ni.
6Tɔ̃yâ-nuu ŋɔpɛ́rɛi mu-sɛŋ tâmaai, kɛ́lɛ ŋwana-lɔ̂ɔ-nuu kɔ̃liŋ su a pâi karâi.
7Táre-nuu a lia-woo lɛ́lɛɛ kɛ̀, kɛ́lɛ lia-woo lɛ́lɛɛ fé ƃoo-nuu lá.
8Ŋwana-lɔ̂ɔ-nuu ŋɔsâla-sãai ƃɛlɛ kpɛɛ̂i Ɣâla Yâwɛɛ koi, kɛ́lɛ tɔ̃yâ-nuu ŋɔɣâla-fɛli-wooi a ǹíi làa.
9Ɣâla Yâwɛɛ a ŋwana-lɔ̂ɔ-nuu tûa-pere kpɔ̀ara, kɛ́lɛ è tɔ̃yâ-nuu tûa-pere wɛ́li ni.
10Ǹúui a kûla dɔ̃yâ-perei mai, a tɔŋ-kpɛ-maa kɛ́tɛ sɔlɔ ƃô. Ǹúui va ŋwɛ̀li dí ŋɔpɔara-mai lɛ́ mai, a pâi saâi.
11À kɛ̀ Ɣâla Yâwɛɛ è saa-taa da m̀ɔlɔ̂ŋ su-mɛni-ŋai kɔ́lɔŋ, va pɔ̂ri núu-kpune líi su-mɛnii kɔ́lɔnîi?
12Núui a ɣɛ́lɛ maa kùla núu kponôi, va ŋ̀wɛli dí ŋɔpɔara-maai lɛ́ ma. Va lî táre-nuu pɔ́.
13Lii-nɛ̃ɛ a kûla núu ŋɛ́i ma, kɛ́lɛ lii-soli a núu su kàra.
14Mɛni-ŋá-kaa-nuu a táre kɔ̀ri, kɛ́lɛ ƃoo-nuu a lɛ̂ɛ nɔ́ ŋɔƃoo-tuai pôlu.
15Kôlo-nuu ŋɔmɛni-soli káa nɔ́ a ɣele kélee, kɛ́lɛ koi lɛ̂lɛɛ-maa-nuu káa yɛ̂ɛ núu a kɛ̀ liî kúu su a ɣele kélee.
16Núu yaoɔɔ Ɣâla Yâwɛɛ ma ŋɔkôlo-laai su lɛ̂lɛi é tɛ́ɛ tɔɔ-laa ma nyii mɛni kpɔ̂lu káa zui.
17Tuma-laa-lao su fólo miiɛɛ ka íwɛli-kɛ-maa-nuu lɛ̂lɛi é tɛ́ɛ la niŋa-sua-lao miiɛɛ ma ka íkpɔara-nuu.
18Líi-fãa-goi-nuu a pâ a laa-saa, kɛ́lɛ ǹúui ǹíi fa ŋwàna a maa félai, a laa-saa kpèra.
19Nyɛ̃ŋ-nyɛŋ-nuu ŋɔfúlu-laai káa yɛ̂ɛ ŋalêŋ-kpɔlɔ, kɛ́lɛ tɔ̃yâ-nuu ŋɔfúlu-laai káa yɛ̂ɛ pere-lee.
20Táre lôloŋ a ǹâŋ líi làa, kɛ́lɛ ƃoo-lôloŋ a ŋ̀ɛ́i nàɣiŋ ǹee mɛi.
21Ƃoo-nuu tûa-pere a m̀arâŋ ƃoo-nuu lii-nɛ̃ɛ, kɛ́lɛ táre-nuu a sîa a pere sã́a.
22Ƃɛ́i núu lia-woo-ƃo-nuu fé naai, mɛni a kâra naa, kɛ́lɛ ƃɛ́i núu lia-woo ƃó-nuu tâmaai naai, mɛni fa kâra naa.
23Mare-kɛɛ su-kula-nuu lɛ́lɛɛ a mare-kɛɛ su kùla a zu-kula tãi, a pâ a lii-nɛ̃ɛ.
24Táre-nuu a sîa fúlu-laa pere su. Va sîa berei ma nyii a lî saa-taai.
25Ɣâla Yâwɛɛ a su-mɛni kɛ̂tɛ-nuu ŋɔpɛ́rɛi wòlo, gɛ́ pɔɔ-nɛni kɔ̃liŋ maa kɔ̃ɔ.
26Ɣâla Yâwɛɛ a ŋwana-lɔ̂ɔ-nuu ŋɔkíli-ŋa-siai kpɔ̀ara, gɛ́ ǹyée sèe wóo lɛ́lɛɛ ƃóɔɔ mù.
27Ǹúui a sɛŋ kɔ̂ri a wôya-perei, a ŋɔpɛ́rɛi wòlo, kɛ́lɛ ǹúui a yee-pɛlɛ ǹá-sɛŋ-kao kpɔ̀arai, a ƃâlo.
28Tɔ̃yâ-nuu a gíli ŋá sìa mɛni ma é lɛ́ɛ pâi zu toôi, kɛ́lɛ ŋwana-lɔ̂ɔ-nuu a wóo nyɔ́mɔɔ ƃò nɔ́ a maa félaa ǹyaŋ nyíŋi a pâ nɔ́ a mɛni kpɔ̂lu.
29Ɣâla Yâwɛɛ a ŋ̀óli tɔ̀ɔ tɔ̃yâ-nuu ŋɔɣâla-fɛli-wooi ma, kɛ́lɛ va ŋ̀óli tɔ̀ɔ ŋwana-lɔ̂ɔ-nuu wóo ma.
30Núu ɣɛ́lɛɛ-nuu ŋɛ́i a núu líi làa, tuŋ lɛ́lɛɛ kɛ́ pà a lii-laa.
31Ǹúui a ŋ̀óli tɔ̀ɔ tɔ̃yâ lia-woo mai, gáa a dáre-ƃelai da.
32Ǹúui va ŋ̀óli tɔ̀ɔ lia-woo mai, a sɛŋ sôli gbîŋ ma, kɛ́lɛ ǹúui a ǹyée sèe lia-woo mui, a táre sɔlɔ ƃô.
33Núu à yào Ɣâla Yâwɛɛ mai, a táre sɔlɔ ƃô. Ílɛɛ pâi ƃaa kɛ́-maa sɔlɔ ƃôi, fɛ̂ɛ í ímaa yéŋ Ɣâla Yâwɛɛ ŋɛ́i-tuɛ.
Currently Selected:
Táre-woo-ŋa 15: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
