San Marcos 14
14
Jesú-ru 'chuttäda pä'ü ukuoku kku̧ni̧nä̧tü̧
(Mt 26.1-5; Lc 22.1-2; Jn 11.45-53)
1Pacua pä'käri, Trigo o̧si̧ ppü̧ä̧mo̧kü̧ ttukuä'ijü pä̧nä̧ päi'a pä'ümä̧, todäre mo̧ro̧tä̧ juiyina̧'a̧. Ja̧'wa̧nü̧ ja̧'a̧ sacerdote wotü tturuwotü'i̧nä̧, weäwä wȩnȩ wo̧juȩkuä̧ isotü'i̧nä̧. Yapare ji'äu, Jesú-ru 'chu'ädü kuä'ü ttikua pä'ü usinä̧tü̧. 2Ja̧'wa̧nü̧ jȩpü̧mä̧, pä'inä̧tü̧: Pä'käri kka̧'a̧ 'kä̧tȩnä̧mä̧ jȩtü̧ juiyü'anü̧ ja̧'a̧, ttü̧ja̧ ttürowäwipü juiyäkua'anü̧, jü̧nä̧.
Jesú-ru a̧mȩwoya tu'epinä̧ju̧
(Mt 26.6-13; Jn 12.1-8)
3Ja̧'wa̧nü̧ ja̧'a̧, Jesú-mä̧ Betania-ra̧'a̧ 'chä̧ji̧'ka̧, Simón Repra kku̧nä̧rü̧ ojusodettü, mesa isodänä̧ ü̧'a̧'a̧, Alabastro pättü i̧sä̧yu̧nä̧, nardo a̧mȩwoya, rü̧ȩnä̧ mikuäwoya päkuoyatä, su̧'pȩnü̧ akua'a, i'kächipü; dü'opo'ü iku, a̧mȩwoya, Jesú-ru u wä̧mȩ to'inä̧ju̧. 4Ja̧'wa̧nü̧ jȩja̧'a̧ topü, juȩnȩ pȩjä̧tü̧ttü̧ yotüte ra̧wä̧ri̧pü̧nü̧ pä'äkuäwinä̧tü̧:
—¿Tta̧'a̧nü̧ pä'ü, a̧mȩu̧ surojuo'epäjuttü̧? 5Trecientos denario yabonä̧ jo̧mȩnä̧ mikuä pä'ü iyü ttiku'anü̧ ja̧'a̧, ji̧yȩja̧ a̧mȩu̧mä̧, usurä isotürü ppädäkuäwä päi'ünä̧, pä'ü suronä̧ ukuokuinä̧tü̧ juäjuru. 6Ja̧'wa̧nü̧ ji̧yä̧ku̧, Jesú-mä̧ päinä̧u̧:
—Ja̧'a̧tä̧ topätukuiju; ¿Tta̧'a̧nü̧ pä'ü suronä̧ päkuätukuäkuajä̧ttü̧? Ttürü ppä'ädü adiu jȩpä̧ju̧ru̧mä̧. 7Ja̧'wa̧nü̧ ja̧'a̧nä̧, usurä isotürümä̧ 'kuäopünä̧tä̧ ku̧ju̧nä̧rä̧kuo̧tü̧jä̧ ku̧'kä̧tȩtu̧ku̧nä̧mä̧, ja̧'wa̧nü̧ ja̧'a̧ttü̧ juätürü pä̧wä̧rü̧ja̧'a̧ku̧ ppäkuädätukuajä̧; ja̧'wa̧nü̧ ja̧'a̧nä̧, ttürümä̧ 'kuä'opünä̧mä̧ kku̧nä̧ro̧ko̧tü̧ kuäkuotüjä̧. 8Pajumä̧ jȩjü̧'a̧nü̧ jü̧tä̧ jȩpä̧ju̧: Ttü chuwapäre ttütäkuometä̧ päi'ünä̧, ä'kanä̧ a̧mȩu̧ tujepäjäkusä. 9Ja̧'wa̧nü̧ ja̧'a̧ttü̧ isopäi'ünä̧ pä'üsä ukuturu, pi̧jä̧nä̧ttü̧ jareü wȩnȩ jittäwomȩmä̧, ukuokuäkuäwäkua'a paju jȩjü̧mä̧, jȩjü̧ ttamükuäda pä'ü.
