San Mateo 24

Dio-rü ukuokuäkuäwode ma̧ä̧chä̧kua̧'a̧ Jesú-mä̧ ji'äwinü̧

(Mc 13.1-2; Lc 21.5-6)

1Jesú-mä̧, Dio-rü ukuokuäkuäwodettü rä'opächäji̧'ka̧ i̧'cha̧'a̧ u̧wo̧juȩtä̧u̧mä̧, juode tti̧jȩpa̧ pä'ü rätto'inä̧ku̧. 2Juätürü, Jesú-mä̧ päinä̧u̧:

—¿Pode isode rü̧o̧de o'kajuiyünä̧ topätüjä̧? Juodemä̧ o'kajuiyünä̧tä̧ pparächi'äkuode. ¡Ji̧yȩtȩ'i̧nä̧ kki̧'ü̧ juiyünä̧tä̧!

Pi̧jä̧ beipächäkua'a ä'kanä̧ 'kuäopä̧kuȩ wȩnȩ

(Mc 13.3-23; Lc 21.7-24; 17.22-24)

3Jua̧u̧nü̧ o'ka'a olivo kka̧kuä̧'ka mü̧ä̧'kara̧'a̧ 'chä̧wi̧'ä̧ji̧'ka̧ Jesú-mä̧ ü̧'a̧'a̧, u̧wo̧juȩtä̧u̧mä̧ päkuotütä 'chä̧wi̧'ü̧ jättepinä̧ku̧:

—Ji'äwitü pi̧yȩmä̧ ti̧yȩnü̧ jä̧kua̧'a̧jä̧ttü̧. ¿Uku kuichäkua'a ä'kanä̧mä̧ ja̧'wa̧ta̧nü̧ pi̧jä̧ beipächäkua'a ä'kanä̧mä̧, däjettü̧ topü wo̧juä̧wä̧kua̧'a̧jä̧ttü̧? pättäku,

4Jesú-mä̧ ädätinä̧u̧:

—Yapareu jittäwe'ünä̧mä̧, kuesetätukuä. 5Isopäi'ünä̧ rekuätü, ttü chi̧mi̧nä̧ ttichäkuotü, «Ttütäsä Crito-mä̧ pä'ätü.» Ja̧'wa̧nü̧ jȩpü̧ rekuätürü ttesetünä̧ ttüyaparewäkuotü, 6Ja̧'wa̧ta̧nü̧ kuä̧ju̧kuä̧kuo̧tü̧jä̧ kurä ttürowäu wȩnȩ'i̧nä̧, ttürowäwä̧kuȩ wȩnȩ'i̧nä̧ jü̧nä̧. Ja̧'wa̧nü̧ ja̧'a̧nä̧ yekuekuätukuä, jua̧u̧mä̧ ä̧tȩkuä̧nä̧tä̧ 'kuäopa pä'ü ja̧'a̧; ja̧'wa̧nü̧ 'kuäopa'anä̧, pi̧jä̧mä̧ ji̧nä̧ beipächoka'a jä̧kua̧'a̧. 7Ja̧'wa̧nü̧ ja̧'a̧nä̧'i̧nä̧ kko̧ro̧jä̧ ttü̧ja̧mä̧ kko̧ro̧jä̧ ttü̧ja̧ku̧ ttürowäwäkuotü ja̧'wa̧ta̧nü̧ kko̧ro̧jä̧ ruwotümä̧ kko̧ro̧jä̧ ruwotüku ttürowäwäkuotü; ja̧'wa̧ta̧nü̧ ppäi ttuttäkuotü, rȩjȩ'i̧nä̧ tti̧'ȩpü̧ pparächäkua'a, kkara'a pünä̧mä̧. 8Ja̧'wa̧nü̧ ja̧'a̧ pi̧yȩ o'kajuiyü 'kuäopümä̧, usurä ȩmä̧kuä̧wä̧ pä'ü kkä̧mä̧da̧'a̧ jä̧kua̧'a̧.

