LUKA 10

Yesu ikubatuma bafundigwa amalongo mahano na mabili (70)

(Mat 10.5-16; Mar 6.7-11; Luk 9.1-5)

1Panyuma pali sisisi, po Untwa alinkubasala abangi amalongo mahano na mabili (70); alinkubatuma babilibabili ukulongolapo mosa ntwaya na mbuyo mumo atigi mo ikubukaga. 2#Mat 9.37-38Alinkubabula alinkuti, “Ugwene untondolo go mwingi, loli ababombi bo banandi; amupyelesyege lelo kumwenentondolo, ukuti abatumege ababombi muntondolo gwake. 3#Mat 10.16Amubukege lelo: keta nikubatuma bo tu twana twa ng'osi pakati pambumbi. 4#Mat 10.7-14; Mar 6.8-11; Luk 9.3-5Mungegaga inyambi ya ndalama, ninyambi ya munjila, fyomma nifilato; kangi mungamponiaga yumo munjila. 5Nnyumba yosa iyi mukwakwingilangamo, mukatalege ukuti, ‘Ulutengano luyemo nnyumba iyi.’ 6Linga alimo mumo unnya lutengano, po ulutengano lwinu lwisakumwisilaga; linga akayamo, po lwisakugomokelaga ku kumyinu. 7#1 Kor 9.14; 1 Tim 5.18Nnyumba yiyo mo mukayege, mukalyege nukunwa ifi linga bikubapa; buno umbombi yo gumbagile umfwalo gwake. Mungaya kubetaga nnyumba iyi na iyi. 8Nkaya kosa aka mukwakwingilangamo, linga bikubambilila, mukalyege fyosa ifi bikubategelekesya; 9mukababumbulusyege ababine aba bali mumo, mukababulege ukuti, ‘Ubutwa bwa Kyala busegelile kumyinu.’ 10#Imbo 13.51Nkaya kosa aka mukwakwingilangamo, linga batikubambilila, mo mukasokengemo mukabukege mmipulo gyake mukatigi, 11‘Na lu lufumbi lwa nkaya kinu, ulu lutumilile mmalundi gitu, tukubakung'undila yuyumwe. Loli mumanyege ukuti, ubutwa bwa Kyala busegelile.’ 12#Bwa 19.24-28; Mat 10.15; 11.24Nikubabula une nikuti, musi gugo po isya kaya ka Sodomu sisakuyaga mbepepo ukukinda isya nkaya kako.

Ubutolwe kutwaya twa basitalwitiko

(Mat 11.20-24)

13 # Yes 23.1-18; Eze 26.1—28.26; Yoeli 3.4-8; Amosi 1.9-10; Zeka 9.2-4 “Sya butolwe gwe kaya ka Korazini, sya butolwe gwe kaya ka Betisaida! Buno linga imbombo ingulumba isi sibombigwe mmyinu, syabombigwe nkaya ka Tiri na ka Sidoni, po angali bapindwike liyolo, bafwele ifisepe nukutugala mumfwandilo. 14Sisakuya mbepepo isya kaya ka Tiri na ka Sidoni pisiku lya bulongelo, ukukinda isyinu. 15#Yes 14.13-15Nugwe gwe kaya ka Kapernaumu, bule kali kulonda ukwimikigwa ukufika kumwanya? Kwisakwisigwaga ukufika kubusyuka. 16#Mat 10.40; Mar 9.37; Luk 9.48; Yoh 13.20Uyu linga ikubapilika umwe, yo ikumbilika une; uyu linga ikubasyokela umwe, yo ikunsyokela une; loli uyu linga ikunsyokela une, yo ikunsyokela uyu alindumile.”

Ukugomoka kwa bafundigwa amalongo mahano na mabili (70)

17Abene loli amalongo mahano na mabili bala (70) balinkugomoka nulusekelo balinkuti, “Gwe Ntwa, syope na si mbepo inyali silinkulamba kunyitu mungamu yako.” 18Umwene Yesu alinkuti, “Nalimbwene Setano ikugwa ukufuma kumwanya bo injasi. 19#Salimo 91.13Keta, mbapele amaka ga kukanya panjoka na patupilili, na pamaka gosa ga ndugu; nakamo katisakubapalamasyaga. 20Syo mungasekelaga sisisi, apa linga mwagile imbepo sikulamba kumyinu, loli musekelege papo ingamu syinu sisimbigwe kumwanya.”

