LUKA 8

Abakikulu aba bambombelaga Yesu

1Panyuma pali sisisi, po Yesu alinkusyungutila ntwaya utukulumba na ntwaya utunandi, alinkulumbilila nukufumusya Inongwa Inunu isya butwa bwa Kyala; bope nabakalongo na babili balinkuya nagwe, 2#Mat 27.55-56; Mar 15.40-41; Luk 23.49nabakikulu bamo aba babumbulusigwe imbepo inyali nindamwa: Maria uyu ikubilikiligwa Magadalena, uyu syasokilemo imbepo inyali ihano na ibili, 3na Yohana unka Kuza undindilili gwa Herodi, na Susana, nabangi ba bingi, aba bababombelaga nikyuma kyabo.

Ikifwanikisyo kya nsopambeyu

(Mat 13.19; Mar 4.19)

4Lelo bo ikilundilo ikikulumba kibungene, nabandu aba bafumile nkaya bo bisile kumyake, popapo Yesu alinkubabulila nkifwanikisyo alinkuti, 5“Isiku limo unsopambeyu alinkubuka kukusopa imbeyu yake. Lelo bo ikusopa, yimo yilinkwakugwa munjila; abandu balinkuyikanya namalundi, ninjumi sya kumwanya silinkusala silinkumala. 6Iyingi yilinkwakugwa pa lwalabwe, bo yimelile yilinkuma, papo ububundafu bukalipo. 7Iyingi yilinkwakugwa mmifwa, imifwa gilinkukula pamopene nayo, gilinkwenda nukuyigoga. 8Iyingi yo yilinkwakugwa pakisu ikinunu, yilinkumela, yilinkupa iseke mia yumo (100).” Bo Yesu ayobile sisisi, alinkukolela alinkuti, “Uyu linga ali nasyo imbulukutu sya kupilikila, yo alipilikaga.”

Imbombo ya fifwanikisyo

(Mat 13.10-23; Mar 4.10-20)

9Popapo abafundigwa bake balinkundalusya balinkuti, “Ikifwanikisyo iki ko kuti fiki?” 10#Yes 6.9-10Umwene alinkubabula alinkuti, “Umwe mupegigwe ukusyagania isya mbutitu isya butwa bwa Kyala; abangi loli bapegigwe mfifwanikisyo, ukuti napa linga bikuketa bangasibonaga, napa linga bikupilika, bangasyaganiaga.

Yesu ikulingania ikifwanikisyo kya nsopambeyu

(Mat 13.18-23; Mar 4.13-20)

11“Ikyene loli ikifwanikisyo kyo iki: Imbeyu lyo isyu lya Kyala. 12Iya munjila, bo aba bikupilika, kunyuma umohesi ikwisa ikunyaka ilisyu mundumbula syabo, ukuti bangitikaga nukupokigwa. 13Iyene iya palwalabwe, bo aba bikugelela bapilike, bikulyambilila ilisyu nulusekelo; loli bakaya nimisisi, bikwitika pakabalilo akanandi itolo, nkabalilo ka ngelo bikugwa. 14Iyene iyi yagwile mmifwa, bo aba bikugelela bapilike, ndwendo lwabo bikusyobigwa nubwikolanie, nubukabi, nisya kwihobosya isya mbumi, popapo iseke syabo sitikukoma. 15Iyene loli iyi yagwile pakisu ikinunu, bo aba bikupilika ilisyu nindumbula inunu ingolofu, bikulyumilila, nukupa iseke nulumilisyo.

Inyale iyi yikupikiligwe

(Mar 4.21-25)

16 # Mat 5.15; Luk 11.33 “Nayumo atikukolesyamo inyale nukuyikupikila nikikupikililo, pamo ukuyibika kusi kukitala, loli ikuyibika pakikolelanyale, ukuti aba linga bikwingila balubonege ulumuli lwake. 17#Mat 10.26; Luk 12.2Papo kakayako kamo aka kibilile aka katisakutupuka, kangi nakamo aka kali kubutitu aka katisakumanyigwa nukuya pabwelu. 18#Mat 25.29; Luk 19.26Mwandege lelo mumo mukupilikila, namanga uyu ali nako kamo yo isakupegigwaga; loli uyu akaya nako kamo, yo isakupokigwaga na kako ikwinogona ukuti ali nako.”

