Marcos 12
12
Qodaloqtenaxana so' 'onataxanaxaicpi 'me coỹ'aqaicpi
(Mateo 21.33-46; Lucas 20.9-19)
1Qana'chi so' Jesús ỹauót'ai naua' laloqtenaxanqa'te da' d'aqtaxanem so' siỹaxadipi, 'enaac:
—'Uo so' siỹaxaua ỹaiñi jaso' lañiise uvas. Ỹim, qana'chi nequepaxadesop, qataxa ỹí'et jaso' lai't da' qonsom na' lí'i jan' uvas, qataxa n'oxoséguem jaso' neuavic da' qaidi ỹima di'ỹoq da' qoỹilotalégue jaso'me.
Joca'li ỹim, qana'chi 'uo so' 'onataxanaxaicpi n'áataxanaxanec so'me n'aléua. Qana'chi jec, qaỹa'ague ga' taiỹi. 2Joca'li ỹivíta so' lalóqo' da' qonqat jen' nanec, qana'chi ỹamaq so' lamaxasec, qaidi ỹiỹaxanot so'me 'onataxanaxaicpi, da' ỹicolaxatée'ga ga' talégue qoỹin so'me. 3Qaláxasa so'me 'onataxanaxaicpi ỹacoot'eguet so'me, qana'chi ỹalaatétac, qana'chi qoỹ'iỹílaxat qaỹa 'te qoỹanem. 4Chan'eesa so' loxot so'me 'aléua ỹitaxa ỹa'uo so' lamaxasec laqáỹa, qaláxasa nataq'en qoỹidó'oc na' qa', ỹíidiñi qoỹin na' laqaic, qataxa qoỹisouéetac. 5Qana'chi so'me loxot so' 'aléua ỹitaxa ỹamaq so' lamaxasec laqáỹa, qaláxasa so'me qoỹalaat. Joca'li ỹim, qana'chi jalcote so' lamaxa'spi, qana'chi 'uo na' 'chi qoỹi'quemaqtet, qataxa 'uo na' ỹátaqta qoỹalaat.
6So'me maliaxa 'uo so' mai'chi lalémaxaset lec'óxot, ỹátaqta lauotaxat. Qana'chi so'me ỹip'áxateegue da' ỹamaq, qá'a 'enaaco': “Séetapega da' qoỹoqo'cha qomle ñi'me ỹalec.” 7Qaláxasa so'me 'onataxanaxaicpi 'enapega'to': “Na' cha'aguet na'me sétaaque da' talégue qoỹin qomle na' 'aléua. Qolaxalégue qomle salaataq, qaidi qo'mi talóo'te jénjo' 'aléua da' qadalémaxaset.” 8Qana'chi qoỹacoot'eguet jeso'me da' qoỹalaat. Ỹim, qana'chi qoỹasaxague da' lai so' 'aléua.
9Qana'chi so' Jesús dachimaqtaxan, 'enaac:
—Qana'chi ¿jái'chi ga' 'éeta qomle so'me loxot so'me 'aléua? So'me janac, qana'chi ỹalaat so'me 'onataxanaxaicpi, qataxa so'me n'aléua n'áataxanaxanec so' 'onataxanaxaicpi laỹi.
10¿Qo'li sa 'autaxaỹaxañiỹa'pe naa'me nedétrañi l'aqtaqa ñi' Dios? 'Me 'enapega't:
So'me qa' 'me l'otánec na' 'emeelo'opi,
naqaiso naỹi so' d'añiỹapeeguet qa'en na' 'emec.
11Da'me chiỹoqot'ot da' ỹí'et ñi' qadasoxola' Dios.
Qataxa ỹátaqta qaỹa 'te 'ená'am qasenaq da' li'ỹoxodic.
12Chan'eesa qoỹilótaaque ga'me 'éeta da' sétaaque qoỹicoñi' so' Jesús, qá'a qoỹaỹáten da'me so'me ỹa'uo da' laloqtenaxanaxat 'me táchiỹi qa'en jen'me. Qaláxasa jen'me ỹátaqta 'uo da' d'oỹa na' siỹaxadipi. Qana'chi qoỹaxátac so'me, qana'chi qodíc'ai.
