San Mateo 25

Nä̧tü̧ mü̧ä̧yotü to̧mü̧rȩnü̧ wotünä̧ wȩnȩtü̧ ji'äwinü̧

1Ja̧'wa̧ta̧nü̧ mo̧ro̧jä̧ ru̧wa̧ weomȩmä̧, ya̧tȩ ü'käu icha'a nä̧tü̧ mü̧ä̧yotü to̧mü̧rȩnü̧ wotü ttiäre ra̧pa̧ra̧ ȩmi̧pü̧ jua̧u̧ru̧ tettäwa pä'ü rä'opächü tti̧'chi̧nü̧'a̧nü̧ ja̧'a̧. 2Ja̧'wa̧nü̧ ja̧'a̧nä̧ juätü nä̧tü̧ttü̧, ji̧mü̧tȩnü̧ wotümä̧ wo̧juȩku̧nä̧ amükuädinä̧tü̧ ja̧'wa̧ta̧nü̧ kkorotü ji̧mü̧tȩnü̧ wotümä̧ wo̧juȩku̧nä̧ amükuädokotü pinä̧tü̧. 3Wo̧juȩku̧nä̧ amükuädokotümä̧ ttü̧ra̧pa̧ra̧mä̧ ttȩmi̧pa̧'a̧nä̧, joipächomȩnä̧ ttü̧'ka̧rä̧kuȩ aceite-mä̧ ȩpo̧ko̧tü̧ pinä̧tü̧; 4Ja̧'wa̧nü̧ ja̧'a̧nä̧ wo̧juȩku̧nä̧ amükuädätümä̧ ttü̧ra̧pa̧ra̧ ȩpü̧ kkä̧nü̧, i̧mi̧ku̧nä̧'i̧nä̧ o̧yu̧nä̧ aceite-mä̧ ȩpi̧nä̧tü̧. 5Ja̧'wa̧nü̧ ja̧'a̧nä̧ ü'käu ichümä̧, jurunä̧ ichi'oka'a ja̧'a̧, o'katoi'ünä̧ nä̧tü̧mä̧ püdittü, ä'ekuächi'inä̧tü̧. 6Ja̧'wa̧nü̧ ja̧'a̧ yodó kkä'ko päia'a, wopinä̧tü̧: ¡Ü'käumä̧ täkü ichü! ¡Tekuäwächätukuarü rä'opätukui! 7Ja̧'wa̧nü̧ ä̧ju̧ku̧ nä̧tü̧ müäyotümä̧ o'katoi'ünä̧ po̧rä̧rä̧kuä̧wi̧'ü̧ ttiäre ra̧pa̧ri̧yu̧ jo̧mȩnü̧ aditopo'i̧nä̧tü̧. 8Ja̧'wa̧nü̧ jȩtta̧'a̧nä̧, nä̧tü̧ mü̧ä̧yotü ji̧mü̧tȩnü̧ wotü wo̧juȩku̧nä̧ amükuädokotümä̧, jitü nä̧tü̧ ji̧mü̧tȩnü̧ wotü wo̧juȩku̧nä̧ amükuädätürü pä'inä̧tü̧: Ttü̧ra̧pa̧ri̧yu̧ na̧wi̧'i̧yä̧u̧jä̧ kuiäretuku aceite-ttü ji̧'chi̧cha̧nü̧ iyitü. 9Pä̧ttä̧u̧mä̧, nä̧tü̧ mü̧ä̧yotü wo̧juȩku̧nä̧ amükuädätümä̧, ttädätinä̧u̧: Isokü̧, tiyüttümä̧ ujuturu'i̧nä̧, ukuturu'i̧nä̧ pa̧ja̧kuä̧chü̧ juiyü'anü̧ ja̧'a̧. Ja̧'wa̧nü̧ ja̧'a̧ttü̧, ukututä mikuänä̧ ttiyomȩttü̧ ȩmä̧jä̧tu̧kui̧. 10Ja̧'wa̧nü̧ jä̧u̧ mikuänä̧ ttiyomȩttü̧ ȩmü̧ tti̧'cha̧'a̧nä̧, Ü'käumä̧ täkü ichi'inü̧. Ichi'a'a wo̧juȩku̧nä̧ amükuädätümä̧, chutäku dodettächa'anä̧, äpatemä̧ mü̧ȩkuä̧chi̧na̧'a̧. 11Ja̧'wa̧nü̧ päi'äji o'ka'a, kkorotü nä̧tü̧ mü̧ä̧yotü päjätümä̧ ichi'äkuäwi'ü wopinä̧tü̧: ¡Chu̧ru̧wa̧, chu̧ru̧wa̧ ba'epitü! 12Pättäku jua̧u̧mä̧ ädätinä̧u̧: «Isopäi'ünä̧ pädäu̧jä̧, ukuturumä̧ jȩru̧pa̧sä̧.» 13Ja̧'wa̧nü̧ ja̧'a̧ttü̧, to̧pä̧rü̧nü̧ kka̧kuä̧tu̧kui̧, mo̧ro̧'i̧nä̧, hora'i̧nä̧ kuieruwätukua'attü̧.