Unna gwa Yesu nabamyabo

(Mat 12.46-50; Mar 3.31-35)

19Popapo unna gwa Yesu nabamyabo balinkwisa kumyake, loli balinkutoligwa ukwaganila nagwe panongwa ya kilundilo kya bandu. 20Umwene Yesu yo balinkumbula ukuti, “Unyoko nabamyinu bimile panja, bikulonda ukwaganila nanugwe.” 21Loli umwene alinkubamula alinkuti, “Yuba nabamyitu bo aba bikulipilika ilisyu lya Kyala nukulikonga.”

Yesu ikugubatamisya umbelo

(Mat 8.23-27; Mar 4.35-41)

22Musi gumo mmasiku gala, Yesu alinkwipaka mwiboti pamopene nabafundigwa bake, alinkubabula alinkuti, “Tubuke, twambukege isilya lila lya nyanja.” Popapo balinkuliguta iliboti. 23Lelo bo bikwenda, Yesu alinkugona utulo. Popapo gulinkwisa umbelo unkulumba panyanja, iliboti lilinkwanda ukwisula amisi, balinkuya mbutolwe fiyo. 24Popapo balinkwisa kumyake, balinkundembusya balinkuti, “Malafyale, tukwibila.” Umwene alinkulembuka, alinkugukemela umbelo nukusukanika kwa mayiga; popapo gulinkubota, kulinkuya yonjolo itolo. 25Alinkubabula alinkuti, “Luli kugu ulwitiko lwinu?” Abene balinkutetema nukuswiga, balinkuyobesania balinkuti, “Ywani yuyuyu, uyu ikugulagila umbelo namisi, ifyene fikwenda nukumpilika?”

Yesu ikumbumbulusya umundu gwa mbepo inyali

(Mat 8.28-34; Mar 5.1-20)

26Popapo Yesu nabafundigwa bake balinkufika nkisu kya baGeraseni, iki kiningene nikya mu Galilai. 27Lelo bo afyukile pisilya, alinkwaganila numundu yumo uyu afumile nkaya, yo ali nimbepo inyali; amasiku ga mingi akafwalangamo imyenda, akagonangamo na nnyumba, loli mu mmapumba. 28Lelo bo ambwene Yesu, alinkukuta, alinkugwa nkyeni mmyake, alinkukolela alinkuti, “Tuli buki nanine nanugwe, Yesu gwe Mwana gwa Kyala Unkinde? Nikupyelesya kumyako nikuti, ungafundaga.” 29Namanga Yesu ayibulile imbepo inyali ukuti yisokemo mmundu yula. Ka kingi itolo yankolaga, balinkumpinya niminyololo kangi nifipingo, balinkundindilila; umwene alinkufilatulania ifi balimpinyile, popapo imbepo inyali yilinkunkagila ndungalangala.

30Popapo Yesu alinkundalusya alinkuti, “Gwani ingamu?” Umwene alinkuti, “Ne Kilundilo;” namanga imbepo inyali si nyingi syalingile mmyake. 31Isyene silinkunsuma, ukuti angasibulaga ukubuka mbwina ubusolofu bwa ngisi.

32Lelo gwalipo papo untimo gwa ngulube inyingi, isi batimaga nkyamba; popapo imbepo inyali silinkumpyelesya ukuti asitikisye ukwingila mumo; umwene alinkusitikisya. 33Popapo imbepo inyali silinkusokamo mmundu yula, silinkwakwingila mungulube; bunobuno untimo gulinkugulutukila kulupanga, gulinkwitaga munyanja, gulinkwibila.

