San Marcos 12
12
Adikuä ttü̧ja̧ suronä̧ jȩtti̧na̧'a̧ wȩnȩtü̧ ji'äwinü̧
(Mt 21.33-46; Lc 20.9-19)
1Ja̧'wa̧ta̧nü̧ Jesú-mä̧ wȩnȩtä̧rü̧, kkä̧mä̧dü̧ ukuokuinä̧u̧: Ya̧tȩ, uwa pätta kku̧nu̧, jäyättanä̧ tto'epü kku̧ni̧pü̧; vino isoya adikuäkuomȩ'i̧nä̧ jo̧mȩnü̧ jȩpü̧ kku̧ni̧pü̧ ja̧'wa̧ta̧nü̧ o'kajuiyünä̧ to̧pä̧rü̧ wä̧kuä̧wäkä'i̧nä̧ jo̧mȩnü̧ aditü kku̧ni̧pü̧. Pätta adikuä isotürü mitäu kkä̧nü̧ ttadita pä'ü we'ipü kkara'a kue'ächü 'chi̧nü̧. 2Ja̧'wa̧nü̧ ja̧'a̧, u̧wä̧ju̧ ka̧ka̧kuä̧ pä̧nä̧ päi'omȩnä̧, u̧mü̧wä̧ya̧rü̧ we'inü̧, churutä ttiyarü päinü̧'a̧kuä̧ u̧wä̧ju̧ jäepäja pä'ü. 3Ja̧'wa̧nü̧ ja̧'a̧nä̧, juätümä̧, 'chu'ädo'ü, kuäkuäpü jui̧'a̧tä̧tä̧ ppa̧wä̧chü̧nä̧ we'ü ttikuinä̧tü̧. 4Ja̧'wa̧nü̧ jä̧ji̧yä̧ku̧, pätta u̧ru̧wa̧mä̧ kka̧ra̧ u̧mü̧wä̧ya̧rü̧ pä'äjita'anü̧ we'inü̧. Ja̧'wa̧nü̧ ja̧'a̧nä̧, piderü'i̧nä̧ uyuyunä̧ kuäkuäpü iku, ttü̧ra̧wä̧ri̧nä̧ku̧. 5Jua'a yabo kka̧ra̧rü̧ weäja'amä̧, kuä'ütä ttikuinä̧ku̧. Jua̧u̧nü̧ o'ka'a kkorotü rekuätürü we'inü̧; ja̧'wa̧nü̧ ja̧'a̧ yotüterümä̧ kuäkuäpü, kkorotürütä kuä'äu iku jȩtti̧nä̧u̧.
6Täkü rüjinä̧mä̧, suro i̧tti̧ ya̧tȩtä̧ kki̧'i̧nü̧, rü̧ȩnä̧ repeäku: Jua̧u̧ru̧tä̧ we'inü̧, chi̧tti̧ ji̧yä̧u̧ ttukuotäkuotü 'kua̧ra̧'a̧ pä'ü, amükuädü. 7Ja̧'wa̧nü̧ ja̧'a̧nä̧, pätta adikuä isotümä̧ pä'inä̧tü̧: Pidetä jä̧kua̧'a̧ ü'ätta u̧ru̧wa̧ päi'ä̧kua̧mä̧, kuä'ü tikuarü, ujututä pätta uruwotü päti'äkua'anü̧. 8Ja̧'wa̧nü̧ amükuädü 'chu'ädo'ü, kuä'ü iku, uwa pätta jäyä do'opü ttikuinä̧ku̧.
9¿Pa̧'a̧nü̧ ja̧'a̧mä̧, kuamükuädätukuomenä̧mä̧ uwa pätta u̧ru̧wa̧mä̧, däjé jȩä̧kua̧'a̧jä̧ttü̧ juätürümä̧? Ja̧'wa̧nü̧ ji̧na̧'a̧mä̧, kku̧nä̧wä̧ isotürümä̧, ichi'ü kuä'ü iku, kkorotürütä i̧yä̧kua̧ pä'ü amükuädätüjä̧.
10¿Wȩyu̧kuä̧ wȩnȩ, topokotü pä'ijätüjä̧? pa̧'a̧nü̧, pä'amä̧:
Odewiyä adikuä isotü ttüjü'koko'ki ji̧no̧'kimä̧,
ji̧nä̧so ukuo ido'ki jü̧nä̧tä̧ pärowächina̧'a̧, jü̧nä̧.