Juda Jesú-ru iyü ikuinü̧ wȩnȩ
(Mt 26.14-16; Lc 22.3-6)
10Ja̧'wa̧ta̧nü̧ Juda Icariote-mä̧, u̧wo̧juȩtä̧u̧ doce-nü̧ wotüttü ya̧tȩ ja̧'a̧, sacerdote wotü tturuwotürü Jesú-ru iyü ikua pä'ü topü 'chi̧nü̧. 11Ja̧'wa̧nü̧ 'chä̧ji̧'ka̧ jiäwa'a ä̧ju̧ku̧ esewipü, pärätä ttiyarü pättinä̧ku̧. Ja̧'wa̧nü̧ pättäku Juda-mä̧, Jesú-ru toku jȩpü̧ iyü iku'anü̧ já̧ pä'ü, usinü̧.
Tu̧ru̧wa̧ u̧kuȩ ukuinü̧ wȩnȩ
(Mt 26.17-29; Lc 22.7-23; Jn 13.21-30; 1 Co 11.23-26)
12Ja̧'wa̧nü̧ ja̧'a̧, trigo o̧si̧ levadura juiyünä̧ ttukuä'ijü mo̧ro̧ päi'omȩnä̧, pacua-mä̧ oweja mü̧ä̧ya̧rü̧ sacrificio jȩttä̧'i̧jü̧ pä'käri kkä̧mä̧dü̧ mo̧ro̧ päi'omȩnä̧, Jesú u̧wo̧juȩtä̧u̧mä̧ jä'epü ttä̧ju̧kui̧nä̧ku̧:
—¿Tȩnȩ́ aditü tu̧ju̧nä̧ji̧ya̧ku̧ päkua'ajä̧ttü̧, Pacua pä'käri kukua pä'ümä̧? 13Ja̧'wa̧nü̧ pättäku, umüwäyotüttü ta̧ju̧ru̧ we'ü iku pä'inü̧:
—Ütawiyära̧'a̧ tätukui. Kui̧'chi̧'ä̧tu̧kuo̧mȩnä̧, jua'attümä̧, ya̧tȩ 'kä̧nä̧ri̧yu̧nä̧ ajiya ȩpü̧rü̧ to'kuäkuotüjä̧, jua̧u̧ o'ka'anä̧ rukui'ätukuarüjä̧, 14doächi'ome, isode u̧ru̧wa̧rü̧ pa̧'a̧nü̧ jä'epü kuä̧ju̧kuä̧tu̧kua̧jä̧: Tu̧ru̧wa̧mä̧, ¿To̧ka̧ttü̧ chu̧wo̧juȩtä̧u̧ku̧mä̧, Pacua pä'kärimä̧ chukuäkua'ajä̧ttü̧? pä'äji, 15päkuätukuomȩnä̧, jua̧u̧tä̧ i̧jȩpä̧kuä̧u̧jä̧ juo̧ka̧ ju'toju kko̧ka̧, rü̧o̧ka̧ jȩtü̧'a̧nü̧ jo̧ka̧mä̧. Juo̧ka̧nä̧ jo̧mȩnü̧ o'kajuiyünä̧ aditü kku̧nä̧jä̧tu̧kui̧. 16Ja̧'wa̧nü̧ wȩä̧u̧, u̧wo̧juȩtä̧u̧mä̧ rä'opächäjä'kotü ütawiyära̧'a̧ tti̧'chi̧'o̧mȩnä̧, o'kajuiyünä̧ Jesú pä'äjita'anü̧ po̧kui̧pü̧. Jo̧mȩnü̧ aditü kku̧ni̧nä̧tü̧ Pacua 'kuättopäkuomȩmä̧. 17Ni̧pä̧cho̧mȩnä̧, Jesú-mä̧ doce-nü̧ wotü u̧wo̧juȩtä̧u̧ku̧ juȩnȩ ichi'inü̧. 18Täkü, mesa isodänä̧ ttu̧kuȩ kuä̧nü̧ ttü̧'ȩja̧'a̧, Jesú-mä̧ päinä̧u̧:
—Jueünä̧tä̧ pädäu̧jä̧, ukututtü ya̧tȩ, ttüku u̧kuȩ kuä̧nü̧ pü̧ ja̧'a̧, ttürü iyü i̧kuä̧kua̧mä̧. 19Ja̧'wa̧nü̧ päomȩnä̧, u̧wo̧juȩtä̧u̧mä̧ tta̧'kua̧ tta̧'ȩkui̧pü̧, yotukunä̧ jä̧ttȩpä̧ri̧'i̧nä̧ku̧.