9Ja̧'wa̧nü̧ jo̧mȩnä̧ usurä kuȩmä̧wä̧tu̧ku̧nä̧ iyü tti̧kuä̧kuä̧u̧jä̧; ja̧'wa̧nü̧ jȩpü̧ kuä'äu iku, pi̧jä̧ ttü̧ja̧mä̧ o'katoi'ünä̧ ttü jäwänä̧ ttüjü'koko̧u̧ kuäkuotüjä̧. 10Ji̧yȩnü̧ mo̧ro̧mä̧ ttesetä'ijü'i̧nä̧ kä'ädi'ü kkä̧nü̧, rowäkuäu mi̧kuä̧ri̧yä̧kuä̧u̧ iyä'chäkuäu ttikuäkuotü. 11Ja̧'wa̧ta̧nü̧ profeta'i̧nä̧ yaparewätü ttichäkuotü, ja̧'wa̧nü̧ jȩpü̧ ttü̧ja̧ rekuätürü ttesetünä̧ ttüyaparewäkuotü. 12Surojümä̧ rü̧ȩnä̧ yabonü̧ rü̧ä̧cho̧mȩnä̧, rekuätü eseu jȩttä̧'i̧jü̧'i̧nä̧ kättädächäkuotü. 13Ja̧'wa̧nü̧ ja̧'a̧nä̧ pi̧jä̧ beipächomȩbü päi'ünä̧, a̧mi̧ 'ki'ächi'ü kkü̧mä̧ ra̧wä̧pi̧jü̧ttü̧mä̧ ü̧ji̧pä̧kua̧, 14Ja̧'wa̧ta̧nü̧ pi̧yȩ jareünä̧ weü wȩnȩmä̧ pi̧jä̧ o'kajuiyünä̧ jiäkuä̧wä̧kuȩ, pi̧jä̧ ttü̧ja̧ o'katoi'ünä̧ ttu̧wo̧jua̧ pä'ü; ja̧'wa̧nü̧ jü̧ o'ka'a pi̧jä̧mä̧ beipächäkua'a.

15Ja̧'wa̧nü̧ ja̧'a̧ttü̧ 'kuäopäkua'a, Lugar Sa̧tu̧ pättomȩttü̧ jȩä̧kuä̧wo̧kü̧ surojü ofrenda jȩtta̧'a̧ topümä̧ tikuipätukuajä̧ (profeta Daniel, wȩyu̧kuä̧ topümä̧ wo̧jui̧'i̧ päinü̧ta'anü̧). 16Ja̧'wa̧nü̧ jo̧mȩnä̧ Judea rȩjȩnä̧ kka̧kuä̧tü̧mä̧ mü̧ä̧'kiyura̧'a̧ku̧ dükuekuätukuajä̧. 17Ja̧'wa̧ta̧nü̧ ojusode wä̧mȩ kkü̧mä̧ kkorojuei kuȩma̧ pä'ümä̧ kui̧mȩyȩwä̧. 18Ja̧'wa̧ta̧nü̧ pättanä̧ kkü̧mä̧, kui̧ä̧rȩta̧ kuȩma̧ pä'ü'i̧nä̧ kuojusodekumä̧ ppa̧kuä̧chä̧. 19Ja̧'wa̧nü̧ ja̧'a̧nä̧, jua̧u̧nü̧ mo̧ro̧ muchotürü'i̧nä̧, ppo̧'ä̧tü̧rü̧ kku̧nä̧rä̧tü̧'i̧nä̧ usurä ttȩmä̧wä̧kuo̧tü̧, ¡isottü̧ juätüwe! 20Ja̧'wa̧ta̧nü̧ Dio-rütä jä'epätukui, a̧'ȩnä̧'i̧nä̧ ja̧'wa̧ta̧nü̧ sawaru mo̧ro̧'i̧nä̧ dükuekuätuku juiyäkua'anü̧. 21Isopäi'ünä̧ rü̧ȩnä̧ usurä ȩmä̧kuä̧wä̧, pi̧jä̧ uwäbe'inomȩttü̧ kkä̧mä̧dü̧ jitä mo̧ro̧bü päi'ünä̧ jo̧kü̧ jä̧'i̧jü̧, yodoji'i̧nä̧ jo̧kü̧ jä̧kuȩ 'kuäopäkua'a. 22Ja̧'wa̧nü̧ ja̧'a̧nä̧, ja̧'wa̧nü̧ jä̧kuȩ mo̧ro̧ Dio be'ädü iku juiyüttümä̧, ya̧tȩ'i̧nä̧ surojüttümä̧ ü̧ji̧pü̧ juiya'anü̧ ja̧'a̧; ja̧'wa̧nü̧ ji̧yä̧ku̧ jua̧u̧ mo̧ro̧mä̧ ȩmi̧nä̧u̧ru̧ rettü be'ädü i̧kuä̧kua̧.

