San Marcos 13

Dio-rü ukuokuäkuäwode ma̧ä̧chä̧kua̧'a̧ Jesú-mä̧ ji'äwinü̧

(Mt 24.1-2; Lc 21.5-6)

1Ja̧'wa̧ta̧nü̧ Jesú Dio-rü ukuokuäkuäwodettü räopomȩnä̧, u̧wo̧juȩtä̧u̧ttü̧ ya̧tȩ pä'inü̧:

—¡Chu̧ru̧wa̧, topittü̧ isoo juiyo inä̧wiyä adiwä juei ja̧'wa̧ta̧nü̧ isode adiwode!

2Päomȩnä̧, Jesú-mä̧ ädätinä̧ku̧: —¿Pode rü̧ȩnä̧ adiu adikuode topüjä̧? podemä̧ kki̧'ü̧ juiyünä̧tä̧ ma̧ä̧chä̧kua̧'a̧.

Pi̧jä̧ beipächäkua'a ä'kanä̧ 'kuäopä̧kuȩ wȩnȩ

(Mt 24.3-28; Lc 21.7-24; 17.22-24)

3Jua̧u̧nü̧ o'ka'a, Dio-rü ukuokuäkuäwode pä̧tȩkuä̧nü̧ olivos mü̧ä̧'kara̧'a̧ 'chä̧ji̧'ka̧, Jesú ü̧'ä̧mä̧do̧mȩnä̧, Peduru'i̧nä̧, Sa̧ti̧a̧ku̧'i̧nä̧ ja̧'wa̧ta̧nü̧ André'i̧nä̧ kkatätä päi'omȩttü̧ jä'epü ä̧ju̧kui̧nä̧tü̧. 4Ji'äwitü, ¿Ti̧yȩnü̧ 'kuäopäkua'ajä̧ttü̧ jua̧u̧mä̧? ¿Ja̧'wa̧ta̧nü̧ däjetä topü wo̧juä̧wä̧kua̧'a̧jä̧ttü̧, täkü tü'küwächa'a pä'ümä̧?

5Pättäku, Jesú ädätinä̧u̧: Ttü̧'ȩpä̧rä̧kuä̧u̧ kka̧kuä̧tu̧kui̧, yapareu jittäumä̧ ya̧tȩ'i̧nä̧ kuesetätukuä. 6Isopäi'ünä̧, Ttü chi̧mi̧nä̧ wȩnȩkuä̧rü̧ rekuätü, Ttütäsä Crito-mä̧ pä'ätü ttichäkuotü; ja̧'wa̧nü̧ jȩpü̧ rekuätürü ttesetünä̧ ttüyapärewäkuotü.

7Ja̧'wa̧ta̧nü̧ kkoromȩ pünä̧ kurä kka̧'a̧ kuä̧ju̧kuä̧tu̧kuo̧mȩnä̧mä̧, yekuekuätükuä. Iweye ja̧'wa̧ta̧nü̧tä̧ 'kuäopa pä'ü rekuä rü̧ja̧'a̧; ja̧'wa̧nü̧ ja̧'a̧nä̧, ji̧nä̧ pi̧jä̧ rȩjȩmä̧ beipächoka'anä̧ jä̧kua̧'a̧. 8Ja̧'wa̧ta̧nü̧, kko̧ro̧jä̧ ttü̧ja̧'i̧nä̧ kkoro rȩjȩ ttü̧ja̧ku̧ ttürowäwäkuotü; rȩjȩ'i̧nä̧ ttü̧ȩpä̧kua̧'a̧, ppäi'i̧nä̧ ttuttäkuotü kkoromȩ kkoromȩ jü̧'a̧kuä̧. Pi̧yȩmä̧, usurä ȩmä̧kuä̧wä̧ pä'ü kkä̧mä̧da̧'a̧ jä̧kua̧'a̧.

