San Mateo 26
26
Jesú-ru 'chuttäda pä'ü ukuoku kku̧ni̧nä̧tü̧
(Mc 14.1-2; Lc 22.1-2; Jn 11.45-53)
1Jesú-mä̧ o'kajuiyünä̧ wo̧juȩtü̧ kä'ädäji̧'ka̧, u̧wo̧juȩtä̧u̧rü pä'inü̧:
2—Täkü wo̧juä̧tü̧jä̧, todäre mo̧ro̧tä̧ o'komȩ Pacua pä'käri jä̧kua̧'a̧ pä'ümä̧ ja̧'wa̧ta̧nü̧ ttürü'i̧nä̧ iyü ttikuäkuotü, ü̧jo̧kä̧nü̧ pȩ'o̧pü̧ ttu̧ju̧na̧'a̧ 'korujuodächä̧kua̧sä̧.
3Ja̧'wa̧nü̧ 'kuäopa'anä̧, sacerdote wotü tturuwotü'i̧nä̧, judío-ttü a̧ci̧a̧nu̧ wotü'i̧nä̧, sacerdote wotü ttu̧ru̧wa̧ Caifá uruwo isodenä̧ ka̧ka̧kui̧päjä'kotü, 4yapare wȩnȩtü̧ ji'äu, Jesú-ru 'chu'ädü kuä'ü ttikuarü pä'ü ukuoku kku̧ni̧nä̧tü̧. 5Ja̧'wa̧nü̧ ja̧'a̧nä̧ pä'inä̧tü̧:
—Pä'käri 'kä̧tȩnä̧mä̧kü̧, ttü̧ja̧ ttürowäwi'ü juiyäkua'anü̧.
Jesú-ru a̧mȩwoya tu'epinä̧ju̧
(Mc 14.3-9; Jn 12.1-8)
6Jesú-mä̧ Betania ütawiyänä̧, Repra kku̧nä̧rü̧ Simón pättä'ijäku ojusodenä̧ kki̧nü̧; 7Jua'attümä̧ yajute ichi'inä̧ju̧ alabastro i̧sä̧yu̧nä̧ a̧mȩwoya, rü̧ȩnä̧ mikuäwoya su̧'pȩnü̧ akua'a i'kächipü. Juäjumä̧ Unä̧ a̧mȩwoya da'epinä̧ju̧ mesa isodenä̧ ü̧'a̧'a̧. 8Ja̧'wa̧nü̧ jȩja̧'a̧ topü, u̧wo̧juȩtä̧u̧mä̧ ttüjü'kü juiyünä̧ pä̧i̧'ä̧u̧ pä'inä̧tü̧:
—¿Tta̧'a̧nü̧ pä'ü, surojuo'epäjuttü̧? 9Pärätä rü̧ȩnä̧ mikuä pä'ü iyü ttiku'anü̧ jä̧jä̧yu̧ ja̧dä̧, usurä isotürü ppättäda pä'ü.
10Pätta'a wo̧jui̧'ü̧ Jesú-mä̧ päinä̧u̧:
—¿Tta̧'a̧nü̧ pä'ü pajurumä̧ pä'ä'chätujä̧ttü̧? pajumä̧ ttürü adiutä jȩpä̧ju̧. 11Isopäi'ünä̧ usurä isotürümä̧ 'kuäopünä̧tä̧ ku̧ju̧nä̧rä̧kuo̧tü̧jä̧ ja̧'wa̧nü̧ ja̧'a̧nä̧ ttürümä̧ 'kuäopünä̧mä̧ kku̧nä̧ro̧ko̧tü̧ kuäkuotüjä̧. 12Paju ttürü chunä̧ a̧mȩwoya tujepäjimä̧, ttürü 'turu ttikuäkua'atä päi'ünä̧ jo̧mȩnü̧ jȩpü̧ kku̧nu̧ jȩpä̧jä̧ju̧. 13Isopäi'ünä̧ pädäu̧jä̧, pi̧jä̧nä̧ttü̧ adiwäjuei wȩnȩ jittäwomȩpü̧nä̧mä̧, paju jȩjä̧ji̧mä̧ amükuädäkuäwäkua'a.
