LUKA 9

Yesu ikubatuma abafundigwa

(Mat 10.5-15; Mar 6.7-13)

1Popapo Yesu alinkubabilikila bala kalongo na babili, alinkubapa amaka nubulambiki pambepo inyali syosa, namaka gakusibumbulukisya imbungo. 2Alinkubatuma pakufumusya ubutwa bwa Kyala, nukubagangula ababine; 3#Luk 10.4-11; Imbo 13.51alinkubabula alinkuti, “Mungakolelaga fimo munjila; yomma ningili, yomma ninyambi, fyomma nifyakulya, syomma nindalama, kangi nayumo angayaga nimiselekesye mibili. 4Nnyumba yosa iyi mukwakwingilangamo, mukayege mumo kangi mukasokelege mumo. 5Bosa aba linga batikubambilila, bo mukusokamo nkaya kala, mukakung'undege ulufumbi lwa kumalundi ginu, lukayege lusisimikisyo kumyabo.” 6Popapo balinkubuka, balinkukisania ntwaya, balinkusifumusya Inongwa Inunu nukubabumbulusya abandu mosamosa.

Ukwalangana kwa Herodi

(Mat 14.1-12; Mar 6.14-29)

7 # Mat 16.14; Mar 8.28; Luk 9.19 Umalafyale Herodi bo apilike syosa isi syabombigwe, silinkumwalangania papo bamo batigi, yo Yohani asyukile mbafwe; abangi batigi, 8Yo Eliya asetwike; abangi kangi batigi Yo yumo mbasololi aba iyolo uyu asyukile. 9Herodi alinkuti, “Yohani yo nalimbolile untu; lelo ywani uyu nikusipilika inongwa syake?” Alinkulonda fiyo ukumbona Yesu.

Yesu ikubaswila abandu abaelifu bahano (5,000)

(Mat 14.13-21; Mar 6.30-44; Yoh 6.1-13)

10Lelo bo bagomwike abatumigwa bala, balinkumpangila Yesu syosa isi babombile. Umwene alinkubega, alinkwepukapo nukwakwiyekela nabo nkaya aka batigi mo mu Betisaida. 11Ifyene ifilundilo fya bandu bo fipilike, filinkunkonga. Yesu alinkubambilila, alinkubabula isya butwa bwa Kyala; aba balondaga ukubumbulusigwa, alinkubabumbulusya. 12Bo ilisuba litembelile, popapo balinkwisa kumyake kalongo na babili bala, balinkumbula balinkuti, “Basumusye abandu, babukege ntwaya twa mumbali na mmigunda, ukuti mo bakagonege kangi mo bakafyagege nifyakulya; kabuno muno tuli mo mbusita bandu.” 13Umwene Yesu alinkubabula alinkuti, “Amubapepo yuyumwe ifyakulya.” Abene balinkuti, “Tukaya nafyo fimo ukukinda ifisyese fihano niswi ibili, pene apa linga twayaga kubulila bosa abandu bababa ifyakulya.” 14Namanga baliti balipo abanyambala baelifu bahano (5,000). Umwene alinkubabula abafundigwa bake alinkuti, “Amubatugasye abandu mfibugutila, kimokimo amalongo mahano (50).” 15Abene balinkubomba bo mumo ababulile, balinkubatugasya bosa. 16Lelo popapo alinkwega ifisyesye fihano fila niswi ibili sila, alinkuketa kumwanya, alinkugwa ulupi, alinkufimenyania, alinkubapa abafundigwa bake ukuti babategelekesyege abandu. 17Balinkulya, balinkwikuta bosa; balinkusala utubululukisya utu twa syele, balinkwisusya ifitundu kalongo na fibili.

Peteri ikunjoba Yesu ukuya yo Kristi

(Mat 16.13-19; Mar 8.27-29)

18Lelo bo Yesu ali pakwiputa mwene, abafundigwa balinkuya nagwe, alinkubalalusya alinkuti, “Ifilundilo fya bandu apa fikunjoba une fikuti ne ani?” 19#Mat 14.1-2; Mar 6.14-15; Luk 9.7-8Abene balinkumwamula balinkuti, “Bamo bikuti gwe Yohani Umosi, abangi bikuti gwe Eliya, abangi kangi bikuti gwe yumo mbasololi aba iyolo uyu asyukile.” 20#Yoh 6.68-69Umwene Yesu alinkubabula alinkuti, “Umwe loli mukuti ne ani?” Peteri alinkwamula alinkuti, “Gwe Kristi gwa Kyala.”

