LUKA 6

Isya isiku lya Sabati

(Mat 12.18; Mar 2.23-28)

1 # Kukumbu 23.25 Lumo pisiku lya Sabati, bo Yesu ikukinda mmigunda, abafundigwa bake balinkupulula ifisasa fya ngano, balinkufigisa mmaboko balinkulya. 2Loli bamo abaFarisai balinkundalusya balinkuti, “Fiki mukobomba isi sili mwiko pisiku lya Sabati?” 3#1 Samu 21.1-6Umwene Yesu alinkubamula alinkuti, “Ngimba mukabalamo sila abombege Davidi, pala yindumege injala yuyo naba bali nagwe? 4#Levi 24.9Apa ingilege Nnyumba ya Kyala, nukwega ifisyesye ifisunguligwa, pala alyege nukubapa aba bali nagwe, ifi fyali mwiko ukulya, loli bene ba baputi?” 5Popapo alinkubabula alinkuti, “Nnyamundu yo Malafyale gwa isiku lya Sabati.”

Umundu gwa kiboko ikilale

(Mat 12.9-14; Mar 3.16)

6Lumo pisiku ilingi ilya Sabati, Yesu alinkwingila nnyumba yakwiputilamo alinkumanyisya; mo alimo mumo umundu uyu ikiboko kyake ikililo kyalalile. 7Abene abamanyandagilo nabaFarisai balinkuntegelela, ukuti bakete linga ikubumbulusyaga pisiku lya Sabati; ko kuti mo basyagilege isya kumohela. 8Loli umwene Yesu alinkusimanya inyinogono syabo, popapo alinkumbula umundu ugwa kiboko ikilale alinkuti, “Sumuka gwime pakati;” umwene alinkusumuka alinkwima. 9Popapo Yesu alinkubabula alinkuti, “Nikubalalusya umwe, kali sitikisigwe ukubomba inunu pisiku lya Sabati pamo ukubomba imbibi, ukupoka ubumi pamo ukugoga?” 10Bo abenesisye bosa, alinkumbula ugwa kiboko ikilale alinkuti, “Golosya ikiboko kyako.” Umwene alinkukigolosya, popapo kilinkuya kinunu itolo. 11Abene balinkunkalalila fiyo ukukinda, balinkuyobana isi babagile ukumbombela Yesu.

Yesu ikubasala abatumigwa kalongo na babili

(Mat 10.14; Mar 3.13-19)

12Lelo mwisiku lilyo, Yesu alinkusumuka ukubuka nkyamba kukwiputa; alinkwakwiputa bukye kwa Kyala. 13Lelo bo bukile, popapo alinkubabilikila abafundigwa bake, alinkubasalamo kalongo na babili; alinkubapa ingamu ya batumigwa. 14Bo baSimoni uyu alimpele iya Peteri, na Andrea ugwamyabo, Yakobu na Yohani, Filipu na Bartolomai, 15Matai na Tomasi, Yakobu unnya Alifeyo na Simoni uyu banjobaga iya Seloti, 16Yuda unnya Yakobu na Yuda ugwa mu Karioti, uyu ulwanyuma ambikaga Yesu mmaboko ga balugu.

Yesu ikumanyisya nukubumbulusya

(Mat 4.23-25)

17Popapo Yesu alinkusuluka nabafundigwa bake, alinkwakwima pabutelamu; pamopene nikilundilo ikikulumba kya bafundigwa bake, ifilundilo ifikulumba ifya bandu aba bafumile mosa nkisu kya mu Yudai na mu Yerusalemu, na mumbali munyanja ya nkisu kya Tiri nikya Sidoni, 18aba balisile kukumpilikisya, nukubumbulusigwa imbungo syabo. Bope naba batamigwaga nimbepo inyali, balinkubumbulusigwa. 19Ikilundilo kyosa kya bandu kyalondaga ukumpalamasya, namanga amaka gafumaga mmyake nukubabumbulusya bosa.

Isya busangalufu nisya busulumanie

(Mat 5.1-12)

20Popapo Yesu alinkubaketa abafundigwa bake, alinkuyoba alinkuti, “Muli basayigwa mwe mwimenye ubulondo, buno ubutwa bwa Kyala bwinu. 21Muli basayigwa mwe injala yikubaluma lilino, buno mwisakwikutaga. Muli basayigwa mwe mukulila lilino, buno mwisakusekaga. 22#1 Pet 4.14Muli basayigwa linga abandu bikubabenga umwe, linga bikubapagula nukubatuka, linga bikusitaga ingamu syinu, bikuti mbibi panongwa ya Nnyamundu. 23#2 Syambu 36.16; Imbo 7.52Po mwisemusekelege nukukina musi gugo; namanga ifihombigwa fyinu fisakuyaga fingi itolo kumwanya; buno mo muno nabisabo bope bababombelaga abasololi. 24Loli sya butolwe kuli mwe bakabi, namanga mwambilile ulusubisyo lwinu. 25Sya butolwe kuli mwe fikelilwe lilino, buno yisakubalumaga injala. Sya butolwe kuli mwe mukuseka lilino, buno mwisakusulumaniaga nukulila. 26Sya butolwe kuli umwe mwe linga abandu bosa bikubatufya, buno syo isi nababisabo bababombelaga abasololi babutungulu.