Qodenataxanec da' neseeténaguec ga' net'a
(Mateo 22.15-22; Lucas 20.20-26)
13Joca'li ỹim, qana'chi 'uo na' qoỹamaxauó'o so' Jesús jen'me quétapegue' na' fariseopi qataxa na'me quétapegue' so' Herodes, da' sétaaque da' qoỹisómaxanaac ga' l'aqtac so'me, qaidi huasoilégue qoỹin. 14Qana'chi janaco' so'me, qana'chi qoỹinato' so' Jesús, qoỹinaac:
—'Am paxaguenataxanaxaic, qo'mi saỹátenaq da' naua' 'auenapegalo ỹátaqta 'eesoda, qataxa qaỹa 'te 'au'óitaaque ga'me 'enaac na' siỹaxadipi, qá'a sa 'auloỹi ga' ỹ'oqóchiỹi lasoxoc na' siỹaxadipi, na'chidáta da' 'auapaxaguenataxáatapeec ga' ladic da' 'ónaxaic nasoxoc 'me ỹiỹamaxadéeta ñi' Dios. ¿Qo'li ỹiỹamqáchiiñi da' qoỹiseeten ñi'me let'a jen'me net'alpi Roma lé'ec, 'uootaxa 'ai'? ¿Seseeténaq, 'uootaxa sa seseeténaq?
15Qaláxasa so' Jesús ỹaatetoot'eguet da'me l'iináanataxanaxac jeso'me. Qana'chi 'enaaco':
—¿Tá'nooqo'chi jaỹim 'anapogóxochiitac? Ỹa jaỹim 'andóỹa jaga' 'oonole laicaua lai, qaidi sec'aten.
16Qana'chi qondó'uo jaso' 'oonole. Joca'li ỹilolégue, qana'chi denataxaalégue, 'enaac:
—¿Jái'chi ga' latáxasoxoc diójo' huetalégue jánjo', qataxa di'me nenaxat 'me nedetalégue?
Qana'chi so'me 'enapega'to':
—Naqaidi di'me let'a na' net'alpi Roma lé'ec.
17Qana'chi so' Jesús 'éetapega jeso'me, 'enaac:
—'Auañimii qomle na' let'a na' net'alpi ga'me mai'chi lalémaxaset, qataxa ñi'me Dios 'auañimii ga' mai'chi lalémaxaset.
Qana'chi jeso'me ỹátaqta ỹoqo'chim da' l'aqtac so' Jesús.
Qodenataxáatapeec da' lasoxoc da' nec'aliséguem ga' siỹaxaua
(Mateo 22.23-33; Lucas 20.27-40)
18Qana'chi ỹitaxa 'uo na' nec'áta so' Jesús so'me saduceopi. Jen'me l'aqtecaic da' sa nec'aliséguem qomle jen' napa'lpi. Chan'eesa ỹinatec so'me, 'enaac:
19—'Am paxaguenataxanaxaic, so' Moisés ỹidíñi joca'li da' 'uo ga' ỹileu siỹaxaua, qana'chi n'óosaỹi da' l'onáxac, qaláxasa jaga' loua qaỹa 'te lec'óxot, qana'chi ga' lanoqolec 'uoneguet jaga'me la'ỹoxoua, qaidi 'uo qa'en ga' lec'óxot so'me lachoq'olec 'me ỹileu. 20'Chi 'uo so' siete naqáỹadipi. So'me ỹ'axaic 'uó'on, qaláxasa jeso'me ỹileu qataxa qaỹa 'te lec'óxot. 21Qana'chi so'me laqáỹa 'me lep'áxaua, qana'chi so'me 'uoneguet jaso' la'ỹoxoua. Qaláxasa so'me nataq'en ỹileu, qataxa qaỹa 'te ga' lec'óxot. Ỹim, qataxa jec so' laqáỹa laqáỹa, qaláxasa nataxa naq'áita. 22Qana'chi naq'áita ỹima so' siete nanogaxau'pi 'uoneguet jaso'me, qaláxasa qaỹa 'te ga' 'uo ga' lec'óxot jeso'me. Qana'chi p'áteegue da' ỹileu jaso' ỹauo. 23Qana'chi qomle ỹivíta ga' lalóqo' da' qonec'alaxadiséguem na' napa'lpi, qana'chi ¿jái'chogamaxa ỹátaqta loua jaso'me ỹauo, qá'a ỹima so'me siete nanogaxau'pi 'uoneguet jaso'me?