Pärätänä̧ wȩnȩtü̧ ji'äwinü̧

(Lc 19.11-27)

14Ja̧'wa̧ta̧nü̧ mo̧ro̧jä̧ ru̧wa̧ weomȩmä̧, ya̧tȩ kko̧ro̧jä̧ra̧'a̧ kue'ächü 'chä̧nü̧ u̧mü̧wä̧yotürü wopo'ü iäre pärätä tta̧ttä̧ri̧ya̧rü̧ pä'ü weipinü̧'a̧nü̧ ja̧'a̧. 15Juätüttü ya̧tȩrü̧mä̧, cinco mil-nü̧ jo̧mȩnä̧ pärätä iyinü̧, kka̧ra̧rü̧mä̧ dos mil-nü̧ jo̧mȩnä̧ ja̧'wa̧ta̧nü̧ kka̧ra̧rü̧tä̧ mil-nü̧ jo̧mȩnä̧: yotukunä̧ jȩttü̧'a̧nü̧ ja̧'a̧ttü̧ topü, iyäji'ka̧mä̧ kue'ächü 'chi̧nü̧. 16Ja̧'wa̧nü̧ jä̧ja̧'a̧, u̧mü̧wä̧ya̧ Cinco mil-nü̧ pärätä ȩmä̧ji̧ päjimä̧, ji̧yȩnä̧tä̧ aditü, yabonä̧nü̧ kkoro cinco mil-nü̧ jo̧mȩnä̧ pärätämä̧ ȩmi̧nü̧. 17Jua̧u̧ jä̧ji̧ta̧'a̧nü̧ dos mil-nü̧ jo̧mȩnä̧ ȩmi̧nü̧ päjimä̧, kkoro yabonä̧nü̧ dos mil jo̧mȩnä̧ ȩmi̧nü̧. 18Ja̧'wa̧nü̧ ja̧'a̧nä̧, mil-nü̧ jo̧mȩnä̧tä̧ pärätä ȩmi̧nü̧ päjimä̧, u̧ru̧wa̧ iäre pärätä ȩmi̧pü̧ rȩjȩ sa'opo'ü, dajü ikuinü̧.