—¿Ttü jä̧kua̧'a̧?, jü̧nä̧. 20Pättä'chiyäku, Jesú-mä̧ päinä̧u̧:
—Jua̧u̧mä̧, doce-nü̧ wotüttü ya̧tȩ, ttütäku, ji̧nä̧ ji̧bä̧tȩnä̧ trigo i̧ri̧si̧ 'ti̧'ü̧ jä̧kua̧'a̧. 21Isopäi'ünä̧, Ttü Ubo I̧tti̧rü̧mä̧, wȩyu̧kuä̧ wȩnȩ päü'a̧kuä̧ 'kuäopäkua'a; ja̧'wa̧nü̧ ja̧'a̧nä̧, ubo I̧tti̧rü̧ iyü ikurumä̧ surojäkua'a; ya'utettü, jua̧u̧mä̧ uwäpächü juiyinü̧ttü̧tä̧ adiwaja'a. 22Ja̧'wa̧nü̧, ttu̧kuȩ ttukuomȩ 'kä̧tȩnä̧, trigo i̧ri̧si̧ ȩmo̧po̧'ü̧, Dio ppäda pä'ü jä'epäji'ka̧, 'te'ädü iyükkä̧nü̧, päinä̧u̧:
—Ja̧já̧, pi̧yȩmä̧ ttütä jä̧ttä̧pä̧ya̧ ja̧'a̧. 23Ja̧'wa̧ta̧nü̧, i̧so̧'ta̧ ȩmo̧po̧'ü̧, jä'o Dio-rü eseu ukuokuäji̧'ka̧, iyomȩnä̧ juä̧'ta̧ttü̧mä̧ o'katoi'ünä̧ awinä̧tü̧. 24Ja̧'wa̧ta̧nü̧ päinä̧u̧:
—Pi̧yȩmä̧ ttütä chukuoja ja̧'a̧, juoyanä̧ Dio-mä̧ jareünä̧ eseku. Juoya chukuojamä̧, rekuätürü ppä'ädü werächoya ja̧'a̧. 25Isopäi'ünä̧ pädäu̧jä̧, täkü penebütä uwa dauttü adikuoya chawa'amä̧ awokü chä̧kua̧sä̧, pä'äjita'anü̧ ji̧yȩnü̧ mo̧ro̧ ru̧wa̧ Dio weomȩttü̧tä̧ chawa pä'ü.