34Abene abatimi bo basibwene isi syabonike, balinkubopa, balinkwakusifumusya nkaya akakulumba na ntwaya utunandi. 35Popapo abandu balinkusoka ukubuka kukuketa isi syabonike, balinkwisa apa alipo Yesu, balinkumwaga umundu uyu imbepo inyali syasokilemo, atugele mmalundi ga Yesu, afwele imyenda, kangi atengene itolo; popapo lulinkubaga ulutende. 36Abene aba basibwene sisisi, balinkubabula muno ugwa mbepo inyali aponile. 37Popapo abandu ikisu kyosa aba nkisu kya ba Geraseni, balinkunsuma ukuti asokemo mmyabo, namanga lwabagile ulutende lu lwingi; popapo Yesu alinkwipaka mwiboti, alinkugomoka. 38Umwene umundu uyu syasokilemo imbepo inyali, alinkumpyelesya Yesu ukuti ayege pamopene nagwe. 39Loli Yesu alikunsuma alinkuti, “Bukaga kukaya kako, ukapangege sisyo Kyala akubombile,” popapo alinkubuka, alinkwakusifumusya nkaya kosa isi Yesu alimbombile.

Umwana gwa Yairo undindwana, nunkikulu gwa nyibuko ya ilopa

(Mat 9.18-26; Mar 5.21-43)

40Umwene Yesu bo agomwike ukwisa kwisilya ilingi, ikilundilo kya bandu kilinkumwambilila, namanga bosa bangulilaga. 41Popapo alinkwisa kumyake umundu uyu ali yo Yairo ingamu, uyu ali nkulumba gwa nyumba yakwiputilamo, yo alinkwitaga mmalundi ga Yesu, alinkumpyelesya ukuti isege kunyumba yake; 42papo umwanake yumoywene ntigi undindwana, uyu ali nifyinja kalongo na fibili, ali pipi ukufwa. Umwene Yesu bo ikubuka, ilalundilo kilinkumfinyilisya.

43Lelo alipo unkikulu uyu ali ninyibuko ya ilopa ifyinja kalongo na fibili, (yo amalile ikyuma kyake mbaganga, kusita kuganguligwa numundu yumo;) 44alinkwisa ukufumila kunyuma, alinkukipalamasya ikipeto kya mwenda gwa Yesu; nakalinga itolo inyibuko ya ilopa yilinkuleka. 45Umwene Yesu alinkulalusya alinkuti, “Ywani uyu ambalamasisye?” Bosa bo bakanile, popapo Peteri naba bali nagwe balinkuti, “Malafyale, utikuketa ifilundilo ifi fikusyungutile ifi kukulufania nafyo?” 46Umwene Yesu alinkuti, “Yumo ambalamasisye, namanga nibwene amaka ukusokamo mmyangu.” 47Lelo bo unkikulu ibwene ukuti akabagila ukwibilila, alinkwisa nukutetema, alinkubunguluka nkyeni mmyake, alinkumpangila nkyeni mbandu inongwa iyi yalimpelile ukumpalamasya; na mumo abumbulukile. 48Umwene Yesu ali nkumbula alinkuti, “Gwe mwanangu, ulwitiko lwako lukubumbulwisye; bukaga nulutengano.”

49Lelo bo Yesu ali pakuyoba sisisi, alinkwisa yumo ugwa nnyumba ya nkulumba gwa nyumba yakwiputilamo, alinkumbula alinkuti, “Umwanako afwile, ungankatasyaga itolo uMmanyisi.” 50Loli Yesu bo asipilike sisisi, alinkumwamula alinkuti, “Ungayaga nulutende, gwitikege itolo, po isakupokigwaga.” 51Lelo bo afikile pakaya, alinkusita nukumwitikisya yumo ukwingila nagwe; bene ba ba Peteri na Yohani na Yakobu nugwise gwa mwanike nunna. 52Bosa itolo balinkundilila nukwikima; loli Yesu alinkubabula alinkuti, “Mungalilaga, buno umwanike akafwa, mma, loli agonile itolo utulo.” 53Abene balinkunseka fiyo, namanga bamenye ukuti afwile. 54Loli alinkunkola ikiboko, alinkukolela alinkuti, “Gwe ndindwana, sumuka.” 55Popapo ubumi bwake bulinkugomokelamo, alinkusumuka nakalinga; alinkubabula ukuti bampepo ifyakulya. 56Abene abapapi bake balinkuswiga fiyo, loli Yesu alinkubakanisya ukuti bangambulaga yumo umundu isi sibombigwe.

Currently Selected:

LUKA 8: NNBII

Highlight

Copy