San Mateo 27
27
Jesú-ru Pilato ä'ka jo̧mȩ ttȩpi̧nü̧ wȩnȩ
(Mc 15.1; Lc 23.1-2; Jn 18.28-32)
1Mo̧ro̧ päia'a, sacerdote tturuwotü o'katoi'ünä̧ ja̧'wa̧ta̧nü̧ judío-ttü a̧ci̧a̧nu̧ wotü'i̧nä̧ Jesú-ru kuä'ü ttikua pä'ü amükuädü kku̧ni̧nä̧tü̧. 2Jua̧u̧nü̧ o'ka'a nü̧'kä'kotü ȩpü̧ iyinä̧tü̧ Roma-ttü̧ wȩ'ä̧wa̧ ru̧wa̧ Pilato-rü.
Juda 'koru päi'inü̧ wȩnȩ
3Jesú-ru iyü ikuäji Juda-mä̧, jua̧u̧ru̧ usurä kuä'ü ttikua pä'ü jȩtta̧'a̧ topü ppa̧'a̧dä̧kuä̧u̧ amükuädü treinta-nü̧ pärätä o̧bi̧mä̧ sacerdote tturuwotürü ja̧'wa̧ta̧nü̧ judío-ttü a̧ci̧a̧nu̧ wotürü ppa̧'a̧dü̧ kkä̧nü̧, 4pä'inü̧:
—Surojü jȩpo̧kü̧päijürü toe'ächünä̧ iyü iku suronä̧ jȩpä̧ji̧sä̧,
Ja̧'wa̧nü̧ pä̧u̧ juätümä̧ ttädätinä̧ku̧:
—¡Jua̧u̧mä̧ ujutu jäwämä̧kü̧! ¡Ukutätä jäwä!
5Ja̧'wa̧nü̧ ja̧'a̧ Juda-mä̧ pärätä o̧bi̧ Dio-rü ukuokuäkuäwodenä̧ do'opü ikuipü tü'ipächü nu̧'ä̧u̧ ikuinü̧.
6Sacerdote tturuwotümä̧ jua̧u̧ pärätä ka̧ka̧tä̧'ko̧tü̧ pä'inä̧tü̧:
—Pi̧yȩ pärätämä̧ ttü̧ja̧sa̧ ukuoja mikuäwächäji; ofrenda ȩnä̧wo̧ka̧ cofre i̧so̧ka̧nä̧mä̧ tȩnü̧ juiyü'anü̧ ja̧'a̧.
7Ja̧'wa̧nü̧ ja̧'a̧ttü̧ amükuä'kotü jua̧u̧ pärätänä̧mä̧ redä'kattü adikuä i̧sa̧ i̧rȩjä̧ pä'ü mi̧kuomȩ jü̧nä̧ mitü ȩmi̧nä̧tü̧, kko̧ro̧jä̧ra̧'a̧ttü̧ ichäkuäwotü wa'ü ttikuomȩnä̧ 'türäwomȩ jü̧nä̧tä̧. 8Ja̧'wa̧nü̧ ja̧'a̧ttü̧ juä̧jä̧ rȩjȩmä̧ jitä mo̧ro̧bü päi'ünä̧ ukuoja rȩjȩ pä'ü mi̧kuomȩ. 9Ja̧'wa̧nü̧ ja̧'a̧ttü̧ Profeta Jeremía, päinü̧ta'anü̧ 'kuäpina̧'a̧: Treinta-nü̧ pärätä o̧bi̧tä̧ ȩmi̧nä̧tü̧, jua̧u̧ ukuoja mikuäwächinü̧ mikuä ä̧tȩkuä̧mä̧, irae ttü̧ja̧ pättinü̧'a̧kuä̧. 10Ja̧'wa̧ta̧nü̧ jua̧u̧ pärätänä̧mä̧, redä'kattü adikuä i̧sa̧ i̧rȩjä̧tä̧ ȩmi̧nä̧tü̧, Dio ttürü ukuokuinü̧'a̧kuä̧.
Pilato, Jesú-ru jä̧ȩpä̧ri̧nü̧ wȩnȩ
(Mc 15.2-5; Lc 23.3-5; Jn 18.33-38)
11Ru̧wa̧ ä'ka jo̧mȩ ttȩpä̧ja̧'a̧ Jesú-ru, jä'epü ä̧ju̧kui̧nü̧:
—¿Ukujä̧ judío ttu̧ru̧wa̧ Rey-mä̧?
