YOHANI 18

Ukukoligwa kwa Yesu

(Mat 26.47-56; Mar 14.43-50; Luk 22.47-53)

1Umwene Yesu bo ayobile sisisi, popapo alinkusoka nabafundigwa bake, alinkubuka isilya lila lya nkikoga kya Kedroni, ko gwaliko ungunda; mungunda gulagula mo alinkwakwingila yuyo nabafundigwa bake. 2Loli Yuda uyu ambikaga mmaboko ga balugu, abumenye abuyo ubu, namanga mo mumo kabilikabili Yesu abunganaga nabafundigwa bake. 3Umwene Yuda bo egile ikilundilo kya basikali ba baRoma nababombi ba baputi abakulumba naba baFarisai, alinkubuka kuko ninyale, nifikoka, nifilwilo. 4Umwene Yesu bo asimenye isi syayaga pakumwisila, popapo alinkubuka alinkubalalusya alinkuti, “Mukundonda ywani?” 5Abene balinkumwamula balinkuti, “Yesu gwa nkaya ka Nazareti.” Umwene Yesu alinkubabula alinkuti, “Yo une.” Yope Yuda uyu ambikaga mmaboko ga balugu, yo alyimile pamopene nabo. 6Umwene Yesu bo ababulile ukuti, “Yo une,” popapo balinkubuyila kyanyumanyuma, balinkugwa pasi. 7Yesu alinkubalalusya kangi alinkuti, “Mukundonda ywani?” Abene balinkuti, “Yesu ugwa nkaya ka Nazareti.” 8Popapo alinkwamula alinkuti, “Keta, Mbabulile ukuti yo une. Lelo linga mukundonda une, amubalekege aba babukege; 9ukuti mo lisilege ilisyu ili ayobile ukuti, ‘Muli aba gwalimbele, akasobapo nayumo.’ ” 10Umwene Simoni Peteri yo ali nulubo, popapo alinkulukwaba, alinkunsenga untumwa gwa mputi unkulumba, alinkumwangula imbulukutu yake iya kukililo; untumwa yuyuyu ali yo Maliko ingamu. 11#Mat 26.39; Mar 14.36; Luk 22.42Popapo Yesu alinkumbula Peteri alinkuti, “Fyatika ulubo ulo munyambi yake; ikinwelo kya ngubilo iki ambele Tata, kyo nati ndeke ukukinwa?” 12Popapo ikilundilo kya basikali ba baRoma, nundongosi gwabo, nababombi ba baYuda balinkunkola Yesu balinkumpinya; 13balinkutala ukuntwala kwa Hanasi, namanga ali yo nko gwa Kayafa uyu ali yo mputi unkulumba ikyinja kikyo. 14#Yoh 11.49-50Ali yo yu Kayafa uyu ababulaga abaYuda ukuti, “Kwali kununu ukuti umundu yumo abafwilege abandu.”

Peteri ikunkana Yesu

(Mat 26.69-70; Mar 14.66-68; Luk 22.55-57)

15Umwene Simoni Peteri numfundigwa uyungi balinkunkonga Yesu. Loli umfundigwa yula, yo umputi unkulumba alimmenye, bunobuno alinkwakwingila na Yesu ndupaso lwa mputi unkulumba; 16loli Peteri yo alinkwima panja pakifigo. Popapo umfundigwa uyungi uyu umputi unkulumba alimmenye, alinkusoka, alinkwakuyoba nundindililakifigo; po lelo alinkumwingisya Peteri. 17Popapo undindwana undindililakifigo alinkundalusya Peteri alinkuti, “Ngimba ukaya gwe yumo mbafundigwa ba mundu uyu?” Umwene alinkwamula alinkuti, “Ngaya yo une.” 18Abatumwa nababombi balyimile papo bakosisye umoto gwa mababu, namanga yaliko imbepo yope Peteri alyimile nabo, otaga umoto.

Yesu numputi unkulumba

(Mat 26.59-66; Mar 14.55-64; Luk 22.66-71)

19Popapo umputi unkulumba alinkundalusya Yesu isya bafundigwa bake, nisya lumanyisyo lwake. 20Umwene Yesu alinkumwamula alinkuti, “Isi une nayobaga syo nayobile kukisu pabwelu itolo; bwila namanyisyaga nnyumba syakwiputilamo na Nnyumba ya Kyala, muno abaYuda bosa bikubungana ngayobamo simo kubutitu. 21Po kundalusya fiki? Ubalalusyege aba basipilikaga sisyo nababulaga, buno basimenye isi nasiyobile.” 22Lelo bo ayobile lilili, popapo umbombi yumo uyu alyimile papo, alinkunkoma nipi Yesu, alinkumbula alinkuti, “Bo kumwamula umputi unkulumba bunobuno?” 23Umwene Yesu alinkumwamula alinkuti, “Linga njobile kabibi, po ulibusisimikisyaga ububibi bwangu; loli linga njobile kanunu, po kungoma fiki?” 24Popapo Hanasi alinkumpinya Yesu, alinkuntuma kumputi unkulumba Kayafa.

