Marcos 13
13
So' Jesús ỹ'axátet'a da' qonoláxachiñi qomle so' tamnaxaqui let'ádaic
(Mateo 24.1-2; Lucas 21.5-6)
1Joca'li cá'ai so' Jesús so' tamnaxaqui, qaama'le so' 'oonolec saua' lasoxoñii's 'enapego' so'me, 'enaac:
—'Am paxaguenataxanaxaic, péga na' qa'pi, ỹátaqta qaỹa 'te 'ená'am, qataxa jen' 'emecpi.
2Qaláxasa so' Jesús 'enaaco':
—¡'Ami 'auc'achiñíit'ape naỹi, naa'me 'emáqa let'ádaiqa! Jen'me qomle qaỹa 'te huetalégue ga' laqáỹa ga' qa'. Ỹima jen'me qonoláxachiñi qomle.
Na' n'anecpi 'me ỹ'axátet'a da' ỹiméta jen'me
(Mateo 24.3-28; Lucas 21.7-24; 17.22-24)
3Qana'chi tát'a so' qasoxonaxa 'me lenaxat 'olívo lichidísat 'me nalot'eta jeso' tamnaxaqui. Qana'chi joca'li ñíchiiñi so' Jesús, qana'chi so' Pedro qataxa Jacobo qataxa Juan qataxa so' Andrés, saa'me nesoxotrot jeso'me, 'enapega't:
4—Qo'mi sétaaque da' qo'mi 'au'axatema ga' livídaxac da'me dójo' nalóqo'. Qataxa ¿'te 'éeta ga' nec'atenec qomle ỹivíta da' ỹipaquíchiỹi ỹima dójo'?
5Qana'chi so' Jesús 'enaaco':
—Ma'choqo' qomle, da'me qaỹa 'te 'ami ỹoqovi'n. 6Qá'a ỹátaqta jalcote qomle na' janac da' 'chi ỹinoxótaaue da' ỹinaxat, qana'chi 'enaac: “Na'chaỹim 'me jaỹim 'adet'ai 'adec'alaxaquii;” qana'chi ỹátaqta jalcote qomle na' ỹoqovin.
7Qaláxasa qomle 'ami 'aup'iquiilégue ga' laataxac chimaqáchii'ñalo, qana'chi 'ená'te 'au'óỹii, qá'a naqaida 'éeta qomle; qaláxasa maliaxása sa ỹovíta ga' loiquiaqa'éna. 8Qá'a na' ỹodapecachi siỹaxadipi deloiỹa't, qataxa ga' net'a naláat'e' ga' net'a laqáỹa, qataxa jalcote naua' hua'alo na' ledáxac jen' 'aléua, qataxa 'uo ga' né'ep, qataxa let'ádaic ga' noqochoxo. Qana'chi ỹima jénjo' naqáina na' chiỹoqóchii'ña na' 'queténaxacpi.
9Qaláxasa 'ami mai'chi 'anloila't qomle. Qá'a 'ami qoỹanhua'alo qomle na' net'alpi, qataxa 'ami qoỹi'uaxaat'ape da'me 'ovíi'ỹa ga'me lemáxaqui na' judiopi. Huá'a, qana'chi 'ami qoỹaueegueta na' net'alpi 'me ỹilótapee'to naua' 'ale'u qataxa na' let'alpi jen'me, ỹasouaxat da' jaỹim 'oquíitapegue'. Huá'a qomle, qaama'le ỹovid'ot da'me 'au'axáchiim jaỹim jen'me. 10Qá'a qomle ỹauaqá'a da' ỹinoxoneequéna, qana'chi da' n'aqtac 'me nec'alaxaqui chaliaxa qoỹ'axátem ỹima na' ỹodapecachi siỹaxadipi. 11Qataxa qomle ỹivíta da' 'ami qoỹanhua'alo na' net'alpi, qaláxasa 'ená'te 'ami ỹaquicoqte't ga'me 'ad'aqtaquii, ỹátaqta 'ená'te 'aueenachíit'a qomle. Na'chigáta ga'me 'ami ỹanema ñi' Dios 'me 'au'axáchii, qá'a sa naqa'ami da'me 'auosíỹi, na'chigáta ga' Espíritu Santo 'me dose. 12Na' siỹaxadipi mai'chi ỹ'étec qomle ga' nalaataguec ga' mai'chi laqaỹasa, qataxa ga' net'a mai'chi ỹ'étec ga' nalaataguec ga'me lec'óxot, qataxa ga' nec'óxot mai'chi ỹ'éteeta ga' mai'chi let'al da' nalaatague'j. 13Ỹima qomle na' siỹaxadipi ỹátaqta 'ami nautenalo, ỹasouaxat da' jaỹim 'oquíitapegue'. Qaláxasa ga'me qaỹa 'te ỹoqochi'iguet, cha ỹivíd'a ga' loiquiaqa' da' nichaalataxac, na'chiga 'me qonec'alaxatéegue.
