Marcos 10
10
So' Jesús ỹ'axat da' lasoxoc da' nañiima't gaua' nóua'
(Mateo 19.1-12; Lucas 16.18)
1So'me Jesús cá'ai di' Capernaum, qana'chi ỹic'áta di' 'aléua lenaxat Judea qataxa di'me 'aléua 'me p'aiỹet na' néte' so' ñáchi Jordán. Huá'a, qana'chi na' siỹaxadipi ỹitaxa lapoosop ga'me huét'a. Qana'chi so'me ỹitaxa dapaxaguenataxáatac, qá'a mai'chi n'onataguec. 2Qana'chi na' fariseopi nichaateuó'o so' Jesús da' sétaaque 'uo ga' 'chi huasoilégue qoỹin. Qana'chi qoỹinatec so'me da' 'uootaxa ỹiỹamqáchiiñi ga' siỹaxaua da' nañíi'me' jaga' loua. 3Qaama'le so'me 'enaaco':
—¿Jái'chi ga' 'ami ỹamaxalóo'te joca'li so' Moisés?
4Qana'chi 'enapega'to':
—So' Moisés ỹaséet'em ga' siỹaxaua da' nañíi'me' jaga' loua, qaláxasa ỹa'uo jan' lemalate da' nañíi'me', qana'chi ma'le ỹañoxot da' diimaxan.
5Qaama'le so' Jesús 'enaaco':
—So' Moisés ỹaseet'ema 'ami joca'li dójo' lamaxasóxonaxac, qá'a ỹasouaxat da' ỹátaqta d'añáiỹilo naa'me 'adiquidiaqtéldii'. 6Qaláxasa da'me chiỹoqóchii'ña jocalia'chi ỹímta ñi' Dios ỹa'uo jen' chaqáina, qana'chi “ỹauo'oi saua' siỹaxa'u, so' lé'em qataxa jaso' ỹauo.” 7“Chan'eesa ga' siỹaxaua, cá'ai ga' let'a qataxa jaga' lat'e, qaidi huaxaiỹet jaga' loua. 8Huá'a, qana'chi gaa'me 'ená'am da'me 'oonolec da' lasoxo'j.” Qana'chi gaa'me sa 'ená'am da' dos, nedot'a't da' 'ená'am da' 'oonolec. 9Chan'eesa ga' siỹaxaua sa ỹisoiỹilo gaa'me ỹ'onáxana't ñi' Dios.
10Joca'li huétr'a so' l'acháqa', qana'chi saua' lasoxoñii's ỹitaxa ỹachimaxatétrapeec da'me dójo' so' Jesús. 11Qana'chi so' Jesús 'enaaco':
—Ga' siỹaxaua da' nañíi'me' jaga' loua qataxa 'uoneguet jaga' ỹauo laqáỹa, qana'chi ga'me 'uo da' lavíỹaxaset, qá'a 'uoolégue jaga' 'uáichiiñi loua. 12Qataxa jaga' ỹauo da' nañíi'me' ga' loua, qana'chi 'uoneguet ga' lé'em laqáỹa, qana'chi jaga'me 'uo nataq'en da' lavíỹaxaset.
So' Jesús netameelégue na'me ñoqolqapiolec
(Mateo 19.13-15; Lucas 18.15-17)
13Qana'chi 'uo na' qondó'uo na' ñoqolqapiolec so' Jesús, qaidi sétaaque da'me huaselelégue, qaláxasa saua' lasoxoñii's nelaqátrapega na' 'uo na' nedótauo na' nootolec. 14Joca'li ỹauáachiỹi dójo' so' Jesús, qana'chi dalemata. Na'chi 'eetapegalo saa'me, 'enaac:
—Ỹa 'amachíi'ỹa na' ñoqolqapiolec da' nec'áteuo, 'ená'te 'au'óiỹapeeguet, qá'a da'me l'onataxanaxac ñi' Dios naqáina na'me 'ená'am na' huétaaue jen' ñoqolqapiolec. 15Ỹátaqta 'eesa da'me 'ami senapegalo, da' ga'me sa ỹadénaxat ga' nootolec da' ỹaconeguet da' l'onataxanaxac ñi' Dios da' ỹimata'a'téna, qana'chi ga'me sa ỹaqanatet da' ỹinoxoneuo.
16Qana'chi so' Jesús nesoxouo na' ñoqolqapiolec, netameelégue da' ỹanem da' 'ónaxaic ladíquiaxac, qataxa ỹima huaselelégue so'me.