24Qana'chi so' Jesús 'enaaco':
—'Ami 'ausómiitac, qá'a sa 'auaỹáchiñii' naua' nidii's l'aqtaqa ñi' Dios qataxa da'me lañoqtaxanaxac ñi'me. 25Qá'a qomle ỹivíta da' qonec'alaxadiséguem na' napa'lpi, qana'chi qaỹa da' n'onáxac qataxa qaỹa 'te ỹ'onáxan jaga' lec'oqte, qá'a jen'me 'ená'am da' lasoxoc na' namaxa'spi 'me huet'ague da' piỹem. 26Qaláxasa da'me lasoxoc da' qonec'alaxadiséguem na' napa'lpi, ¿qo'li sa 'autaxaỹaxañiỹa'pe naua' ỹidídiñi l'aqtaqa so' Moisés da'me 'éeta joca'li ñi' Dios dosápegue' jeso'me, chimaqátapegooue jaso' 'epaq lapole 'me 'edétanỹi? Jiñi'me 'enaaco': “Jaỹim 'me naqaỹim netamnaxala' so' Abraham, qataxa so' Isaac, qataxa so' Jacob.” 27Ñi'me sa netamnaxala' jen'me napa'lpi, na'chínata jen'me nec'alétaiỹipi. Chan'eesa qaa'le 'ami ỹátaqta 'ausómiitac.
Da' naqátaxac 'me ỹátaqta qoỹalaxalégue
(Mateo 22.34-40)
28Nataq'en 'uo so' nivíta jen'me dapaxaguenataxanapeec na' naqátaxacpi da' nec'áta so' Jesús. So'me naquiáxatapega joca'li so' qolguétaxac. Qataxa ỹasouaxat da' ỹaỹáten da'me so' Jesús ỹiỹamqáchiiñi da' l'aqtac joca'li qoỹinatétac, qana'chi so'me dachimaqtaxan, 'enaac:
—¿'Te hua'ague ga' ỹátaqta qoỹalaxalégue ỹima jen' naqátaxacpi?
29Qana'chi so' Jesús 'enaaco':
—Da'me ỹátaqta qoỹalaxalégue ỹima jen'me naqátaxacpi 'eet'oi: “'Anaquiáxañiỹo' qomle, 'ami Israel lec'óqo'tepi, ñi' qadasoxola' Dios, ñi'me na'chiñíta 'oonolec qadasoxola'. 30Ỹátaqta 'auauotec qomle ñi' 'adasoxola' Dios, 'aumato'ot jana' 'adiquidiaqte, qataxa da' 'ad'óiỹaxac, qataxa da' 'adeenataxac, qataxa ỹima da' 'ad'añaxac.” Naqaida da'me ỹátaqta qoỹalaxalégue jen'me naqátaxacpi. 31Qataxa da' laqáỹa 'me na'chi 'ená'am da'me, 'eet'oi: “'Auauotec ga' 'adaqáỹa, 'éet'em 'auen da' mai'chi 'anchoxodeela't.” Qaỹa 'te laqáỹa naqátaxac 'me ỹátaqta qoỹalaxalégue, na'chináate' náajo'.
32Qana'chi jeso'me dapaxaguenataxanapeec na' naqátaxacpi 'enaaco':
—'Am paxaguenataxanaxaic, ỹátaqta ỹiỹamqáchiiñi da' 'ad'aqtac. 'Eesása da'me 'auenaac, da' 'oonolec ñi' qan'étoqo't, na'chiñíta, qaỹa 'te laqáỹa. 33Qataxa da' ỹátaqta qoỹauotec ñi' qadasoxola' Dios, ỹimo'ot qoỹin da' niquidiaqtéỹaxac, qataxa neenataxac, qataxa da' chaalataxac, qataxa ỹima da' n'añaxac, qataxa da' qoỹauotec ga' naqáỹa, 'éet'em da' mai'chi nichoxodeela't ga' siỹaxaua. Naqaida 'me ỹátaqta napacalégue ỹima na' nachítaqtaxanaxat 'me qoỹanot ñi' Dios, qataxa jan' nachítaqtaxanaqte 'me qoỹachalégue jaga' nec'oỹoxonaxalate.
34Qana'chi so' Jesús joca'li ỹilá'a so'me da' ỹátaqta ỹiỹamqáchiiñi da' 'enaac, qana'chi 'enaaco':
—'Am sóxote sa qaỹáaque da' 'aunoxoneuó'o da' l'onataxanaxac ñi' Dios da' ỹimata'a'téna.