11Ja̧'wa̧nü̧ jȩpi̧nü̧mä̧ Tu̧ru̧wa̧tä̧ ja̧'a̧
ja̧'wa̧nü̧ ja̧'a̧ttü̧ adiwä jueitä ja̧'a̧ Dio jȩi̧na̧'a̧ttü̧.
12Pi̧yȩnä̧ wȩnȩtü̧ jiäwomȩnä̧, ujuturutä pä'ü, pä'ü ttu̧wo̧jua̧'a̧ttü̧, Jesú-ru 'chuttäda pätta'anä̧ 'chuttädokoku pinü̧, ttü̧ja̧rü̧ yettekua'attü̧, kä'ädi'ütä i̧wi̧'i̧nä̧tü̧.
Roma-ra̧'a̧ iyäwä pärätä tü'kü ji'äwinü̧
(Mt 22.15-22; Lc 20.20-26)
13Ja̧'wa̧nü̧ ja̧'a̧, fariseo wotü yotüterü ja̧'wa̧ta̧nü̧ Herode umüwäyotüttü yotüterü, Jesú ü̧ja̧'a̧ku̧ we'inä̧tü̧; ji̧yȩtȩ ieruwa'ajakuänä pä'opo'ü, jua̧u̧nä̧tä̧ 'chuttädarü pä'ü. 14Juätümä̧, ichi'opo'ü pättinä̧ku̧:
—Wo̧juȩkuä̧ i̧sa̧, isopäi'ünä̧ ukurumä̧ jueünä̧tä̧ ukuoku pä'ü wo̧juä̧tü̧jä̧ ja̧'wa̧nü̧ ja̧'a̧ttü̧ ttü̧ja̧ pätta'akumä̧ jȩpo̧kü̧jä̧, juätürü to̧pä̧rü̧mä̧ pärokuänä̧ Dio u̧mä̧nä̧ jueünä̧tä̧ wo̧juȩtü̧jä̧. Ja̧'wa̧nü̧ ja̧'a̧ttü̧ ¿Roma ru̧wa̧rü̧ impuesto ti̧mi̧ta'amä̧ adiwa'a tä̧jí̧, suroja'a tä̧jí̧? ¿Tiyü'anü̧ tä̧jí̧, tiyü juiyü'anü̧ tä̧jí̧?
15Ja̧'wa̧nü̧ pätta'anä̧, Jesú-mä̧, ä'koyättütä ttüyapareu wo̧juö̧ päinä̧u̧:
—¿Tta̧'a̧nü̧ pä'ü, kka̧kuä̧mȩ'ü̧ to'kuätukuäkusättü̧? Denario i̧sä̧bi̧ ji̧bi̧tȩ tocha i'kächätukui.
16Tti'kächipomenä̧, Jesú-mä̧ päinä̧u̧:
—¿Pi̧yȩmä̧, dí ä̧'kua̧juä̧ jä̧ttü̧ ja̧'wa̧ta̧nü̧ pi̧yȩmä̧ dí i̧mi̧jä̧ttü̧?
Päomȩnä̧, ttädätinä̧ku̧:
—Ru̧wa̧ Césa, jü̧nä̧.
17Pättomȩnä̧, Jesú-mä̧ ädätinä̧u̧:
—Jua̧u̧nu̧mä̧, Césa jäwämä̧: Césa-rütä iyätukui ja̧'wa̧ta̧nü̧ Dio jäwämä̧: Dio-rütä iyätukui.
Pä'ü ädätäu̧, pättü juiyünä̧tä̧ winä̧tü̧.