—Päku, Jesú ädätinü̧: —Ukujä̧, ja̧'wa̧nü̧ pä'ümä̧.
12Sacerdote tturuwotü'i̧nä̧, judío-ttü a̧ci̧a̧nu̧ wotü'i̧nä̧'i̧nä̧ suronä̧ jȩpä̧ji̧ pätta'anä̧, Jesú-mä̧ yoriso ädätoküpinü̧. 13Ja̧'wa̧nü̧ ü̧ji̧yä̧ku̧, Pilato-mä̧ jä'epü ä̧ju̧kui̧nä̧ku̧:
—¿Ukuru o'kajuiyünä̧ suronä̧ pätta'anä̧, ä̧ju̧kuo̧kü̧jä̧?
14Ja̧'wa̧nü̧ pä'anä̧ Jesú-mä̧ yoriso 'koruäku, ru̧wa̧mä̧ rü̧ȩnä̧ amükuädü to̧pä̧ri̧nü̧.
Jesú-ru kuä'ü ttikua pä'ü weäwi'ina̧'a̧
(Mc 15.6-20; Lc 23.13-25; Jn 18.38—19.16)
15Ja̧'wa̧ta̧nü̧ ru̧wa̧mä̧ kärenä̧ pȩjä̧tü̧ttü̧ ya̧tȩrü̧, pä'käri pä̧nä̧mä̧ ttü̧ja̧ pättäkuru rä'epü ikuä'ija'a ji̧na̧'a̧. 16Ja̧'wa̧nü̧ ja̧'a̧, jua̧u̧nu̧mä̧ ya̧tȩ kärenä̧ pi̧nü̧, rü̧ȩnä̧ u̧kuo̧wa̧ Jesú Barrabá pä'ü mi̧kua̧; 17Ja̧'wa̧nü̧ ja̧'a̧ttü̧ ka̧ka̧kuä̧jä̧'kotü ttü̧'ȩjä̧ma̧'a̧, juätürü Pilato-mä̧ jä'epü ä̧ju̧kui̧nü̧:
—¿Ukutumä̧ dírü rä'epü chikua päkuätukua'ajä̧ttü̧ Jesú Barrabá-rü, ja̧'wa̧nü̧ jo̧ka̧'a̧ jü̧ttü̧'i̧nä̧ Jesú, Crito pättäkuru? pä'inü̧, 18isopäi'ünä̧ kkü'kü jui'ü iyu ttikuäku pä'ü u̧wo̧jua̧'a̧ttü̧.
19Pilato-mä̧ ji̧nä̧ jua̧u̧ wȩnȩ ukuokua'anä̧, irekuamä̧ jittäwiyaju pä'ü we'inä̧ju̧: Mo̧ro̧ji̧ yodó suronä̧ 'kuo̧ti̧kuä̧jä̧ju̧sä̧ Jua̧u̧ suronä̧ jȩpo̧kü̧ ütü'kümä̧, Jua̧u̧ru̧mä̧ ukumä̧ jȩ'kuä̧, pä'ü.
20Ja̧'wa̧nü̧ ja̧'a̧nä̧, sacerdote tturuwotü'i̧nä̧, a̧ci̧a̧nu̧tu̧'i̧nä̧ ttü̧ja̧ rekuätürü we'ü kku̧ni̧nä̧tü̧, Barrabá-rütä rä'epü iku; Jesú-rumä̧ kuä'ü ttikua pä'ü jättepünä̧. 21Ru̧wa̧mä̧ pä'äjita'anü̧ jä'epü ä̧ju̧kui̧nü̧, ttü̧ja̧rü̧:
—¿Pitü, ta̧ju̧ttü̧mä̧ tiderü rä'epü chikua päkuätukuättü̧?
Päomȩnä̧, ädätinä̧tü̧:
—Barrabá-rütä, pä'ü.
22Pättiyäku, Pilato-mä̧ jä'epinü̧:
—Ja̧'wa̧ta̧nü̧ ¿Jesú, Crito pättäkurumä̧, toku jȩcha̧'a̧jä̧ttü̧?
Päomȩnä̧, o'katoi'ünä̧ ädätinä̧tü̧:
—¡Ü̧jo̧kä̧nü̧ jäinä̧ pȩ'o̧pü̧ kkü̧nä̧tu̧kui̧rü̧, 'korupäi'ünä̧! pä'inä̧tü̧, 23pättiyäku, pilato-mä̧ pä'inü̧:
—Jua̧u̧nu̧mä̧ ¿Däjé surojümä̧ jȩä̧jä̧ttü̧?