Juda Jesú-ru iyü ikuinü̧ wȩnȩ
(Mc 14.10-11; Lc 22.3-6)
14Jua̧u̧nu̧tä̧ mo̧ro̧, u̧wo̧juȩtä̧u̧ doce-nü̧ wotüttü ya̧tȩ, Juda Icariote pä'ü mi̧kua̧ sacerdote wotü tturuwotürü topü 'chi̧nü̧, 15Jua̧u̧ 'chä̧wi̧'ü̧, juätürü pä'inü̧:
—¿Tta̧'a̧nü̧ rü̧ȩnä̧ kuiyätukuäkua'ajä̧ttü̧, Jesú-ru 'chukuädätukunä̧ ppädädüttümä?
Ja̧'wa̧nü̧ pä̧u̧, treinta-nü̧ jo̧mȩnä̧ ttiyinä̧ku̧, pärätämä̧. 16Jua̧u̧nu̧tä̧ päi'ünä̧ kkä̧mä̧dü̧, Juda-mä̧ Jesú-ru iyu ikua pä'ü usinü̧.
Tu̧ru̧wa̧ u̧kuȩ ukuinü̧ wȩnȩ
(Mc 14.12-25; Lc 22.7-23; Jn 13.21-30; 1 Co 11.23-26)
17Levadura juiyünä̧ trigo ire ttukuä'ijü pä'käri, ä̧kuo̧mȩnä̧ mo̧ro̧ päi'äja'a, u̧wo̧juȩtä̧u̧mä̧ Jesú-ru ichi'ü pä'inä̧tü̧:
—¿Torü jȩpü̧ tujuni̧ya̧ku̧ päkua'ajä̧ttü̧, ni̧pä̧ro̧mȩku̧ Pacua kukua pä'ümä̧?
18Jesú-mä̧ ädätinä̧u̧:
—Ütawiyära̧'a̧ täi'ätukui, jua'attü cha̧wa̧ru̧wa̧rü̧ pa̧'a̧nü̧ päkuätukuajä̧: «Tu̧ru̧wa̧mä̧ pa̧'a̧nü̧ pä'äji: Tode'ächäkua'a ä'kanä̧, kuojusodettü chumüwäyotuku Pacua chukua pä'üsä,» jü̧nä̧.
19U̧wo̧juȩtä̧u̧mä̧ Jesú weäjita'anü̧ Pacua ukua pä'ümä̧, jo̧mȩnä̧ jȩpü̧ kku̧ni̧nä̧tü̧.
20Täkü ni̧pä̧chi̧'ä̧ja̧'a̧mä̧ Jesú-mä̧ u̧wo̧juȩtä̧u̧ku mesa isodenä̧ ukua pä'ü pä̧mä̧di̧nü̧; 21Ja̧'wa̧nü̧ ttu̧kuȩ ttukua'a 'kä̧tȩnä̧ päinä̧u̧:
—Isopäi'ünä̧ pä'üsä ukuturu, ukututtü ya̧tȩ ttürü iyü i̧kuä̧kua̧ ja̧'a̧.
22Ja̧'wa̧nü̧ pä̧u̧, rü̧ȩnä̧ tta̧'kua̧ tta̧'ȩkui̧pü̧, yotukunä̧ jä̧ttȩpä̧ri̧nä̧ku̧:
—¿Ttü jä̧kua̧'a̧ chu̧ru̧wa̧?
23Jesú-mä̧ ädätinä̧u̧:
—Ttütäku ji̧nä̧ ji̧bä̧tȩ sä̧rä̧bä̧nä̧, u̧kuä̧si̧ 'ti̧'ü̧ jä̧kua̧'a̧, ttürü iyü i̧kuä̧kua̧mä̧. 24Isopäi'ünä̧ Ttürümä̧ wȩyu̧kuä̧ wȩnȩ päüta'anü̧ 'kuäopä̧kua̧ ja̧'wa̧nü̧ ja̧'a̧nä̧, ttürü iyü ikurütä jä̧kua̧'a̧ surojäkua'amä̧ ¡isottü̧, jua̧u̧we!. Ya'utettü jua̧u̧mä̧ uwäpächü juiyinü̧ttü̧tä̧ adiwaja'a.
25Ja̧'wa̧nü̧ päomȩnä̧, Juda ji̧nä̧so iyü i̧kuä̧kua̧mä̧ Jesú-ru pä'inü̧:
—¿Jua̧u̧nu̧mä̧, ttü jä̧kua̧'a̧ chu̧ru̧wa̧?
