San Mateo 28

Jesú ttoächinü̧ wȩnȩ

(Mc 16.1-8; Lc 24.1-12; Jn 20.1-10)

1Domiku̧ mo̧ro̧ juomȩnä̧, 'kuä'ächi'ü ttü̧'ȩjü̧ mo̧ro̧ 'kuäopäji o'ka'a, María Madarena'i̧nä̧ kkaraju María-ku wa'are ttütäjomȩ topü 'chi̧nä̧tü̧. 2Ttu̧ni̧chä̧ra̧'a̧nä̧ rȩjȩ ttü̧ȩpa̧'a̧ttü̧, Tu̧ru̧wa̧ wȩ'ä̧wa̧ á̧gȩ mo̧ro̧jä̧ra̧'a̧ttü̧ mȩyȩwi̧'ü̧ inä̧yu wa'are rütäwäju mü̧ȩkuäyu pporädü juäyutä wä̧mȩ pä̧mä̧di̧nü̧. 3Á̧gȩ-mä̧ ku'upä ürowa'a 'kua̧rü̧nä̧ kkä̧dȩpi̧nü̧ ja̧'wa̧ta̧nü̧ ü̧'ka̧tä̧wä̧ta̧mä̧ diyawa'a isoppa jä̧'i̧nü̧'a̧nü̧ teina̧'a̧. 4Su̧ro̧do̧u̧mä̧ jua̧u̧ topü ye'ü ttü̧ttä̧wa̧'a̧ttü̧, 'korujuo'ächätü jä̧'i̧nü̧'a̧nü̧ pä'i'inä̧tü̧. 5Á̧gȩ-mä̧ nä̧tü̧rü̧ pä'inü̧:

—Yekuekuätukuä. Wo̧jua̧sä̧ Jesú ü̧jo̧kä̧nü̧ kku̧nu̧ pȩ'o̧pü̧ ttu̧ju̧nä̧jä̧ku̧rü̧ usätüjä̧. 6Pȩnȩmä̧ toa'a päinü̧ta'anü̧ tto'ächäji, ttütäjomȩ topächätukui. 7Jitätä jurunä̧ tätukui, u̧wo̧juȩtä̧u̧rü jikuäwätukua wa'arettü ttoächäji wȩnȩ, ukututä kuä'katukunä̧ Galirea rȩjȩra̧'a̧ 'chü̧, jua'attü to'kuätukuarü, täkü jidäwä̧u̧jä̧.

Jesú nä̧tü̧rü̧ i̧jȩkui̧nü̧ wȩnȩ

8Nä̧tü̧mä̧ wa'are rütäwomȩttü̧ jurunä̧ rä'opächü ye'ükkä̧nü̧, rü̧ȩnä̧ eseunu̧ u̧mü̧wä̧yotürü wȩnȩ ji'äu 'chä̧nü̧ jopinä̧tü̧. 9Ja̧'wa̧nü̧ jotta'a Jesú-mä̧ nä̧tü̧ ttä'ka jo̧mȩ rä'o'ü, Dio-tä tta̧wä̧rä̧tu̧kuä̧ku̧ päinä̧u̧. Juätü nä̧tü̧mä̧ Jesú-ru tü'künä̧nü̧ pä'i'ü ü̧jä̧pü̧nä̧ wa'adi'ü ttiwe'kiyunä̧ pȩjä̧mü̧ esewinä̧tü̧. 10Ja̧'wa̧nü̧ ja̧'a̧ Jesú-mä̧ päinä̧u̧:

—Yekuekuätukuä chu̧wo̧juȩtä̧u̧rü Galirea rȩjȩra̧'a̧ tti̧'cha̧ ji'äwätukui, jua'attü tottattü.