Päomȩnä̧, yabonü̧tä̧ wopinä̧tü̧:
—¡Ü̧jo̧kä̧nü̧ jäinä̧ pȩ'o̧pü̧ kkü̧nä̧tu̧kui̧rü̧, 'korupäi'ünä̧! pä'ü wopinä̧tü̧.
24Pilato-mä̧ yabokutä jȩpü̧ wotta'a topü yabonü̧mä̧ jȩü̧ juiyünä̧ jä̧ku̧, ajiya tti'chächa pä'ü we'äji̧'ka̧ o'katoi'ünä̧ ttä'ka jo̧mȩttü̧ u̧mü̧ tükäu kkä̧nü̧ pä'inü̧:
—Ttü jäwämä̧kü̧ pide toe'ächümä̧; ukututä jäwä jä̧kua̧'a̧, pä'ü.
25Päomȩnä̧, ttü̧ja̧mä̧ o'katoi'ünä̧ ädätinä̧tü̧:
—¡Jua̧u̧ toe'ächümä̧ wä̧i̧nä̧ ujuturutä, ti̧tti̧mü̧rü̧tä̧ wȩjä̧kua̧'a̧!, jü̧nä̧.
26Ja̧'wa̧nü̧ ja̧'a̧ttü̧, Pilato-mä̧ Barrabá-rütä rä'epü iku; Jesú-rumä̧ kuäkuätta pä'ü we'ü kkä̧nü̧, ü̧jo̧kä̧nü̧ jäinä̧ pȩ'o̧pü̧ ttu̧ju̧na̧rü̧ pä'ü we'inü̧.
27Ja̧'wa̧nü̧ ja̧'a̧ ru̧wa̧ isotü su̧ro̧do̧u̧mä̧ ruwode kkä'ko isaräku Jesú-ru ttȩmipa̧ja̧'a̧ su̧ro̧do̧u̧mä̧ o'katoi'ünä̧ jua̧u̧ ippeyänä̧ ka̧ka̧kui̧pi̧nä̧tü̧. 28Juorümä̧ ü̧'ka̧tä̧wä̧ta̧ kko̧'ä̧dü̧ iku, tu̧wä̧ta̧ttü̧ 'ka̧tü̧ kkä̧nü̧ 29Unä̧mä̧ so̧u̧ttü̧ puttäwäkä wȩni̧nä̧tü̧ ja̧'wa̧ta̧nü̧ u̧mü̧ u̧wo̧jua̧'a̧ku̧nä̧mä̧ i̧so̧'kȩ 'chu̧ä̧rü̧nä̧. Ja̧'wa̧nü̧ jȩpü̧ ttiwe'kiyunä̧ ä'ka jo̧mȩ pȩjä̧mä̧'chü̧ ya̧'a̧wȩ'ü̧, wottinä̧ku̧:
—¡Judío ttu̧ru̧wa̧ rey-mä̧, rekuo ku̧jä̧kua̧jä̧!, pä'ä'chü.
30Ja̧'wa̧ta̧nü̧ surepü kkä̧nü̧, i̧so̧'kȩ tti̧yä̧jo̧'kȩ yo̧'kȩnä̧tä̧ unä̧ kuäkuättinä̧ku̧. 31Ja̧'wa̧nü̧ jȩpü̧, ya̧'a̧wä̧'chü̧ kuäkuäpäjä'kotü, tu̧wä̧ta̧ kko̧'ä̧dü̧ iku, ji̧nä̧so ü̧'ka̧tä̧wä̧ta̧ jä̧jä̧ta̧tä̧ 'ka̧ti̧pü̧ ü̧jo̧kä̧ jäinä̧ pȩ'o̧pü̧ ttu̧ju̧na̧rü̧ pä'ü ttȩpi̧nä̧ku̧.
Jesú-ru ü̧jo̧kä̧ jäinä̧ pȩ'o̧pü̧ ttu̧ju̧ni̧nü̧ wȩnȩ
(Mc 15.21-32; Lc 23.26-43; Jn 19.17-27)
32Juorü rättopomȩnä̧ Cirene ütawiyä ttü̧ja̧sa̧ Simón pä'ü mi̧kua̧rü̧ po̧kui̧po̧'ü̧ Jesú-ru pȩ'o̧pü̧ ttu̧ju̧nä̧kuäi ü̧jo̧kä̧jäi ȩpü̧nä̧ wettinä̧ku̧.