Isya kubagana abalugu

(Mat 5.38-48; 7.12)

27“Loli umwe mwe mukumbilika une nikubabula nikuti, amubaganege abalugu binu, mubabombelege inunu babo bababengile umwe, 28amubasayege aba bikubaguna umwe, nukubiputila aba bikubabombela imbibi. 29Uyu linga ikukukoma palusaya lumo, yo umpege nulunine, yope na uyu linga ikupoka ikilundo kyako, ungakanilaga na gu nselekesye. 30Gwesa uyu linga ikukusuma yo umpege, kangi uyu linga ikupoka ifyako yo ungammelelaga. 31#Mat 7.12Bo mumo mukulonda ukuti abandu bababombelege umwe, mo mubabombelege mumo nanumwe. 32Apene linga mubaganile babo babaganile umwe, bo mukabile fiki? Buno bope nabatulanongwa bikubagana babo babaganile. 33Kangi linga mukubabombela inunu aba bikubabombela inunu umwe, bo mukabile fiki? Buno bope nabatulanongwa bo bikubomba bunobuno. 34Nalinga mukubakopesya aba mukusubila ukuti mwisakukabangako fimo, bo mukabile fiki? Buno bope nabatulanongwa bikubakopesya abatulanongwa ukuti babagomolelege bo mumo fyayilile. 35Loli amubaganege abalugu binu, mubombege inunu, kangi mubakopelege kisitakusubila ukukabako fimo; po ifihombigwa fyinu fikuyaga fingi, kangi mwisakuyaga bana ba yu Nkinde, namanga umwene mololo kubasitakugwa ulupi na kubabibi. 36Amuyege nikibabilisi, bo apa uGwisemwe ali nikibabilisi.

Isya kubalonga abangi

(Mat 7.15)

37“Mungabalongaga abangi ukuti nanumwe Kyala angisakubalongaga. Mungabayobaga abangi ububibi ukuti nanumwe Kyala angisakubayobaga ububibi. Mubahobokelege abangi po nanumwe Kyala isakubahobokelaga. 38Amupege po nanumwe Kyala isakubapaga; ikigelelo ikinunu ikikanyisye, ikisukanie iki kikulefuka, kyo mwisakwambililaga mfimpagato fyinu. Namanga ikigelelo iki mukubagelela abangi kyo mwisakugeleligwaga kikyo nanumwe.”

39 # Mat 15.14 Popapo Yesu alinkubabula ikifwanikisyo alinkuti, “Kali umfwamaso abagile ukundongosya umfwamaso unnine? Kali batisakugwila mbwina bosa? 40#Mat 10.24-25; Yoh 13.16; 15.20Umfundigwa akaya pamwanya pammanyisi gwake; loli gwesa uyu amanyisigwe afikilepo, po ikuya bo yu mmanyisi gwake. 41Kuketa kaki akapatu aka kali nkisige kya gwamyinu, loli ugwe bo utikugubona umpiki ugu guli nkisige kyako? 42Pamo, kali ubagile bulebule ukuyoba kugwamyinu ukuti, ‘Gwamyitu, isaga ngusosyemo akapatu aka kali nkisige kyako,’ bo ugwe utikugubona umpiki ugu guli nkisige kyako yuyugwe? Gwe nsyobi ugwe, sosyamo tasi umpiki nkisige kyako, po kwisakuketaga bununu bokusosyamo akapatu aka kali nkisige kya gwamyinu.

Umpiki na museke syake

(Mat 7.16-20; 12.33-35)

43“Namanga gukayako umpiki unnunu ugu gukupa iseke imbibi, kangi gukayako umpiki umbibi ugu gukupa iseke inunu. 44#Mat 12.33Buno umpiki gosa abandu bikugumanyilaga museke syake, namanga mmifwa nayumo atikutungulamo iseke sya nkuyu, kangi mmitulatula nayumo atikutungulamo amafilu. 45#Mat 12.34Umundu unnunu ikusosya ubununu ukufuma mununu isi siswile mundumbula yake; yope numundu umbibi ikusosya ububibi ukufuma mumbibi isi alundike; namanga isi sikulefuka mundumbula, syo isi sikusoka nkanwa mmyake.

Inyalo ibili

(Mat 7.24-27)

46“Nongwa yafiki mukunjoba une ukuti, ‘Gwe Ntwa, gwe Ntwa,’ loli mutikusibomba isi nikubabula? 47Umundu gwesa uyu linga ikwisa kumyangu, ikugapilika amasyu gangu nukugabomba, nisakubanangisyaga uyu afwene nagwe. 48Afwene bo umundu uyu ayengaga inyumba, uyu alinkukumba ubwina ubusolofu fiyo, ulwalo alinkubika palwalabwe; lelo bo gwisile umwelesyo, ulusoko lulinkwitaga panyumba yiyo, lulinkusita nukuyiyugania, papo yayengigwe kanunu. 49Uyu linga ikugapilika amasyu gangu, loli atikugabomba, yo ali bo umundu uyu ayengile inyumba yake pamfu kisita lwalo, iyi, bo ulwisi lwitagilepo, yilinkugwa nakalinga; ukubulutuka kwa nyumba yiyo kulinkuya kukulumba fiyo.”

Currently Selected:

LUKA 6: NNBII

Highlight

Copy