Huá'a, qana'chi tá'ña da' qaỹa 'te ga' ỹitaxa dachimaqtaxan.
¿'Te hua'ague ga' nec'óxot 'me net'a nec'alaxaqui?
(Mateo 22.41-46; Lucas 20.41-44)
35So' Jesús dapaxaguenataxáatac, huétaaue so' tamnaxaqui, qana'chi 'enaaco':
—¿Jái'te 'éeta jen'me dapaxaguenataxáatapeec na' naqátaxacpi da' 'éetapega ga' qoỹ'axátet'aguet net'a 'me nec'alaxaqui, ga'me lec'óxot so' qadet'a David? 36Qá'a so' David joca'li ỹosáxanaxan so' Espíritu Santo, qana'chi 'enaaco':
Ñi' qadasoxola' Dios 'enapéga ñi' ỹasoxola', 'enaac:
“'Oná'ague qomle na' saỹáten,
ỹataqtelégue qom'chi ỹim da' sacho'to naua' 'adapia'te na' 'am ỹip'aguéetacpi.”
37Qaláxasa ¿'te hua'ague ga' 'éeta da' ga' net'a 'me nec'alaxaqui da' lec'óxot so' David, qá'a so' David ỹátaqta 'enapéga da' lasoxola'?
Qana'chi so'me siỹaxadipi ỹátaqta 'uo da' lamanaxanaxa da' naquiáxatapega so' Jesús.
So' Jesús devitaqtaxáatapega na'me dapaxaguenataxanapeec na' naqátaxacpi
(Mateo 23.1-36; Lucas 11.37-54; 20.45-47)
38So' Jesús joca'li ỹapaxaguéetac so' siỹaxadipi, qana'chi 'enaaco':
—Ỹátaqta 'avichiiỹa'aguet qomle na' dapaxaguenataxanapeec na' naqátaxacpi, qá'a jen'me ỹátaqta noqopita da' locaiqa naua' leuo, qataxa noqopita da' huéta'nỹi na' naq'aic, qana'chi qouaỹoxot'a da' qoỹip'iỹen. 39Qataxa jen'me ỹilótaaque jan' s'ónaxaqui 'me ỹátaqta ỹ'oxodaq jen' lemáxaquipi na' judiopi, qataxa nataq'en na' liqui'ỹáqa'. 40Jen'me ỹátaqta dootáxanque naua' l'acháqa'te jan' p'ai, qana'chi 'chi nañoxótaxaqui da' ỹátaqta jaloc qa'en da' netamnaxac. Jen'me 'me qoỹanem qomle da' ỹátaqta p'asáiỹi ne'uaxánaguec.
Jaso' lasaqáse jaso' p'ai 'me choxodaq
(Lucas 21.1-4)
41'Uo so' nolo' so' Jesús huétaaue jeso' tamnaxaqui, ñíchiiñi, dasota'nỹet jaso' lai't jan' nasaqasepi. Qana'chi ỹic'atéetac na' siỹaxadipi 'me ỹasaqátapiiñi jan' lasaqáse. Ỹátaqta jalcote so' saliaxanqapi 'me ỹaneuo jan' lemena. 42Qana'chi nivídeuo jaso' p'ai 'me choxodaq. Qana'chi jaso'me ỹaadéuo saa'tai' lemenalole, ỹasaxádinỹi jaso' 'oonole jan'me lai'tpi jan' nasaqasepi. Saa'me ỹátaqta sa 'amaqtaq da' laso'víỹaxa'j. 43Qana'chi so' Jesús ỹiỹáxanoovlo saua' lasoxoñii's, qana'chi 'enapegalo, 'enaac:
—Ỹátaqta 'eesa da'me 'ami senapegalo, jaso'me p'ai 'me choxodaq, ỹátaqta ỹágueegue jaso' ỹaneuo, napacalégue ỹima na' laỹi 'me 'uo jan' ỹasaxáñi lasaqáse. 44Qá'a ỹima jen'me laỹi ỹasaqátapiiñi jan' 'chi l'iỹoqte. Qaláxasa jaso'me, temaqaidi da' choxodaq, qaláxasa ỹimatéteuo ỹima jaso'me 'uo leuénec laso'viole.
Currently Selected:
Marcos 12: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.