33Gólgota pä'ü mi̧kuomȩ tti̧'chi̧'o̧mȩnä̧, (ja̧u̧ pä'ümä̧ ttupiyä ose pȩjo̧mȩ pä'ü päwä), 34uwa isoya, reoyaku wiwakua'a awa pä'ü iyinä̧ku̧ ja̧'wa̧nü̧ ja̧'a̧nä̧ Jesú-mä̧ mü̧'o̧pü̧ topü awamä̧ pä'okü pinü̧.
35Täkü ü̧jo̧kä̧ jäinä̧ pȩ'o̧pü̧ kku̧nä̧jä̧'kotü, su̧ro̧do̧u̧mä̧ Jesú ü̧'ka̧tä̧wä̧ta̧mä̧ yotukunä̧ dírü pätekuächa ja̧ pä'ü, jȩpä̧'chü̧ iyä'chäkuäwinä̧tü̧, profeta ukuokuinü̧'a̧kuä̧. 36Ja̧'wa̧nü̧ ja̧'a̧, juȩnȩtä̧ pȩjü̧ tta̧ttä̧ri̧nä̧ku̧. 37Ja̧'wa̧ta̧nü̧ u wä̧mȩ jo̧mȩ wȩyu̧tu̧ rütäwina̧'a̧ kuä'ü ttiku jäwämä̧, jua̧u̧ pa̧'a̧nü̧ päina̧'a̧: «Pide ja̧'a̧, Jesú, judío ttu̧ru̧wa̧ Rey-mä̧,» jü̧nä̧.
38Ja̧'wa̧ta̧nü̧ jua̧u̧ku̧mä̧ nä̧u̧kuä̧rä̧kuä̧wä̧ isotü ta̧ju̧ru̧ ü̧jo̧kä̧nü̧ toe'ächünä̧ pȩ'o̧pü̧ kku̧ni̧nä̧tü̧, ya̧tȩmä̧ u̧wo̧jua̧'a̧ku̧nä̧ ü̧jü̧nä̧, kka̧ra̧rü̧tä̧ ü'oweja̧'a̧ku̧nä̧ ü̧jü̧nä̧, jü̧nä̧. 39Juȩnȩnä̧ 'kuä'opätümä̧ suronä̧ pä'ä'chü, ttu roripünü̧, 40pä'inä̧tü̧:
—¡Uku Dio-rü ukuokuäkuäwode pparopü ikuipü wäbodäkuä mo̧ro̧tä̧ kuaditäkua̧jä̧ päkuina̧'a̧mä̧! ¡Isopäi'ünä̧ Dio I̧tti̧ kuttümä̧ kua̧mü̧nä̧ pa̧ja̧tü̧ kki̧'ä̧kuä̧u̧ ü̧jo̧kä̧ jäittü mȩyȩwä̧chi̧! 41Ja̧'wa̧ta̧nü̧ sacerdote tturuwotü'i̧nä̧, weäwä wȩnȩ wo̧juȩtä̧tü̧'i̧nä̧ ja̧'wa̧ta̧nü̧ A̧ci̧a̧nu̧tu̧ päi'ünä̧ wotüku yo̧mȩtȩnä̧ pättä'chinä̧ku̧:
42—Kkorotürümä̧ ra̧wä̧pi̧jü̧ttü̧ ttü̧ji̧pü̧nä̧ ppädina̧'a̧nä̧, a̧mü̧nä̧ pa̧ja̧tü̧ wa'arettümä̧ ü̧ji̧pü̧ juiyünä̧ wa̧, Irae ttü̧ja̧ ttu̧ru̧wa̧sä̧ pä'ija'anä̧: ¡isopäi'ünä̧ ü̧jo̧kä̧ jäittü i̧mȩyȩwä̧chü̧ttü̧tä̧, tesetä̧kua̧! 43Dio I̧tti̧sä̧ pä'ä'ijü, wä̧i̧nä̧ Dio-tä ppädäku: ¡isopäi'ünä̧ Dio repeäku jü̧ttü̧mä̧, Dio wa'arettü ü̧ji̧pü̧nä̧ ppä̧dä̧kua̧!
44Ja̧'wa̧ta̧nü̧ chutäku ü̧jo̧kä̧ jäinä̧ pȩ'o̧pü̧ kku̧nä̧wo̧tü̧ nä̧u̧kuä̧rä̧kuä̧wä̧ isotü'i̧nä̧ ttü̧ra̧wä̧ri̧nä̧ku̧.