23Ja̧'wa̧nü̧ ja̧'a̧ttü̧ ya̧tȩ ukuturu, Crito-mä̧ yȩna̧ja̧ kkü̧ ja̧'wa̧ta̧nü̧ yȩnȩ kkü̧ päüttümä̧ kuesetätukuä. 24Ja̧'wa̧ta̧nü̧ Crito i̧mi̧nä̧, profetas wotü tti̧mi̧nä̧ yaparewätü ttichäkuotü ja̧'wa̧nü̧ jȩpü̧ jȩtto̧kü̧ jä̧'i̧jü̧ jȩpä̧'chü̧, Dio ȩmi̧nä̧u̧ttü̧'i̧nä̧ ttesetünä̧ jȩttä̧kuo̧tü̧, 25Täkü, ä'kanä̧ ji̧dä̧wä̧u̧jä̧. 26Ja̧'wa̧nü̧ ja̧'a̧ttü̧, rȩbi̧yu̧ dȩ'a̧ra̧'a̧ kkü̧ pättüttü'i̧nä̧, kui̧'chä̧tu̧kuä̧. Aposento i̧so̧ka̧ jakuä kkü̧ pättüttü'i̧nä̧, kuesetätukuä. 27Isopäi'ünä̧ kkä̧wa̧ räopa'akuttü ku'upä ürowomȩnä̧, kkä̧wa̧ ma̧ä̧cha̧'a̧ku̧ttü̧'i̧nä̧ kkȩdȩa̧'a̧ jä̧'i̧nü̧'a̧nü̧ jä̧kua̧'a̧ ubo I̧tti̧ ichomȩnä̧mä̧. 28Wa'inä̧tü̧ ttü̧'ȩjo̧mȩ pünä̧, ȩjo̧tü̧mä̧ ttü̧ka̧ka̧kuä̧kuo̧tü̧.

Ubo I̧tti̧ ppa̧wä̧chä̧kuȩ wȩnȩ

(Mc 13.24-37; Lc 17.26-30,34-36; 21.25-33)

29Usurä ttȩmä̧wä̧ji̧ mo̧ro̧mä̧ beipächi'a'anä̧, yotäku mo̧ro̧ kkä̧wa̧mä̧ na̧wi̧'ä̧kua̧ ja̧'wa̧ta̧nü̧ yodó kkä̧wa̧'i̧nä̧ na̧wi̧'ä̧kua̧'a̧, si̧ri̧'kü̧'i̧nä̧ mo̧ro̧jä̧ttü̧ ttattäwächäkuotü ja̧'wa̧ta̧nü̧ mo̧ro̧jä̧nä̧ttü̧ ujuru'i̧nä̧ ttü̧ȩpä̧kua̧'a̧. 30Ja̧'wa̧nü̧ päi'omȩnä̧, mo̧ro̧jä̧ra̧'a̧ttü̧ ubo I̧tti̧ icha'a ä'kanä̧ jäwä i̧jȩkuä̧chä̧kua̧'a̧ ja̧'wa̧nü̧ päia'a topü rü̧ȩnä̧ ye'ekue'i'ü pi̧jä̧ ttü̧ja̧ o'katoi'ünä̧ ttajäkuäwäkuotü ja̧'wa̧nü̧ päi'omȩnä̧ ubo I̧tti̧ mo̧ro̧jä̧ra̧'a̧ttü̧ ajiya isoppanä̧ uruwoku, ujuruku icha'a tottäkuotü. 31Ja̧'wa̧ta̧nü̧ jua̧u̧mä̧ umüwäyotü á̧gȩrȩ-rü wȩä̧kua̧, trompeta-ku pä̧i̧ku̧nä̧ rä̧mi̧pü̧nä̧ ȩmi̧nä̧u̧ru̧, pi̧jä̧ pa̧ja̧ku̧nä̧ ttü̧ka̧ka̧ta̧ pä'ü.

