LUKA 7

Yesu ikumbumbulusya untumwa gwa sarijenti

(Mat 8.5-13)

1Panyuma lelo, bo Yesu amalile ukuyoba amasyu gosa nkyeni mbandu, popapo alinkwingila nkaya ka Kapernaumu. 2Lelo untumwa gwa sarijenti yumo uyu ali nkundwe kumyake, yo abinile fiyo, ali pipi nukufwa. 3Umwene sarijenti yula bo apilike isya Yesu, alinkubatuma kumyake abakulumba mbaYuda ukuti bakansume ise ambumbulusye untumwa gwake. 4Lelo bo bayilekufika apa alipo Yesu, balinkunsuma fiyo balinkuti, “Umundu uyu abagile ukuti untule; 5buno akiganile ikikolo kyitu, yo yuyo atuyengile ni nnyumba yakwiputilamo.”

6Popapo Yesu alinkubuka nabo. Lelo bo ali pabupipi ninyumba, popapo sarijenti yula alinkubatuma abamanyani bake kumyake ukuti bakambule ilya kuti, “Gwe Ntwa, ungikatasyaga; buno une ngabagila ukuti gwingilege nkitembe kyangu. 7Ko kuno nagile ukuti ngabagila une ukwisa kumyako; loli uliyobaga li isyu lyene, po umbombi gwangu ikuponaga. 8Namanga nanine ndi mundu uyu abikigwe pasi pabamaka, kangi nanine ndi nabasikali pasi pamyangu; linga nikumbula yumo nikuti, ‘Bukaga,’ ikubuka kangi kuyungi linga nikuti, ‘Isaga,’ ikwisa; na kuntumwa gwangu linga nikuti, ‘Bomba iyi,’ ikubomba.” 9Umwene Yesu bo apilike sisisi, alinkuswiga alinkukisyutukila ikilundilo kya aba bankongaga, alinkubabula alinkuti, “Ngalwagamo muli yumo ulwitiko ulukulumba bo ulu mwa Israeli.” 10Bo bagomwike kukaya aba batumigwe, balinkwakwaga untumwa yula abumbulwike.

Yesu ikunsyusya umwana gwa nkikulu umfwilwe

11Lelo bo pakindilepo, Yesu alinkwakufika nkaya kamo aka batigi Naini ingamu, abafundigwa bake balinkubuka nagwe pamopene nikilundilo ikikulumba. 12Lelo bo basegelile pabupipi nikipata kya kaya, balinkwaganila nabandu aba bapimbile umfimba. Umwene uyu afwile ali mwana undumyana yumoywene ntiga, umwana gwa nkikulu umfwilwe; ikilundilo ikikulumba kya bandu aba bafumile nkaya kilinkuya nagwe. 13Umwene Untwa bo ambwene unkikulu yula, ikisa kilinkumwaga, alinkumbula alinkuti, “Komma ukulila.” 14Bo asegelile, alinkulupalamasya ulutato, popapo aba balimpimbile balinkwima. Umwene Yesu alinkuti, “Gwe ndumyana ugwe, nikukubula nikuti sumukaga.” 15Popapo uyu afwile alinkusumuka, alinkwanda ukuyoba; popapo alinkumpa unna. 16Ulutende lulinkubagwila bosa, balinkutufya Kyala balinkuti, “Unsololi unkulumba abonike mmyitu muno;” kangi balinkuti, “Kyala abaketile abandu bake.” 17Popapo inongwa syake sisisi silinkusatanila mosa nkisu kya Yudai na mfisu fyosa ifya mumbali.

Abandu aba Yohani Umosi abatumile

(Mat 11.2-19)

18Abene abafundigwa ba Yohani bo bambulile syosa sisisi. Popapo Yohani alinkubabilikila abafundigwa bake babili, 19alinkubatuma kuNtwa kukundalusya ilya kuti, “Kali yo ugwe gwe batigi ikwisaga, pamo tungulilege uyungi?” 20Abene abandu bababa bo bafikile kumyake, balinkumbula Yesu balinkuti, “Yohani Umosi atutumile kumyako ikuti, ‘Kali yo ugwe gwe batigi ikwisaga, pamo tungulilege uyungi?’ ” 21Nkabalilo kako Yesu alinkubabumbulusya abandu ba bingi imbungo syabo, ningubilo, nimbepo inyali, bope nabafwamaso ba bingi alinkubigula amaso. 22#Yes 35.5-6; 61.1Popapo alinkubamula alinkubabula alinkuti, “Amubukege mukambule Yohani syosa isi musibwene nukusipilika: abafwamaso bikuketa, aba bikukwema bikwenda, aba mbungo ya bukoma bikwelusigwa, abamapuli bikupilika, abafwe bikusyuka, nabalondo bikupilika ukulumbilila kwa Nongwa inunu. 23Nsayigwa gwesa uyu indumbula yake yitikwikinya mmyangu.”