—Ukutänü̧ päkuäwadä̧ —päinä̧ku̧ Jesú-mä̧.
26Ttu̧kuȩ ttukua'a 'kä̧tȩnä̧, Jesú-mä̧ trigo i̧ri̧si̧ ȩmo̧po̧'ü̧ Dio-rü ukuokuäji̧'ka̧, 'to'opo'ü u̧wo̧juȩtä̧u̧rü iyü pä'inü̧:
—Ja̧já̧ kuätukui, pi̧yȩmä̧ ttütä jä̧ttä̧pä̧ya̧ ja̧'a̧.
27Jua̧u̧nü̧ o'ka'a i̧so̧'ta̧ ȩmo̧po̧'ü̧ Dio-rü ukuokuäji̧'ka̧, u̧wo̧juȩtä̧u̧rü iyü pä'inü̧:
—Po̧'ta̧ttü̧ o'katoi'ünä̧ awätukui, 28Isopäi'ünä̧ poyamä̧ ttütä chukuoja ja̧'a̧, poyanätä̧ jareünä̧ esekusä. Juoyamä̧ rekuätü suronä̧ jȩttä̧'i̧jü̧ jȩpü̧ iku werächäkua'a. 29Ja̧'wa̧nü̧ ja̧'a̧nä̧ pädäu̧jä̧, uwa isoya jitä chawa'atä ja̧'a̧mä̧ awokü chä̧kua̧sä̧, pä'äjita'anü̧ ukutukumä̧ ji̧yȩnü̧ mo̧ro̧ chä'o Dio weomȩttü̧tä̧ chawa pä'ü.
Jesú-mä̧, Peduru ä̧ppü̧tä̧rä̧kua̧'a̧ ji'äwinü̧
(Mc 14.26-31; Lc 22.31-34; Jn 13.36-38)
30Salmos ra̧'ü̧ kä'ädäkuäwi'ü olivo kka̧kuä̧'ka mü̧ä̧'kara̧'a̧ 'chi̧nä̧tü̧. 31Ja̧'wa̧nü̧ tti̧'chä̧ja̧'a̧ Jesú-mä̧ päinä̧u̧:
—Ukutu o'katoi'ünä̧, mä̧kuä̧ yodomä̧ ttüttümä̧ ye'ekuä'chi'ü kuipperekuächäkuotüjä̧, wȩyu̧kuä̧mä̧ pa̧'a̧nü̧ pä'ija'a: «Oweja-tü̧ ttu̧ru̧wa̧rü̧ 'kui'opü chikuomȩnä̧ oweja-tü̧mä̧ ttü̧jo̧kuo̧mȩttü̧ ttipperekuächäkuotü,» jü̧nä̧. 32Ja̧'wa̧nü̧ ja̧'a̧nä̧, wa'arettü ttodächi'omȩnä̧mä̧, Galirea-ra̧'a̧ kuä'katukunä̧ chi̧'chä̧kua̧sä̧.
33Peduru-mä̧ ädätinä̧ku̧:
—O'katoi'ünä̧ ukuttü düttekuächa'anä̧, ttümä̧ tü'ipokü chä̧kua̧sä̧.
34Päiyäku Jesú-mä̧ ädätinä̧ku̧:
—Isopäi'ünä̧ pä'üsä ukuru, mä̧kuä̧ yodó äkärä woäkua'a ä'kanä̧ wäbodäkuä jo̧mȩnä̧, ttürü kuieruwa'a jikuäwäkua̧jä̧.
35Päomȩnä̧, Peduru-mä̧ yabonü̧ pä'inü̧:
—Ukutäku tode'ächüttü'i̧nä̧, wä̧i̧nä̧ ja̧'a̧nä̧, ukú kutü'kümä̧ ä̧ppü̧tä̧ro̧kü̧ chä̧kua̧sä̧. Pä̧i̧yä̧u̧ u̧wo̧juȩtä̧u̧mä̧ o'katoi'ünä̧tä̧ ja̧'wa̧nü̧tä̧ pä'inä̧tü̧.
Gesemaní de'attü Jesú Dio-rü ukuokuinü̧
(Mc 14.32-42; Lc 22.39-46)
36Ja̧'wa̧nü̧ ja̧'a̧ Jesú-mä̧ u̧wo̧juȩtä̧u̧ku Gesemaní pä'ü mi̧kuomȩ 'chä̧wi̧'o̧po̧'ü̧, juätürü pä'inü̧:
—Pȩnȩtä̧ pȩjä̧tu̧kui̧, yorü Dio-rü ukuoku chi̧'cha̧'a̧nä̧.