32Ja̧'wa̧nü̧ jä̧kua̧'a̧ttü̧, higo daunä̧ wȩnȩtü̧ päda'a wo̧jui̧'ä̧tu̧kui̧: Juäi ä̧na̧jui̧yä̧ jä̧kuȩ räreomȩnä̧ ja̧'wa̧ta̧nü̧ ojiyä'i̧nä̧ rärea'a topü pä'ätüjä̧, täkü du'onä̧ juoa'a, jü̧nä̧. 33Ja̧'wa̧nü̧ jä̧'i̧jü̧ta̧'a̧nü̧, pi̧yȩ jä̧ji̧ o'kajuiyünä̧ 'kuäopa'a to'kuätukuomȩnä̧, ubo I̧tti̧mä̧ täkü äpate ä'ka kkü̧ pä'ü ku̧wo̧juä̧tu̧kua̧jä̧. 34Isopäi'ünä̧ pädäu̧jä̧, jitä mo̧ro̧ beipächäkua'a ä'kanä̧ pi̧yȩmä̧ o'kajuiyünä̧ 'kuäopäkua'a. 35Mo̧ro̧jä̧'i̧nä̧, pi̧jä̧ rȩjȩ'i̧nä̧ beipächa'anä̧, ttü chi̧wȩnȩmä̧ beipächokü jä̧kuȩ.

36Ja̧'wa̧nü̧ ja̧'a̧nä̧, ji̧nä̧so chi̧chä̧kuȩ mo̧ro̧mä̧, hora-mä̧, mo̧ro̧jä̧ á̧gȩrȩ'i̧nä̧, chutä I̧tti̧'i̧nä̧ yorisotä ya̧tȩ'i̧nä̧ jerupätüjä̧, suro jä'o ya̧tȩtä̧ ja̧'a̧ jua̧u̧ wo̧jua̧mä̧.

37Ja̧'wa̧nü̧ ja̧'a̧nä̧, Nué ü̧ji̧nü̧ mo̧ro̧ 'kuäopinü̧ta'anü̧ 'kuäopäkua'a, ubo I̧tti̧ ichü mo̧ro̧'i̧nä̧. 38Ji̧yȩnü̧ mo̧ro̧mä̧, rü̧ä̧ a̧'ȩ ma̧ä̧mä̧kua̧'a̧ ä'kanä̧mä̧, ttü̧ja̧mä̧ a̧wä̧rü̧ pȩjü̧, ttu̧kuȩ kuä̧nü̧, tti̧rȩkua̧mü̧rü̧ ȩmä̧kuä̧u̧ jȩpi̧nä̧tü̧, Nué woi'kanä̧ doächomebü päi'ünä̧. 39Ja̧'wa̧nü̧ jȩpü̧ kkä̧nü̧ ttieruäkuäwa'anä, rü̧ä̧ a̧'ȩ ma̧ä̧mo̧mȩnä̧, o'katoi'ünä̧rü̧tä̧ juatädi'ina̧'a̧. Jua̧u̧nü̧ ji̧nü̧ta'anü̧ 'kuäopäkua'a ubo I̧tti̧ ichomȩnä̧mä̧. 40Jua̧u̧nü̧ mo̧ro̧ pättanä̧ ta̧ju̧ kka̧kuä̧tü̧rü̧mä̧, kka̧ra̧rü̧tä̧ ȩmi̧pü̧ kka̧ra̧rü̧mä̧ kku̧ni̧kuä̧kua̧'a̧. 41Nä̧tü̧ ta̧ju̧ trigo i̧sa̧ppȩ päi'ünä̧ kkärü kka̧kuä̧tü̧ttü̧mä̧ yajuterütä ȩmi̧pü̧, kkarajurumä̧ kku̧ni̧kuä̧kua̧'a̧.

