YOHANI 17

Yesu ikubiputila abafunidgwa bake

1Bo Yesu ayobile sisisi, popapo alinkuketa kumwanya alinkuyoba alinkuti, “Gwe Tata, kisile akabalilo; mpepo ubukulumba uMwanako, ukuti yope uMwanako akupege ubukulumba. 2Bo apa umpele amaka pabandu bosa, ukuti abapege ubumi bwa bwila bosa aba umpele. 3Ubwene ubumi bwa bwila, ko kukumanya linga bakumenye ugwe ukuya gwe Kyala gwa naloli gwimwene, linga batile nukummanya Yesu Kristi uyu untumile. 4Une ngupele ubukulumba ugwe nkisu muno, imbombo iyi gwalimbele ukuti njibombe, yo njimalile. 5Lilino lelo gwe Tata, umbege ubukulumba nkyeni mmyako, ubukulumba ubu nali nabo nkyeni mmyako bo kikali ukuyako ikisu.

6“Mbafumukisye ingamu yako abandu, aba umbele ukufuma nkisu muno; bali bako lelo umbele une, abene ilisyu lyako balibikile mundumbula syabo. 7Lilino bamenye ukuti fyosa ifi umbele, fyo fifumile kumyako. 8Buno amasyu aga umbele une, go mbapele, abene bagambilile, bamenye naloli ukuti mfumile kumyako kangi bitike ukuti gwalindumile yuyugwe.

9“Une nikubasumila babo, ndikukisumila ikisu, loli babo umbele ugwe, buno bako yuyugwe. 10Namanga fyosa ifyangu fyako yuyugwe, kangi ifyako fyo fyangu; po lelo ubukulumba bwangu bukubonekela mmyabo. 11Une ngayamo nkisu muno kangi, loli abene balimo nkisu muno, lelo une nikwisa kumyako. Gwe Tata gwe Mwikemo, ubalindililege mungamu yako iyi umbele, ukuti bipelege ukuya yumoywene, bo apa nanuswe tuli yumoywene.

12 # Salimo 41.9; Yoh 13.18 “Apa nalimo, ndinkubalindilila mungamu yako iyi gwalimbele, ndinkububatila, alinkusita nukusobapo nayumo mmyabo, loli mwene yu nnya lonangiko, ukuti mosisilege isi sisimbigwe mmasimbo. 13Loli lilino nikwisa kumyako, nikusiyoba sisisi bo ngali ndi nkisu, ukuti ulusekelo lwangu luyege lupelelesye itolo mmyabo. 14Une mbapele ilisyu lyako, loli ikisu kibabengile, papo bakaya ba nkisu, bo apa nanine ngaya gwa nkisu. 15Ndikusuma ukuti ubasosyemo nkisu, mma, loli ukuti ububatilege ku mbibi.

Ubusulumanie nubwikyele

16“Bakaya ba nkisu muno, bo apa nanine ngaya gwa nkisu muno. 17Bapelege bikemo mbwanaloli; ilisyu lyako bo bu bwanaloli. 18Bo papo undumile une nkisu, mo mumo nanine mbatumile nkisu. 19Une nikwikemesya panongwa yabo, ukuti bope bipelege bikemo mbwanaloli.

20“Lelo ndikubasumila bene bababa, loli nikubasumila bope naba bisakunyitikilaga mwisyu lyabo, 21ko kuti bosa bipelege yumoywene, bo papo ugwe Tata uli mmyangu, nanine ndi mmyako; ukuti bope bayege mu mmyitu, ko kuti ikisu kitikege ukuti yo ugwe undumile. 22Ubukulumba ubu gwalimbele une bo mbapele babo, ukuti bope bipelege ukuya yumoywene, bo apa nanuswe tuli yumoywene; 23une ndi mmyabo, nanugwe uli mmyangu, po ukuti bipelege bapelelesye itolo ukuya yumoywene, ko kuti ikisu kimanyege ukuti ugwe undumile une, nukuti ubaganile bo apa unganile une. 24Gwe Tata, bosa aba umbele une, niganile ukuti kuno ndiko une ko bayege bope, ukuti babuketege ubukulumba bwangu ubu umbele une, namanga gwalinganile bo kikali nukwaligwa ikisu. 25Gwe Tata gwe ngolofu, ikisu kikakumenye, loli une nakumenye, bope bababa bamenye ukuti ugwe undumile une. 26Une mbafumukisye ingamu yako, kangi nisakuyifumusyaga, ukuti ulugano ulu unganile une luyege mmyabo, nanine njege mu mmyabo.”

Currently Selected:

YOHANI 17: NNBII

Highlight

Copy