37Ja̧'wa̧nü̧ pä'ipü Peduru-kutä ja̧'wa̧ta̧nü̧ Zebedeo i̧tti̧mü̧ ta̧ju̧ku̧tä̧ o'ipächü 'chä̧ji̧'ka̧, jua'attü rü̧ȩnä̧ a̧'kua̧ tta̧'ȩkui̧pü̧, 38Juätürü pä'inü̧:
—Cha̧'kua̧tta̧nü̧ jä̧ku̧sä̧, tode'ächäkuomȩtä̧ päi'ünä̧. Ukutumä̧ pȩnȩtä̧ kka̧kui̧pü̧, kuä'i'ätukuoka'a ttütäku ukuokuätukui.
39Pä'ipü yabonä̧nü̧ 'chä̧wi̧'ü̧, iwe'kiyunä̧ pä̧mä̧dü̧ rȩjȩku̧ ma̧'ä̧mü̧, Dio-rü ukuoku pä'inü̧: «Chä'o, jȩ'ku̧'a̧nü̧ jü̧ttü̧mä̧, pi̧yȩ usurä ȩmä̧kuä̧wä̧nä̧ 'kuädopü juiyünä̧ ppä'ädittü; ja̧'wa̧nü̧ ja̧'a̧nä̧ ttürü pä̧wä̧rü̧jo̧mȩnä̧mä̧kü̧, ukuru pä̧wä̧rü̧jo̧mȩnä̧tä̧.»
40Ja̧'wa̧nü̧ ukuoku kä'ädi'ipü u̧wo̧juȩtä̧u̧ ttü̧'jä̧jo̧mȩku̧ 'chä̧wi̧'ü̧ toomȩnä̧, ä'eku pȩji̧nä̧tü̧. Ja̧'wa̧nü̧ ji̧yä̧ku̧, Peduru-rü pä'inü̧:
—¿Suro ya'ute hora-tä'i̧nä̧, ttükumä̧ to̧'kuä̧rä̧tu̧ku̧ juiyünä̧ ja̧'a̧? 41To̧pä̧rü̧ Dio-rü ukuokuätukui kua̧mi̧ 'kuäkuätukunä̧ ma̧kuä̧chä̧tu̧ku̧ juiyäkua'anü̧. Isopäi'ünä̧ epíritumä̧ jȩa̧ pä'anä̧ ttidepämä̧ juiyuwa'a.
42Pä'äji jä̧ji̧ta̧'a̧nü̧, todärenä̧ päi'ünä̧ tü'ipächi'ü Dio-rü pa̧'a̧nü̧ ukuokuinü̧: «Chä'o, pi̧yȩ usurä ȩmä̧kuä̧wä̧nä̧ ttü 'kuädopa päkuttümä̧, ukuru pä̧wä̧rü̧jo̧mȩnä̧tä̧ jȩpi̧.»
43Ji̧nä̧ pä'äji jä̧ji̧ta̧'a̧nü̧ 'chä̧wi̧'ü̧ toomȩnä̧ u̧wo̧juȩtä̧u̧mä̧ ä'eku pȩji̧nä̧tü̧, püdittü tti'äre mü̧ȩkuä̧chä̧rä̧u̧. 44Ja̧'wa̧nü̧ ttü̧'ȩja̧'a̧nä̧ ja̧'a̧tä̧ topi'ütä tü'ipächi'ü, wäbodäkuänä̧ päi'ünä̧, Dio-rümä̧ pä'äji ukuokuäjitä ukuokuinü̧. 45Ja̧'wa̧nü̧ ukuoku kä'ädäji̧'ka̧ ichi'ü u̧wo̧juȩtä̧u̧rü pä'inü̧:
—Täkü jitämä̧ ä'ekuätukui, pü̧di̧ri̧ja̧'a̧ttü̧. Jitämä̧ täkü, Ttürümä̧, suronä̧ jȩpä̧tü̧ ttu̧mü̧nä̧ iyü ttiku hora päia'a. 46Ä̧rä̧mi̧'ä̧tu̧kui̧, ti̧'chä̧tu̧kua̧; täkü ttürü iyü iku ichümä̧ tü'kü pä'i'ü.