24Lelo bo babukile aba Yohani abatumile, popapo Yesu alinkwanda ukufibula ifilundilo fya bandu isya Yohani alinkuti, “Mwabukaga nkuketa fiki mmatengele? Ulutete ulu lukupetanika kumbelo? 25Loli mwabukaga nkuketa fiki? Umundu uyu afwele imyenda imitakanyifu? Keta, aba bikufwala imyenda imisisya naba batengene, bo aba bikuya pafitangalala. 26Mwabukaga nkuketa fiki lelo? Unsololi? Ena, nikubabula une nikuti, Yo nkinde na kunsololi. 27#Mala 3.1Yo uyu balinsimbile isi sikuti,

‘Keta nikuntuma ugwandumi gwangu nkyeni mmyako,

uyu isakutendekesyaga injila yako nkyeni mmyako.’

28“Nikubabula une nikuti, Muli aba bapapigwe nabakikulu, akayako yumo unkulumba ukunkinda Yohani; loli unnandi kuli bosa mbutwa bwa Kyala, yo ankindile ubukulumba.”

29 # Mat 21.32; Luk 3.12 Popapo abandu bosa nabasongesyasongo bo bapilike, balinkunjoba ubugolofu Kyala, papo balyosigwe ulosyo ulwa Yohani. 30Abene loli abaFarisai nabamanyandagilo, balinkusisyokela isi Kyala abinogonile babo, papo bakalyosigwe nagwe.

31Yesu alinkwendelela ukuyoba alinkuti, “Mbafwanikisyege bo ifiki abandu ba lilino aba, kali bali bo ifiki? 32Bali bo abakeke aba batugesye pasokoni, aba bikubilikilana bikuti, ‘Tubakubile ililonge loli mukakinapo, twililisisye loli mukalilapo.’ 33Buno Yohani Umosi isile atikulya ikisyesye, atikunwa nubwalwa bwa mafilu, umwe mukuti, ‘Ali nimbepo inyali.’ 34Nnyamundu isile, ikulya nukunwa, loli umwe mukuti, ‘Keta umundu umpafu ugwa kinwelo uyu, ummanyani gwa basongesyasongo nabatulanongwa.’ 35Agene amahala gikuboneka ukuya magolofu mbanake bosa.”

Yesu ali pa nyumba ya Simoni umFarisai

36Popapo yumo umFarisai alinkunsuma Yesu ukuti akalyege nagwe ifyakulya; bo Yesu ingile nnyumba ya mFarisai, alinkutugala pakulya. 37#Mat 26.7; Mar 14.3; Yoh 12.3Lelo alimo nkaya mumo unkikulu yumo untulanongwa. Bo apilike ukuti Yesu ali pakulya nnyumba ya mFarisai, popapo alinkutwala ikipake kya nyemba inunga, 38alinkwima kunyuma kumalundi gake alinkulila, alinkwanda ukugatimya amalundi ga Yesu namasosi, kangi agapuputile ninywili sya kuntu gwake, alinkugafipa amalundi gake nukugapaka ninyemba. 39Umwene umFarisai uyu alimbilikile, bo asibwene sisisi, alinkwinogona mundumbula yake alinkuti, “Linga umundu uyu ali nsololi po angali amwagenie unkikulu uyu ampalamasisye ukuti ywani, kangi ali bulebule, nukuti ntulanongwa.” 40Popapo Yesu alinkumwamula alinkuti, “Gwe Simoni, ndi nasyo isya kuyoba nanugwe.” Umwene alinkuti, “Oko, yobaga gwe Mmanyisi.” 41Umwene alinkuti, “Unkopesya ndalama yumo ali nabanongwa yake babili; yumo akopile indalama abamia bahano (500), uyungi amalongo mahano (50). 42Abene bo bakaya nafyo ifya kunhomba, popapo alinkubalekela bosa indalama sila. Muli bababa lelo, yo aliku uyu isakunganaga ukukinda?”

43Simoni alinkumwamula Yesu alinkuti, “Une nikuti uyu alindekile nyingi ukukinda.” Popapo Yesu alinkumbula alinkuti, 44“Utumwile utalwisye.” Bo asanukile kunkikulu, alinkumbula Simoni alinkuti, “Umbwene unkikulu uyu? Une ningile nnyumba yako, ukamba amisi ga kusugusula mmalundi gangu; loli umwene agatimisye amalundi gangu namasosi gake, kangi agapuputile ninywili syake. 45Ugwe ukafipa une, loli umwene ukwanda muno ningilile, akalekapo ukugafipa amalundi gangu. 46Ugwe ukambaka untu ninyemba, loli umwene ambakile amalundi ninyemba inunga. 47Ko kuno nikukubula nikuti, inongwa syake, isi nyingi itolo, siswegigwe, namanga ulugano lwake lukulumba; loli kuli uyu sikuswegigwa nandi, yo ulugano lunandi.” 48Popapo alinkumbula unkikulu alinkuti, “Nguswile inongwa syako.” 49Abene aba batugasenie nagwe pakulya balinkwanda ukwinogona mundumbula syabo balinkuti, “Ywani yope yuyuyu, uyu ikuswa na si nongwa?” 50Loli umwene alinkumbula unkikulu alinkuti, “Ulwitiko lwako lukupokile, bukaga nulutengano.”

Currently Selected:

LUKA 7: NNBII

Highlight

Copy