LUKA 5

Yesu ikubabilikila abafundigwa bake abatasi

(Mat 4.18-22; Mar 1.16-20)

1 # Mat 13.1-2; Mar 3.9-10; 4.1 Isiku limo bo ifilundilo fipapatene nagwe Yesu fikulipilikisya ilisyu lya Kyala, popapo umwene alinkwima pambali panyanja ya Genesareti, 2alinkugabona amaboti mabili gali palubafu panyanja; abene abalobi basokilemo, basukaga inyelo syabo. 3Popapo alinkwingila mwiboti limo ili lyali lya Simoni, alinkunsuma ukuti alitandamikepo panandi kukisu; alinkutugasya mumo alinkufimanyisya ifilundilo bo ali mwiboti. 4Lelo bo amalile ukuyoba, alinkumbula Simoni alinkuti, “Endesyaga ubukege pakati panyanja, po mukasopege inyelo syinu mukalobege.” 5#Yoh 21.3Simoni alinkwamula alinkuti, “Malafyale, twiyulile ikilo kyosa tukakola nafimo, loli papo uyobile po nikusopaga inyelo.” 6#Yoh 21.6Lelo bo babombile sisisi balinkubungania iswi inyingi fiyo, inyelo syabo silinkulonda nukulatuka. 7Popapo balinkubabilikila abinabo aba bali mwiboti ilingi, ukuti bise kukubatula; abene balinkwisa, popapo balinkwisusya amaboti gosa go mabili, galinkupona nukwibila. 8Lelo bo Simoni Peteri asibwene sisisi, alinkungwila Yesu mmalundi, alinkumbula alinkuti, “Ulisokapo pamyangu gwe Malafyale, buno ndi mundu untulanongwa une.” 9Namanga kyalimwagile ikiswigu, yuyo naba bali nagwe, panongwa ya bwingi bwa nswi isi bakolile; 10bunobuno bope na ba Yakobu na Yohani abanya Zebedai, aba bali banine ba Simoni kilinkubaga ikiswigu. Umwene Yesu alinkumbula Simoni alinkuti, “Ungatetemaga; ukwanda lilino kuyaga ndobi gwa bandu.” 11Lelo bo bagakwabile amaboti gabo pisilya, balinkufileka fyosa, balinkunkonga Yesu.

Yesu ikumbumbulusya umundu

(Mat 8.14; Mar 1.40-45)

12Lumo lelo Yesu bo ali nkaya kamo, alinkwisa yumo umundu ugwa mbungo ya bukoma umbili gosa; lelo bo ambwene Yesu, popapo alinkugundama pasi alinkunsuma alinkuti, “Malafyale, linga gwiganile, ubagile ukunyelusya.” 13Umwene Yesu alinkugolosya ikiboko kyake, alinkumpalamasya alinkuyoba alinkuti, “Niganile, elukaga.” Nakalinga itolo ubukoma bulinkundeka. 14#Levi 14.1-32Popapo Yesu alinkunkanisya ukuti angayakumbulaga yumo umundu, alinkuti, “Loli bukaga ukinangisye kumputi, kangi ukatwalege ifya kwiyelukisya bo mumo alagilile Mose; fyo fiyege fya kumanyilamo abene.” 15Popapo inongwa syake silinkukindilila ukubalanila, ifilundilo fya bandu fi fingi itolo filinkubungana kukumpilikisya, nukubumbulusigwa imbungo syabo. 16Loli umwene alinkwikwabila mmatengele alinkwakwiputa.

Yesu ikumbumbulusya ugwa mbungo ya bukokonyale

(Mat 9.18; Mar 2.1-12)