Ttoächäkuäwä tü'kü jä'epü ä̧ju̧kui̧nä̧tü̧
(Mt 22.23-33; Lc 20.27-40)
18Ja̧'wa̧nü̧ ja̧'a̧, saduceo wotüttü yotüte Jesú-ru topü 'chi̧nä̧tü̧. Juätümä̧, 'korujuoächäkuäwämä̧ ttoächäkuäwokü pätta'attü̧, jua̧u̧ tü'kü jä'epü ttä̧ju̧kui̧nä̧ku̧:
19—Wo̧juȩkuä̧ i̧sa̧, Moisé-mä̧ wȩyu̧tu̧ rütinü̧, ya̧tȩ irekuarü ȩmi̧pü̧'ka̧ i̧tti̧mü̧ toa'anä̧ 'korujuoächomȩnä̧mä̧, juäju ubüo rekuarümä̧, ü̧jä̧wa̧ ȩmi̧pü̧'ka̧ ubüo i̧tti̧mü̧ jü̧nä̧ yoepa pä'ü. 20Ja̧'wa̧nü̧ ja̧'a̧, ya̧tȩ i̧jä̧wa̧tu̧ku̧mä̧ kko̧ro̧mü̧ttü̧nü̧ ta̧ju̧ jo̧mȩnä̧ winä̧tü̧; juätü ttubüo irekuarü ȩmi̧na̧'a̧nä̧, i̧tti̧mü̧ to̧'a̧tä̧ 'korujuo'ächinü̧. 21Ja̧'wa̧nü̧ jä̧ja̧'a̧, i̧jä̧wa̧ o̧'ka̧ ubüo rekuarü ȩmi̧nü̧ ja̧'wa̧nü̧ ja̧'a̧nä̧, jua̧u̧'i̧nä̧ i̧tti̧mü̧ to̧'a̧tä̧ 'korujuo'ächinü̧. Ja̧'wa̧ta̧nü̧ 'kuäopina̧'a̧, juätü ta̧ju̧ tto'komȩnä̧ i̧sa̧rü̧'i̧nä̧. 22Jua'a yabo, ja̧'wa̧nü̧tä̧ 'kuäopina̧'a̧, kko̧ro̧mü̧ttü̧nü̧ ta̧ju̧nü̧ winä̧tü̧rü̧mä̧, ya̧tȩ'i̧nä̧ i̧tti̧mü̧rü̧mä̧ u̧ju̧ni̧'ü̧ juiyünä̧tä̧; täkü rüjinä̧mä̧, isaju'i̧nä̧ 'korujuo'ächinä̧ju̧. 23Ja̧'wa̧nü̧ ji̧na̧'a̧ttü̧mä̧, ttottächü mo̧ro̧, päi'omȩnä̧mä̧ ¿kko̧ro̧mü̧ttü̧nü̧ ta̧ju̧ ttirekua ji̧na̧'a̧mä̧, ttottächomȩnä̧mä̧ tide irekua jä̧kua̧'a̧jä̧ttü̧?
24Jesú-mä̧ ädätinä̧u̧:
—Ukutumä̧, jäyä pä'ätüjä̧, wȩyu̧kuä̧ wȩnȩ'i̧nä̧, Dio ujuru'i̧nä̧ kuieruwätukua'attü̧. 25Jua'amä̧, wa'arettü ttottächomȩnä̧mä̧, ü'käu'i̧nä̧, ü'kätü'i̧nä̧ jȩä̧kuä̧wo̧ka̧'a̧ jä̧kua̧'a̧ pärokua'aku, mo̧ro̧jä̧nä̧ kka̧kuä̧tü̧, á̧gȩrȩ ttü'anü̧tä̧ ttäkuotü. 26Ja̧'wa̧ta̧nü̧, wa'inä̧tü̧ ttottächü tü'kümä̧ ¿Moisé i̧wȩyu̧ti̧nä̧'tänä̧ ukuokuokotü pä'ijä̧tü̧jä̧ tä̧jí̧, zarza dau kuoa'anä̧, Dio: Ttütäsä Abraha̧'i̧nä̧, Isaa'i̧nä̧, Jaco'inä̧, Ttü̧ä̧nä̧wa̧mä̧, päino̧mȩ jä̧'i̧jo̧mȩmä̧? 27¡Ja̧'wa̧nü̧ ja̧'a̧ttü̧, Dio-mä̧ wa'inä̧tü̧ ttü̧ä̧nä̧wa̧mä̧kü̧, a̧'kua̧rä̧tü̧ Ttü̧ä̧nä̧wa̧ ja̧'a̧! Pa̧'a̧nü̧ jo̧mȩttü̧ ukutumä̧ jäyä pä'ätüjä̧.
