یوحنا 14
14
مِنِم رئی، مِنِم حخیخت، مِنِم ژییاین
1«سِتار اژ دلتو نُئِری. ایمونتون اَر خدا داشدوئی؛ ایمونتون اَر مِن‌یش داشدوئی. 2اِنوم مال باوَه آسمونی مِه جا فِرِهءَ، اَرّ هُنَ نوئیا موئِتِم بینتو مَچِم تاگَه جای اَرِه هُمَه آمادَه کَم. 3ئو هر وخد چِم ئو جامی اَرِه هُمَه آمادَه کِرد، اِدوارَه مام ئو هُمَه میَرِم اَرِه تک ووژِم، تاگَه اَر اورَه گه مِه هم، هُمِه‌یش بوئینو. 4جای گه مِنَ مَچِم رئیَ مَذانینونی.» 5توما وِتَ بی: «آقا ایمَه جُ‌جُ نِمَذانیم مَچین اَرِه کو، اَسَه چطورَ مَتونیم رئیِهَه بِذانیم؟» 6عیسی وِتیَ توما: «مِنِم رئی، مِنِم حخیخت، ئو مِنِم ژییاین؛ هُیچ کس نِمای اَرِه تک باوَه مَر وَه‌سونگَ مِنا. 7اَرّ مِنتونَ مَشتاسیا، باوَه مِن‌یشتونَ مَشتاسیا؛ مِنتائای دُما یَه اوءَ مَشتاسینو ئو اوتو دیَ.» 8فیلیپُس وِتیَ عیسی: «آقا، باوَه نشونمو دَ، گه هَر یَه اَرِنمو بسَ.» 9عیسی وِتَ بی: «فیلیپُس، مِدت فِرِه‌ی وَه‌گَردتو بیمَ، یانی هَنی مِنتو نَشتاسیَ؟ کسی گه مِه دیَسی، باوَه دیَسی اِسَه چطورَ گه موشین ”باوَه نشونمو دَ“؟ 10یانی باوار نِرین گه مِه هام اِنوم باوَه‌م ئو باوَه‌م ها نوم مِن‌اِر؟ قصَه‌لی گه مِنَ موشِمَ بینتو اژ وَر ووژِم نیَ، بلکِم اژ باوِه کَ گه لیز گِرتیَسی اِنوم مِه، اَوَه‌‌سَ گه کارَل ووژ اَنجومَ مِ. 11ایی قصَه‌مَ باوار کَن گه مِه هام اِنوم باوَه‌م ئو باوَه ها نوم مِن‌اِر؛ یاگَه وَه خاطر اَ کارَلما گه کِرد، مِه باوار کَن.
12«حخیختاً، موشِمَ بینتو، اَوَه گه ایمونَ مِه داشدوئیتی، اویش کارَلی گه مِنَ مَهَم، مِهِه، ئو جُ‌جُ کارَل کَلِنگتِر اژ یوئن‌یشَ مِهِه، اَرِیَگه مِنَ مَچِم اَرِه تک باوَه. 13ئو هر چَتونی وَه نُم مِه بِ، اَنجومَ میَمی تاگَه باوَه اِنوم کُر جِلال بِگِری. 14اَرّ چیتونی وَه نُم مِه اژ مِه بِ، اَوَه اَنجومَ میَم.
وَدَه روح‌القدس
15«اَرّ مِه دوس دیرینو، فِربونَلِم بارِنَ جا. 16ئو مِه اژ باوَه‌مَ مِ ئو، او هِنارَسی‌تِرَ مِئَه بینتو گه هَر وَه‌گَرد هُمَه بو، 17یانی روحِ حخیخت گه دنیا نِمَتونی بِچوتی‌ِ گِرد، اَرِیَگه نه اوءَ موئینی ئو نه مَشتاسِتی؛ مِنتائای هُمَه اوءَ مَشتاسینو، اَرِیَگه اَر تک هُمَه لیزَ مَگِری ئو مَمینی اِنوم هُمَه.
18«بی‌کس نِمِیلِمتو؛ مام اَرِه تَکتو. 19دُما مِدتی‌تِر دنیا دیَر مِه نِموئینی، مِنتائای هُمَه مِنَ موئینینو، اَرِیَگه مِه زِنیئِم، هُمِه‌یش زِنِه‌یَ مِهِینو. 20اِ اَ روژَ، مَذانینو گه مِه هام اِنوم باوَه‌م ئو هُمَه هاینون اِنوم مِه ئو مِه هام اِنوم هُمَه. 21اَوَه گه حکمَلِم دیری ئو ماریون‌َ جا، اَوَه‌‌سَ گه مِه دوس دیری، ئو اَوَه گه مِه دوس دیری، باوَه‌م دوس دیرِتی ئو مِن‌یش دوس دیرِمی، ئو ووژِم اَری ظاهرَ مَهَم.»
22یهودا، نه اَسخَریوطی، اَژی پِرسی: «آقا، چطورَ گه میا ووژت اَر ایمَه ظاهر کِین، مِنتائای نه اَر ایی دنیا؟» 23عیسی جوواو داتی: «اَرّ کسی مِه دوس دیری، کلوم مِنَ ماریَ جا ئو باوَه‌م دوس دیرِتی، ئو ایمَه مایمی اَرِه تک ئو وَه‌گَرد او لیزَ مَگِریم. 24اَوَه گه مِه دوس نِری، کلوم مِه نِماریَ جا؛ ئو ایی کلومَ گه مَشتوئینو اژ مِه نیَ، بلکِم اژ باوِه کَ گه مِه کِل‌کِردیَسی.
25«ایی چیئَلمَ وخدی وِتَ هُمَه گه هَنی هامَ گَردتو. 26مِنتائای اَ هِنارَسَ، یانی روح‌القدس، گه باوَه وَه نُم مِه کِلَ‌مِهِیتی، او کُل چی تیَلیمتونَ مِ ئو هرچی گه مِه وِتمَ بینتو، ماریَ ویرتو. 27اَرِه هُمَه سِتارَ مِیلِمَ جا؛ سِتار ووژمَ میَمَ بینتو. اَ چیئَه گه مِنَ میَمَ بینتو، اِجور اَ سِتاری نیَ گه دنیا مِئَه بینتو. سِتار اژ دلتو نُئِری ئو هِراسو نوئن. 28شنَفتِتو گه وِتمَ بینتو، ”مِنَ مَچِم، مِنتائای اِدوارَه مام اَرِه تَکتو.“ اَرّ مِنتو دوس باشتا، خَوشیتونَ مَهَرد گه مَچِم اَرِه تک باوَه‌م، اَرِیَگه باوَه اژ مِه کَلِنگتِرَ. 29اِسگَه وِر اژ یَگه اَنجوم بِگِری وِتمَ هُمَه، تا وخدی گه اَنجوم بِگِری ایمو بارینو. 30دیَر ویشتِر اژ یَه قصَه‌تونَ گَرد نِمَهَم، اَرِیَگه رِئیس ایی دنیا گه شِطونَ دیری مای. او هُیچ ادعای اَر مِه نِری؛ 31مِنتائای مِه اَ کارَ مَهَم گه باوَه فِربو داسیَ مِه، تاگَه دنیا بِذانی گه باوَه دوس دیرِم. اِسگَه هیزگِرِن، اژ ایرَه بِچیم.
Currently Selected:
یوحنا 14: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