19Rekuo mo̧ro̧ 'kuäopinü̧ o'ka'a, adikuä isotü ttu̧ru̧wa̧mä̧ ppa̧'ä̧chä̧ji̧'ka̧, ttaditäwä tti̧jȩpa̧rü̧ pä'ü jäepinä̧u̧. 20Ja̧'wa̧nü̧ ja̧'a̧, ä̧kuo̧mȩnä̧ cinco mil-nü̧ jo̧mȩnä̧ pärätä ȩmi̧nü̧ päjimä̧, ichi'ü u̧ru̧wa̧rü̧ kkoro cinco mil-nü̧ jo̧mȩnä̧ pärätä iyü pä'inü̧: Chu̧ru̧wa̧ cinco mil-nü̧ jo̧mȩnä̧ pärätä kuiyinä̧ku̧sä̧, kuiyinü̧ttü̧mä̧ kkoro cinco mil-nü̧ jo̧mȩnä̧ ji̧yȩnä̧tä̧ aditü chȩmi̧nü̧mä̧ pi̧yȩ ja̧'a̧. 21Jua̧u̧ru̧ u̧ru̧wa̧mä̧ pä'inü̧: Juiyo adiwa'a, adiu adikuä i̧sa̧jä̧; a̧'u̧ku̧nä̧tä̧'i̧nä̧ adiu kuaditina̧'a̧ttü̧, rü̧ȩnä̧ chiyäkujä̧ kuadita pä'ümä̧. Do'ächi ttüku kuesewa. 22Jua̧u̧nü̧ o'ka'a dos mil-nü̧ jo̧mȩnä̧ pärätä ȩmi̧nü̧ päjimä̧, ichi'ü u̧ru̧wa̧rü̧ kkoro dos mil-nü̧ jo̧mȩnä̧ pärätä iyü pä'inü̧: Chu̧ru̧wa̧ dos mil-nü̧ jo̧mȩnä̧ pärätä kuiyinä̧ku̧sä̧, kuiyinü̧ttü̧mä̧ kkoro dos mil-nü̧ jo̧mȩnä̧ ji̧yȩnä̧tä̧ aditü chȩmi̧nü̧mä̧ pi̧yȩ ja̧'a̧. 23Jua̧u̧ru̧ u̧ru̧wa̧mä̧ pä'inü̧: Juiyo adiwa'a, adiu adikuä i̧sa̧jä̧; a̧'u̧ku̧nä̧tä̧'i̧nä̧ adiu kuaditina̧'a̧ttü̧, rü̧ȩnä̧ chiyäkujä̧ kuadita pä'ümä̧. Do'ächi ttüku kuesewa.

24Ja̧'wa̧nü̧ ja̧'a̧nä̧ u̧mü̧wä̧ya̧ mil-nü̧ jo̧mȩnä̧tä̧ pärätä ȩmi̧nü̧ päjimä̧ u̧ru̧wa̧rü̧ ichi'ü pä'inü̧: Chu̧ru̧wa̧ ukumä̧ juiyo jä'epüjä̧, kuaditokomȩ ji̧no̧mȩttü̧'i̧nä̧ u̧wä̧ju̧ jäekuä i̧sa̧jä̧ ja̧'wa̧ta̧nü̧ riri'kuokome ji̧no̧mȩttü̧'i̧nä̧ ka̧ka̧kuä̧ i̧sa̧, pä'ümä̧ chu̧wo̧juä̧ku̧jä̧. 25Ja̧'wa̧nü̧ ja̧'a̧ttü̧ ye'eku kuiäre pärätämä̧ rȩjȩ dajü ikuinü̧sä̧. Ja̧'wa̧nü̧ ja̧'a̧nä̧, kuiäremä̧ pi̧yȩsä̧ ja̧já̧. 26Ja̧'wa̧nü̧ päiyäku, u̧ru̧wa̧mä̧ päinä̧ku̧: Ukumä̧ adikuä i̧sa̧ kua'anä̧, ü̧tä̧wa̧jä̧, su̧ro̧pa̧jä̧. Chaditokomȩ ji̧no̧mȩttü̧'i̧nä̧ u̧wä̧ju̧ jäekuä i̧sa̧ cha'amä̧ ja̧'wa̧ta̧nü̧ ririchokome ji̧no̧mȩttü̧'i̧nä̧ ka̧ka̧kuä̧ i̧sa̧ cha'amä̧ wo̧jui̧nü̧jä̧, 27Ja̧'wa̧nü̧ jü̧ttü̧mä̧ chiäre pärätämä̧ Banco-ra̧'a̧ rütina̧jü̧jä̧, ppa̧dä̧cho̧mȩnä̧ interes pättüku chȩmä̧kua̧'a̧nü̧. 28Ja̧'wa̧nü̧ pä'ü kkä̧nü̧ juȩnȩ kka̧kuä̧tü̧rü̧ pä'inü̧: mil-nü̧ jo̧mȩnä̧ üäre pärätä kku̧nä̧rü̧rü̧mä̧ 'cho'ipätukuirü, diez mil-nü̧ jo̧mȩnä̧ kku̧nä̧rü̧rü̧tä̧ kuiyätukua. 29Isopäi'ünä̧ kku̧nä̧rü̧rü̧mä̧ iyäwäkua'a ja̧'wa̧nü̧ jo̧mȩnä̧ rü̧ȩnä̧ u̧ju̧nä̧rä̧kua̧; ja̧'wa̧nü̧ ja̧'a̧nä̧ jui̧'a̧rü̧mä̧, suro a̧'u̧ku̧nä̧tä̧ u̧ju̧nä̧rü̧'i̧nä̧ 'choikuäkua'a. 30Ja̧'wa̧nü̧ ja̧'a̧nä̧, pide adikuä i̧sa̧ ü̧tä̧wa̧rü̧mä̧ u̧mi̧ yo̧mȩku̧ do'opü ikuätukuirü. Juorümä̧ ttaku norü ajuäkuäwäkua'a.