Su̧ro̧do̧u̧ jittäwinü̧ wȩnȩ

11Nä̧tü̧ päjätümä̧ ji̧nä̧ tti̧'cha̧'a̧nä̧ su̧ro̧do̧u̧ tta̧'a̧rä̧jä̧tü̧mä̧ ütawiyära̧'a̧ rȩbȩwi̧pi̧nä̧tü̧. Ja̧'wa̧nü̧ rȩbȩwi̧pü̧ sacerdote tturuwotürü o'kajuiyünä̧ 'kuäopäji ji'äwinä̧tü̧. 12Ja̧'wa̧nü̧ ji̧ttä̧wä̧u̧ sacerdote wotümä̧, judío-ttü a̧ci̧a̧nu̧ wotümä̧ toku jȩtü̧'a̧nü̧ ja̧ pä'ü ukuoku 'chi̧nä̧tü̧. Ja̧'wa̧nü̧ ukuokuäjä'kotü su̧ro̧do̧u̧ru̧mä̧ pärätä rü̧ȩnä̧ iyinä̧tü̧, 13Juätürümä̧ pä'inä̧tü̧:

—Ji̧nä̧ tä'ekua'anä̧ Jesú u̧wo̧juȩtä̧u̧mä̧, yodó ichäjä'kotü o'ko jäwä nä̧u̧kuä̧chä̧jä̧tü̧ päjätü pä'ü jikuäwätukuaja̧ pättinä̧u̧. 14Ja̧'wa̧nü̧ ja̧'a̧nä̧ ru̧wa̧, pi̧yȩ u̧wo̧jui̧pü̧ttü̧mä̧, ujutumä̧ esetipünä̧ tu̧kuo̧kuä̧kua̧, ukuturu suronä̧ jȩpä̧jä̧tü̧ pä'ü surojü jȩü̧ juiyünä̧.

15Su̧ro̧do̧u̧mä̧ pärätätä ȩmi̧pü̧ pättäjita'anü̧ jȩpi̧nä̧tü̧. Ja̧'wa̧nü̧ ja̧'a̧ttü̧ pi̧yȩmä̧ jitä mo̧ro̧bü päi'ünä̧ judío ttü̧'kȩtȩnä̧mä̧ jittäwä'chü ja̧'a̧.

Jesú u̧wo̧juȩtä̧u̧rü weinü̧ wȩnȩ

(Mc 16.14-18; Lc 24.36-49; Jn 20.19-23)

16Ja̧'wa̧nü̧ ja̧'a̧ttü̧ ttü̧jä̧pü̧ttü̧ ya̧tȩnü̧ wotü u̧wo̧juȩtä̧u̧mä̧ Galirea rȩjȩ mü̧ä̧'kara̧'a̧, Jesú jiäwäjita'anü̧ 'chi̧nä̧tü̧. 17Ja̧'wa̧nü̧ tti̧'chä̧ja̧'a̧ Jesú-ru topümä̧ ttiwe'kiyunä̧ pä̧mä̧dü̧ esewinä̧tü̧, yotukunä̧mä̧ ttesetü juiyünä̧ ji̧nä̧u̧, Jesú pä'ümä̧. 18Ja̧'wa̧nü̧ ja̧'a̧ Jesú-mä̧ juätürü tü'künä̧nü̧ 'chä̧wi̧'ü̧ pä'inü̧:

—Dio-mä̧ mo̧ro̧jä̧nä̧'i̧nä̧, pi̧jä̧nä̧'i̧nä̧ o'kajuiyünä̧ churuwo weda pä'ü iyinä̧ku̧sä̧. 19Ja̧'wa̧nü̧ ja̧'a̧ttü̧ pi̧jä̧ o'kajuiyünä̧ 'chä̧nü̧ ttü̧ja̧rü̧ chu̧wo̧juȩtä̧u̧ jü̧nä̧; Jä'o i̧mi̧nä̧, i̧tti̧ i̧mi̧nä̧ ja̧'wa̧ta̧nü̧ Epíritu Sa̧tu̧ i̧mi̧nä̧ bautizo jȩpä̧tu̧kui̧, 20Ja̧'wa̧ta̧nü̧ o'kajuiyünä̧ ukuturu chu̧wo̧juȩti̧nü̧mä̧ ttukuotünä̧ wo̧juȩtä̧tu̧kui̧, ttümä̧, pi̧jä̧ beipächomȩbü päi'ünä̧ 'kuäopünä̧ mo̧ro̧ ji̧nü̧'a̧kuä̧ ukututäku chü̧jä̧kua̧sä̧.

Currently Selected:

San Mateo 28: PNT13

Highlight

Copy