Weäwä wȩnȩttü̧ ji̧nä̧so ukuo jäwä ji̧nü̧
(Mt 22.34-40)
28Weäwä wȩnȩ wo̧juȩkuä̧ isotüttü ya̧tȩ, ukuoku kkä̧nü̧, adiu adäta'a ä̧ju̧kuä̧ji̧'ka̧, Jesú ü̧jo̧mȩku̧ ichi'ü jä'epü ä̧ju̧kui̧nü̧:
—¿Ti̧yȩtä̧ttü̧, weäwä wȩnȩttü̧ ji̧nä̧so ji̧yȩtä̧ ukuo jäwämä̧?
29Jesú-mä̧, ädätinä̧ku̧:
—Weäwä wȩnȩ o'kajuiyünä̧ttü̧ ji̧nä̧so ukuo jäwämä̧ pi̧yȩ ja̧'a̧: «Irae ttü̧ja̧, ä̧ju̧kuä̧tu̧kui̧: Tu̧ru̧wa̧ Tü̧ä̧nä̧wa̧mä̧, ya̧tȩtä̧, Ru̧wa̧ ja̧'a̧. 30Ja̧'wa̧ta̧nü̧ ku̧ru̧wa̧ Dio-rümä̧, kua̧mi̧'iso'ki o'kajuiyünä̧, kua̧'kua̧rü̧ o'kajuiyünä̧, kuamükuädü o'kajuiyünä̧, kujuru'i̧nä̧ o'kajuiyünä̧ repe'ü esewi.» 31Ja̧'wa̧ta̧nü̧ jua̧u̧ o'komȩnä̧ jäwämä̧, jua̧u̧ jü̧ta̧'a̧nü̧ ja̧'a̧: «Yotükupünä̧ tta̧wa̧ru̧wa̧rü̧mä̧ esewätukui, kua̧mü̧nä̧ repe'äkuäu kueseäkuäwätukuta'anü̧.» Pi̧yȩtä̧ ja̧'a̧ ji̧nä̧so ukuo jäwämä̧.
32Päiyäku, weäwä wȩnȩ wo̧juȩkuä̧ i̧sa̧mä̧ pä'inü̧:
—Juiyo adiwa'a, wo̧juȩkuä̧ i̧sa̧. Isopäi'ünä̧tä̧ ja̧'a̧: Dio-mä̧ ya̧tȩtä̧ ja̧'a̧, kka̧ra̧mä̧ yoriso toa'a, ukú päku ta̧'a̧nü̧. 33Isopäi'ünä̧, tta̧mi̧'iso'ki o'kajuiyünä̧, tta̧mü̧kuädü o'kajuiyünä̧, ttujuru o'kajuiyünä̧ ja̧'wa̧ta̧nü̧ tta̧mü̧nä̧ pa̧ja̧tü̧ repe'ü tteseäkuäuta̧'a̧nü̧ tta̧wa̧ru̧wa̧rü̧ repe'ü, Dio-rü eseäkuämä̧ sacrificios jȩpü̧, Holocausto jȩä̧kuä̧wä̧ttü̧'i̧nä̧ abonä̧nü̧ mikuäu ja̧'a̧.
34Ja̧'wa̧nü̧ ja̧'a̧ttü̧, adiu wo̧juȩku̧nä̧ ädätäjiyäku, Jesú-mä̧ päinä̧ku̧:
—Ru̧wa̧ Dio weomȩttü̧mä̧ otomä̧ kko̧kü̧jä̧.
Jua̧u̧nü̧ o'ka'amä̧, ya̧tȩ'i̧nä̧ jä'epü ttä̧ju̧kua̧ pättokoku pinü̧.
¿Crito-mä̧ díttü ichinü̧jä̧ttü̧? Pä'ü jä'epü ä̧ju̧kui̧nä̧u̧
(Mt 22.41-46; Lc 20.41-44)
35Jesú-mä̧, Dio-rü ukuokuäkuäwodettü wo̧juȩtü̧ kkä̧nü̧ jä'epü ä̧ju̧kui̧nü̧:
—¿Toku pä'ü, weäwä wȩnȩ wo̧juȩkuä̧ isotümä̧, Crito-mä̧ Dawi isotü isotüttü i̧chä̧kua̧ pätta'ajä̧ttü̧? 36Ja̧'wa̧nü̧ ja̧'a̧nä̧, Chutä Dawi'i̧nä̧ Epíritu Sa̧tu̧ juȩpä̧ra̧'a̧nä̧, pä'inü̧:
«Chu̧ru̧wa̧ Dio-mä̧, Chu̧ru̧wa̧ Jesucrito-rü pä'inü̧:
Chu̧wo̧jua̧'a̧ku̧nä̧ pä̧mä̧di̧,
Kuaboiyotürü ku̧jä̧pü̧ dȩa̧'a̧ chutomebü päi'ünä̧.»