Peteri ikunkana Yesu

(Mat 26.71-75; Mar 14.69-72; Luk 22.58-62)

25Umwene Simoni Peteri akali alyimile papo, otaga umoto; popapo abangi balinkundalusya balinkuti, “Ngimba ukaya gwe yumo mbafundigwa ba mundu uyu?” Umwene alinkukana alinkuti, “Ngaya yo une.” 26Popapo untumwa yumo gwa mputi unkulumba, unkamu gwa mundu uyu Peteri alimwangwile imbulukutu, alinkuyoba alinkuti, “Kali ngakubwene nagwe mungunda mula?” 27Umwene Peteri alinkukana kangi; nakalinga itolo ingongobe yilinkwenda nukubilikila.

Yesu imile nkyeni mwa Pilati

(Mat 27.1-2,11-14; Mar 15.1-5; Luk 23.1-5)

28Bo kukukya itolo, popapo balinkusoka nagwe Yesu ukufuma ku nyumba ya Kayafa, balinkubuka nagwe nnyumba ya ndindililakisu, ukuti banginyasyaga, ko kuti balyege ifya Kyaka kya Pasa. 29Popapo Pilati alinkusoka, alinkubuka apa balipo, alinkubalalusya alinkuti, “Mukundonga sya fiki umundu yuyuyu?” 30Abene balinkumwamula balinkuti, “Linga umundu yuyuyu akali mbombambibi, po angali tukantwala kumyako.” 31Umwene Pilati alinkubamula alinkuti, “Amumwegege yuyumwe, mukandongege ukufwana nululagilo lwinu.” Abene abaYuda balinkumbula balinkuti, “Uswe tutikwitikisigwa ukungoga yumo umundu.” 32#Yoh 3.14; 12.32(Ukuti mo lisilege ilisyu ili aliyobile Yesu, ukunangisya ubufwe ubu ayaga pakufwa.)

33Popapo Pilati alinkwingila kangi nnyumba ya bulindililakisu, alinkumbilikila Yesu, alinkundalusya alinkuti, “Bati ugwe uli Malafyale gwa baYuda?” 34Umwene Yesu alinkwamula alinkuti, “Syo kuyoba sisisi gwimwene, pamo bangi itolo aba balaibulile isyangu?” 35Popapo Pilati alinkumwamula alinkuti, “Ndi nYuda une? Aba kikolo kyako nabaputi abakulumba, bo aba bakutwele kumyangu, utulile fiki?” 36Umwene Yesu alinkumwamula alinkuti, “Ubunyafyale bwangu bukaya bwa nkisu iki. Linga ubunyafyale bwangu bwali bwa nkisu iki, angali ababombi bangu bikundwila, ukuti nangabikigwaga mmaboko ga baYuda; loli lilino, ubunyafyale bwangu bukaya bwa munomuno.” 37Popapo Pilati alinkundalusya alinkuti, “Ngimba uli Malafyale lelo?” Umwene Yesu alinkumwamula alinkuti, “Bo lilyo kuyoba; une ndi Malafyale. Buno syo sisyo mbapiligwe, kangi syo sisyo nisile nkisu, ukuti mbusisimikisyege ubwanaloli. Gwesa uyu ali pabwanaloli, yo ikulipilika ilisyu lyangu.” 38Umwene Pilati alinkulalusya alinkuti, “Ubwanaloli fyo fiki?”

Situmuligwe ukuti Yesu agogigwege

(Mat 27.15-31; Mar 15.6-20; Luk 23.13-25)

Lelo bo ayobile sisisi, popapo alinkusoka kangi, alinkubuka ku baYuda, alinkubabula alinkuti, “Une ndikuyagamo inongwa mmyake. 39Loli muli nulwiho lwa kuti mbabulilege umundu yumo pa Kyaka kya Pasa. Bule lelo mukulonda ukuti mbabulilege Umalafyale gwa baYuda?” 40Abene loli balinkuywega kangi balinkuti, “Yomma yuyuyu, loli Baraba.” (Umwene Baraba lyali inyambuta.)

Currently Selected:

YOHANI 18: NNBII

Highlight

Copy