Ttü̧ja̧rü̧ ü'ojo'ä̧kuȩ wȩnȩ

31Ubo I̧tti̧ uruwoku ichomȩnä̧mä̧, umüwäyotü á̧gȩrȩ-ku̧ o'katoi'ünä̧ ichi'ü, uruwo dȩä̧kä̧nä̧ ü̧'ä̧mä̧dä̧kua̧. 32Ja̧'wa̧nü̧ päi'omȩnä̧ tti̧wȩnȩ pa̧ja̧ku̧nä̧ o'katoi'ünä̧tä̧ ä'ka jo̧mȩ ttü̧ka̧ka̧kui̧'ä̧kuo̧tü̧, ja̧'wa̧nü̧ ttü̧ka̧ka̧kui̧'a̧'a̧ yotukunä̧rü̧ 'kȩ'chä̧u̧ u̧ju̧nä̧kua̧, ya̧tȩ pató, oweja-tü̧rü̧ cabra-tü̧ttü̧ pojope'ü u̧ju̧na̧jü̧'a̧nü̧. 33Oweja-tü̧rü̧mä̧ u̧wo̧jua̧'a̧ku̧nä̧ u̧ju̧nä̧kua̧ ja̧'wa̧ta̧nü̧ cabra-tü̧rü̧mä̧ ü'owekunä̧ u̧ju̧nä̧kua̧. 34Ja̧'wa̧nü̧ ja̧'a̧ Ru̧wa̧ Rey-mä̧ u̧wo̧jua̧'a̧ku̧nä̧ kka̧kuä̧tü̧rü̧ pä̧kua̧: Ichätukui Chä'o ppädinä̧u̧mä̧, pi̧jä̧ adikui'ino̧mȩttü̧ päi'ünä̧ ukuturu wekuätukua pä'ü jo̧mȩnü̧ jȩpü̧ u̧ju̧ni̧nü̧ kuȩmä̧tu̧kua̧. 35Isopäi'ünä̧ chukua ppä̧i̧rü̧jo̧mȩnä̧'i̧nä̧, chukua pä'ü iyinä̧tü̧jä̧; chawa a̧di̧ri̧jo̧mȩnä̧'i̧nä̧, chawa pä'ü iyinä̧tü̧jä̧; kkorotü tti̧rȩjä̧nä̧ kuedächomȩnä̧'i̧nä̧, kuojusodenä̧ dokuädinä̧tu̧kuä̧ku̧sä̧; 36Chü̧'ka̧tä̧wä̧ta̧ juida'a'i̧nä̧, ku̧'ka̧ti̧nä̧tu̧kuä̧ku̧sä̧; na̧dä̧cho̧mȩnä̧'i̧nä̧, do'ächü ichinä̧tü̧jä̧; kärenä̧ chü̧'o̧mȩnä̧'i̧nä̧, topü kuichinä̧tu̧kuä̧ku̧sä̧. 37Ja̧'wa̧nü̧ pä̧i̧yä̧u̧ adiwä isotümä̧, jä'epü ttä̧ju̧kuä̧kua̧: Tu̧ru̧wa̧ ¿ti̧yȩnü̧ ppäi ttukua'a, ku̧kuȩmä̧ tiyinä̧ku̧ttü̧? ja̧'wa̧ta̧nü̧ ¿Ti̧yȩnü̧ kuawa a̧di̧ri̧ja̧'a̧, kuawa pä'ümä̧ tiyinä̧ku̧ttü̧? 38¿Ja̧'wa̧ta̧nü̧ ti̧yȩnü̧ kko̧ro̧jä̧nä̧ kuekuächa'a, tojusodenä̧ dotädinä̧ku̧ttü̧; ku̧'ka̧tä̧wä̧ta̧'i̧nä̧ juikua'a, tiyinäku̧ttü̧? 39¿Ja̧'wa̧ta̧nü̧ na̧kuä̧cha̧'a̧'i̧nä̧, kärenä̧ ku̧'a̧'a̧'i̧nä̧, ti̧yȩnü̧ topü tichinä̧ku̧ttü̧? 40Pättomȩnä̧ Ru̧wa̧ Rey-mä̧ ä̧dä̧tä̧kuä̧u̧: Isopäi'ünä̧ pä'üsä ukuturu o'kajuiyünä̧ pitü chi̧jä̧wa̧tü̧ttü̧ ppo̧'ä̧tü̧rü̧ ya̧tȩrü̧ ja̧ pä'ü'i̧nä̧ ppäkuädinä̧tu̧ku̧mä̧, ttürütä ppä'ädinä̧tü̧jä̧.

