یوحنا 13
13
عیسی پال شاگردِلَ مَشوری
1وِر اژ عِد پِسَخ، عیسی وَه‌یاآگه مَذِناسدی سات چیئِنی اژ ایی دنیا رَسیَ تا بِچو اَرِه تک باوَه، تاگَه آخِر مِحبت کِردیَ کسِ‌کار ووژ گه اِنوم ایی دنیا دوسو داشدی.
2موقَع شُم بی. ابلیس وِرِکار نایت‌ِ دل یهودا اَسخَریوطی، کُر شَمعون، گه عیسی بیَ گیر دشمن. 3عیسی گه مَذِناسدی باوَه کُل چی داسیَ دس اوآ، ئو اژ تک خدا هاتیَ ئو مَچو اَرِه تک او، 4اژ سر شُم هیزگِرتی ئو چوخا اِوَر کَنی ئو حوله‌ی هیزداتی، بَسدی اَر قِ ووژ. 5اَسَه آو رِشونی اِنوم تَشت ئو بِنیا ناتی اَر شورین پال شاگردَل ئو حُشگا کِردِنو وَه حوله‌ی گه اِسَر قِ بیتی. 6وخدی گه رَسیَ شَمعونِ پطرس، او وِتیَ عیسی: «آقا، یانی تو پال مِنَ مَشورین؟» 7عیسی جوواو داتی: «اِسگَه نِمَفیَمین گه چَه مَهَم، مِنتائای بعدِنَ مَفیَمین.» 8پطرس وِتَ بی: «هرگِس پال مِه نِمَشورین!» عیسی جوواو داتی: «اَرّ نَشورمِت دیَر قط خدافظیَ.» 9شَمعونِ پطرس وِتی: «آقا، فَخَد پالِم نه، دَسَل ئو سَریشِم بشور!» 10عیسی جوواو داتی: «اَوَه گه حموم کِردیِ، سِرَن‌تاپا تَمیسَ ئو شورین نِمِیتی، بِخِر اژ پالی. ئو هُمَه پاکینو، مِنتائای نه کُلتو.» 11اَرِیَگه عیسی مَذِناسدی کی اوءَ مِئَه گیر دشمن، ئو اَرِه یَه وِتی: «کُلتو پاک نیئینو.»
12دُما یَگه عیسی پائلو شوریتی، چوخا ووژ کِردیِ وَر ئو اِدوارَه نیشت اَر سر سِفِرَه شُم. اَسَه اَژینو پِرسیتی: «آیا اَ چیئَه گه اَرِنتو کِردِم فیَمینو؟ 13هُمَه موشینونَ مِه استاد ئو آقا، ئو دُریس‌یشَ موشینو، اَرِیَگه هُنِ‌یشَ هم. 14اِسَه اَرّ مِه گه آقا ئو استاد هُمَه‌م، پال هُمَه‌م شوری هُمِه‌یش باس پال یَکتِری بِشورینو. 15اَرِیَگه مِه وَه اَنجوم دائِن ایی کارَ، سرمقشمی داسَ بینتو تاگَه هُمِه‌یش هَرهُنَ بِهِینو گه مِه اَرِه هُمَه‌م کِرد. 16حخیختاً، موشِمَ بینتو، نه خُلُم اژ اَرباو ووژ کَلِنگتِرَ، نه قاصی اژ اَوَه گه او کِل‌کِردیَسی. 17اِسگَه گه یوئنِلَ مَذانینو، خَوزگالَ ووژتو اَرّ اونِلَ اَنجوم دِینو.
18«اَ چیئَه گه موشِم اِبارَه کُل هُمَه نیَ. مِه اونَلی گه دیاریِم کِردیَ، مَشتاسِم. مِنتائای ایی نُخسَه مقدّسَ اِنوم زبور باس اَنجوم بِگِری گه ”اَوَه گه نُو مِنَ میری، اَرضد مِه هیزگِرتیِ.“ 19اِسگَه وِر اژ یَگه اَنجوم بِگِری، موشِمَ بینتو تا وخدی گه اَنجوم بِگِری، ایمو بارینو گه مِه هم. 20حخیختاً، موشِمَ بینتو، هر کی بِچوءِ گِرد اَوَه گه مِه کِلَ‌مَهَمی، چیَسِ گِرد مِه، ئو هر کی بِچوءِ گِرد مِه، چیَسِ گِرد اَوَه گه مِه کِل‌کِردیَسی.»
