Marcos 11
11
So' Jesús táaue di' Jerusalén
(Mateo 21.1-11; Lucas 19.28-40; Juan 12.12-19)
1Joca'li sóxote ma'le qonadíite'uo di' Jerusalén, sóxote qoỹivídau'alo saua' noiqolqa, lenaxat da' Betfagé qataxa Betania, nalot'eta jaga' qasoxonaxa lenaxat 'olívos lichidísat. Qana'chi so' Jesús ỹama' saua' dos lasoxoñii's. 2Qana'chi 'enapegalo, 'enaac:
—'Auc'áchii'uo qomle di' noicolec 'me qadalot'eta. Qana'chi qomle 'avíchiiỹa, qana'chi 'auañíỹa ga' 'ásena necoñitáisec, 'me maliaxa sa qonapeelégue. Qana'chi 'ausoỹíỹi 'anavíquiiquéna qomle. 3Qataxa qomle 'uo ga' 'ami ỹinateque, da' ga'me 'oñíitapeec, qana'chi 'oñíỹapega qomle da' ñi' qadasoxola' ỹiuen. Qaláxasa qomle ỹimat, qana'chi n'iỹílaxat.
4Qana'chi saa'me jeque'o', na'chi ỹauáata so' 'ásena necoñitáisec, néta'ña na' lai so' som, ga'me lai so' naq'aic. Qana'chi ỹisodéegue.
5Qataxa 'uo na' huét'a so'me, qana'chi ỹinatét'ape saa'me, 'enaac:
—¿Jái'chi ga'me 'oñíitapeec? ¿Tóoqo'chi 'ausóitapegueegue na' 'ásena?
6Qana'chi saa'me ỹ'adeteguet so' siỹaxadipi, ỹaloqchíichidiỹi da' l'aqtac so' Jesús, qaama'le qodemachit'alo da' 'éque'. 7Ỹim, qana'chi qoỹauéga so' 'ásena so' Jesús, qana'chi qoỹin laxala'te saua' leuo, qana'chi so' Jesús nalégue so'me. 8Qana'chi ỹátaqta jalcote na' lapaqapii'nỹi na' lapoto so' naq'aic. Qataxa 'uo na' ỹiquesoxóiỹi jan' lepee jan' 'epaq, qana'chi qoỹachapii'nỹi so' ladic so'me.
9Qana'chi na'me 'uáuta, qataxa na' liilata', na'me ỹ'alqátaỹi, 'eet'oi:
—¡'Uo da' li'ỹoxodic ñi' Dios! ¡Ỹátaqta 'ónaxaic da' ladíquiaxac na'me nauéctapegue' da' lenaxat ñi' qadesaliaxanec! 10¡Ỹátaqta 'ónaxaic da'me nata't n'onataxanaxac, 'me 'ená'am da' l'onataxanaxac so' qadet'a David! ¡'Uo da' li'ỹoxodic ñi' Dios!
11Qana'chi 'éeta so' Jesús da' táaue di' Jerusalén, qataxa nataq'en so' tamnaxaqui let'ádaic. Joca'li ỹimat da' ỹic'atéetac ỹima na'me 'uo, qana'chi ỹic'áta di' Betania, náictapee'to saua' doce lasoxoñii's, qá'a sóxote da' jávit.
So' Jesús 'en láso jaso' 'epaq higo 'me qaga 'te jala
(Mateo 21.18-19)
12So' nolo' laqáỹa, joca'li quéd'ai di' Betania, qana'chi so' Jesús nom'aguet da' loqouáxa. 13Qana'chi ỹila'ata jaso' 'epaq lenaxat higo lichidic. Joca'li maliaxa qaỹá'a, qana'chi dec'atenaxadet'a da' 'uootaxa 'uo jaga' jala. Qaláxasa qaga 'te ỹauana, nedóchiiñi jan' laỹoqote, qá'a maliaxa da' sa livídaqa' da' 'uo jan' jala. 14Chan'eesa so' Jesús 'enapego' jaso'me 'epaq, 'enaac:
—Naỹi na'chi táchii'ña da' qaỹa 'te ga' ỹalic da'me jaláỹaxac da' qonéta.
Qana'chi saua' lasoxoñii's naquiáxachidiỹi da'me dójo'.
So' Jesús d'otaxalégue so' tamnaxaqui
(Mateo 21.12-17; Lucas 19.45-48; Juan 2.13-22)
15Joca'li ỹivídede'uo di' Jerusalén, qana'chi so' Jesús táaue so' tamnaxaqui. Huá'a, qana'chi ỹ'odáiỹi na' menaxaicpi qataxa na'me neuodénapega na' nemenecpi. Qataxa ỹisouóxoỹi na' nemenaxala'pi na'me nemeetapega't qa'en jan' lemena na' siỹaxadipi, qataxa jan' nes'ónaxaquipi na'me ỹiméetac na' doqoto'pi. 16Qana'chi sa dasenataxanem da' gamachaqaiga 'uo ga' ỹidóta'uo jeso' tamnaxaqui. 17Huá'a, qana'chi dapaxaguenataxáatac, 'enaac:
—Naua' nedétrañi l'aqtaqa ñi' Dios 'enapega't: “Jen'me ỹ'imec, 'me qoỹimatá'ac da' tamnaxaqui, netamnaqa' na' ỹima ỹodapecachi siỹaxadipi.” Qaláxasa 'ami 'aviñii da' nañoxótaqa' na' huoodáxanaxaicpi.