41Jua̧u̧nü̧ o'ka'a Ru̧wa̧ Rey-mä̧ ü'owekunä̧ kka̧kuä̧tü̧rü̧ pä̧kua̧: Suropätümä̧, ttüttümä̧ 'kȩ'i̧pä̧chä̧tu̧kui̧; okurä na̧wi̧pokorära̧'a̧, äwettä umüwäyotü á̧gȩrȩ-ku̧ ttä̧tȩkuarä päi'ünä̧ jȩpü̧ kku̧nä̧warära̧'a̧tä̧ tätukui. 42Isopäi'ünä̧ chukua ppä̧i̧rü̧jo̧mȩnä̧'i̧nä̧, chukua pä'ü iyokotü pinä̧tü̧jä̧; chawa a̧di̧ri̧jo̧mȩnä̧'i̧nä̧, chawa pä'ü iyokotü pinä̧tü̧jä̧; 43kko̧ro̧jä̧nä̧ kuedächomȩnä̧'i̧nä̧, kuojusodenä̧ dokuädätukuokoku pinü̧sä̧; chü̧'ka̧tä̧wä̧ta̧ juidomȩnä̧'i̧nä̧, iyokotü pinä̧tü̧jä̧; na̧dä̧cho̧mȩnä̧'i̧nä̧, kärenä̧ chü̧'o̧mȩnä̧'i̧nä̧ do'ächü ichokotü pinä̧tü̧jä̧; 44Ja̧'wa̧nü̧ pä̧u̧, ttädätäkuotü: Chu̧ru̧wa̧ ¿Ti̧yȩnü̧ ppäittukua'anämä̧, kuawa a̧di̧ri̧ja̧'a̧nä̧mä̧, kko̧ro̧jä̧ra̧'a̧ kuekuächa'anä̧mä̧, kui̧ä̧rȩta̧ juikua'anä̧mä̧, na̧kuä̧cha̧'a̧nä̧mä̧, kärenä̧ ku̧'a̧'a̧nä̧mä̧ ppätädokoku kuinä̧ttü̧? 45Ja̧'wa̧nü̧ pättomȩnä̧ chä̧dä̧tä̧kua̧sä̧: Isopäi'ünä̧ pä'üsä ukuturu, pitü ppo̧'ä̧tü̧ ja̧'a̧nä̧ ya̧tȩrü̧ ppäkuädätukuoka'a ji̧na̧'a̧mä̧, ttürü'i̧nä̧ ppä'ädokotü pinä̧tü̧jä̧. 46Ja̧'wa̧nü̧ ja̧'a̧ttü̧, pa̧'a̧nü̧ suronä̧ jȩpi̧nä̧tü̧mä̧ ro̧ȩkuä̧ beipokomȩtä̧ tti̧'cha̧'a̧nä̧, adiu jȩpi̧nä̧tü̧mä̧ kkä̧kuä̧wä̧ i'ko kka̧'a̧tä̧ tti̧'chä̧kuo̧tü̧.

Currently Selected:

San Mateo 25: PNT13

Highlight

Copy