Jesú 'korujuoächinü̧ wȩnȩ
(Mc 15.33-41; Lc 23.44-49; Jn 19.28-30)
45Kkä̧wa̧ jueü kkü̧rü̧, pi̧jä̧ o'kajuiyünä̧ yo̧ä̧i̧ja̧'a̧mä̧, ni̧pä̧ro̧mȩ las tres-bü päi'ünä̧, yo̧i̧na̧'a̧. 46Jua̧u̧tä̧ hora-nä̧ Jesú ujuruku pä̧i̧ku̧nä̧ wopi'inü̧: «Elí, Elí, ¿lemá sabactani?» Jua̧u̧mä̧ ¿Chä'o Dio, Chä'o Dio, tta̧'a̧nü̧ pä'ü ja̧'a̧tä̧ to'kuättüttü̧? pä'ü päwä.
47Ja̧'wa̧nü̧ woa'a ä̧ju̧ku̧, juȩnȩ kka̧kuä̧tü̧ yotukunä̧ pä'inä̧tü̧:
—Profeta Elía-rü wopü.
48Ja̧'wa̧nü̧ ja̧'a̧ yotäku, juätüttü ya̧tȩ jopächü vino isoya a̧'ti̧poya, i̧sä̧ppä̧nä̧ pütädopo'ü i̧so̧'kȩnä̧ kku̧nu̧, 49Jesú awa pä'ü iyinü̧.
—Ja̧'a̧tä̧ topätukuirü, ü̧jo̧kä̧ jäittü Elía mȩyȩdü̧ iku icharü ja̧ pä'ü.
—Jȩ'kuä̧rü̧, Elía wa'arettü rä'epiku icha'anä̧ to̧tä̧ra̧rü̧, pä'inä̧tü̧.
50Jesú-mä̧ pä'äjita'anü̧ pä̧i̧ku̧nä̧ wopi'ü, 'korupä'i'inü̧. 51'Korupäi'omȩnä̧, Dio-rü ukuokuäkuäwode i̧sä̧ta̧, jo'tojunä̧ttü̧ kkä̧mä̧dü̧, rȩjȩku̧ kkä̧'ko̧ta̧nä̧ sȩrä̧wi̧'i̧na̧'a̧. Rȩjȩ'i̧nä̧ ttü̧ȩpi̧na̧'a̧ inä̧wiyä'i̧nä̧ dürächipina̧'a̧ 52ja̧'wa̧ta̧nü̧ wa'are rütäwomȩ'i̧nä̧ bachächipina̧'a̧; ja̧'wa̧nü̧ ja̧'a̧ttü̧ rekuätü surojü jui'inä̧tü̧ wa'ü ikuinä̧tü̧mä̧ wa'ü ttikuinomȩttü̧ tto'ächipinä̧tü̧. 53Ja̧'wa̧nü̧ jo̧mȩnä̧ Jesú ttoächäji o'ka'amä̧, wa'are rütäwomȩttü̧ rä'opü. Adiwänä̧ Jerusarȩ́ ütawiyära̧'a̧ dottächa'a ttü̧ja̧ rekuätü tottinä̧u̧. 54Su̧ro̧do̧u̧ ttu̧ru̧wa̧'i̧nä̧ ja̧'wa̧ta̧nü̧ jua̧u̧tä̧ku̧ Jesú-ru to̧pä̧rü̧ tta̧'a̧rü̧ kka̧kuä̧tü̧'i̧nä̧ terremoto pättü juei o'kajuiyünä̧ 'kuäopa'a topü rü̧ȩnä̧ ye'ü pä'inä̧tü̧:
—¡Isopäi'ünä̧ pidemä̧ Dio I̧tti̧ jä̧'i̧ja̧'a̧dä̧!
55Nä̧tü̧'i̧nä̧ rekuätü juorü otonä̧ to̧pä̧rü̧ kka̧kui̧nä̧tü̧ Galirea-ttü kkä̧mä̧dü̧ ttu̧kuȩ iyu ppä̧'ä̧dä̧rü̧ Jesú-ku 'chi̧nä̧tü̧mä̧. 56Juätümä̧ María Madarena'i̧nä̧, Sa̧ti̧a̧ku̧ku̧, José-ku tta̧ju̧ María'i̧nä̧ ja̧'wa̧ta̧nü̧ Zebedeo i̧tti̧mü̧ tta̧ju̧'i̧nä̧ ji̧na̧'a̧.