17Musi gumo, bo Yesu ikumanyisya, balipo abaFarisai nabamanyisyandagilo aba batugele papo, bo bafumile ntwaya twa nkisu kya Galilai nikya Yudai na mu Yerusalemu; gope namaka ga Ntwa aga kubumbulukisya galinkuya nagwe 18Popapo abandu bamo balinkuntwala pakitala umundu yumo ugwa mbungo ya bukokonyale, balondaga ukumwingisya nukumbika nkyeni mmyake. 19Lelo bo bagile bakapaga pabwingililo panongwa ya kilundilo, popapo balinkufyuka pamwanya panyumba, balinkusegulapo amapamba, balinkunsololosya nulutato lwake, balinkumbika pakati nkyeni mwa Yesu. 20Umwene Yesu bo alubwene ulwitiko lwabo, popapo alinkumbula umbine yula alinkuti, “Gwe mundu ugwe, uswegigwe imbibi syako.” 21Popapo abamanyandagilo nabaFarisai balinkwanda ukwilusania balinkuyoba balinkuti, “Ywani yuyuyu, uyu ikuyoba amahelu? Ywani uyu abagile ukuswa inongwa, nikuti mwene yu Kyala?” 22Umwene Yesu bo akwagenie ukwilusania kwabo, popapo alinkubamula alinkubabula alinkuti, “Mukwilusania fiki mundumbula syinu? 23Lyo ipepe liliku, ilya kuti, ‘Uswegigwe imbibi syako,’ pamo ilya kuti, ‘Sumukaga gwendege?’ 24Loli ukuti mummanyege Nnyamundu ukuti ali namaka ukuswa imbibi nkisu” — alinkumbula ugwa mbungo ya bukokonyale alinkuti, “Nikukubula nikuti, Sumuka, pimbaga ikitala kyako ubukege kukaya.” 25Nakalinga itolo umundu yula alinkwima nkyeni mmyabo, alinkupimba kako alambalelepo, alinkubuka kukaya kake, alinkuntufya Kyala. 26Popapo ikiswigu kilinkubaga bosa, balinkuntufya Kyala; lulinkubaga ulutende ulukulumba balinkuyoba balinkuti, “Umusyugu tusibwene isya kiswigu.”

Yesu ikumbilikila Levi

(Mat 9.9-13; Mar 2.13-17)

27Panyuma pali sisisi Yesu alinkusoka, alinkumbona unsongesyasongo uyu ali yo Levi ingamu, bo atugesye pabusongelo isongo, alinkumbula alinkuti, “Ngongaga.” 28Umwene alinkufileka fyosa, alinkusumuka, alinkunkonga. 29Popapo Levi alinkutendekesya ifyakulya fya palusekelo fi fingi nnyumba yake; kyalipo ikilundilo ikikulumba ikya basongesyasongo, nabangi aba batugesye pakulya nabo. 30#Luk 15.1-2Abene abaFarisai nabamanyandagilo babo balinkwibubusya kubafundigwa bake balinkuti, “Fiki mukulya nukunwa pamopene nabasongesyasongo nabatulanongwa?” 31Umwene Yesu alinkubamula, alinkubabula alinkuti, “Bakaya bo bakafu aba bikundonda unganga, loli ba babine; 32une ngisa kukubabilikila abagolofu, loli abatulanongwa ukuti bapindukege.”

Isya kufipika ifyakulya

(Mat 9.14-17; Mar 2.18-22)

33Abandu bamo balinkumbula Yesu balinkuti, “Abafundigwa ba Yohani bikufipika ifyakulya kabilikabili, kangi bikuti nukwiputa, mo bikubombela bope nabafundigwa ba baFarisai, loli abafundigwa bako bikulya nukunwa itolo.” 34Popapo Yesu alinkubabula alinkuti, “Ngimba mubagile ukubapelela aba bali palusekelo lwa bwegi, ukufipika ifyakulya bo umwegankikulu ali nabo? 35Loli gikwisaga amasiku, bo bansosisyeko umwegankikulu kumyabo, po bisakufipikaga ifyakulya mmasiku gago.”

36Kangi Yesu alinkubabulila nkifwanikisyo alinkuti, “Akayako yumo uyu ikunyafulako ikigamba kumwenda umpya, nukukikatika pamwenda unkulu; linga ikubomba bo bunobuno, po ikugunyafula umpya, kangi ikigamba ikifuma kumwenda umpya gula kitisakufwana nunkulu. 37Kangi akayako yumo uyu ikukusya ubwalwa bwa mafilu ubuteta mfyakubikilamo ifikulu; buno linga umundu akusisyemo, po ubwalwa ubuteta bukonanga ifyakubikilamo po bwende nukoneka fyope nifyakubikilamo fikonangika itolo. 38Loli ubwalwa bwa mafilu ubuteta fikuti bubikigwege mfyakubikilamo ifipya. 39Akayapo yumo uyu bo anwile ubwalwa bwa mafilu ubukulu, ikubulonda kangi ubupya; namanga ikuyoba ikuti, Ubukulu bo bununupo.”

Currently Selected:

LUKA 5: NNBII

Highlight

Copy