Jesú-mä̧ Peduru ä̧ppü̧tä̧rä̧kua̧'a̧ ji'äwinü̧
(Mt 26.30-35; Lc 22.31-34; Jn 13.36-38)
26Ji̧yȩtȩ himnos ra̧'ü̧ kä'ädä'kotü, Olivos kka̧kuä̧'ka mü̧ä̧'kara̧'a̧ 'chi̧nä̧tü̧. 27Jua'attü Jesú-mä̧ päinä̧u̧:
—O'katoi'ünä̧ ttürü kua̧'kua̧ ku̧wȩnä̧rä̧'i̧jä̧tu̧ku̧ juikuächi'äkuotüjä̧, jitä yodomä̧. Wȩyu̧kuä̧ wȩnȩmä̧ pä'ija'a: «Pató-rü kuä'ü chikuomȩnä̧, oweja-tü̧mä̧ ttipperekuächäkuotü,» jü̧nä̧. 28Ja̧'wa̧nü̧ ja̧'a̧nä̧, wa'arettü ttodächü o'ka'amä̧, Galirea rȩjȩra̧'a̧ kuä'katukunä̧ chi̧'chä̧kua̧sä̧. 29Päiyäku, Peduru-mä̧ pä'inü̧:
—Isopäi'ünä̧ tta̧'kua̧ ttu̧wȩnä̧rä̧'i̧jü̧ ttijuiyuwächi'a'anä̧, ttümä̧ wokü chä̧kua̧sä̧. 30Päomȩnä̧, Jesú-mä̧ ädätinä̧ku̧:
—Jueünä̧tä̧ pädäkujä̧ jitä yodomä̧, äkärä todärenä̧ ra̧wä̧kua̧'a̧ ä'kanä̧, ttü chütü'kümä̧, kuä̧ppü̧tä̧rä̧kua̧jä̧ wäbodäkuä jo̧mȩnä̧. 31Ja̧'wa̧nü̧ pä'anä̧, Peduru-mä̧ juruwächi'ünü̧ pä'inü̧:
—Ukutäku tode'ächüttüdä̧jä̧ wä̧i̧nä̧ ja̧'a̧nä̧, kutü'kümä̧ ä̧ppü̧tä̧ro̧kü̧ chä̧kua̧sä̧.
Jua̧u̧ päüta'anü̧ kkorotü'i̧nä̧ ja̧'wa̧ta̧nü̧ pä'inä̧tü̧.
Gesemaní de'attü Jesú Dio-rü ukuokuinü̧
(Mt 26.36-46; Lc 22.39-46)
32Jua̧u̧nü̧ o'ka'a, Gesemaní pä'ü mi̧kuomȩ ichi'ü, Jesú-mä̧ u̧wo̧juȩtä̧u̧rü pä'inü̧:
—Pȩnȩtä̧ pȩji̧pä̧tu̧kui̧, Dio-rü ukuoku chi̧'cha̧'a̧nä̧.
33Ja̧'wa̧nü̧ pä'ipü, Peduru-rütä, Sa̧ti̧a̧ku̧rü̧tä̧, Ju̧a̧-rü̧tä̧ o'ipächü 'chä̧ji̧'ka̧ a̧'kua̧ tta̧'ȩkui̧pü̧, rü̧ȩnä̧ ajuäwinü̧. 34Päinä̧u̧:
—Cha̧'kua̧ tta̧wȩpä̧ku̧sä̧, tode'ächäkuomȩbü päi'ünä̧. Pȩnȩtä̧ kka̧kui̧pä̧tu̧kui̧, kuä'i'ätukuoka'a. 35Pä'ipümä̧, yabonä̧nü̧ 'chä̧wi̧'ü̧, ja̧rȩyu̧nu̧ rȩjȩ ma̧'ä̧mü̧, jä'o Dio-rü jä'epinü̧, churutä 'kuäopäkuȩmä̧ 'kuäopü juiyünä̧tä̧ ppädarü pä'ü, jȩü̧'a̧nü̧ jü̧ttü̧mä̧. 