So' nesoq saliaxanec dosétapegue' so' Jesús
(Mateo 19.16-30; Lucas 18.18-30)
17Joca'li so' Jesús ỹitaxa jec, qana'chi janac so' siỹaxaua naqalégoqot'ague. Qana'chi ỹisocoto naua' liliictel, qana'chi ỹachimaxatétapega so'me, 'enaac:
—'Am sóxodaic paxaguenataxanaxaic, ¿jái'chi ga'me séeta, da' qaidi senoxoneuó'o da' nec'alaxa 'me qaỹa 'te ga' loiquiaqa'?
18Qana'chi so' Jesús 'enaaco':
—¿Tá'nooqo'chi qonapii'ỹa sóxodaic? Qá'a qaỹa ga' sóxodaic, na'chiñíta ñi'me Dios 'me sóxodaic. 19'Am 'auaỹáte'n naua' naqátaxaco 'me 'enapega't: “'Ená'te da' 'anchíua'te' jaga' sa 'adoua; 'ená'te 'aualaataxan; 'ená'te da' 'aucachi; 'ená'te 'am pecaic; sa 'te 'auqovin ga' 'adaqáỹa; 'auqo'cha ga' 'adet'a qataxa jaga' 'adat'e.”
20Qana'chi so'me siỹaxaua 'enaaco':
—'Am paxaguenataxanaxaic, ỹima jénjo' s'étetac, chiỹoqóchii'ña ca'li jaỹim nootolec.
21Qana'chi so' Jesús ỹátaqta 'uo da' lauo'chi joca'li ỹilot'ot so'me. Qana'chi 'enapego', 'enaac:
—Ỹa 'oonolec da' maliaxa sa 'aué'et, 'eet'oi: 'oc, 'aumen qomle ỹima na' 'am huet'ot qataxa 'auanóoue na' choxodaqpi, qaidi 'uo qomle ga' 'adesaliaxa da' piỹem. Qomle 'adem, qana'chi jaỹim 'oquegue, na'chidi da' jaỹim 'auleetalégue.
22Qaláxasa so'me joca'li demachii'ỹi dójo', qana'chi sa ma'aguet qa'en, qana'chi jec, daquicoiỹi, qá'a ỹátaqta saliaxanec.
23Chan'eesa so' Jesús ỹilápii'nỹi, qana'chi 'enapegalo' saua' lasoxoñii's, 'enaac:
—¡Ỹátaqta 'uo da' laqalaic na' saliaxanqapi da' ỹinoxoneuó'o da' l'onataxanaxac ñi' Dios da' ỹimata'a'téna!
24Qana'chi saa'me lasoxoñii's ỹátaqta 'uo ỹoqo'chitem da'me l'aqtac, qaláxasa so' Jesús ỹitaxa v'iỹílaxalégue da' l'aqtac, 'enaac:
—Ỹalqolqa, ¡píiỹa da'me laqalaic ỹátaqta 'uo da' ỹinoxoneuó'o da' l'onataxanaxac ñi' Dios jen'me p'iỹá'a da' nesaliaxa! 25Ỹátaqta 'uo da' laqalaic jaga' naanáxanaq da' táaue qoỹin ga' lauac jaga' náicaiỹi, qaláxasa ỹátaqta p'asáima'te da' laqalaic ga' saliaxanec da' ỹinoxoneuó'o da' l'onataxanaxac ñi'me Dios.
26Qana'chi ca'li demachídee'gue da'me dójo' saa'me, qana'chi ỹátaqta demalaqtaxata'salo. Qana'chi mai'chi nachimaxatétapega'salo, 'enapega't:
—Qana'chi ¿jái'chogamaxa ỹaqanatet da' qonec'alaxatéegue?
27Qana'chi so' Jesús ỹilápegoovlo saa'me, qana'chi 'enaaco':
—Jen'me siỹaxadipi sa ỹaqanatet dójo', qaláxasa ñi' Dios ỹaqanatet, qá'a ñi'me qaỹa 'te ga' ỹaqalánaac.
28Qana'chi so' Pedro 'enapego' so'me, 'enaac:
—'Am qadesaliaxanec, qo'mi maa'le ñ'ónaxataqchiiñi ỹima jen'me qo'mi huet'oto, qana'chi 'am qolqátapegue'.