Jesú-ru 'chuttädinü̧ wȩnȩ
(Mc 14.43-50; Lc 22.47-53; Jn 18.2-11)
47Jesú-mä̧ ji̧nä̧ ukuoku ü̧ja̧'a̧nä̧, doce-nü̧ wotü u̧wo̧juȩtä̧u̧ttü̧ ya̧tȩ, Juda pä'ijü ichi'inü̧, ttü̧ja̧ rekuätüku kurodiyä'i̧nä̧, dauwiyä'i̧nä̧ 'chu̧ä̧rä̧nü̧ i'chächätuku. Irae ttü̧ja̧ttü̧ sacerdote wotü tturuwotü'i̧nä̧ ja̧'wa̧ta̧nü̧ judío-ttü a̧ci̧a̧nu̧ wotü'i̧nä̧'i̧nä̧ wettäja'a ji̧na̧'a̧. 48Juda-mä̧ ji̧nä̧so iyü ikuä̧u̧ru̧mä̧: «Ja̧'wa̧nü̧ 'chu̧do̧pä̧ku̧ jä̧kua̧'a̧, jua̧u̧ru̧tä̧ 'chukuädätukuajä̧ pä'ü ji'äu u̧ju̧nä̧ja̧'a̧ ji̧na̧'a̧.» 49Ja̧'wa̧nü̧ jä̧ja̧'a̧ttü̧, Jesú-ru 'chä̧wi̧'ü̧ pä'inü̧:
—¡Tta̧'a̧nü̧ ja̧'a̧kuä̧, chu̧ru̧wa̧!
Pä'ünü̧, 'chu̧o̧pi̧nä̧ku̧. 50Ja̧'wa̧nü̧ jȩi̧yä̧ku̧, Jesú-mä̧ päinä̧ku̧:
—Cha̧wa̧ru̧wa̧, jȩ'kua̧ pä'ü kuichäjimä̧ jȩpi̧.
Päomȩnä̧, juätümä̧ ichi'opo'ü Jesú-ru 'chu'ädinä̧tü̧.
51Ja̧'wa̧nü̧ 'chuttädiyäku Jesú-ku kkä̧ji̧mä̧, ukurodä 'cho'äwo'ü sacerdote wotü ttu̧ru̧wa̧ u̧mü̧wä̧ya̧rü̧ ä̧ja̧ 'kui'opü ikuinü̧. 52Ja̧'wa̧nü̧ jȩi̧yä̧ku̧ Jesú-mä̧ päinä̧ku̧:
—Kukurodämä̧ ȩjä̧jo̧mȩtä̧ ȩni̧. Isopäi'ünä̧ o'katoi'ünä̧ ttukurodänä̧ kuä'ü ikuätümä̧, kurodänä̧tä̧ to'e'ächätü. 53¿Ukutu kuamükuädätukumä̧ Chä'orümä̧ doce-nü̧ wotü á̧gȩrȩ-rü̧mä̧, ttumüwäyotuku weattü pä'ü jädepüttümä̧, weü juiyü'anü̧ ja̧'a̧? 54Ja̧'wa̧nü̧ ja̧'a̧nä̧, ja̧'wa̧nü̧ jȩchü̧ttü̧mä̧ ¿wȩyu̧kuä̧ wȩnȩnä̧ ja̧'wa̧nü̧ jä̧kua̧'a̧ pä'ijümä̧ toku 'kuäopäkua'ajä̧ttü̧?
55Pä'ükkä̧nü̧, yotäku Jesú-mä̧ ttü̧ja̧rü̧ pä'inü̧:
—¿Tta̧'a̧nü̧ pä'ü nä̧u̧kuä̧rä̧kuä̧wä̧ i̧sa̧rü̧ 'kua̧rü̧nä̧, kurodiyäku, dauwiyäku 'chu̧ä̧rä̧nü̧ 'chu'ädü kuichäjätukuäkusättü̧? 'Kuäopünä̧ mo̧ro̧ ji̧nü̧ a̧'u̧kuä̧, Dio-rü ukuokuäkuäwodettü chu̧wo̧juȩta̧'a̧nä̧ 'chukuädätukuokoku pä'ijüsä. 56Ja̧'wa̧nü̧ ja̧'a̧nä̧, pi̧yȩ o'kajuiyünä̧ 'kuäopümä̧, profeta wotü wȩyu̧tu̧ ttütinü̧ta̧'a̧nü̧ 'kuäopa'a ja̧'a̧.
