Hebreos 6

1Chan'eesa qo'mi 'ónaxaic da' ñichíỹaqtaseguem, qaidi sevítaxa da' qo'mi ỹ'axaiqa. Ñ'ónaxataq qomle jen'me 'uáichiiñi qanapaxaguenataguecpi so' Cristo. Qataxa sa sañoxotaq da' s'iỹílaxasoxolégue da' s'axátaqtac da' ladic ga' siỹaxaua da' ca'ai naua' loico 'me ỹauécteda da' neleuaxa jega'me, qataxa da' qop'iỹá'a ñi' Dios, 2qataxa da' ladic da' qonachiláxan ga' siỹaxaua, qataxa da' qouaseltalégue jen' 'amaqténataxanaxaicpi, qataxa da' ladic qomle ỹitaxa qonec'alaxatéegue jen' napa'lpi, qataxa qomle qonimit ỹima jen' chaqaina. 3Naqaida qomle da' senqát'ec, da' 'uootaxa qo'mi ỹaseet'ema ñi'me Dios.

4Qá'a jen'me ma'le sóxote da' ỹaỹáten jega'me ỹan ñi' Dios, qataxa sóxote da' ỹaconguet so' Espíritu Santo, 5qataxa da' ma'le ỹaỹáten da' l'aqtac ñi' Dios, qataxa jeda'me n'añaxac 'me huét'a jega'me 'aléua 'me maliaxa naỹa'quéna, 6qana'chi jen'me siỹaxadipi, da' 'uootaxa ỹitaxa qoséegue, qana'chi sa ỹitaxa taa'le ca'ai qoỹin naua' loico, qá'a jen'me 'ená'am da' ỹitaxa ỹanáỹi jaso' sodooso so' lec'óxot ñi' Dios qataxa qoỹauáachiỹi 'en da' ỹi'uena't jeso'me. 7Jen'me siỹaxadipi 'ená'am ga' 'aléua 'me na'chi 'eeta't da' cáñi qa'en jen' huétep da' talégue. Jega'me 'aléua da' 'uootaxa ỹátaqta 'ónaxaic qa'en jen' jala ga' lañiisec jega'me d'onataxaatapeelégue, qana'chi jega'me 'uo da' nichoxodénataguec 'me chiỹoqo'ot ñi' Dios. 8Qaláxasa jega'me 'aléua da' 'uootaxa nolelelégue jan' ỹaxat qataxa jen' lolelaxa, qana'chi jega'me ỹátaqta qaỹa 'te ga' náỹi; taỹá'a da' 'uo ga' ne'uaxánaguec 'en ñi' Dios, qataxa taỹá'a da' qoỹigóoue.

Da'me qanaquitaxac 'me qo'mi sa nedámchidiñi qa'en

9'Ami ỹaqai'ỹolqa, qo'mi temaqaidi da' 'uootaxa 'éeta dójo' jeda'me qadetaxaỹaxac, qaláxasa qo'mi saỹátenaq da' 'oñíita jeda'me let'ádaic 'anchoxodénataỹiquii 'me chiỹaqaỹi da' nec'alaxa. 10Qá'a ñi' Dios sa ỹaqanatet da' 'uootaxa sa ỹipaguelégue ga' l'aqtac. Qataxa jiñi'me sa petelaxaguet da' 'ad'onataxanaxaquii qataxa da' 'adauochidíỹaxaquii jena'me 'adaỹii 'me 'ad'amaqténataxanaxauai, jeda'me maliaxa 'oquiit'ot naỹi da' 'av'íchiitac. 11Qaláxasa qo'mi sauoqótaaque ga' 'oonolec da' 'oñíita da' quet'ot qomle da' n'añaxataxac, cha ỹivíde'ta ga' loiquiaqa', qaidi ỹátaqta ỹipaquíchiỹi ỹima jen'me 'anaquichíitaaque. 12Qataxa sa siỹamaxadénaq da' 'ami 'avídii'ỹa da' qaỹa ga' 'adesapátaxaquii, na'chidato' da' 'ami 'auadénaxachii da' lasoxoc jen'me chiỹaqaỹi da' lip'iỹáxac qataxa da' napogáxadenaxac, qana'chi ỹaconguet jeda'me ỹaloxóotac ñi' Dios.

13Qá'a ñi' Dios joca'li 'uo da' ỹaloxónapecot so' Abraham, qaláxasa jiñi'me mai'chiñi da' detaqátapeela't, qá'a qaỹa ga' laqáỹa let'ádaic da' 'uootaxa ỹanem ga' l'aqtac. 14Qana'chi 'enaaco': “Ỹátaqta let'ádaic qomle da' ỹichoxodénataxanaxac 'am sanem, qataxa ỹátaqta sa lec'óxotolec qomle ga' 'ac'oqtepi 'am sanem.” 15Qana'chi so' Abraham ỹátaqta jalcote da' nepogoxóinaxac da' ỹiuatétaaque dójo', qana'chi jeso'me ỹivíd'a da' ỹaconguet jeda'me ỹaloxónapecot joca'li ñi' Dios. 16Jen' siỹaxadipi, da' 'uootaxa ỹan ga' l'aqtac, jen'me ỹanem da' l'aqtac jega'me nasoỹá'ña jen'me. Qataxa da' 'uootaxa qoỹan ga' n'aqtac da' ỹátaqta qoỹipagaqchíichiỹi, qaláxasa qaỹa 'te taa'le 'uo ga' qoncotátapiỹi. 17Chan'eesa ñi' Dios ỹan da' l'aqtac da' ỹátaqta ỹipaquíchiỹi jega'me ỹaloxóotac, qá'a jiñi'me sétaaque da' ỹaỹátenaxanaxaata jen'me taỹá'a qom'chi da' ỹaconguet jeda'me ỹaloxóotac, da' jiñi'me ỹátaqta ỹipagaqchíichiỹi da' ỹí'et jega'me ỹaloxóotac, sa ỹadálaxat ga' l'aqtac. 18Qana'chi naqaida da' 'éet'ec da' huo'oi naua' dos 'me sa qoỹañoxo't da' qonchíỹaxa't, jenaa'me tadeeto' sa ỹañoxot da' doqovínaxan ñi' Dios, naqainaua naua' ỹachiỹoxotapiilo ñi' Dios da' qo'mi ỹanema da' qad'añaxac, qo'mi 'me sapiinoqot jiñi'me qataxa s'amaqténaq jeda'me quitaxac 'me qo'mi ỹanema. 19Dójo' qanaquitaxac, naqaida jeda'me qo'mi ỹ'añaxachidíñi qataxa jan'me qadiquidiaqte. Jeda'me 'ená'am ga' lequet jaga' nilicota. Dójo' qanaquitaxac, jeda'me nesócta'ña jega' p'áuo so' lapadénaxat jega' tamnaxaqui 'me net'ague da' piỹem, 20jeso'me ỹinoxoneuó'o joca'li so' Jesús, da' qaidi ỹ'ouáteegue ga' qadadic. Qana'chida da' 'éet'ec so' Jesús ỹivíd'a da' na'chiso so' 'oonolec qadetaxaỹáxanaxanec da' detaxaỹapégue' ñi' Dios, 'ená'am da' lasoxoc so' Melquisedec joca'li.

Currently Selected:

Hebreos 6: PLGNT93

Highlight

Copy