36Ukuokumä̧ pä'inü̧: «Abbá»,#14.36 Abbá Pä'ümä̧ Chä'o pä'ü päwä ja̧'a̧ arameo tti̧wȩnȩnä̧mä̧ (Ro 8.15; Gl 4.6). Chä'o ukumä̧ o'kajuiyünä̧ jȩ'ku̧tä̧ ja̧'a̧; pi̧yȩttü̧mä̧ chü̧ji̧pü̧nä̧ ppä'ädittü; ja̧'wa̧nü̧ ja̧'a̧nä̧, ttürü pä̧wä̧rü̧ja̧'a̧ku̧mä̧kü̧, ukuru pä̧wä̧rü̧jo̧mȩnä̧tä̧. 37Jua̧u̧nü̧ o'ka'a, ichi'ü toomȩnä̧ ä'eku ttü̧'ȩja̧'a̧ topü, Peduru-rü pä'inü̧:
—Simón, ¿juiyo pü̧di̧ri̧jä̧ku̧jä̧? ¿ya'ute hora-tä'i̧nä̧ to̧'kuä̧rü̧ juiyünä̧ jä̧ja̧'a̧? 38Kuä'i'ätukuoka'a Dio-rü ukuokuätukui, tta̧mi̧ 'kuäwänä̧ ma̧kuä̧chä̧tu̧ku̧ juiyäkua'anü̧. Isopäi'ünä̧, kua̧'kua̧ ru̧wa̧mä̧ eseunu̧ jȩa̧ pä'anä̧, ttidepämä̧ jiyuwa'a. 39Pä'äjita'anü̧ 'chä̧wi̧'ü̧, ä'koji jä̧ji̧ta̧'a̧nü̧, ukuokuäjitä ukuokuinü̧. 40Pä'äji jä̧ji̧ta̧'a̧nü̧, ppa̧'ä̧chi̧'ü̧ toomȩnä̧ umüwäyotü päjätümä̧, ä'ekutä ttü̧'ȩja̧'a̧ po̧kui̧pi̧nü̧. Jua'amä̧ rü̧ȩnä̧ pü̧di̧ri̧ja̧'a̧ttü̧, ttü'äremä̧ mü̧ȩkuä̧chä̧ri̧nä̧u̧, jäepomȩnä̧mä̧ ttädätü juiyünä̧tä̧. 41Pä'äjita'anü̧, wäbodäkuä päi'ünä̧ ppa̧'a̧chi̧'ü̧, päinä̧u̧:
—Täkü ä'ekuätukui, 'kuä'ächi'ü pȩjä̧mü̧; täkü ubo I̧tti̧rü̧, iyü ikuäwi'a'a suronä̧ jȩpä̧tü̧ ttu̧mü̧nä̧. 42Ä̧rä̧mi̧'ä̧tu̧kui̧; ti̧'chä̧tu̧kua̧, täkü ttürü iyü ikumä̧ potä tü'kü pä'i'ü.
Jesú-ru 'chuttädinü̧ wȩnȩ
(Mt 26.47-56; Lc 22.47-53; Jn 18.2-11)
43Jua̧u̧ o'ka'a, Jesú-mä̧ ji̧nä̧ ukuoku ü̧ja̧'a̧ 'kä̧tȩnä̧, umüwäyotü doce-nü̧ wotüttü ya̧tȩ, Juda pä'ü mi̧kua̧mä̧, ttü̧ja̧ rekuätü ttukurodiyä'i̧nä̧, dauwiyä'i̧nä̧ 'chu̧'ä̧rä̧tu̧ku̧ ichi'inü̧. Sacerdote wotü tturuwotü'i̧nä̧, weäwä wȩnȩ wo̧juȩtä̧tü̧'i̧nä̧ ja̧'wa̧ta̧nü̧ a̧ci̧a̧nu̧tu̧'i̧nä̧ wȩttä̧jä̧u̧ ichi'inä̧tü̧. 44Ji̧nä̧so iyü ikumä̧, ttu̧wo̧jua̧ pä'ü ji'äu ü̧jü̧nä̧ ja̧'a̧ ji̧na̧'a̧, jȩä̧kuȩmä̧: «'chu̧do̧pä̧ku̧ jä̧kua̧'a̧, ji̧nä̧so chutämä̧; jua̧u̧ru̧ 'chu'ädi'ü kuȩmipä̧tu̧kua̧jä̧, ü̧ji̧pü̧ juiyünä̧», pä'ü. 45Ja̧'wa̧nü̧ jä̧ja̧'a̧ttü̧, Juda-mä̧ Jesú-ru ichi'ü, 'chu̧'o̧pü̧ pä'inü̧:
—¡Wo̧juȩkuä̧ i̧sa̧! Pä'ü, 'chu̧o̧pi̧nä̧ku̧. 46Ja̧'wa̧nü̧ pä'anä̧, Jesú-rumä̧ 'chu'ädinä̧tü̧. 47'Chuttäda'anä̧, ya̧tȩ ukurodä 'cho'äwo'ü, sacerdote wotü ttu̧ru̧wa̧ u̧mü̧wä̧ya̧rü̧ ä̧ja̧ 'kui'opü ikuinü̧. 48Ja̧'wa̧nü̧ jä̧ku̧, Jesú-mä̧ ttü̧ja̧rü̧ pä'inü̧:
—¿Tta̧'a̧nü̧ pä'ü, nä̧u̧kuä̧rä̧kuä̧wä̧ i̧sa̧rü̧ 'kua̧rü̧nä̧, kurodiyäku, dauwiyäku 'chu̧ä̧rä̧nü̧ 'chuädü kuichäjätükuättüttü̧? 49'Kuä'opünä̧ mo̧ro̧ jü̧ta̧'a̧nü̧, ukututäku Dio-rü ukuokuäkuäwodenä̧ wo̧juȩtü̧ chü̧ja̧'a̧nä̧ 'chukuädätukuokoku pä'ijüsä; ja̧'wa̧nü̧ ja̧'a̧nä̧, pi̧yȩmä̧ 'kuäopa'a wȩyu̧kuä̧ wȩnȩ päü'akuätä. 50Ja̧'wa̧nü̧ jȩtti̧pa'anä̧, u̧wo̧juȩtä̧u̧mä̧ o'katoi'ünä̧ dü'ekuächinä̧tü̧, kkatätä ü̧ji̧pa̧'a̧nä̧. 51Ja̧'wa̧ta̧nü̧, ya̧tȩ mü̧ä̧ya̧ pü̧jä̧ta̧ juäokuänü̧ ru̧'ä̧rü̧rü̧ 'chu'ädinä̧tü̧, 52'Chuttäda'anä̧, pü̧jä̧ta̧ kko̧'ä̧dä̧kuä̧u̧ ikuipü, jui̧'a̧tä̧ tü'ipächinü̧.
Jesú-ru ruwotü ttä'ka jo̧mȩ ttȩpi̧nü̧ wȩnȩ
(Mt 26.57-68; Lc 22.54-55,63-71; Jn 18.12-14,19-24)
53Ja̧'wa̧nü̧ 'chu'ädäjä'kotümä̧, Jesú-ru sacerdote wotü ttu̧ru̧wa̧, ä'ka jo̧mȩ i'chächipinä̧tü̧. Ja̧'wa̧ta̧nü̧ sacerdote ruwotü'i̧nä̧, a̧ci̧a̧nu̧tu̧'i̧nä̧, weäwä wȩnȩ wȩyu̧kuä̧ isotü'i̧nä̧ o'katoi'ünä̧ ka̧ka̧kui̧pi̧nä̧tü̧. 54Ja̧'wa̧nü̧ ja̧'a̧nä̧, Peduru-mä̧ sacerdote wotü ttu̧ru̧wa̧ uruwo weode u̧mi̧ isaräbü ru̧'ä̧ri̧nü̧; ja̧'wa̧nü̧ 'chä̧ji̧'ka̧mä̧, su̧ro̧do̧u̧ ttü̧'kä̧tȩnä̧ okurä tä̧nü̧ pi̧nü̧. 55Ja̧'wa̧nü̧ jȩpü̧ kkä̧nü̧, sacerdote wotü tturuwotü'i̧nä̧ ja̧'wa̧ta̧nü̧ sanedrín ruwotü'i̧nä̧ ji̧yȩtȩnä̧ tottünä̧ i̧jȩpü̧, ji'äu kuä'ü ttikuarü pä'ü usinä̧tü̧; ja̧'wa̧nü̧ ttüsa'anä̧, po̧kui̧po̧ko̧tü̧ pinä̧tü̧. 