Táre-woo-ŋa 14
14
1Táre nɛni a ŋɔpɛ́rɛi mu kpɛ̀tɛ a ǹɛ́lɛɛ, kɛ́lɛ ƃoo-tua a pɛ́rɛ mu kàra.
2Tɔ̃yâ-tua kɛ́ɛ a ǹɛ́ a gɛɛ ƃaa-kɛ-maa káa íyêei Ɣâla Yâwɛɛ mɛni ma, kɛ́lɛ núui dûa-pere fé sã́a-nii a ǹɛ a gɛɛ ƃaa kɛ́-maa fé ǹyêei m̀ɛni ma.
3Ƃoo-lono a pâ a tɔ̂ŋ-kpɛ-maa yoŋka-nuu pɔ́, kɛ́lɛ táre-nuu-woo a gbîŋ maa kɔ̃ɔ.
4À kɛ̀ tíi kɛ́ kɔli-sãa lɛ́lɛɛ fé íyêei, ímii-sãai pûi kɛ́-kerei a lɛ̂ɛ a vólo, kɛ́lɛ à kɛ̀ tíi kɛ́ kɔli-sãa lɛ́lɛɛ káa íyêei a gɛɛ ítii kɛ́ la, gɛ̀ ní ƃa pɔ̂ri mii-sãa támaa sɔlɔ ƃôi.
5Núu sãa a tɔ̃yâ-sere-faa kɛ̀, kɛ́lɛ wôya-nuu a wôya-sere faa kɛ̀.
6Yola kula-nuu kponôi-nuu a táre kɔ̀ri, va gàa, kɛ́lɛ mɛni-ŋa-kaa-nuu a târe mɛni su a maa félaa.
7Ífe kànaŋ ƃoo-nuu ma, kpɛ́ni fêi, ífe pâi sɛŋ lɛ́lɛɛ maa kɔ̂rii ǹyêei.
8Táre-nuu a dûa-pere maa kpɛ̂ɛ, ƃoo-nuu kɛ́ gàa nɔ́ yɛ̂ɛ ǹyaa ƃé dáreɛi kɛ́lɛ vé táre-ni.
9Ƃoo-nuu fé kpáaŋ ní ŋɔsɔnyɔ̂ŋ mɛni ma, kɛ́lɛ táre-nuu a fâa ŋɔsɔnyɔ̂ŋ ma gɛ́ kɔ̀ a gɛɛ Ɣâla é zu-mɛni lɛɛ.
10Núu da kpɛ́ni fé m̀arâŋ-nuu ŋɔlii-soli mɛni da ŋɔlii-nɛ̃ɛ mɛnii kɔ́lɔŋ yɛ̂ɛ ǹyaa kpîŋ.
11Ŋwana-lɔ̂ɔ-nuu ŋɔpɛ́rɛi a pâi wôloi, kɛ́lɛ tɔ̃yâ-nuu ŋɔpɛ́rɛi a pâi lɛɛ̂i dɔɔi.
12Berei nyii ílâai la ǹɛ̂lɛɛi íkili ŋái, a lî a yá su-kara-pere su.
13Ɣɛ́lɛ a lii-solii mɛi pɛ̂lɛ. Ǹíi-nɛ̃ɛi kpɛɛ ŋá a pâ a lii-too pôlu.
14Zɛŋ ŋwana-lɔ̂ɔ-nuu a zìi, a m̀á kùla, kɛ́lɛ núu lɛ́lɛɛ a ŋɔfela-fei sɔlɔ ƃô dûa-pere su.
15Diai dífa mɛni ŋá kaai, da mɛni kélee sìɣe a tɔ̃yâ, kɛ́lɛ táre-nuu a zia-pere maa kpɛ̂ɛ.
16Táre-nuu a yâo sɔnyɔ̂ŋ ma é bôlu fé mì, kɛ́lɛ ƃoo-nuu fa mɛni maa kpɛ̂ɛ gɛ́ pili zu.
17Ǹúui ǹíi ŋwana-la nɛ̃ɛ̂i a ƃoo-tua kɛ̀, kɛ́lɛ wôya-nuu ƃɛlɛ kpɛɛ̂i núu koi.
18Ƃoo-nuu ŋɔfela-fei ƃa ŋɔƃoo-wooi, kɛ́lɛ táre-nuu a mɛni ŋá kàa.
