LUKA 4

Ukugeligwa kwa Yesu

(Mat 4.1-11; Mar 1.12-13)

1Bo Yesu iswile Mbepo Mwikemo, alinkugomoko ukufuma ku Lusoko lwa Yordani, alinkulongosigwa na Mbepo ukubuka mmatengele; 2mo alinkugeligwa numohesi amasiku amalongo mana (40). Mmasiku gala akalyaga nafimo, lelo bo gamalike, injala yilinkunduma. 3Popapo umohesi alinkuyoba nagwe alinkuti, “Linga uli Mwana gwa Kyala, po uliyobaga kwibwe ili ukuti lipelege fyakulya.” 4#Kukumbu 8.3Umwene Yesu alinkumwamula alinkuti, “Lisimbigwe ilya kuti, ‘Umundu fitikumpa ubumi fi fyakulya fyene.’ ” 5Popapo alinkufyuka nagwe pamwanya, alinkunnangisya ubunyafyale bosa ubwa nkisu nkabalilo akanandi itolo. 6Popapo umohesi alinkumbula alinkuti, “Nikukupaga amaka gosa gagaga nubukulumba bwake, buno mbegigwe une, kangi nikumpaga itolo yuyo linga niganile nimwene; 7lelo linga kubunguluka kumyangu, fyosa fisakuyaga fyako.” 8#Kukumbu 6.13Umwene Yesu alinkumwamula alinkuti, “Lisimbigwe ili likuti, ‘Umbungulukilege uNtwa Kyala gwako, yo umbombelege yuyo mwene.’ ” 9Popapo alinkubuka nagwe nkaya ka Yerusalemu, alinkwakumbika pamwanya pa Nyumba ya Kyala, alinkumbula alinkuti, “Linga uli Mwana gwa Kyala, gwitagege pasi ukufuma apa; 10#Salimo 91.11buno lisimbigwe ili likuti, ‘Isakukulagililaga abandumi bake ukuti bakulindililege,’ 11#Salimo 91.12nilya kuti, ‘Bisakukupimbaga mmaboko gabo, ukuti ungisakwikomaga pibwe ikilundi kyako.’ ”

12 # Kukumbu 6.16 Umwene Yesu alinkwamula alinkuti, “Lisimbigwe ili likuti, ‘Ungangelaga uNtwa Kyala gwako.’ ” 13Lelo bo umohesi amalile ukungela Yesu, popapo alinkundeka, alinkuti linga siku.

Yesu ikwanda imbombo yake nkisu kya Galilai

(Mat 4.12-17; Mar 1.14-15)

14Popapo Yesu alinkugomoka ukubuka nkisu kya Galilai, amaka ga Mbepo galinkuya pamyake; ukufumuka kwake kulinkubalanila nkisu kyosa kya mumbali. 15Umwene alinkubamanyisya Nnyumba syabo syakwiputilamo, abandu bosa balinkuntufya.

Aba nkaya ka Nazareti bikunsyokela Yesu

(Mat 13.52-58; Mar 6.16)

16Popapo Yesu alinkwakufika nkaya ka Nazareti, muno akulile; alinkwingila nnyumba yakwiputilamo pisiku lya Sabati, bo mumo lwayilile ulwino lwake, alinkusumuka pakubala mmasimbo. 17Popapo balinkunninga buku gwa Yesaya unsololi; lelo bo ikupetulania, alinkupaga apa lisimbigwe ilya kuti,

18 # Yes 61.1-2 “Mbepo gwa Ntwa ali pamyangu,

papo ambakile une ukulumbilila Inongwa Inunu kubalondo;

andumile kukufumusya ubwabuke kubakoligwa,

nukuti abafwamaso baketege kangi,

nukubabika mbwabuke aba bakamandanigwe,

19nukufumusya ikyinja ikinunu ikya Ntwa.”

