Táre-woo-ŋa 18
18
1Ƃɛlɛ kpɛɛ-goi-nuu kpáaŋɔ̂ɔi nɔ́ gbîŋ mɛni ma, va fâa núu da kpɛ́ni ŋɔmɛni kpɛtɛɛ lɛ́lɛɛ ma.
2Ƃoo-nuu fé kpáani mɛni-ŋa-kaa mɛni ma, a ŋ̀wɛ̂lii nɔ́ é ǹɛ́ a gɛɛ dáreɛ̂i.
3Ŋwana-lɔɔ a pâ a ŋumɛ mɛni. À kɛ̀ ya ƃaa kula-maa mɛni kɛ̀, da pâi í ŋumɛ̂i.
4Táre-nuu wóo káa yɛ̂ɛ pari siŋɔɔ, è ƃò ŋɔ́nɔ yɛ̂ɛ ya-toŋ-ma ƃɛ́i yá fa kpɛ̂ɛ naai.
5Vé lɛ́lɛ ní a gɛɛ dí tɔ́ɔ wôya-nuu pôlu, kpaa máŋ dí díŋɛi naŋiŋ tɔ̃yâ-nuu ŋɔ-tɔ̃yâi mɛi.
6Ƃoo-nuu lóno-woo a pâ a laa-saa, gɛ́ ŋɔ́nɔ pà bɔ́ a tɔ̂ŋ-kpɛ-maa.
7Ƃoo-nuu lóno-woo a bìli mɛnîi. Da zòŋ ǹóno-woo ma.
8Laa-ƃo-kɛ-nuu wóo káa yɛ̂ɛ sɛŋ nɛ̃ɛ nyii núu a mìi a maa félaa é yéŋ goi a ǹɛ́lɛɛi.
9Nyɛ̃ŋ-nyɛŋ-nuu káa a núu-su-kara-nuu ǹêɣe.
10Ɣâla Yâwɛɛ wóo káa yɛ̂ɛ yeŋkêŋ kpanaŋɔɔ. Núu sã́a a lî naa a gɛɛ é ŋuŋ ma ƃô sɔlɔ ƃó.
11Gáa tɔɔ-nuu kíli ŋá a gɛɛ ŋɔtɔɔ-sãai da pɔ̂ri maa kɔ̃ɔ̂i yɛ̂ɛ berei siɣãŋ kpanaŋɔɔ a taa ma kɔ̃̂ɔ lai.
12Su-mɛni kɛ̂tɛ a pâ a su-kara núu pɔ́, ma-yeŋ-tua kɛ́ pà a ƃaa-kɛ-maa.
13Mɛni mɛ́ni í lɛ́ɛ pâi zu-toôi, à wàla kɛ́ tí, da pâi íkâai a ƃoo-nuu dí íŋumɛ.
14Kɔlɔ-fela fa lii-kpele-nuu líi tòo pôlu, kɛ́lɛ gbɛ̂ɛ ƃa pɔ̂ri lii-too pôlu-nuu líi mu siɣêi?
15Táre-nuu a mɛni ŋá-kaa kɔ̀ri, gɛ́ ŋ̀óli tɔ̀ɔ táre ma.
16Sama-sɛŋ tɛɛ́ a pere láa ƃò núu mì, gɛ́ gɛ̀ núu kɛ́ pà núu kɛ́tɛ ŋɛ́i-tuɛ.
17Ǹúui a lôno a maa-ŋuŋ, ŋɔmɛnii a kɛ̂ a ǹɛ́lɛɛ ǹûai ŋɛ́i í lɛ́ɛ la zu m̀arâŋ-nuui é pɛ́lɛ m̀arê kɛ̂i.
18Kpɛɛŋ tooɔ a laa-saa kpèra, gɛ́ wála-wala-ƃela loai mɛni ŋá tèe.
19Kpɔŋ íbarâŋ-nuui ma, gɛ̀ ní a pâi ímaa kɔ̃ɔ̂i yɛ̂ɛ taa-lee nyii siɣãŋ tínaŋɔɔ̂i mai. Kɛ́lɛ à kɛ̀ ka dîa-ni ka laa-saa kɛ̀, da pâi díkpôŋ láa tɛ̂i íperei.
20M̀ɛnii núu a mòi gáa a ǹíi láa mɛni, kɛ́lɛ m̀ɛnii a kûla zui, gáa a m̀aa mɛ̂ni.
21Saa da fúlu-laa díwala-wala-laai káa núu lágbɔ̀ ma. M̀ɛnii lágbɔ̀ a môi, ǹâmu maa mɛ̂ni ƃè.
22Ƃà nɛnî kùla, ƃa mɛni lɛ́lɛɛ sɔlɔ ƃó, ƃa lûwa sɔlɔ ƃó Ɣâla Yâwɛɛ yêei.
23Kôlo-nuu a lôno a fɛli-kɛ-woo, kɛ́lɛ tɔɔ-nuu a ŋ̀óo su tòo a nyɔ́mɔɔ.
24Nɛ̃ɛ-laa da káa naa zu kpanaŋɔɔi é tɛ́ɛ íkaayɔɔ ŋɔi ma.
Currently Selected:
Táre-woo-ŋa 18: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