Jesú-ru ttu'turinü̧ wȩnȩ
(Mc 15.42-47; Lc 23.50-56; Jn 19.38-42)
57Täkü ni̧pä̧cho̧mȩnä̧, ya̧tȩ pärätä ru̧wa̧ Arimatea ttü̧ja̧sa̧ José pä'ü mi̧kua̧ ja̧'wa̧ta̧nü̧ Jesú u̧wo̧juȩtä̧'i̧jä̧ku̧. 58Jua̧u̧, José-mä̧, Jesú 'koru juo'ächäjirü pilato-rü jä'epü i̧'chä̧ja̧'a̧ Pilato-mä̧ ttiyarü pä'ü weinä̧ku̧. 59Ja̧'wa̧nü̧ ja̧'a̧ José-mä̧, Jesú 'korujuo'ächäjirü sawana'kua idikuoko'kuanä̧ juä'opi'ü ȩmi̧pü̧, 60i̧rȩjä̧ttü̧ wa'are rütäwomȩ jareomȩ i̧nä̧wänä̧ satta pä'ü weino̧mȩ rütinü̧. Ja̧'wa̧nü̧ jä̧ji̧ o'ka'amä̧ inä̧yu rü̧ä̧yunä̧ wa'are rütäwa'a doächäkuäwome mü̧'ȩpi̧'ü̧ i̧wi̧nü̧. 61Ja̧'wa̧nü̧ ja̧'a̧nä̧ María Madarena'i̧nä̧ ja̧'wa̧ta̧nü̧ kkaraju María-ku wa'are ttütäjomȩ pä̧tȩkuä̧nü̧ kka̧kui̧pä̧jä̧'kotü pȩji̧nä̧tü̧.
Su̧ro̧do̧u̧ wa'are ttütäjomȩ tta̧ttä̧ri̧nü̧ wȩnȩ
62Kkoro mo̧ro̧, sawaru mo̧ro̧mä̧ sacerdote tturuwotü'i̧nä̧ fariseo wotü'i̧nä̧ Pilato-rü yo̧mȩtȩnä̧ topü 'chi̧nä̧tü̧, 63'chä̧jä̧'kotümä̧ pä'inä̧tü̧:
—Tu̧ru̧wa̧, chupinü̧ yaparewinü̧mä̧, ji̧nä̧ pi̧jä̧nä̧ ü̧jä̧i̧mä̧ wäbodäkuä mo̧ro̧ päi'omȩnä̧ tto̧dä̧chä̧kua̧sä̧ pä'inü̧ ji̧nü̧, amükuädätüjä̧. 64Ja̧'wa̧nü̧ ja̧'a̧ttü̧ wa'are rütäwomȩ wäbodäkuä mo̧ro̧bü päi'ünä̧ u̧wo̧juȩtä̧u̧ ichü jä̧ttä̧pä̧ya̧rü̧ ttü̧nä̧u̧kuä̧chü̧ juiyäkua'anü̧ adiu tta̧ttä̧ra̧ we'i. Jua̧u̧nü̧ o'ka'a ttü̧ja̧rü̧ tto'ächäji pä'ü jittäwa'aku. Ja̧'wa̧nü̧ jo̧mȩnä̧ rüjinä̧ yapareu wȩnȩmä̧ ä̧kuo̧mȩnä̧ ji̧no̧mȩttü̧'i̧nä̧ abonä̧nü̧ jä̧kua̧'a̧.
65Pilato-mä̧ päinä̧u̧:
—Su̧ro̧do̧u̧ru̧mä̧ juȩnȩtä̧ ku̧ju̧nä̧rä̧tu̧kuä̧dä̧, wa'are ttütäjomȩ tta̧'a̧rä̧jä̧tu̧kui̧ adiu jȩ'kuä̧tu̧ku̧'a̧nü̧ jo̧mȩnä̧. 66Ja̧'wa̧nü̧ wȩä̧jä̧u̧mä̧, wa'are rütäwomȩ i̧nä̧yunä̧ 'kiyünä̧ mü̧ȩkuä̧chü̧nä̧ mü̧'ȩpi̧nä̧tü̧; ja̧'wa̧ta̧nü̧ su̧ro̧da̧u̧ru̧'i̧nä̧ juä̧nȩtä̧ adiu to̧pä̧rü̧ tta̧ttä̧rü̧nä̧ we'ipinä̧tü̧.
Currently Selected:
San Mateo 27: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