29Qana'chi so' Jesús 'enaaco':
—Ỹátaqta 'eesa da'me 'ami senapegalo, da' gamachaqaiga siỹaxaua da' 'uootaxa cá'ai ga' l'acháqa', ga' laqáỹa qataxa jaga' laqáỹa, let'a 'uootaxa lat'e, 'uootaxa loua qataxa lec'óqo'tepi, 'uootaxa ga' n'aléua, ỹasouaxat jaỹim qataxa da' n'aqtac 'me chiỹaqaỹi da' nec'alaxa, 30qana'chi ga'me ỹaconeguet naỹi da' ỹa huét'a jen' 'aléua ga' cien l'acháqa'pi, qataxa ga' laỹi, laqáỹa' ỹauo', lat'elpi, qataxa lec'oqtepi, qataxa na' n'aléuapi. Qataxa temaqaidi da' 'uo da' necanáguec, qaláxasa ga'me maliaxa nata't 'aléua ga'me qoỹanem qomle ga' nec'alaxa 'me qaỹa 'te loiquiaqa'. 31Qaláxasa jalcote qomle jen'me naỹi 'uáuta jen'me p'áteegue qoỹin qomle, qaláxasa nataq'en jalcote qomle jen'me naỹi p'áteegue, jen'me 'uáuta qoỹin qomle.
So' Jesús ỹitaxa ỹ'axát'a da' qoỹalaat
(Mateo 20.17-19; Lucas 18.31-34)
32Sóxote qodict'ague so' naq'aic 'me ỹilot'egue da' Jerusalén, so' Jesús 'uáuta, saua' lasoxoñii's 'chi ỹic'atralégue, saa'me ỹátaqta ỹoqochítapiỹi'salo qataxa d'óitapiỹi'salo. Qana'chi so' Jesús ỹitaxa ỹiỹáxanoovlo saua' doce lasoxoñii's da' ỹiỹotái'ỹalo, qana'chi ỹátaqta ỹ'axátet'ema saa'me da'me huápiỹi qomle so'me. 33'Enaac:
—'Ami 'auaỹáchiñiita naỹi da' saqat'ague da' Jerusalén, huá'a qomle di'me, qana'chi jen' siỹaxaua lec'óxot qoỹanóoue na' lasoxola'pi na' netaxaỹáxanaxanecpi da' qodetaxaỹapégue' ñi' Dios qataxa na' dapaxaguenataxáatapeec na' naqátaxacpi. Na'me 'me ỹa'uo qomle ga' ñalaataguec, qataxa jaỹim ỹanóoue na' ỹaqá'a lé'ecpi. 34Qana'chi jen'me qomle ỹátaqta jaỹim ỹiué'en, qataxa jaỹim ỹi'uaxaatalégue, qataxa qonatóqtaaue na' ỹatáxasoxoc, qataxa jaỹim ỹalaat. Qaláxasa qomle ỹivi't gaua' tres noloqo'te, qana'chi ỹitaxa jaỹim qonec'alaxadiséguem.
Da'me ỹiỹáxade'uo saua' Jacobo qataxa so' Juan
(Mateo 20.20-28)
35Qana'chi so' Jacobo qataxa so' Juan saa'me lec'óqo'te so' Zebedeo, saa'me nichiitot so' Jesús. Qana'chi 'enapega'to':
—'Am paxaguenataxanaxaic, sétaaque da' qo'mi 'auanema ga'me siỹáxanqaaque.
36Qana'chi so'me ỹina'to' saa'me, 'enaac:
—¿Jái'chi ga'me sétaaque da' 'ami sanema?
37Qana'chi saa'me 'enapega'to':
—Qo'mi sétaaque da' qomle 'am 'onalégue ga' 'ad'onataxanaxac 'me qaỹa 'te 'ená'am da' li'ỹoxodic da' 'am net'a, qana'chi n'óota da' ga' 'oonolec da' senqáta na'ague qomle na' 'auaỹáten, ga' laqáỹa na'ague na' 'an'emaq.
38Qana'chi so'me Jesús 'enapegalo saa'me, 'enaac:
—'Ami sa 'auaỹáchiñii ga'me tátee'ga da' 'aviỹáxañiitapee'uo. ¿Qo'li 'auañoxochii da' 'ovíỹapiỹi da' 'queténaxac 'me sega'me jaỹim qoniỹómaxanỹi qomle, qataxa da'me chiláxac 'me sáaue qoỹin?