14So' l'aqtáxanaxanec ñi' Dios, lenaxat Daniel, so'me ỹidíñi joca'li ga'me desépaxanaqtaxan qataxa dolaqtaxan. (Naỹi ga'me ỹitaxaỹaxan jénjo' ỹidíisec 'me l'aqtac so' Jesús, n'óota qomle da' ỹaỹáteeta), chan'eesa da' 'aulói'ỹa qomle jega'me da' qoỹanáaue ñi' tamnaxaqui di' Jerusalén 'me sa l'acháqa', qana'chi na' néta'ña na' Judea dasóiỹi qomle, ỹ'iỹiilégue jen' qasoxonaxapi. 15Ga'me nétasee'mec ga' l'emec lóvi' ga'me nolo', qana'chi 'ená'te nenótee'guesop ga' l'emec da'me 'uo ga' ỹáchi. 16Qataxa ga'me huétai'ỹa na' n'ónaxa, qana'chi 'ená'te da' n'iỹílaxauo qomle da' 'uo ga' ỹáchi ga' loxot. 17Qaláxasa ¡ỹátaqta choxodáxasa na' ỹauodipi 'me qo'uaxaipi qataxa jen'me maliaxa ỹanogaxátac na' lec'óxot ga'me nolo'! 18'Ami 'anachoxodíñiỹoto' ñi' Dios, qaidi da'me 'adelotaxaquii sa nateet'eguet ga' naqaviaxa. 19Qá'a gaa'me noloqo'te ỹátaqta let'ádaic da' 'queténaxac qomle. Sa 'te 'uo ga' 'ená'am jocalia'cho' táchiiñi ñi' Dios da' ỹí'et jen' 'aléua, qataxa sa ỹitaxa qonauá'ne' qomle da'me dójo' 'queténaxac. 20Qataxa ñi'me qadasoxola' da' 'uootaxa sa ỹichicaỹilo gaa'me noloqo'te, qana'chi qaỹa qomle ga' nec'aléegue. Qaláxasa ñi'me qomle sa ỹivídaxatreegue gaa'me noloqo'te, qá'a ỹasouaxat da'me loqopi'chi jen'me lalémaxasetpi 'me liquiỹacpi.
21Chan'eesa qomle 'uo ga' 'ami d'aqtaxanema da' 'enaac: “Píiỹa, jénjo' na' qadet'a qadec'alaxaqui, huet'éna,” 'uootaxa da' 'enaac: “Ñi' chá'a ñi'me,” 'ená'te 'au'amaqchiñiỹo' qomle. 22Qá'a jalcote qomle na' janac qovínaxanaxaicpi, 'enapeela't net'a nec'alaxaqui, 'uootaxa da' l'aqtáxanaxanec ñi' Dios. Qataxa jen'me ỹ'e't qomle naa'me n'anaqa qataxa naua' sa qoỹauanápiilo, da' doqovínaxan. Ỹitaxa 'éet'ec qomle, jen'me sóxote liquiỹacpi ñi' Dios da'me sétaaque ỹoqovin. 23Qaláxasa 'ami 'anloiteego' qomle, qá'a sóxote da' 'ami sanómaxanaxanque ỹima da'me dójo'.
