Hebreos 7

So' Jesús netaxaỹáxanaxanec da' qodetaxaỹapégue' ñi' Dios, 'ená'am so' Melquisedec

1Jeso'me Melquisedec, jeso'me naqaiso so' let'a jen'me néta'ña di' Salem qataxa letaxaỹáxanaxanec jen' siỹaxadipi da' qodetaxaỹapégue' ñi' Dios 'me let'ádaic. So' Abraham joca'li ma'le n'iỹílaq, chiỹoqót'a so' laataxac 'me huáaue joca'li ỹalaa't saua' net'al, qana'chi jeso'me Melquisedec, jeso'me huaqat'aguet so' Abraham, qana'chi ỹanem da' lichoxodénataxanaxac jeso'me. 2Qana'chi so' Abraham ỹanem jeso'me ñi' 'oonolec so' diez jen'me lootáxanaxatpi 'me ỹachiỹoxotáaue so' laataxac. Jeda'me nenaxat Melquisedec da' 'uáichiiñi náỹi 'eet'oi: “Net'a 'me 'ónaxaic da' lasoxoc.” Qataxa ỹasouaxat jeso'me na'chiso so' let'a jen' néta'ña di' Salem 'me nataq'en da' náỹi 'eet'oi: “N'emáxac,” chan'eesa dójo' nenaxat nataq'en da' náỹi 'eet'oi: “Net'a 'me nedo't da' n'emáxac.” 3Jeso'me qaỹa 'te let'a qataxa jaga' lat'e qataxa ga' huá'au let'alpi. Qataxa jeso'me sa qoỹ'axat da' 'éeta ga' lañoxoc qataxa ga' leleuaxa. Qana'chida da' 'éeta jeso'me na'chi 'ená'am da' lasoxoc so' lec'óxot ñi' Dios, jeso'me na'chi 'eeta't da' netaxaỹáxanaxanec da' qodetaxaỹapégue' ñi' Dios.

4Naỹi 'ami 'aulóichiỹi da' 'éeta da' l'amaqchic so' Melquisedec. Chan'eesa jeso'me huá'au qadet'a Abraham ỹanem joca'li jeso'me jaso' 'oonole jen' diez na' lootáxanaxatpi 'me ỹachiỹoxotáaue so' net'alpi 'me nalaatétapegue' joca'li. 5Naua' laqátaxaco so' Moisés ỹ'axa't jen' netaxaỹáxanaxanecpi 'me lec'oqtepi so' Leví, da' 'uo da' n'aqtac da' qaidi qoỹiseeten jañi' 'oonole jen' diez lalémaxasetpi ỹima jen' siỹaxadipi, qaamaxa jen'me mai'chi laỹi lé'ecpi, nataq'en lec'oqtepi so' Abraham. 6So' Melquisedec, jeso'me temaqaidi da' sa lec'óxot so' Leví, qaláxasa na'chi 'ená'am jeso'me qoỹiseeten jañi' 'oonole ỹima jen' lalémaxasetpi so' Abraham, jeso'me 'uo joca'li da' ỹaloxónapega ñi' Dios. Huá'a, qana'chi so' Melquisedec ỹanem da' nichoxodénataguec so' Abraham. 7Qataxa qaỹa ga' ỹañoxot da' ỹoqolguet dójo', da' jega'me dechoxodénataxan na'chiga ga' let'ádaic, sa 'ená'am ga' qoỹichoxoden. 8Dójo' senqáta naỹi jen'me ỹacootapeeguet jañi' 'oonole jen' diez lalémaxasetpi na' siỹaxadipi, jen'me taỹá'a da' ỹileu. Qaláxasa dójo' 'éeta so' Melquisedec naua' l'aqtaqa ñi' Dios ỹ'axa't jeso'me da' na'chi 'eeta't da' nec'alétaiỹi. 9Qataxa na'chi 'éeta nataq'en jeso'me Leví qataxa jen' letaxaỹáxanaxanecpi jen' siỹaxadipi da' qodetaxaỹapégue' ñi' Dios 'me lec'oqtepi jeso'me, jen'me naỹi qoỹiseeten jañi' 'oonole jen' nalémaxasetpi, da' jen'me nataq'en ỹaneuo joca'li jañi' 'oonole jen' lalémaxasetpi da' ỹanot so' Melquisedec joca'li so' Abraham deseeténataxan. 10Qá'a 'eesa da' jen'me 'ená'am joca'li da' dasouó'o so' Abraham joca'li so' Melquisedec huaqat'aguet jeso'me, temaqaidi da' maliaxa sa niỹíñi jen'me.