9Ja̧'wa̧nü̧ ukututä'i̧nä̧, tta̧'a̧rä̧kuä̧u̧ kka̧kuä̧tu̧kui̧; isopäi'ünä̧, ruwotürü iyü ttikuäkuä̧u̧jä̧ ja̧'wa̧ta̧nü̧ sinagoga odewiyättü kuäkuättäkuä̧u̧jä̧. Ttü jäwänä̧mä̧, gobernador ruwotü ttä'ka jo̧mȩ'i̧nä̧, rȩjȩ ruwotü ttä'ka jo̧mȩ'i̧nä̧ ttȩpä̧kuä̧u̧jä̧; ttü chütü'kü juätürü jikuäwätukua pä'ü. 10Ja̧'wa̧ta̧nü̧ pi̧jä̧ beipächäkua'a ä'kanä̧mä̧, jareü wȩnȩ jo̧mȩnü̧ ji'äu kättädü o'ka'a jä̧kua̧'a̧. 11Ja̧'wa̧ta̧nü̧, ruwotü ttä'ka jo̧mȩ ttȩpo̧mȩnä̧, däjé jitäwäkua'ajó pä'ümä̧, kua̧'kua̧ tta̧kuȩkuä̧tu̧kuä̧. Jua̧u̧nu̧mä̧ iyäwi'ütä kukuokuäkuotüjä̧, ukuturu pä̧wä̧rü̧jü̧mä̧kü̧, Epíritu Sa̧tu̧tä̧ i̧yä̧kua̧ kukuokuätukua pä'ümä̧. 12Ja̧'wa̧ta̧nü̧ ttü̧bü̧o̧tü̧ku̧mä̧, ttü̧jä̧wa̧tü̧ku̧mä̧ iyäkuäu ttikuäkuotü kuä'ü ttikuatü pä'ü; ttä'otü̧'i̧nä̧, tti̧tti̧mü̧ku̧ mi̧kuä̧ri̧yä̧kuä̧u̧ iyä'chäkuäu ttikuäkuotü; ja̧'wa̧nü̧ jȩttä̧kuä̧wo̧mȩnä̧ kuä'äu ttikuäkuä̧u̧. 13Ja̧'wa̧ta̧nü̧ ttü jäwänä̧mä̧, o'katoi'ünä̧ tta̧mi̧ suru tottäkuä̧u̧jä̧; ja̧'wa̧nü̧ ja̧'a̧nä̧ rüjí mo̧ro̧ päi'ünä̧ a̧mi̧ 'ki'ächi'ü kkü̧tä̧ jä̧kua̧'a̧ ra̧wä̧pi̧jü̧ttü̧ ttü̧ji̧pä̧kuo̧tü̧mä̧.

14Ja̧'wa̧nü̧ ja̧'a̧nä̧, ofrenda jȩä̧kuä̧wo̧mȩttü̧ jua̧u̧ jȩä̧kuä̧wo̧ka̧'a̧ku̧ surojü jȩttü̧ mo̧ro̧ päi'omȩnä̧, (profeta Daniel, päinü̧ta'anü̧ ukuokumä̧ wo̧jui̧'i̧;) —Ja̧'wa̧nü̧ ja̧'a̧ topümä̧ yotäku dükuekuätukuajä̧, Judea rȩjȩnä̧ kka̧kuä̧tü̧mä̧ mü̧ä̧'kiyura̧'a̧ku̧. 15Ja̧'wa̧ta̧nü̧ ojusode wä̧mȩ kkü̧mä̧, kui̧mȩyȩwä̧ kuojusodettü kkorojuei kuȩma̧ pä'ümä̧. 16Ja̧'wa̧ta̧nü̧ pättara̧'a̧ kkü̧mä̧ kuiäreti̧yu̧ kuȩma̧ pä'ümä̧ ppa̧kuä̧chä̧. 17¡Ja̧'wa̧nü̧ ja̧'a̧nä̧, ji̧yȩnü̧ mo̧ro̧ muchotürü'i̧nä̧, ppo̧'ä̧tü̧rü̧ atate ajätürü'i̧nä̧ adiwoka'a jä̧kua̧'a̧! 18Ja̧'wa̧nü̧ ja̧'a̧ttü̧ Dio-rütä ukuokuätukui jua̧u̧mä̧ a̧'ȩnä̧ 'kuäopü juiyäkua'anü̧. 19Jua'amä̧ Dio pi̧jä̧ kkä̧mä̧dü̧ aditina̧'a̧tä̧ päi'ünä̧ usurä ttȩmä̧wo̧kü̧ jä̧'i̧jü̧ usurä ttȩmä̧u̧ rȩbȩwä̧kua̧'a̧; ja̧'wa̧nü̧ rü̧ȩnä̧ usurä ttȩmä̧u̧mä̧, jua̧u̧mä̧ kkoronü̧'i̧nä̧ yoriso 'kuäopokü jä̧kuȩ usurä ȩmä̧kuä̧wä̧ 'kuäopäkua'a. 20Isopäi'ünä̧ Tu̧ru̧wa̧ ji̧yȩnü̧ mo̧ro̧ be'ädü iku juiyüttümä̧ o'katoi'ünä̧ kki̧'o̧ko̧tü̧ pa̧ja̧tü̧; ja̧'wa̧nü̧ ja̧'a̧nä̧ jitü ȩmi̧nä̧u̧ jäwänä̧ mo̧ro̧mä̧ be'ädü i̧kuä̧kua̧.