Da'me l'iỹílaxasoxoc jen' siỹaxaua lec'óxot
(Mateo 24.29-35, 42-44; Lucas 21.25-36)
24Qaláxasa qom'chi ỹinoxodéegue gaa'me noloqo'te 'me 'queténaxaqui', qana'chi 'om qomle jañi' c'atena, qataxa qaỹa 'te lauaq ñi' 'auóxoic, 25qataxa nachiñi qomle jan' huaqchiñipi, ỹivíd'a deda qomle na' n'añaxacpi 'me huet'ot na' piỹem. 26Qaama'le qoỹila'aguet qomle jen' siỹaxaua lec'óxot da' naquétaaue na' ló'oc, ỹátaqta qaỹa 'te 'ená'am da'me l'añaxac qataxa da' li'ỹoxodic. 27Ỹim, qaama'le ỹamaqat'eelo na' lamaxa'spi, qaidi ỹiỹaxa't jen'me mai'chi liquiỹacpi, ỹachiỹoxota'aguelo naa'me chiỹaqpeeguelo naua' cuatro laỹa'chi, ỹivíd'ailo naua' loiquiaqa'te jen' 'aléua qataxa na' piỹem.
28'Anapaxaguiñíỹa qomle jaga' higo lichidic 'me qodaloqtenaxáatapega: Da'me jaga'me noleléegue jan' lepeepi, qana'chi 'ami 'auaỹáchiñii da'me ma'le sa qaỹádaiỹi naua' nta'pi. 29Qana'chi naq'áita nataq'en qomle 'aulói'ỹa da' di'ỹoq jen' chaqáina, qana'chi 'auaỹáchiñii 'ami da'me sóxote sa qaỹáaque ga' loiquiaqa'éna. Sóxote ma'le neségueetauo. 30Ỹátaqta 'eesása da'me 'ami senapegalo, jen'me 'uáiñi ỹima da' di'ỹoq qomle, chaliaxa da' sa ỹileu jen'me siỹaxadipi 'me natees'aita naa'me noloqo'te. 31Na' piỹem qataxa jen' 'aléua ỹinoxodéegue qomle, qaláxasa da' ỹ'aqtac qaỹa 'te loiquiaqa'.
32Qaláxasa ga'me nolo' qataxa ga' lalóqo' da'me, qaỹa 'te ga' ỹaỹáten, ỹivíd'a na' Dios lamaxa'spi piỹem lé'ecpi qataxa jen'me lec'óxot ñi' Dios. Na'chiñíta ñi'me ỹit'a 'me ỹaỹáten.
33Ỹátaqta 'anloitaiỹo' qomle qataxa 'avichiita't qataxa 'antamiñíitaco' qomle, qá'a sa 'auaỹáchiñii ga' nivídaqa'. 34Qá'a da'me 'ená'am ga' siỹaxaua qomle qaỹa'ague ga' taiỹi. Qaláxasa da'me jec, qana'chi ỹipataxaguet ga' l'acháqa' ga' lamaxa'spi. Qana'chi so'me ỹanem ñi' 'oonolec ga' l'onatac. Ỹim, qana'chi huaqátetapega ga' som ló'o da' neloséguem. 35Ỹátaqta 'anloitaiỹo' qomle, qá'a 'ami sa 'auaỹáchiñii ga'me lalóqo' da' nóvi' ga'me lalémaxaset ga' 'emec, qomle n'álchiiñi, 'uootaxa pí'ỹaxalaiñi, 'uootaxa ga' noinaqa' na' 'olégaxa, 'uootaxa da' ỹ'oxosáñi. 36Qá'a 'uo da' lepelaqtaxanaxac da' nóvi', qana'chi 'ami ỹilaloo'to' qomle 'au'ochíitac. 37Da'me ỹ'aqtac 'me 'ami senapegalo, da'me ỹima qoỹimíchiỹi, 'enaac: Ỹátaqta 'anlóitaiỹi qomle.
Currently Selected:
Marcos 13: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.