ROM 7

Hukom Bekenah-gengsir Sebegei Cuntoh

1Sesedara seiman, engkek ya engkepanei tentang hal hukom. Hukom had kibekuasa nu nenumom selagi sengoi ajeh lekat kisui taleh, kan? 2Icuntohjeh, amen hijoi ha hukom, numom kerdor de ya kibegengsir terikat nu igengsir selagi igengsir ajeh lekat sui. Tapi amen igengsir ajeh kidat, kerdor ajeh pek terikat nij nu hukom de kibeh ilei terikat nu kemoj igengsir entem. 3Jadi, amen kerdor ajeh kibesama ru keral kilek mase igengsir lekat sui, kerdor ajeh kibezinah. Tapi amen igengsir kidat, kek ya biterlas ju hukom ajeh ru pek kibezinah hamapen kibegengsir nij ru keral kilek. 4Jadi, begei ajehloh juga nu engkek sesedara seiman. Engkek ya engkedat nu kuasa Hukom Taurat bile engkedat besama-sama ru Kristus. Engkek engkejadi hak Ilei de ya biberkos nij ju Idanan supaye sinui hik mong ihasel ha Jenang. 5Mase hik lekat hisui hijoi ha heknod berog entem, Hukom Taurat kipetimul heknod bedosa de kibekerjak ku kateh diri hik. Ajehloh isebab hik hibeh hal-hal de kien hik nu danan. 6Hunen, hik ya biterlas ju kuasa Hukom Taurat kerana ya hidat nu hukom de kibekuasa nu hik entem. Jadi, himelayani Jenang pek hijoi care manah de bicot ku kateh hukom ajeh tapi hijoi care pai ju Kelog Jenang.

Hukom Taurat ru Dosa

7Amen begei ajeh, bulehka hiurok Hukom Taurat ajeh jehat? Tentuloh tok! Tapi ya kerana Hukom Tauratloh eng ngpanei dosa ajeh ma. Eng pek ngpanei tamak ajeh dosa amen pek mong Hukom Taurat de kiurok, “Agok tamak.”#Kel 20:17; Ul 5:21 8Tapi dosa kikot peluang ju Hukom Taurat ajeh kipetimul bemacam jenis heknod de tamak ku kateh sengik eng. Amenloh pek mong Hukom Taurat, tentu dosa pek mong ikuasa juga. 9Entem eng pernah ngsui pek ngpaham ha Hukom Taurat. Tapi bile ya ngpaham ha hukom de kiget nghod ha harta mai kilek, dosa mula kibekuasa ku eng ru eng pen ngdat. 10Eng ngsangka hukom sepatotjeh kien eng nu sinui tapi ngsedar hukom ajeh sebenarnye kien eng nu danan. 11Dosa kikot peluang ju hukom ajeh kilenglod eng ru kiperdat eng kiguna hukom ajeh.

12Jadi, Hukom Taurat ajeh suci ru jap-jap ihukom pen suci, benar, ru bor. 13Jadi, imaksodjeh hal de bor ajeh kibeh eng ngdatka? Tentuloh tok! Dosaloh de kibeh eng ngdat kiguna hal de bor. Dosa kiguna hukom Jenang ha itujuan de jehat. Jadi, hal ajeh kibeh hik hisedar ihad jehat dosa ajeh.

Dosa Ku Kateh Diri Manusia

14Hik ya hipanei tentang hal adeh: Hukom Taurat ajeh iasal ju Jenang. Tapi eng adeh manusia de bedosa. Eng ya bijual sebegei hambe nu dosa. 15Eng betol-betol pek ngpaham kelaku lieng sendiri. Kerana, hal-hal bor de ngha-beh, pek ngbeh. Tapi hal-hal de ngnyek pek ngha-beh, hal ajehloh de ngbeh. 16Tapi amen eng ngbeh hal-hal de ngnyek pek ngha-beh, bahneh eng ajeh kiperneng hal adeh: Eng ngbesetuju Hukom Taurat ajeh bor. 17Jadi, apeka lieng sendiri de bahbeh hal-hal ajeh tapi dosa de bekuasa ku engloh de bahbeh hal-hal ajeh. 18Eng ngpanei pek mong nanek hal pen de bor kigei ku kateh diri eng. Imaksodjeh, pek mong nanek hal pen de bor ku kateh kelaku eng sebegei numom manusia. Hamapen eng nghod ngha-beh bor, tapi eng pek dapat ngbeh bor begei de nghod ajeh. 19Eng pek ngbeh hal bor de ngha-beh tapi ngbeh hal jehat de ngnyek pek ngha-beh. 20Jadi, amen eng ngbeh hal de ngnyek pek ngha-beh, hal ajeh apeka bibeh ya eng tapi dosa de bekuasa ku engloh de bahbeh hal ajeh.

21Jadi, eng ngsedar aturan sinui de begei adehloh de tejadi: Hamapen eng ngha-beh hal bor tapi ipenyudah hal de jehatloh de ngbeh. 22Sengik eng ihad kigemar ha hukom Jenang 23tapi eng ngsedar tentang hal adeh: Ku kateh diri eng mong kuasa kilek de kibeperag kilawan ha hal de bigemar ya sengik eng ajeh. Kuasa kilek ajeh kipejadi eng hambe nu dosa de lekat mong ku kateh diri eng. 24-25Jadi, begei adehloh keadaan eng: Ku kateh sengik eng, eng ihad nghagu-taat nu Hukom Jenang. Tapi heknod eng sebegei manusia kipejadi eng adeh hambe nu dosa. Ihad malangloh eng adeh! Bokka de dapat kipeselamat eng ju heknod berog adeh de kien eng nu danan? Ngbesyukor nu Jenang! Ileiloh de Kipeselamat eng melalui Yesus Kristus Tuhan hik!

Currently Selected:

ROM 7: AEH

Highlight

Copy