21Ja̧'wa̧nü̧ ja̧'a̧ttü̧ ukuturu: Topätukui Crito-mä̧ yȩna̧ja̧ kkü̧, yȩnȩ ichi'äji pättüttümä̧ kuesetätukuätü. 22Isopäi'ünä̧, Crito i̧mi̧nä̧ yaparewätü'i̧nä̧, profeta tti̧mi̧nä̧ yaparewätü'i̧nä̧ ttichäkuotü, jȩtto̧kü̧ ja̧jü̧juei'i̧nä̧ jȩttä̧kuo̧tü̧, ja̧'wa̧nü̧ jȩpü̧ Tu̧ru̧wa̧ ȩmi̧nä̧u̧ru̧'i̧nä̧ ttesetipünä̧ jȩtta̧ pä'ü tta̧mü̧kuädäkuotü. 23Ja̧'wa̧nü̧ ja̧'a̧ttü̧ ttu̧'ȩpä̧rä̧kuä̧u̧ kka̧kuä̧tu̧kui̧; täkü ä'kanä̧ jidäwä̧u̧jä̧.

Ubo I̧tti̧ ppa̧wä̧chä̧kuȩ wȩnȩ

(Mt 24.29-35,42,44; Lc 21.25-36)

24Ja̧'wa̧nü̧ ja̧'a̧nä̧ ji̧yȩnü̧ mo̧ro̧ usurä ttȩmä̧u̧ o'ka'a päi'omȩnä̧; kkä̧wa̧mä̧ na̧wi̧'ä̧kua̧'a̧ ja̧'wa̧ta̧nü̧ yodó kkä̧wa̧'i̧nä̧ kkȩdȩpo̧ka̧'a̧ jä̧kua̧'a̧. 25Ja̧'wa̧ta̧nü̧ si̧ri̧'kü̧mä̧ mo̧ro̧jä̧ttü̧ ttattäwächäkuotü ja̧'wa̧ta̧nü̧ mo̧ro̧jä̧nä̧ kka̧ku̧ ujuru'i̧nä̧ tti̧ȩpä̧kua̧'a̧. 26Ja̧'wa̧nü̧ päi'omȩnä̧, ttü ubo I̧tti̧rü̧ ajiya isoppanä̧, chujuruku, churuwoku chicha'a tottäkuotü. 27Ja̧'wa̧nü̧ päi'omȩnä̧, chumüwäyotü á̧gȩrȩ-rü pi̧jä̧ rȩjȩ bȩi̧pä̧ra̧'a̧bü o'kajuiyünä̧ päi'ünä̧, Ttütä chȩmi̧nä̧u̧ru̧ ttü̧ka̧ka̧ta̧ pä'ü wȩdä̧kua̧sä̧.

