ROM 6

Hidat nu Dosa tapi Hisui Benanek ru Kristus

1Amen begei ajeh, maloh de buleh hiurok? Bulehka hik lekat hibeh dosa supaye Jenang Kiperneng Ibernor sengik de lebeh entoi nij? 2Tentuloh pek buleh! Hik ya hidat nu dosa. Tentu ya pek buleh lekat hisui ku kateh dosa nij. 3Engkek ya biajar tentang hal adeh: Mase hik bibaptis canukjeh, hik ya hibenanek ru Kristus Yesus. Imaksodjeh hik ya hibenanek ru Idanan. 4Mase hik bibaptis, hik ya hidat besama-sama ru Kristus ru ya bicop besama ru Ilei supaye hik dapat hisui sinui de pai sama begei Kristus biberkos ju Idanan ya kuasa Menek de mulie.

5Amen hik ya hibenanek ru Kristus ku Idanan kerana ya hidat besama ru Ilei, sudah pasti hik juga doh hibenanek ru Ilei ku Ikisnos kerana hik doh bipersui nij begei ha Ilei. 6Hik ya hipanei tentang hal adeh: Sinui manah hik ya bisaleb besama-sama ru Ilei supaye kuasa dosa ku kelaku manah hik ajeh bipemusnah ru hik pek bipehambe ya dosa nij. 7Kerana, bok taleh de ya naidat besama-sama ru Kristus ya telas ju kuasa dosa. 8Amen ya hidat besama-sama ru Kristus, hik hipecaya doh hisui juga besama-sama ru Ilei. 9Hik ya hipanei tentang hal adeh: Kristus ya biberkos ju Idanan ru Kek pek akan Kidat nij doh. Danan pek kibekuasa nij nu Kek. 10Kek Kidat had nukali taleh Kaha-pealah kuasa dosa lei ditehjeh. Hunen Kek Kisui ha Jenang. 11Begei ajehloh juga, engkek hodloh engkeanggap diri liengkek ya dat nu kuasa dosa tapi engkesui ha Jenang kerana engkebenanek ru Kristus Yesus.

12Jadi, agokloh biar dosa kibekuasa ku berog engkek de doh dat supaye pek engketaat nu iheknod de jehat. 13Agokloh og nanek pen ju anggote berog engkek nu dosa sebegei alat ha bahneh jehat. Tapi ogloh diri engkek nu Jenang kerana entemjeh engkek dat tapi hunen ya bipersui nij. Ogloh dikdij berog engkek sebegei alat ha bahneh hal de benar. 14Dosa pek buleh kibekuasa ku engkek nij kerana engkek pek engkesui ku kerop Hukom Taurat nij tapi engkesui ku kateh bernor sengik Jenang.

Hambe nu Hal de Benar

15Jadi, begeiharok? Bulehka hibeh dosa kerana hik ya pek hisui ku kerop Hukom Taurat tapi ya higei ku kateh bernor sengik Jenang? Tentuloh pek buleh! 16Tentu engkek ya engkepanei tentang hal adeh: Engkek ajeh hambe nu bok taleh de engkepileh engkeha-taat. Engkek buleh engkejadi hambe nu dosa de kien engkek nu danan. Atao, engkek buleh engkejadi hambe nu Jenang de doh Kipejadi engkesui sinui de benar. 17Tapi besyukorloh nu Jenang kerana entem engkek ajeh hambe nu dosa tapi hunen engkek betol-betol engketaat nu neajar benar de ya biog nu engkek. 18Engkek ya biterlas ju dosa ru engkejadi hambe nu sinui de benar. 19Eng ngguna cuntoh hambe supaye senang engkepaham kerana penanei engkek terhad. Sama begei entemjeh engkek engkeog berog liengkek kijadi hambe nu napsu de niknej ru jehat ha tujuan jenghat, begei ajehloh juga hunen engkek hod engkeog berog engkek kijadi hambe nu sinui de benar supaye engkekep sinui de suci.

20Mase engkejadi hambe nu dosa, engkek pek bikuasai ya heknod de benar. 21Maloh ineuntong de engkekep ku mase ajeh? Dikdij ajeh kibeh engkerasa selsel hunen ru kien engkek nu danan taleh! 22Tapi hunen, ha kerana engkek ya biterlas ju dosa ru ya engkejadi hambe Jenang, neuntong de engkekep ajeh sinui suci ru doh engkesui lei ditehjeh. 23Danan ajeh hasel ju bahneh dosa tapi sinui de lei ditehjeh besama-sama ru Kristus Yesus Tuhan hik ajeh ennog ju Jenang de Kiog pecume.

Currently Selected:

ROM 6: AEH

Highlight

Copy