21عیسی دُما ایی گپَ گه وِتی، اِنوم روح ووژ سِتار اَژی بِریاتی، آشگارا اِلوم کِردی: «حخیختاً، موشِمَ بینتو، یَکی اژ هُمَه مِنَ مِئَه گیر دشمنا.» 22شاگردَل سِیل یَکتِریونَ مَهَرد، بِلُجوئیونَ ماهات گه ایی قصَه اِبارَه کیَ موشی. 23یَکی اژ شاگردَل، هَراَوَه گه عیسی او دوس داشدی، مِرکا دائیتی اَر لِف او. 24شَمعونِ پطرس هَشارَه کِرد اَری تا اژ عیسی بِپِرسی گه یَه وَه کیَسی. 25اَسَه اَ شاگردَ هَرهُنَ گه مِرکا دائیتی ووژ نزیکتِر کِردی اَر عیسی، ئو اَژی پِرسیتی: «آقا، او کیَ؟» 26عیسی جوواو داتی: «هَراَوَه گه ایی گُپ نونَ دُما یَگه بِژَنم اِنوم دُری میَمیَ بی.» اَسَه گُپ نونِهَه ژَنی اِنوم دُری ئو اَوَه داءَ یهودا کُر شَمعونِ اَسخَریوطی. 27هَر یَگه یهودا گُپ نونِهَه گِرتی، شِطو چِتیِ دَرین. اَسَه عیسی وِتیَ بی: «اَ چیئَه گه مِ اَنجوم بِین، زویتِر اَنجوم دَ.» 28مِنتائای هُیچ‌کُم اژ کسَلی گه نیشتوئین اَر سر سِفِرَه، نَفیَمین گه عیسی اَرِه‌چَه یَه وِتی. 29بِری گُمونو کِرد گه اَرِیَگه ژاژ خرجِ‌بَرج ها دس یهودا، عیسی موشِتیَ بی اَ چیئَه گه اَرِه عِد نیازَ بِخِری، یاگَه چیئی بیَ ژارَل. 30دُما هُاردِن گُپ نونِهَه، یهودا هِرازِه چیَ دِریر. ئو شو بی.
حکِم نووئی
31دُما یَگه یهودا چیَ دِریر، عیسی وِتی: «اِسگَه کُر اِنسو جِلال گِرتی ئو خدا اِنوم او جِلال گِرتی. 32اَرّ خدا اِنوم او جِلال گِرتی، اِسَه خدایش او اِنوم ووژ جِلالَ مِه ئو هِرازِه او جِلالَ مِ. 33اِ رولَه‌ل، مِدتی‌تِر هامَ گَردتو. مِنِیمَ مِهِینو ئو هَرهُنَ گه وِتِمَ یهودیَل، اِسگَه موشِمَ هُمِه‌یش گه اورَه گه مِنَ مَچِم، هُمَه نِمَتونینو باینو. 34حکِم نووئی میَمَ بینتو، ئو اَوَه یَسَ گه مِحبت بِهَن اَر یَکتِری. هَرهُنَ گه مِه مِحبتِم کِرد اَر هُمَه، هُمِه‌یش باس مِحبت بِهِینون اَر یَکتِری. 35اَرّ مِحبت بِهِینون اَر یَکتِری، کُل مردِمَ مَفیَمِن گه شاگرد مِنینو.»
36شَمعونِ پطرس وِتی: «آقا، اَرِه کوءَ مَچین؟» عیسی جوواو داتی: «تو اِسگَه نِمَتونین وَه تُرّ مِنا باین اَرِه جای گه مِنَ مَچِم؛ مِنتائای بعدِنَ ماینَ تُرّ مِنا.» 37پطرس وِتی: «آقا، اَرِه‌چَه اِسگَه نِمَتونِم وَه تُرّ تونا بام؟ مِه گیون‌یشمَ مَهَمَ خِرِت.» 38عیسی وِتی: «یانی گیونتَ مِهِینَ خِر مِه؟ حخیختاً، موشِمَ بینِت، وِر اژ یَگه کِلَه‌شیر باءِ بال، سه گِل مِه حاشاءَ مِهِین.»
Currently Selected:
یوحنا 13: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