Yesu ikuyobela ngani isya kukubilwa kwake nukusyuka

(Mat 16.20-28; Mar 8.30—9.1)

21Popapo Yesu alinkubakanisya nukubabula ukuti bangambulaga yumo umundu sisisi, 22alinkuti, “Fikuti Nnyamundu akubilwege fiyo, nukukanigwa nabakulumba nabaputi abakulumba nabamanyandagilo, nukugogigwa; kangi bo gakindile amasiku matatu asyukege.” 23#Mat 10.38; Luk 14.27Popapo alinkubabula bosa alinkuti, “Gwesa uyu linga ikulonda ukwisa munyuma mmyangu, yo fikuti ikanege mwene, apimbege ikipingika kyake bwila, angongege. 24#Mat 10.39; Luk 17.33; Yoh 12.25Namanga uyu linga ikulonda ukubuponesya ubumi bwake, yo isakubutagaga, loli uyu linga ikubutagila ubumi bwake mmyangu, yo isakubuponesyaga. 25Kali po akabaga fiki umundu linga akikabaga ikisu kyosa, bo itagile nukwipesya mwene? 26Buno uyu linga ikuya nisoni kumyangu na kumasyu gangu, yo uyu Nnyamundu isakuyaga nisoni kumyake, bo ikwisa mbukulumba bwake, nubwa Gwise, nubwa bandumi abikemo. 27Naloli nikubabula une nikuti, balipo bamo aba bimile papapa aba batisakububonamo ubufwe ukufika apa bisakububonaga ubutwa bwa Kyala.”

Ukwanduka

(Mat 17.1-8; Mar 9.2-8)

28 # 2 Pet 1.17-18 Lelo panyuma pamasyu aga, bo gakindile amasiku mahano na matatu, Yesu alinkubega ba Peteri na Yohani na Yakobu, alinkufyuka nabo nkyamba kukwiputa. 29Lelo bo ali pakwiputa, ukuboneka kwa kyeni kyake kulinkwanduka, nimyenda gyake gilinkuya swee itolo, gilinkubukuka. 30Nakalinga itolo abandu babili balinkuyoba nagwe. Bali bo ba Mose na Eliya, 31bo balinkubonekela mbusisya, balinkuyoba nagwe isya bufwe bwake, ubu ayaga pakubumalikisya nkaya ka Yerusalemu. 32Umwene loli Peteri naba bali nagwe utulo twabatolile, loli bo balembwike, balinkububona ubukulumba bwa Yesu, balinkubabona nabandu babili aba balyimile nagwe. 33Lelo bo abandu bala bikulekanila nagwe, Peteri alinkumbula Yesu alinkuti, “Malafyale, kununu uswe ukuya papapa, tuliyengaga ifitembe fitatu, kimo kiyege kyako, kimo kya Mose, nikingi kya Eliya” — alinkusita ukumanya isi ayobaga. 34Lelo bo ali pakuyoba sisisi, lilinkwisa ilibingu, lilinkubakupikila; abene ulutende lulinkubaga bo bikwingila mwibingu lilyo. 35Ilisyu lilinkufuma mwibingu lilinkuyoba lilinkuti, “Uyu yo Mwanangu unsaligwa, yo mumpilikisyege yuyo.” 36Lelo bo likindile ilisyu, balinkwaga Yesu ali mwene itolo. Abene balinkuya mye itolo, balinkusita nukumbula yumo umundu mmasiku gago, muli isi basibwene.

Yesu ikumbumbulusya undumyana gwa mbepo inyali

(Mat 17.14-18; Mar 9.14-27)

37Ulwa kilabo bo Yesu nabafundigwa batatu bikusuluka ukufuma nkyamba, ikilundilo ikikulumba kilinkwaganila nagwe. 38Popapo umundu yumo alinkukolela ukufuma nkilundilo alinkuti, “Mmanyisi, nikukusuma ukuti ungetele umwanangu, namanga yo mwanangu yumoywene ntiga; 39keta, imbepo yikunkola, po nakalinga itolo ikukuta, yikunkwabania po lelo ikusosya nuntotofula, yitikundekesya mbibi bo tasi yikampuyulania. 40Nabasumile abafundigwa bako ukuti bayisosye, loli batoligwe.” 41Popapo Yesu alinkwamula alinkuti, “Ilayu! Mwe ngulilo isitakwitika, iniongafu umwe, nguyaga nanumwe ukufika ndili bo ngali nguti lyambepa? Ntwale kuno umwanako.” 42Lelo bo akali ikuntwala, popapo imbepo inyali yilinkungwisya pasi undumyana, yilinkunsilisya; umwene Yesu alinkuyikemela imbepo inyali, alinkumbumbulusya umwanike, popapo ali nkungomokesya ugwise. 43Bosa balinkubuswiga ubukulumba bwa Kyala.