28Higo dauttü topü, wȩnȩkuä̧cha̧'a̧ wo̧jui̧'ä̧tu̧kui̧: Ä̧na̧jui̧yä̧ ppo̧a̧'a̧nä̧, ojiyä räreomenämä̧, täkü du'o tü'küwächa'a pä'ü ku̧wo̧juä̧'i̧tu̧ku̧'a̧nü̧. 29Ja̧'wa̧nü̧ jä̧'i̧jü̧ta̧'a̧nü̧, pi̧yȩ 'kuäopa'a to'kuätukuomȩnä̧mä̧, ubo I̧tti̧mä̧ täkü äpate ä'ka kkü̧ pä'ü ku̧wo̧juä̧tu̧kua̧jä̧. 30Isopäi'ünä̧ pä'üsä ukuturu, pi̧yȩmä̧ o'kajuiyünä̧ 'kuäopäkua'a jitä pä̧nä̧ kka̧kuä̧tü̧ 'koru juottächäkua'a ä'kanä̧. 31Mo̧ro̧jä̧'i̧nä̧, pi̧jä̧'i̧nä̧ beipächa'anä̧, ttü chi̧wȩnȩmä̧ yoriso beipächokü jä̧kuȩ.

32Ja̧'wa̧nü̧ ja̧'a̧nä̧, jä̧kuȩ mo̧ro̧'i̧nä̧, jä̧kuȩ hora'i̧nä̧ tü'kümä̧ ya̧tȩ'i̧nä̧ yoriso jeruäkuäwa'a, mo̧ro̧jä̧nä̧ kka̧kuä̧tü̧ á̧gȩrȩ'i̧nä̧, I̧tti̧'i̧nä̧ jerupätü. Ja̧'wa̧nü̧ ja̧'a̧nä̧, Jä'otätä ja̧'a̧ wo̧jua̧mä̧.

33Ja̧'wa̧nü̧ ja̧'a̧ttü̧, ukutumä̧ tta̧'a̧rä̧kuä̧u̧ topärä̧kuä̧wä̧tu̧kui̧, isopäi'ünä̧ jä̧kuȩ mo̧ro̧mä̧ kuieruwätukua'attü̧. 34Ya̧tȩ ubo ojusodettü otó kue'ächü i̧'cho̧mȩnä̧, umüwäyotü yotukunä̧rü̧ ttaditäwä we'ipükkä̧nü̧, äpatenä̧ tta̧'ä̧rü̧rü̧mä̧ ä'i'oka'a tta̧wä̧ri̧ya̧rü̧ pä'ü weipa'a jä̧'i̧nü̧'a̧nü̧ ja̧'a̧. 35Ja̧'wa̧nü̧ ja̧'a̧ttü̧, to̧pä̧rü̧ kuä'i'ätukuoka'a kka̧kuä̧tu̧kui̧; isode u̧ru̧wa̧ ichäkuomȩmä̧ kuieruwätukua'attü̧; ni̧pä̧ro̧mȩku̧ jä̧kua̧'a̧ pä'üdä̧jä̧, yodó kkä'ko jä̧kua̧'a̧ pä'üdä̧jä̧, äkärä woa'aku jä̧kua̧'a̧ pä'üdä̧jä̧, mo̧ro̧ juoa'aku jä̧kua̧'a̧ pä'üdä̧jä̧ kuieruwätukua'attü̧. 36Isopäi'ünä̧ Ttü ku̧ni̧chä̧rä̧tu̧kua̧'a̧nä̧ chichomȩnä̧, ä̧'ä̧rü̧ ku̧'ȩjä̧tu̧ku̧ juiyäkua'anü̧. 37Ja̧'wa̧nü̧ ja̧'a̧ttü̧, ukuturu pädümä̧ o'katoi'ünä̧rü̧'i̧nä̧ pä'üsä: ¡Kuä'i'ätukuoka'atä to̧pä̧rä̧tu̧kui̧!, jü̧nä̧.

Currently Selected:

San Marcos 13: PNT13

Highlight

Copy