YOHANI 16
16
1“Syo mbabulile sisisi ukuti mungayaga basita lwitiko. 2Bisakubasosyaga nnyumba syakwiputilamo; naloli kikwisaga akabalilo apa gwesa uyu ikubagoga, isakwinogonaga ukuti ikumbombela akabombo Kyala. 3Syo bisakubombaga sisisi, papo bakammanya Tata, nanine bakamanya. 4Mbabulile sisisi ukuti bo kisile akabalilo kala, mwisemukumbukege ukuti nababulile une. Loli pabwandilo ngababulile sisisi, papo nali nanumwe.
5“Loli lilino nikubuka kuli uyu alindumile une, kangi nayumo mmyinu atikundalusya ukuti, ‘Kubuka kugu?’ 6Loli papo mbabulile sisisi, popapo indumbula syinu siswile ubusulumanie. 7Loli nikubabula isya naloli une nikuti, sikuyaga nunu kumyinu linga nikubuka; buno linga ndikubuka, po Unjili atisakwisa kumyinu, loli linga nikubuka, nisakuntumaga kumyinu. 8Lelo umwene bo isile, isakukitobesyaga ikisu panongwa ya mbibi, nubugolofu, nubulongi. 9Panongwa ya mbibi, isakukitobesyaga ikisu papo kikanyitika une; 10panongwa ya bugolofu, isakukitobesyaga papo nsumwike kwa Tata kangi mutisakumbonamo; 11panongwa ya bulongi, isakukitobesyaga ikisu papo unkulumba gwa kisu kikiki alongigwe.
12“Ngali ndi nasyo nyingi isya kubabula, loli mukabagila ukusikola lilino. 13Loli linga isile yuyo, yu Mbepo gwa naloli, yo isakubalongosyaga mbwanaloli bosa; buno atisakuyobaga isyake mwene, loli syosa isi ikusipilika, syo isakusiyobaga; kangi isakubafumukisyaga isi sikwisaga. 14Umwene isakumbaga ubukulumba une, namanga isakwegaga mfyangu une, fyo isakubafumukisyaga. 15Fyosa ifi ali nafyo Tata, fyo fyangu une. Po apa njobile ukuti, Isakwegaga mfyangu, fyo isakubafumukisyaga umwe.
Ubusulumanie nubwikyele
16“Pasyele panandi po mutikumbonaga, kangi pasyele panandi po mukumbonaga.”
17Popapo abafundigwa bake bamo balinkulalusania balinkuti, “Fyo fiki ifi ikutubula ikuti, ‘Pasyele panandi mutikumbonaga, kangi pasyele panandi po mukumbonaga?’ Napa ikuti, ‘Nsumwike kwa Tata.’” 18Balinkuyoba balinkuti, “Fyo fiki ifi ikuyoba ikuti, ‘Pasyele panandi?’ Tukasyagania uswe isi ikuyoba.”
19Umwene Yesu alinkusimanya isi balondaga ukundalusya, popapo alinkubabula alinkuti, “Syo mukulalusania apa njobile ukuti pasyele panandi mutikumbonaga, kangi ‘pasyele panandi po mukumbonaga?’ 20Naloli nikubabule une nikuti, umwe mwisakulilaga, kangi mwisakukutaga, ikyene ikisu loli kyo kisakusekelaga; umwe mwisakusulumaniaga, loli ubusulumanie bwinu bwisakwipelaga ukuya lusekelo. 21Apa linga unkikulu ali pakupapa umwana, po ikuya nubusulumame, papo akababililo kake kafikile; loli linga umwana apapigwe, po atikubukumbuka ubutolwe panongwa ya lusekelo lwa kuti, umundu apapigwe nkisu. 22Nanumwe lelo muli nubusulumanie, loli nisakubabonaga kangi, po indumbula syinu sisakusekelaga, kangi ulusekelo lwinu nayumo atisakulusosyangapo pamyinu.
23“Pisiku lilyo po mutisakundalusyaga une simo. Naloli nikubabula une nikuti, fyosa ifi linga mukusuma kwa Tata, fyo isakubapelaga mungamu yangu. 24Ukwisakufika kulilino kuno, mukasumilamo fimo mungamu yangu; amusumege po mukwambililaga, ukuti ulusekelo lwinu lwipelege lupelelesye.
Ukukitola ikisu
25“Sisisi syo mbabulile mbupingamu, kikwisaga akabalilo apa ndisakuyobelaga nanumwe kangi mbupingamu, loli nisakusiyobaga pabwelu itolo inongwa sya Tata. 26Pisiku lilyo mwisakusumilaga mungamu yangu, loli ndikubabula une ukuti nisakubasumilaga kwa Tata. 27Namanga umwene Tata abaganile umwe, papo umwe munganile une, kangi mwitike ukuti une mfumile kwa Kyala. 28Une nafumile kwa Tata, nisile nkisu muno; kangi nikukilekaga ikisu, nikubukaga kwa Tata.”
29Popapo abafundigwa bake balinkuyoba balinkuti, “Keta, lilino po kuyoba itolo pabwelu, utikuyobela mbupingamu. 30Lilino po tusyagenie ukuti ugwe usimenye syosa, kangi utikulonda ukuti yumo akulalusyege simo muli sisisi tukwitika ukuti ufumile kwa Kyala.” 31Popapo Yesu alinkubamula alinkuti, “Mukwitika lilino? 32Keta kikwisaga akabalilo, ena nalilino kisile, apa mwisakunyambanikaga uyu kumyake uyu kumyake, nukundeka nimwene; loli ngaya nimwene, buno Tata ali nanine. 33Sisisi syo mbabulile ukuti muyege nulutengano mmyangu. Nkisu muno muli nulukubilo, loli amukibege itolo, une nkitolile ikisu.”
Currently Selected:
YOHANI 16: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