37Ja̧'wa̧nü̧ ja̧'a̧nä̧ «¿toku pä'ü Dawi'i̧nä̧, Chu̧ru̧wa̧ päinä̧ku̧jä̧ttü̧? ¿i̧tti̧ ja̧'a̧nä̧mä̧?»
Ja̧'wa̧nü̧ ja̧'a̧ ttü̧ja̧, rekuätü, Jesú ukuokua'a eseunu̧ ä̧ju̧kui̧nä̧tü̧.
Jesú-mä̧ suronä̧ jȩtti̧yä̧ku̧ ro̧'ȩpi̧nü̧
(Mt 23.1-36; Lc 11.37-54; 20.45-47)
38Ja̧'wa̧nü̧ ja̧'a̧, Jesú wo̧juȩtü̧ pä'inü̧: Weäwä wȩnȩ wo̧juȩkuä̧ isotürü ä'kuoyäkuäunu̧ tta̧'a̧rä̧kuä̧wä̧tu̧kui̧, juätümä̧ tti̧ä̧rȩta̧ o̧to̧ä̧ta̧ 'ka̧tä̧wi̧'ü̧ kkä̧kuä̧wä̧tä̧ kkü'kätü ja̧'wa̧ta̧nü̧ ttu̧kuȩ ȩmä̧wo̧mȩttü̧ rü̧ȩnä̧ ukuotünü̧ tettäwatütä pä'ätü. 39Ja̧'wa̧ta̧nü̧, sinagoga odewiyättü ukuo dȩä̧ki̧yä̧nä̧tä̧ ttü̧'ȩja̧ pä'ü kkä̧nü̧ ttu̧kuȩ ttukuomȩttü̧'i̧nä̧ ä̧kuo̧mȩnä̧ dȩä̧ki̧yä̧nä̧tä̧ ttü̧'ȩja̧ pä'ätü. 40Ja̧'wa̧ta̧nü̧, rȩkua̧mü̧rü̧'i̧nä̧ tüäre rȩni̧yü̧ nä̧u̧kuä̧rü̧ kkä̧nü̧, jȩpo̧ko̧tü̧ 'kua̧rü̧nä̧ Dio-rü rekuo ukuokuätü. Juätümä̧ rü̧ȩnä̧ usurä ttȩmä̧u̧nä̧ ro̧ȩkuä̧kuo̧tü̧.
Rekua ofrenda rütinä̧ju̧
(Lc 21.1-4)
41Ja̧'wa̧ta̧nü̧, Jesú ofrenda rütäwomȩ pä̧tȩkuä̧nü̧ pä̧nü̧, pärätä ȩnä̧wo̧ka̧nä̧ ttü̧ja̧ ttȩna̧'a̧ to̧pä̧ri̧nü̧. Ruwotümä̧ pärätä rü̧ȩnä̧ ȩni̧nä̧tü̧. 42Ttȩno̧mȩ 'kä̧tȩnä̧, usurä isaju rekua, yajute ichi'ü, yo̧ka̧tȩnä̧ cobre o̧bi̧ to̧bi̧rȩ, a̧'u̧ku̧nä̧tä̧ mikuäu ȩni̧nä̧ju̧. 43Ja̧'wa̧nü̧ ji̧yä̧ku̧ Jesú-mä̧ u̧wo̧juȩtä̧u̧rü wopo'ü, pä'inü̧:
—Isopäi'ünä̧ pädäu̧jä̧ paju rekua usurä isajumä̧ o'katoi'ünä̧ cofre o̧ka̧nä̧ pärätä ȩnä̧tü̧ttü̧'i̧nä̧ abonä̧nü̧ ȩnä̧ju̧; 44Isopäi'ünä̧ o'katoi'ünä̧ kki̧'i̧pü̧ttü̧tä̧ ttȩna̧'a̧nä̧ pajumä̧, usurä isaju kka'anä̧ o'kajuiyünä̧ kkukua pä'ü kku̧ju̧nä̧rä̧ji̧mä̧ ȩnä̧jä̧ju̧.
Currently Selected:
San Marcos 12: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