11Jen' lec'oqtepi so' Israel joca'li ỹaconguet jen' naqátaxacpi, qaláxasa chiỹaqaỹi qoỹin jen' letaxaỹáxanaxanecpi 'me lec'oqtepi so' Leví, jen'me nataq'en lec'oqtepi so' Aarón. Jénjo' netaxaỹáxanaxanecpi toqo' da' ỹañoxot da' nalóchiiñi qa'en da' lasoxoc jen' quétapegue' jen' naqátaxacpi, qana'chi sa ỹañoxot taa'le da' ỹiuen da' janac ga' laqáỹa netaxaỹáxanaxanec da' qodetaxaỹapégue' ñi' Dios, da' 'ená'am da' lasoxoc so' Melquisedec, sa 'ená'am so' Aarón. 12Qá'a da' qoỹadálaxat jen' netaxaỹáxanaxanecpi, qana'chi nataq'en ỹiuen da' qoỹadálaxat jen' naqátaxacpi. 13Qataxa jeso'me qadesaliaxanec 'me ỹ'axa't joca'li naua' l'aqtaqa ñi' Dios, jeso'me chiỹaqaỹi na' laỹi lec'oqtepi so' Israel, jen'me qaỹa 'te ga' chiỹaqáaue da' qaidi netaxaỹáxanaxanec. 14Qá'a ỹima da' qoỹaỹáten so' qadesaliaxanec da' chiỹaqáaue so' lec'oqtepi so' Judá, jen'me sa detaxaỹá'a joca'li so' Moisés joca'li ỹ'axátetac da' ladic jen' netaxaỹáxanaxanecpi.

15Qana'chi dójo' ỹátaqta ỹátaqtegue da' lasoxoc joca'li di'ỹoq jeso'me laqáỹa netaxaỹáxanaxanec, 'me 'ená'am da' lasoxoc so' Melquisedec, 16joca'li jeso'me qoỹanaỹi da' netaxaỹáxanaxanec. Qaláxasa sa chiỹaqáaue ga' nec'oqtepi 'me ỹ'axat jen' naqátaxacpi da' chiỹaqaỹi ga' netaxaỹáxanaxanec. Qá'a jeso'me chiỹaqaỹi da' l'añaxac da' n'óiỹaxac 'me sa qoỹañoxot da' qonoláxachiñi. 17Qá'a dójo' na'chida da' 'enaac ñi' Dios joca'li ỹ'axát'a jeso'me, 'enaaco':

'Am na'chi 'eeta't qomle da' 'am letaxaỹáxanaxanec jen' siỹaxadipi da' jaỹim qodetaxaỹapégue',

na'chi 'auená'am da' lasoxoc so' Melquisedec.

18Chan'eesa jeso'me 'uáichiiñi namaxasóxonaxac, jeso'me qonsoỹíñi, qá'a jeso'me qaỹa 'te ga' l'añaxac, qataxa qaỹa 'te ga' náỹi. 19Qá'a jen'me laqátaxacpi so' Moisés sa ỹañoxot da' naloqchíichiiñi da' lasoxoc jen' siỹaxadipi. Qaláxasa nemenguet qoỹin da'me qanaquitaxac 'me qaỹa 'te 'ená'am, na'chida da' chiỹaqaỹi da' tadeeto' ñichíỹaxa'uo ñi' Dios.