20Lelo bo akupikile buku yula, alinkumpa ugwambombo, alinkutugasya; amaso ga bandu bosa nnyumba yakwiputilamo galinkundulalila yuyo. 21Popapo alinkwanda ukubabula alinkuti, “Umusyugu amasyu aga gafikilemo mumbulukutu syinu.” 22Bosa balinkunsisimikisya, balinkugaswiga amasyu ga ipyana aga gafumaga nkanwa mmyake, balinkuyoba balinkuti, “Uyu, akaya yo yu mwana gwa Yosefu?” 23Umwene alinkubabula alinkuti, “Kisita kwilamwa mwisakumbulilaga une isya mbupingamu isi sikuti, ‘Gwe nganga, oko, gwigangulege gwimwene; syosa isi tupilike ukuti usibombile nkaya ka Kapernaumu, syo ulibombaga sisyo na munomuno nkisu kyako.’ ” 24#Yes 61.1-2Yesu alinkubabula alinkuti, “Naloli nikubabula une nikuti, akayako unsololi uyu ikwimikigwa nkisu kyake. 25#1 Banyaf 17.1Loli une nikubabula mbwanaloli nikuti, balipo abafwilwe bingi nkisu kya Israeli mmasiku ga Eliya, bo kumwanya kwigele ifyinja fitatu nimyesi mihano naguno, pala injala ingulumba yagwile nkisu kyosa; 26#1 Banyaf 17.8-16Eliya akatumigweko kuli yumo ugwa balabala, loli kwene ku kunkikulu yumo umfwilwe ugwa nkaya ka Zarefati nkisu kya Sidoni. 27#2 Banyaf 5.1-14Kangi balimo ba bingi abambungo ya bukoma nkisu kya Israeli mmasiku ga nsololi Elisha, loli akalyelusigwemo yumo, mwene yu Naamani umundu gwa nkisu kya Siria.” 28Lelo bo basipilike sisisi, popapo bosa nnyumba yakwiputilamo balinkwisula nubukalale. 29Popapo balinkusumuka balinkunsosyamo nkaya kabo, balinkubuka nagwe pamwanya pakyamba apa akaya kabo kayengigwe, balinkwakufika nagwe pambali palupanga ukuti bambungulusye; 30umwene loli alinkukisania pakati pamyabo, alinkubuka.

Umundu uyu ali nimbepo inyali

(Mar 1.21-28)

31Popapo Yesu alinkusuluka ukubuka mu Kapernaumu, akaya ka nkisu kya Galilai, alinkubamanyisya abandu pisiku lya Sabati. 32#Mat 7.28-29Balinkuswiga fiyo nulumanyisyo lwake, namanga ilisyu lyake lyali namaka. 33Lelo alimo umundu yumo nnyumba yakwiputilamo uyu ali nimbepo inyali iya Setano; yo alinkukolela ilisyu ilikulumba alinkuti, 34“Elayu Tuli buki nanuswe nanugwe Yesu gwa nkaya ka Nazareti? Kingamo gwisile nkutupyuta itolo? Ngumenye ugwe, uli Mwikemo gwa Kyala ugwe.”

35Umwene Yesu alinkuyikemela alinkuti, “Batama! Sokamo mmundu uyu.” Popapo imbepo inyali yilinkumbiga pasi pakati pamyabo, yilinkusoka mmyake, bo yikandemasya napamo. 36Popapo ulutende lulinkubaga bosa, balinkulalusania balinkuti, “Lyo isyu iki lilili, buno nubulambiki namaka ikusilagila imbepo inyali, isyene sikwenda nukusoka?” 37Popapo ukufumuka kwake kulinkubalanila nkisu kyosa ikya mumbali.

Yesu ikubabumbulusya abandu ba bingi

(Mat 8.14-17; Mar 1.29-38)

38Popapo Yesu alinkusokamo nnyumba yakwiputilamo, alinkwakwingila nnyumba ya Simoni. Loli unko gwa Simoni unkikulu ali mbine fiyo ali nisekema, abene balinkunsumila kumyake; 39alinkwakwima pabupipi nagwe, alinkuyikemela isekema, iyene yilinkundeka; nakalinga itolo alinkusumuka, alinkwanda ukubabombela.

40Lelo bo ilisuba likuyonga, popapo bosa aba bali nababine aba mbungo syosa itolo, balinkubatwala kumyake. Umwene alinkubabikapo amaboko yumoyumo, alinkubabumbulusya. 41Syope nimbepo inyali silinkusokamo mbandu ba bingi, silinkukuta silinkuti, “Ugwe uli Mwana gwa Kyala;” umwene alinkusikemela nukusikanisya ukuti singayobaga, papo syalimmenye ukuya yo Kristi.

Yesu ikulumbilila nnyumba syakwiputilamo

(Mar 1.35-39)

42Lelo bo bukile, popapo Yesu alinkusokamo nkaya alinkubuka pabusita bandu ifyene ifilundilo fya bandu filinkundonda, filinkwisa kumyake, fyalondaga ukungomola ukuti angasokangamo mmyabo. 43Umwene loli alinkubabula abandu alinkuti, “Kumbagile une ukulumbilila Inongwa Inunu isya butwa bwa Kyala na ntwaya utungi, buno syo sisyo ndumigwe ukwisakukubomba.”

44Popapo alinkulumbilila kosakosa Nnyumba syakwiputilamo nkisu kya Galilai.

Currently Selected:

LUKA 4: NNBII

Highlight

Copy