Täkü jua̧u̧nu̧tä̧, u̧wo̧juȩtä̧u̧mä̧ o'katoi'ünä̧ kkatätä ü̧ji̧pa̧'a̧nä̧ dü'ekuächü tü'ipächinä̧tü̧.
Jesú-ru ruwotü ttä'ka jo̧mȩ ttȩpi̧nü̧ wȩnȩ
(Mc 14.53-65; Lc 22.54-55,63-71; Jn 18.12-14,19-24)
57Jesú-ru 'chu'ädäjä'kotümä̧ sacerdote wotü ttu̧ru̧wa̧ Caifá ojusodera̧'a̧ku̧, weäwä wȩnȩ wo̧juȩtä̧tü̧'i̧nä̧ ja̧'wa̧ta̧nü̧ a̧ci̧a̧nu̧tu̧'i̧nä̧ ka̧ka̧kua̧jä̧'kotü ttü̧'ȩjo̧mȩ ttȩpi̧nä̧ku̧. 58Peduru-mä̧ Jua̧u̧ru̧ ȩmi̧pä̧tü̧ tto'ka'anä̧, otonä̧ jo̧mȩnä̧ ru'inü̧ sacerdote wotü ttu̧ru̧wa̧ ü̧jo̧debü päi'ünä̧. Ru'i'äji̧'ka̧mä̧, u̧mi̧ isaränä̧ do'ächi'ü, tta̧wä̧rä̧kuä̧wä̧ isotü ttü̧'ȩjo̧mȩ pä̧mä̧di̧nü̧, rüjí jȩtto̧mȩbü toa pä'ü.
59Sacerdote wotü tturuwotü'i̧nä̧ ja̧'wa̧ta̧nü̧ sanedrín isotü'i̧nä̧ yapareu jittäwiyatü pä'ü usinä̧tü̧, ji̧yȩnä̧tä̧ Jesú-ru kuä'ü ttikunä̧ jȩtta̧ pä'ü. 60Ja̧'wa̧nü̧ ttüsa'anä̧, po̧kui̧po̧ko̧tü̧ pinä̧tü̧, ttü̧ja̧mä̧ rekuätü ichü yapareu jittäwa'anä̧. Ja̧'wa̧nü̧ jä̧ji̧ o'ka'a päjuriyänä̧ ta̧ju̧ ichi'ü, 61Pä'inä̧tü̧:
—Pidemä̧ pa̧'a̧nü̧ pä'inü̧: Ttümä̧ Dio-rü ukuokuäkuäwode pparopü chiku'anü̧ wa̧sä̧, pä'äjita'anü̧ wäbodäkuä mo̧ro̧tä̧ chäräbe'a pä'ü.
62Ja̧'wa̧nü̧ ji̧yä̧ku̧, sacerdote wotü ttu̧ru̧wa̧mä̧ ä̧rä̧mi̧'ü̧ Jesú-ru pä'inü̧:
—¿Yoriso kuädätoka'a? ¿ukutämä̧ toku jikuäkuäwa'ajä̧ttü̧, ku̧ji̧pa̧ pä'ümä̧?
63Ja̧'wa̧nü̧ pä'anä̧ Jesú-mä̧ ädätokoku, sacerdote ttu̧ru̧wa̧mä̧ jua̧u̧ru̧ pä'inü̧:
—Dio kkü̧ i̧mi̧nä̧ wedäkujä̧, isopäi'ünä̧ Dio i̧tti̧ Jesucrito kuttümä̧ jikuäwatü pä'üsä.
64Päiyäku Jesú-mä̧ ädätinä̧ku̧:
—Ukutäjä̧, A̧, pä'ümä̧. Ja̧'wa̧ta̧nü̧ ttü'i̧nä̧ pä'üsä, porütä kkä̧mä̧dü̧ ukutumä̧ to'kuäkuotüjä̧ Ttürümä̧ Dio u̧wo̧jua̧'a̧ku̧nä̧ chü̧'a̧'a̧ ja̧'wa̧ta̧nü̧ mo̧ro̧jä̧ra̧'a̧ttü̧ ajiya isoppanä̧ chicha'a'i̧nä̧ to'kuäkuotüjä̧.