20Qataxa ñi'me Dios joca'li ỹí'et dójo', qaa'le ỹátaqta ỹan so' l'aqtac da' qaidi ỹipaquíchiỹi. 21Jen'me laỹi netaxaỹáxanaxanecpi joca'li qoỹidéuo, qaa'le sa qoỹan ga' n'aqtac, da' qaidi qoỹipagaqchíichiỹi. Qaláxasa dójo' 'éeta jeso'me laqáỹa netaxaỹáxanaxanec, qaa'le ỹátaqta 'uo joca'li so' n'aqtac qoỹan. Qá'a naua' n'aqtaqa 'me nedétrañi 'eet'oi:

Ñi' qadasoxola' ỹan da' l'aqtac, 'me sa ỹadálaxat, 'eet'oi:

'Am na'chi 'eeta't qomle da' 'am letaxaỹáxanaxanec jen' siỹaxadipi da' jaỹim qodetaxaỹapégue',

na'chi 'auená'am da' lasoxoc so' Melquisedec.

22Chan'eesa so' Jesús naqaiso so' ỹátaqta táchiiñi qa'en jega'me ỹamaxataxac 'me ỹátaqta ỹiỹamqáchiiñi, sa 'ená'am jeso'me 'uáichiiñi. 23Jen' laỹi netaxaỹáxanaxanecpi jen'me ỹivíd'a da' ỹátaqta jalcote, qá'a jen'me ỹileet'aguet, sa na'chi 'eeta't. 24So' Jesús, qaamaxa sa ỹileu. Chan'eesa sa ỹa'uo ga' laqáỹa da' ỹanaỹi da' l'onataxanaxac da' qodetaxaỹapégue' ñi' Dios. 25Chan'eesa jeso'me da' 'chi táteegue da' nec'alaxatéegue jega'me chiỹoqóchiỹi jeso'me da' nañanot ñi' Dios. Qá'a jeso'me na'chi 'eeta't da' nec'alétaiỹi, da' qaidi netameetapecot ñi' Dios, netameetapeelégue jen'me.

26Chan'eesa so' Jesús naqaiso so' 'oonolec qadetaxaỹáxanaxanec da' detaxaỹapégue' ñi' Dios 'me souénaqtaaque. Qá'a jeso'me ỹátaqta ỹoqovíta, 'ónaxaic da' lasoxoc, qataxa qaỹa 'te ga' loic, qataxa sa qoneuogaqtenguet qoỹin jen' 'itaxalóxoicpi, qataxa jeso'me net'ague qoỹin da' lai di' piỹem. 27Sa 'ená'am ga' laqáỹa lasoxola' jen' netaxaỹáxanaxanecpi da' ỹiuen da' ỹ'áuaxañi da' ỹigóoue jaga' lachítaqtaxanaqte ỹiméda naua' noloqo'te, da' qaidi qoỹapalaxa't naua' mai'chi loico, ỹim, qataxa jec na' laỹi siỹaxadipi. Qaláxasa so' Jesús 'oonolec da' ỹa'uo jaso' lachítaqtaxanaqte da' ỹaneuo joca'li mai'chi ỹan da' l'óiỹaxac. 28Qataxa jen' laqátaxacpi so' Moisés chiỹaqaỹi da' qoỹidéuo da' lasoxola' jen' netaxaỹáxanaxanecpi jega'me siỹaxaua 'me sa nalóiñi. Qaláxasa jeda'me l'aqtac ñi' Dios 'me ỹan da' qaidi ỹipaquíchiỹi, 'me ỹan joca'li qaỹat'ague jen' naqátaxacpi, jeda'me chiỹaqaỹi da' qoỹidéuo da' lasoxola' qoỹin jen' netaxaỹáxanaxanecpi so' lec'óxot Jesús, jeso'me na'chi 'eeta't da' nalóchiiñi qoỹin da' lasoxoc.

Currently Selected:

Hebreos 7: PLGNT93

Highlight

Copy