Yesu ikusekela

(Mat 11.25-27; 13.16-17)

21Nkabalilo kala, Yesu alinkusekela mwa Mbepo Mwikemo alinkuti, “Nikugwa ulupi kumyako, gwe Tata, gwe Ntwa gwa kumwanya na pasi, papo usifindile sisisi kubamaganyi na kuba mahala, loli ubasetulile ba bakeke; ena gwe Tata, buno syo sikukyelile ugwe nkyeni mmyako. 22#Yoh 3.35; 10.15Fyosa itolo mbegigwe une na Tata, nayumo akammanya uMwana, loli mwene yu Gwise; kangi nayumo akammanya uGwise, loli mwene yu Mwana, na uyu linga uMwana atile nunsetulile.”

23Yesu alinkusanukila ku bafundigwa bake, alinkuyoba nabo pabutitu alinkuti, “Masayigwa amaso aga gikuketa isi mukuketa umwe. 24Namanga nikubabula une nikuti, abasololi nabanyafyale ba bingi banyonywaga ukusiketa isi mukusiketa, loli balinkusita nukusibona; nukuti basipilike sisyo mukusipilika, loli balinkusita nukusipilika.”

Ikifwanikisyo kya nSamaria unnunu

25 # Mat 22.35-40; Mar 12.28-34 Popapo yumo ummanyandagilo alinkusumuka alinkungela Yesu alinkuti, “Mmanyisi, mbombe fiki ukuti mbwingilepo ubumi bwa bwila?” 26Umwene Yesu alinkumwamula alinkuti, “Syo siliku isi sisimbigwe mmasimbo? Kubalamo siliku?” 27#Levi 19.18; Kukumbu 6.5Alinkumwamula alinkuti, “Isi sikuti, Unganege uNtwa Kyala gwako nindumbula yako yosa, numoyo gwako gosa, namaka gako gosa, namanala gako gosa; yope nunnino unganege bo papo gwiganile gwimwene.”

28 # Levi 18.5 Umwene Yesu alinkumbula alinkuti, “Gwamwile kanunu; ubombege bo bunobuno, po kwisakubwagaga ubumi.”

29Umwene ummanyandagilo yula bo ikuti ninokesye, alinkundalusya Yesu alinkuti, “Umwinangu yo aliku?” 30Popapo Yesu alinkumwamula alinkuti, “Umundu yumo afumile nkaya ka Yerusalemu, asulukaga ukubuka nkaya ka Yeriko; popapo alinkugwila mmaboko ga minyambuta, gyo gilinkumfula imyenda nukunkoma, gilinkundeka bo asyele panandi ukufwa, gilinkubuka. 31Kulusako umputi yumo alinkwenda injila yiyo; lelo bo ambwene, alinkwenda pambali. 32Yope nunnya Levi bububo, alinkufika papo, bo ambwene, alinkwenda pambali. 33#2 Syambu 28.15Loli unSamaria yumo uyu alimwenda njila, alinkufika papo ali; lelo bo ambwene, ikisa kilinkumwaga, 34alinkusegelela kumyake, alinkumpinya ififulalo fyake nukufyonelela inyemba nubwalwa bwa mafilu, alinkumfyusya pambunda yake, alinkwakumbika nnyumba ya bahesya, mo alinkwakundwasya. 35Ulwa kilabo alinkusakula indalama ibili alinkumpa umwenenyumba alinkuti, ‘Ulindwakisyaga umundu uyu, fyosa ifi linga ukisisyepo ukutaga, nisakukuhombaga yuyune bo nikugomoka.’ 36Bule, bo batatu bababa, kwinogona ukuti yo aliku uyu ali nnine gwa uyu agwilile mmaboko ga minyambuta?” 37Umwene alinkumwamula alinkuti, “Uyu kyalimwagile ikisa.” Popapo Yesu alinkumbula alinkuti, “Bukaga, ukabombege bo bunobuno.”

Marta na Maria

38 # Yoh 11.1 Lelo bo Yesu ikwenda palikimo nabafundigwa bake, alinkwakwingila nkaya kamo; mo unkikulu yumo uyu ingamu ali yo Marta, alinkumwambilila nnyumba yake. 39Ali nunnuguna uyu ali yo Maria ingamu, yo alinkutugasya kumalundi ga Ntwa, alinkupilikisya amasyu gake. 40Umwene Marta alinkwikolania nisya kumbombela si nyingi; po lelo alinkwisa kwa Yesu alinkuti, “Gwe Ntwa, syo utikusibikilako umoyo apa unnuguna gwangu andekile ukubomba nimwene? Ulimbulaga lelo ukuti andule imbombo.” 41Popapo Untwa alinkumwamula alinkuti, “Marta gwe Marta, kwikatasya nukwiyaya si nyingi; 42loli kali kamokene aka kikulondigwa; buno Maria yo isalile ikiyabo ikununu, iki kitisakupokigwamo kumyake.”

Currently Selected:

LUKA 10: NNBII

Highlight

Copy