65Ja̧'wa̧nü̧ päiyäku, sacerdote wotü ttu̧ru̧wa̧mä̧, a̧mi̧surächi'äku, ü̧'ka̧tä̧wä̧ta̧ sȩro̧ku̧nu̧ pä'inü̧:
—¡Dio-rü suronä̧, to'ija̧'a̧ku̧ pä'üjä̧! ¡Täkü kkorotü pide ütü'kü jittäwa pä'ümä̧ rekuä rü̧jo̧ka̧'a̧! Ukututä ä̧ju̧kuä̧tü̧jä̧ suronä̧ päümä̧, 66¿Ukutumä̧ toku päkuätukuättü̧?
Päomȩnä̧, ädätinä̧tü̧:
—Kuä'ü ttikuarü pä'ütä wa̧.
67Pä'ü kä'ädü i'änä̧ surepükkä̧nü̧, 'ta'tattinä̧ku̧. Ja̧'wa̧ta̧nü̧ kkorotümä̧ i'änä̧ kuäkuäpünü̧, 68wopäkuäwinä̧tü̧:
—Jueü pä'i ¡Crito kuttümä̧, díjä̧ttü̧ ukuru kuä'ümä̧!
Peduru-mä̧, Jesú ütü'kü ä̧ppü̧tä̧ri̧nü̧
(Mc 14.66-72; Lc 22.56-62; Jn 18.15-18,25-27)
69Ja̧'wa̧nü̧ jȩtta̧'a̧nä̧ Peduru-mä̧ u̧mi̧ isaränä̧ pi̧nü̧. Ja̧'wa̧nü̧ ü̧'a̧'a̧, yajute ttu̧mü̧wäyaju ichi'ü päjinä̧ku̧:
—Uku'i̧nä̧ Jesú Galirea i̧sa̧ku̧ kue'ächä'ijü̧jä̧.
70Ja̧'wa̧nü̧ päjäku, Peduru-mä̧ kkorotü'i̧nä̧ ttä'ka jo̧mȩttü̧ ä̧ppü̧ti̧'i̧nü̧:
—Yoriso jȩru̧pa̧sä̧ uku päkumä̧, jü̧nä̧.
71Jua̧u̧ jä̧ji̧ o'ka'a äpate'kaku räo'omȩnä̧, kkaraju topo'ü juȩnȩtä̧ kka̧kuä̧tü̧rü̧ pä'inä̧ju̧:
—Chujua'i̧nä̧ Jesú nazare i̧sa̧ku̧ kkä̧'i̧jü̧.
72Pä'äjita'anü̧ Peduru-mä̧ yorisotä ä̧ppü̧ti̧'ü̧ pä'inü̧:
—Juramento pättünä̧ jȩpü̧nü̧: ¡Jua̧u̧ru̧mä̧ yorisotä jȩru̧pa̧sä̧! jü̧nä̧.
73A̧'u̧kua̧'a̧tä̧ jä̧ji̧ o'ka'a, juȩnȩtä̧ kka̧kuä̧tü̧ ichi'ü Peduru-rü pä'inä̧tü̧:
—Isopäi'ünä̧ uku'i̧nä̧ juätütä i̧sa̧jä̧. Suro kui̧wȩnȩttü̧ ä̧ju̧ku̧tä̧'i̧nä̧ tu̧wo̧juä̧ku̧jä̧.
74Ja̧'wa̧nü̧ pättäku, Peduru-mä̧ juramento pättünä̧ jȩpü̧, suronä̧'i̧nä̧ pä'ükkä̧nü̧ pä'inü̧:
—¡Jua̧u̧ru̧mä̧ yorisotä jȩru̧pa̧sä̧!
Pä'ü käda'anä̧, äkärämä̧ wopinü̧. 75Ja̧'wa̧nü̧ ä̧ju̧ku̧, Peduru-mä̧ Jesú pä'inü̧ ji̧nü̧ amükuädi'inü̧: «Äkärä woäkua'a ä'kanä̧, wäbodäkuänä̧ jo̧mȩnä̧ ttü chütü'kü kuä̧ppü̧tä̧rä̧kua̧jä̧», jü̧nä̧. Ja̧'wa̧nü̧ jä̧ku̧ Peduru-mä̧ juorü rä'opächü rü̧ȩnä̧ ajuäu ikuinü̧.
Currently Selected:
San Mateo 26: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