Yesu ikuyoba kangi isya bufwe bwake

(Mat 17.22-23; Mar 9.30-32)

Lelo bo abandu bosa bali pakusiswiga syosa isi abombile, Yesu alinkubabula abafundigwa bake alinkuti, 44“Amugabikege amasyu aga mumbulukutu syinu, namanga fikuti Nnyamundu abikigwege mmaboko ga bandu.” 45Loli balinkusita nukulyagania ilisyu ili, ilyene lyafisigwe kumyabo ukuti bangalyaganiaga; balinkutila ukundalusya isya isyu lilili.

Yo aliku uyu yo nkulumba kuli bosa?

(Mat 18.1-5; Mar 9.33-37)

46 # Luk 22.24 Lulinkutupuka ulukani mbafundigwa bake pa sya uyu ali nkulumba nkati mmyabo. 47Umwene Yesu bo asimenye sisyo binogonaga mundumbula syabo, alinkumwega umwanike, alinkumbika pabupipi nagwe. 48#Mat 10.40; Luk 10.16; Yoh 13.20Popapo alinkubabula alinkuti, “Gwesa uyu ikumwambilila umwanike uyu mungamu yangu, yo ikunyambilila une; kangi gwesa uyu linga ikunyambilila une, yo ikumwambilila uyu andumile une; namanga unnandi nkati mmyinu, yo nkulumba kuli mwesa.”

Uyu atikukindana nanumwe yo ali pamopene nanumwe

(Mar 9.38-40)

49Popapo Yohani alinkumbula Yesu alinkuti, “Malafyale, twalimbwene yumo ikusokesya imbepo inyali mungamu yako, loli tulinkunkanisya, papo akaya palikimo nanuswe.” 50Umwene Yesu alinkumbula alinkuti, “Mungankanisyaga, namanga gwesa uyu atikukindana nanuswe, yo ali kulubafu lwitu.” Abandu ba ntwaya twa Samaria bikukana ukumwambilila Yesu 51Lelo bo amasiku gake ga kufyukila kumwanya gasegelile Yesu alinkulabisya ikyeni kyake ukubuka ku Yerusalemu. 52Popapo alinkutuma indumi ukulongolela nkyeni mmyake. Abene balinkubuka, balinkwakwingila nkaya ka baSamaria, ukuti mo bakantendekekesye pabuyo. 53Loli abenekaya balinkusita nkumwambilila, papo bamenye ukuti ikulabila ku Yerusalemu. 54Lelo bo basibwene sisisi, abafundigwa bake Yakobu na Yohani balinkuyoba balinkuti, “Gwe Ntwa, kulonda tuyobege ukuti umoto gusulukege ukufuma kumwanya nukubapyuta?” 55Umwene alinkubasyutukila, alinkubakemela.#9.55 Amasimbo gamo gikongelelako: Alinkuti, “Mukimanya ukuti muli bana ba mbepo aliku. Namanga Nnyamundu akalisile nkubupyuta ubumi bwa bandu, loli nkubupoka.” 56#2 Banyaf 1.9-16Popapo balinkubuka nkaya akangi.

Aba bikulonda ukuya bakongi ba Yesu

(Mat 8.19-22)

57Lelo bo bikwenda munjila, popapo umundu yumo alinkumbula Yesu alinkuti, “Nikukukongaga kosa kuno kubukaga.” 58Umwene Yesu alinkumbula alinkuti, “Abakambwe bali nimina, ninjuni sya kumwanya sili nififumbwa, loli Nnyamundu akaya napo pabulambaliko untu.” 59Yesu alinkumbula uyungi alinkuti, “Ngongaga.” Umwene alinkuti, “Malafyale, ulinyitikisyaga ukuti mbuke ngansyile tasi tata.” 60Loli umwene Yesu alinkumbula alinkuti, “Baleke abafwe babasyile abafwe babo; ugwe loli bukaga ukafumusyege mosa ubutwa bwa Kyala.” 61#1 Banyaf 19.20Yope nuyungi alinkuyoba na Yesu alinkuti, “Malafyale, nikukukongaga, loli tasi ngabalage aba nnyumba yangu.” 62Umwene Yesu alinkumbula alinkuti, “Uyu ikuketa kunyuma bo abikile ikiboko kyake pikumbulu, yo akabagila mbutwa bwa Kyala.”

Currently Selected:

LUKA 9: NNBII

Highlight

Copy