39Qana'chi saa'me 'enapega'to':
—Já'a, sesetáxaguet.
Qana'chi so' Jesús 'enaaco':
—'Eesa da' 'ami 'auañoxochii qomle da' 'queténaxac 'me sega'me jaỹim qoniỹómaxanỹi, qataxa da' chiláxac 'me sáaue qomle. 40Qaláxasa da' lasoxoc da'me sétaaque 'oñí'ỹague na' saỹáten, qataxa na' ñ'imaq, jaỹim sa 'te qoỹanem da'me san. Qá'a na'chigáta ga'me sóxote qoỹaqátaxatapiỹe't 'me qoỹanem qomle.
41Joca'li saua' laqáỹa' diez lasoxoñii's demachítre'uo da'me dójo', qana'chi qoỹip'ague'n saua' Jacobo qataxa so' Juan. 42Qaláxasa so' Jesús ỹiỹáxanaavlo saa'me, qana'chi 'enapegalo, 'enaac:
—'Ami sóxote da' 'auaỹáchiñii da' lasoxoc na' net'alpi 'me ỹilo'ogue na' ỹodapecachi siỹaxadipi, da' na'me 'ená'am ga' nadípa da' ỹamaqaac na' laỹipi, qana'chi jen' sóxote naláuopi, jen'me ỹátaqta ỹ'étec da' loqochoxo qa'en da' lamaxasóxonaxac na' laỹipi. 43Qaláxasa da' 'oñíita, sa naq'áita da'me dójo'. Na'chidáta da' ga' sétaaque da' p'asáiỹi da' 'oñíita, qana'chi ỹacono' da' lelatac na' laỹipi. 44Qataxa gamachaqaiga da' 'oñíita da' sétaaque da' nasoxola', qana'chi naqaiga 'me lelatac na' laỹipi ỹima qomle. 45Qá'a jen' siỹaxaua lec'óxot, jen'me sa janac da' qaidi neloxot. Na'chidáta da' sétaaque nelatac qataxa da' ỹan da' l'óiỹaxac da' 'ená'am qa'en jaga' laso'vi da' qaidi jalcote na' qonec'alaxatéegue.
So' Jesús 'en nelóiỹi so' qanam Bartimeo
(Mateo 20.29-34; Lucas 18.35-43)
46Qana'chi sóxote qoỹivíta di' noic Jericó. Qana'chi ca'li sóxote ca'aidi so' Jesús, náictapee'to saua' lasoxoñii's qataxa jalcote so' laỹi siỹaxadipi. Qana'chi 'uo so' qanam lenaxat Bartimeo. So'me lec'óxot so' Timeo. Nes'oota'nỹi na' lai so' naq'aic, dasélaxatac. 47Qana'chi so'me joca'li demachiiỹet so' Jesús 'me Nazaret lé'ec, qana'chi diỹáxan so'me, 'enaac:
—¡'Am Jesús, 'me lec'óxot so' qadet'a David, jaỹim 'avichoxoden qomle!
48Qana'chi jalcote na' nelaqátapega so'me, da' sétaaque da' ỹimáqta. Qaláxasa so'me 'eesamale ỹátaqta netenec da' liỹáxanaxac, 'enaac:
—¡'Am lec'óxot so' qadet'a David, jaỹim 'avichoxoden qomle!
49Qana'chi so' Jesús v'iiỹet, qana'chi 'enaaco':
—Ỹa 'aviỹáxañiỹa ñi'me.
Qana'chi qoỹiỹáxanee'ga so'me qanam, qana'chi qoỹinapéga:
—'An'añaxat qomle, 'oñíseguem, qá'a 'am qoniỹáxanee'ga.
50Qana'chi ỹasaxáiỹi so' lapoto, qana'chi nenódiseguem da' ỹic'áta so' Jesús. 51Qana'chi so' Jesús ỹinatétac so'me, 'enaaco':
—¿Jái'chi ga' sétaaque da' 'am séet'ec?
Qana'chi so'me qanam 'enaaco':
—'Am paxaguenataxanaxaic, sétaaque da'me ñilóiỹi 'auen.
52Qana'chi so' Jesús 'enapego':
—'Oc qomle, sóxote 'am n'óota, qá'a 'au'amaqtenataxan.
Huá'a, qana'chi so'me qanam ma'le nelóiỹi, qana'chi 'equegue so' Jesús.
Currently Selected:
Marcos 10: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