56Ja̧'wa̧nü̧ jȩpü̧, jua̧u̧ ütü'kümä̧ rekuätü yapareu ji'äwinä̧tü̧, jittäwa'anä̧, jittäumä̧ yorätewächi'okotü pinä̧tü̧. 57Yotukunä̧mä̧, ä̧rä̧mi̧'ü̧ jua̧u̧ ütü'kü, yapareu ji'äwinä̧tü̧: 58Ujutumä̧, pa̧'a̧nü̧ pä'a ä̧ju̧kui̧nä̧tü̧jä̧: «Pode ttü̧ja̧ adikuode Dio-rü ukuokuäkuäwodemä̧, ttümä̧ pparopü chi̧kuä̧kua̧sä̧, pparopü ikuipü, ttü̧ja̧ adikuokode pärokuode wäbodäkuä mo̧ro̧tä̧ chäräbȩ'ä̧kua̧sä̧,» pä'ä'ijü pä'inä̧tü̧. 59Ja̧'wa̧nü̧ jittäwa'anä̧'i̧nä̧, yorätewächi'ü juiyünä̧tä̧ ji'äkuäwinä̧tü̧. 60Ja̧'wa̧nü̧ jittäwa'anä̧, sacerdote wotü ttu̧ru̧wa̧mä̧ o'katoi'ünä̧ ttü̧'kä̧tȩttü̧ ä̧rä̧mi̧'ü̧, Jesú-ru jä'epü ä̧ju̧kui̧nü̧:
—¿Kuädätoka'a? ¿däjejä̧ttü̧, pi̧yȩ uku kutü'kü jittäumä̧? 61pä'ü, jäepa'anä̧, ädätoka'a yabokutä 'koruchi'ü kki̧nü̧.
—Pä'äjita'anü̧, sacerdote wotü ttu̧ru̧wa̧mä̧ jä'epü ä̧ju̧kui̧nä̧ku̧: ¿Ukutä ja̧'a̧, Crito, Dio i̧tti̧ esewäkumä̧? 62Jäepäku Jesú-mä̧ päinä̧ku̧:
—A̧, ttütäsä. Ja̧'wa̧nü̧ ja̧'a̧ttü̧, ukutumä̧ ubo I̧tti̧rü̧ o'kajuiyünä̧ ujuru kku̧nä̧rü̧ u̧wo̧jua̧'a̧ku̧nä̧ ü̧'a̧'a̧'i̧nä̧, mo̧ro̧jä̧ttü̧ ajiya isoppanä̧ icha'a'i̧nä̧ to'kuäkuotüjä̧. 63Ja̧'wa̧nü̧ ädätiyäku, sacerdote wotü ttu̧ru̧wa̧mä̧, ra̧wä̧ri̧pü̧ ü̧'ka̧tä̧wä̧ta̧ sȩro̧pü̧ ikunü̧ pä'inü̧:
—¿Tta̧'a̧nü̧ pä'ü rekuä rü̧ja̧'a̧jä̧tü̧, pide ütü'kü yabonü̧ ji'äwätürümä̧? 64Dio-rü suronä̧ pä'amä̧ ä̧ju̧kuä̧tü̧jä̧; ¿toku päkuätukuättü̧? Ja̧'wa̧nü̧ ja̧'a̧ttü̧, isopäi'ünä̧ wa'ü ikua pä'ütä wa̧, pä'ü kku̧ni̧nä̧tü̧. 65Ja̧'wa̧nü̧ päi'omȩnä̧, yotukunä̧mä̧ surepükkä̧nü̧, i'äre mü̧ȩpä̧jä̧'kotü, 'ta'tapünü̧ pättinä̧ku̧:
—¡Ji'äwitü, ukuru kuä'ümä̧ díjä̧ttü̧! Ja̧'wa̧ta̧nü̧, Dio-rü ukuokuäkuäwode tta̧'a̧rä̧tü̧'i̧nä̧ i'änä̧ kuäkuättinä̧ku̧.