42Ja̧'wa̧nü̧ ku̧ru̧wa̧tu̧ku̧ i̧chä̧kuȩ mo̧ro̧ kuieruwätukua'attü̧, kuä'i'ätukuoka'a to̧pä̧rä̧tu̧kui̧. 43Ja̧'wa̧nü̧ ja̧'a̧nä̧ pi̧yȩ ku̧wo̧juä̧tu̧kua̧ pä'ü ja̧'a̧, ya̧tȩ isode u̧ru̧wa̧ ojusodenä̧ nä̧u̧kuä̧rä̧kuä̧wä̧ i̧sa̧, yodó nä̧u̧ku̧ i̧chä̧kuȩ hora u̧wo̧juö̧ttü̧mä̧, jua̧u̧mä̧ ä'i'oka'a to̧pä̧ra̧jü̧, ojusode jäwä ü̧nä̧u̧ku̧ juiyiyarü pä'ümä̧. 44Ja̧'wa̧nü̧ ja̧'a̧ttü̧, ukutu'i̧nä̧ jo̧mȩnü̧tä̧ kka̧kuä̧tu̧kui̧; isopäi'ünä̧ ubo I̧tti̧mä̧ tta̧kuä̧rä̧tu̧kuo̧kü̧ hora-nä̧ ichäkua'attü̧.

Umüwäyotüttü ukuotinü̧'i̧nä̧, ukuotoküpinü̧'i̧nä̧ jü̧nä̧

(Lc 12.41-48)

45¿Tideja̧'a̧jä̧ttü̧ u̧mü̧wä̧ya̧ ttu̧'ȩpä̧rü̧nü̧ ukuotümä̧? jua̧u̧mä̧ chú jä̧kua̧'a̧, u̧ru̧wa̧ ojusodenä̧ we'ü u̧ju̧ni̧'ä̧ku̧, ttu̧kuȩ iyäwomȩ pätekuächomȩnä̧ iyiyarü pä'ü. 46Ja̧u̧ru̧ eseäkuäwä kkä̧kua̧'a̧, u̧ru̧wa̧ ichomȩnä̧, weinüta'anü̧ jȩpü̧ ü̧jü̧ttü̧mä̧. 47Isopäi'ünä̧ pädäu̧jä̧, jua̧u̧ru̧mä̧, u̧ru̧wa̧mä̧ o'kajuiyünä̧ iäre tta̧wä̧ra̧ pä'ütä we'ü u̧ju̧nä̧kua̧. 48Ja̧'wa̧nü̧ ja̧'a̧nä̧ u̧mü̧wä̧ya̧päji su̧ro̧pa̧ jü̧ttü̧mä̧, jakuänä̧ amükuädäkua̧: «Chu̧ru̧wa̧mä̧ jitätä ja̧'a̧ku̧mä̧ ichokü» 49pä'ü, chutäku aditätürü suronä̧ jȩpü̧, tä̧'ä̧mä̧tu̧ku̧ awä'chü, u̧kuȩ kuä̧nü̧ jȩa̧'a̧ jakuänä̧, 50hora'i̧nä̧, mo̧ro̧'i̧nä̧ ieruwäkuäwa'anä̧ u̧ru̧wa̧mä̧ ichi'ü. 51Usurä ȩmä̧u̧nä̧ ro̧ȩpä̧kua̧, ä'koyättü esetetätukutä. Juȩnȩmä̧ ttaku norü ajuäkuäwomȩ jä̧kua̧'a̧.

Currently Selected:

San Mateo 24: PNT13

Highlight

Copy