18Qana'chi naquiáxatapega na'me lasoxola'pi na' netaxaỹáxanaxanecpi da' qodosápegue' ñi' Dios qataxa na'me dapaxaguenataxanapeec na' naqátaxacpi. Qana'chi jen' nasoxola'pi dimitaxana'a't, qonmitáaque ga' lasoxoc da' sétaaque qoỹalaat so'me, qá'a 'uo da' noqolánaxa, qá'a ỹima na' siỹaxadipi ỹátaqta 'uo da' l'aalaxac so'me naa'me lapaxaguenataxanaxaco. 19Qaláxasa joca'li sóxote pí'ỹaq, qana'chi so' Jesús cá'ai di' noic t'ádaic.
Jaso' lichidic jan' higo 'me láso
(Mateo 21.20-22)
20So' néte'ta so' nolo' laqáỹa, qana'chi tadelégue jaso' lichidic jan' higo, qana'chi ỹilod'ata jaso'me da' láso, ỹivída'ñalo naua' lepatadi da' lásoi'. 21Chan'eesa so' Pedro hueenatét'a joca'li da' l'aqtac so' Jesús, qana'chi 'enapego' so'me, 'enaac:
—'Am paxaguenataxanaxaic, péga, jada'me lichidic jan' higo 'me 'auéetapega quelaqáỹa, sóxote da' láso.
22Qana'chi so' Jesús 'enaaco':
—Ỹátaqta 'aup'íi'ỹa qomle ñi' Dios. 23Ỹátaqta 'eesa da'me 'ami senapegalo, da' 'uo gamachaqaiga da' 'uootaxa 'enapéga jiñi' qasoxonaxa da' 'enaac: “'Ocá'ai qomle na' 'onéta'ña, 'ánỹi jadi' huaxai”, da' qaỹa 'te loqolguétaxanaxac jañi' liquidiaqte, ỹisamaq da' ỹ'amaqten da'me 'enaac, qana'chi ỹipaquíchiỹi. 24Naqaida da' 'ami senapegalo da' ỹima jen'me 'aviỹáxañiỹaaque da' 'antamiñíitac, da'me ỹátaqta 'au'amaqchíñii da' sóxote 'ami huo'oto, qana'chi da'me ỹipaquíchiỹi. 25Qataxa qomle 'antamiñíitac, qana'chi da' 'uo ga' sa 'aviỹamaxadíñiic ga' 'adaqaỹai, 'auchoxodíñiiỹo', qaidi nataq'en ñi'me 'adet'ai 'me net'ot na' piỹem, 'ami ỹichoxode'n qataxa ỹapalaxa't naua' 'adoicódii'. 26Qá'a da' sa 'avichoxodénataxañii, qana'chi ñi'me 'adet'ai 'me net'ot na' piỹem, jiñi'me sa ỹapalaxa't naa'me 'adoicódii'.
Da' lichic so' Jesús
(Mateo 21.23-27; Lucas 20.1-8)
27Joca'li v'iỹílaxade'uo di' Jerusalén. Qana'chi so' Jesús joca'li huétaaue jeso' tamnaxaqui, qana'chi nec'áte'uo so'me jen'me lasoxola'pi na' netaxaỹáxanaxanecpi da' qodosápegue' ñi' Dios, qataxa jen'me dapaxaguenataxanapeec na' naqátaxacpi, qataxa na' ỹ'axaicáchiipi. 28Qana'chi qoỹinatec so'me da' 'enaac:
—¿Jái'chogamaxa 'auachiỹoxot'ague da' 'an'aqtaguec da'me 'aué'et dójo'? ¿Jái'chi ga'me 'am ỹanem dójo' da'me qaidi 'aué'et?
29Qana'chi so' Jesús 'enaaco':
—Jaỹim nataq'en 'uo da' ỹinátaxanaxac da' 'oñíita. Qomle jaỹim 'au'aqtaxañiim, qana'chi 'ami s'axatema ga'me chiỹoqo'ot da' ñ'aqtaguec da'me s'étetac dójo'. 30So' Juan ¿jái'chi ga' ỹamaxalégue joca'li da' dachiláxanataxan? ¿Qo'li Dios, 'uootaxa ga' 'chi siỹaxaua? Ỹa jaỹim 'au'axáchiim.
31Qaama'le so'me mai'chi p'aỹa't da' noqolguétetapega't, 'enapega't:
—Da'me senaqpéga na'chiñi ñi' Dios ñi' ỹamaxalégue, na'chi da'me qo'mi 'enapegalo qomle da' 'enaac: “Qalqaiga da' ¿tóoqo'chi sa 'au'amaqchíñii?” 32¿Qataxa qomle senaqpéga da' na'chína na' siỹaxadipi na' ỹamaxalégue?
Qá'a so' nasoxola'pi ỹátaqta 'uo da' d'oỹa na' siỹaxadipi, qá'a ỹima da' qoỹaỹáten'a't da' qoỹ'amaqten so' Juan da' 'eesa da' Dios l'aqtáxanaxanec. 33Qana'chi qo'enapéga so' Jesús, qoỹinaac:
—Sa saỹátenaq.
Qaama'le 'enapego' so' Jesús so' nasoxola'pi, 'enaac:
—Jaỹim nataq'en sa 'ami s'axatema ga'me sachiỹoxot'ot da' ñ'aqtaguec da'me 'uo da' s'étetac da'me dójo'.
Currently Selected:
Marcos 11: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.