Peduru-mä̧, Jesú ütü'kü ä̧ppü̧tä̧ri̧nü̧
(Mt 26.69-75; Lc 22.56-62; Jn 18.15-18,25-29)
66Ja̧'wa̧nü̧ ja̧'a̧nä̧, Peduru-mä̧ u̧mi̧ isaränä̧ ü̧ja̧'a̧, sacerdote wotü ttu̧ru̧wa̧ umüwäyaju ichi'inä̧ju̧, 67ichi'opo'ü, Peduru-rü okurä tä̧nü̧ ü̧'ja̧'a̧ topü, to̧o̧ to̧jä̧ra̧'a̧ttü̧ päjinä̧ku̧:
—Uku'i̧nä̧, nazare i̧sa̧jä̧, Jesú-ku kue'ächä'ijü̧jä̧. 68Päjäku, Peduru-mä̧ ä̧ppü̧ti̧'ü̧ pä'inü̧: Jua̧u̧mä̧ chieruwäku, kukuoku tü'kü'i̧nä̧ jȩru̧pa̧sä̧. Pä'ipütä äpateku räo'omȩnä̧, äkärämä̧ ra̧'i̧nü̧. 69Pä'äji jä̧ji̧ta̧'a̧nü̧, umüwäyajumä̧ Peduru-rü topo'ü, kkorotü juȩnȩ kka̧kuä̧tü̧rü̧ ji'äwinä̧ju̧:
—Pidemä̧, juätütä i̧sa̧ ja̧'a̧. 70Päja'anä̧, pä'äji jä̧ji̧ta̧'a̧nü̧ ä̧ppü̧ti̧'i̧nü̧. A̧'u̧kua̧'a̧tä̧ jä̧ji̧ o'ka'a, juȩnȩ kka̧kuä̧tü̧mä̧ pä'äji jä̧ji̧ta̧'a̧nü̧, Peduru-rü pä'inä̧tü̧:
—Isopäi'ünä̧, juätütä i̧sa̧jä̧; Galirea ttü̧ja̧sa̧jä̧, kukuoku'i̧nä̧ juätü jä̧'i̧jü̧ ta̧'a̧nü̧ ukuokujä̧.
71Ja̧'wa̧nü̧ pättäku, Peduru-mä̧, suronä̧ pä'ünü̧ Dio i̧mi̧nä̧ wȩnȩtü̧ pä'inü̧:
—¡Jua̧u̧ ttü̧ja̧sa̧rü̧mä̧ jȩru̧pa̧sä̧!, jü̧nä̧.
72Ja̧'wa̧nü̧ pä'ü käda'anä̧, äkärä ra̧'i̧nü̧ todäre päi'ünä̧. Ja̧'wa̧nü̧ ä̧ju̧ku̧, Peduru-mä̧ Jesú pä'inü̧ amükuädi'inü̧ «äkärä todäre päi'ünä̧ ra̧wä̧kua̧'a̧ ä'kanä̧mä̧, wäbodäkuä jo̧mȩnä̧ ttürü kuä̧ppü̧tä̧räkua̧jä̧» päjijä̧ji̧. Amükuädi'ü, ajuäwipü, ajuäwü ikuinü̧.
Currently Selected:
San Marcos 14: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