19Sɔnyɔ̂ŋ-ƃela da pâi pɛlɛ̂i díŋume ŋá ǹúu sã́a-ŋai kɔ́ɔ mu dí díkpera fé. Ŋ̀wana-lɔɔ-ƃelai da pâi tɔɔ̂i dɔ̃yâ-ƃelai díkpoŋ-ŋai lá.
20Kôlo-nuu ŋɔwɛli-kɛ-maa-nuu fé ma, kɛ́lɛ tɔɔ-nuu ŋɔwɛli-kɛ-maa ƃela tâmaai.
21Ƃa íŋɛi nàɣiŋ íkɔlɛ-maa-nuui mɛi, gɛ̀ ní ƃa sɔnyɔ̂ŋ kɛ́. Lûwa káa ǹúui ma a kôlo-nuu malôŋ kâai.
22Ǹúui a mɛni nyɔ́mɔɔ kpɛ̀tɛ ǹíi sui, ŋɔfúlu-laai su a kâra, kɛ́lɛ ǹúui a mɛni lɛ́lɛɛ kpɛ̀tɛ ǹíi sui, ƃaa kɛ́-maa da teniŋ ƃô-laa da pâ bɔ́.
23Tíi-kpanaŋ kɛ́ɛ a pâ a fela-fei, kɛ́lɛ lóno kpɛ́ni-kpɛni kɛ́ɛ a pâ a kôlo-laa.
24Táre-nuu ŋɔfela-fei ƃa tɔɔ-laa, kɛ́lɛ ƃoo-nuu ŋɔfela-fei ƃa ŋɔƃoo-tuai.
25Tɔ̃yâ-sere-faa-kɛ-nuu a núu ƃàlo, kɛ́lɛ wôya-sere-faa-kɛ-nuu a núu kìri.
26Ǹúui a yâo Ɣâla Yâwɛɛ mai, kili kɛ-zu káa ǹyêei, dɔɔ̂i kpanaŋɔɔ ǹyaŋ ŋuŋ maa ƃô a pâi kɛ̂i ŋɔnîa-pɛlɛɛi yêei.
27Ɣâla Yâwɛɛ ŋɔyao-maai káa yɛ̂ɛ fúlu-laa ya-toŋ, a núu kùla saa ŋɔƃáre ŋá.
28Kâloŋ ŋɔtɔɔ-polu ƃa ŋɔlɔii-ƃelai, kɛ́lɛ à kɛ̀ núu fé bôlu, gɛ̀ ní gáa nɔ́ naa kpɛ́ni-kpɛni.
29Ǹúui ǹíi saâi gôi, maa nûui káa a táre-nuu, kɛ́lɛ líi-fãa goi-nuu a ŋɔƃoo-tuai lɛ̀.
30Lii lɛlɛɛ gôi-nuu kɔlɔi ponoɔ̂i, kɛ́lɛ tólo a kao sôli kɔlɔ-fela pìli núu ma.
31Ǹúui a kôlo-nuu lùaŋ, a Ŋɔkpɛtɛ-nuui Ɣâla ƃɛlɛ tôo, kɛ́lɛ ǹúui a kôlo-nuu malôŋ kàai, a ƃaa-kɛ-maa tɛ̀ɛ Ɣâla pɔ́.
32Ŋ̀wana-lɔ̂ɔ-nuui ŋɔŋwana-lɔ̂ɔ-tuai a ǹyée mɛi ɣâle, kɛ́lɛ tɔ̃ya-nuu ŋɔtɔ̃yâ-tuai a maa kɔ̃ɔ.
33Táre káa mɛni-ŋa-kaa-nuu kponôi, kɛ́lɛ ƃoo-nuu fé mɛni da kɔ́lɔŋ é pîlaŋ táre ma.
34Tɔ̃yâ-laa a lɔii tɔ̂ɔ, kɛ́lɛ sɔnyɔ̂ŋ a pâ a ƃaa-kula-maa ǹɔii-ƃelai pɔ́.
35Yée-mu-nuu táreɛ a kâloŋ líi làa, kɛ́lɛ ƃoo yee-mu-nuu a ŋɔnuu-namui líi ŋwàna.
Currently Selected:
Táre-woo-ŋa 14: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
