ROM 8

Hisui Hijoi Heknod Kelog Jenang

1Jadi hunen, pek mong nij nehukom nu mai de benanek ru Kristus Yesus. 2Kerana, melalui Kristusloh kuasa Kelog de kiog sinui ya kiterlas hik ju kuasa dosa de kien hik nu danan. 3Hukom Taurat pek mampu kaha-peselamat hik ju dosa kerana hik adeh manusia lemah de pek mampu hitaat nu dikdij hukom ajeh. Tapi hal de pek mampu bibeh ya Hukom Taurat ajeh ya bibeh ya Jenang sendiri bile Kingeng IKenon nu dunia adeh ku kateh berog de sama begei berog manusia de bedosa supaye IKenon ajeh Kijadi pesembahan pehapos dosa. Begei ajehloh Jenang Kihukom dosa manusia ku berog IKenon 4supaye hik dapat betol-betol hibeh heknod Jenang de Kipasal ku kateh Hukom Taurat. Hik hisui pek hijoi heknod berog manusia tapi hijoi heknod Kelog Jenang. 5Sengoi de kisui kijoi heknod iberog, isengik tebeg ya heknod manusia. Tapi sengoi de kisui kijoi heknod Kelog Jenang, isengik tebeg ya heknod Kelog Jenang. 6Amen sengik engkek tebeg ya heknod berog, engkekep danan. Tapi amen sengik engkek tebeg ya Kelog Jenang, engkekep sinui ru neaman. 7Sengoi de isengik tebeg ya heknod berog kijadi musoh Jenang kerana kek kinyek jijoi ha hukom Jenang ru mimang pek dapat kijoi ha hukom ajeh. 8Sengoi de kisui kijoi iheknod berog pek dapat kipesenang ha sengik Jenang.

9Tapi amen Kelog Jenang betol-betol Kisui ku kateh engkek, engkek ya pek engkesui engkejoi heknod berog nij tapi engkesui engkejoi heknod Kelog Jenang. Bok imai de pek mong Kelog Kristus, ilei ajeh pek hak Kristus. 10Tapi amen Kristus mong Kisui ku kateh engkek, hamapen berog engkek ajeh doh kidat kerana dosa, tapi Kelog Jenang Kiog engkek sinui kerana engkejadi benar ku mat Jenang. 11Amen Kelog ju Jenang de Kiberkos Yesus ju Idanan ajeh Kisui ku kateh engkek, Jenang de Kiberkos Yesus ju Idanan ajeh juga doh Kiog sinui nu berog engkek de doh dat. Kek doh Kiog sinui melalui IKelog de Kisui ku kateh engkek.

12Jadi, sesedara seiman, hik terikat ru hal adeh: Hik pek buleh hisui hijoi heknod berog. 13Kerana, amen engkesui engkejoi heknod berog, engkek doh engkedat. Tapi amen ya kuasa Kelog Jenang engkeperdat kelaku de bedosa ajeh, engkek doh engkesui. 14Dikdij mai de bipimpen ya Kelog Jenang ajeh kekenon Jenang. 15Kelog Jenang de engketerima ajeh pek Kibeh engkejadi hambe ru engkesui ku kateh sengngoh nij. Tapi Kelog Jenang de engketerima ajeh Kiangkat engkejadi kekenon Jenang, ru Kelog ajeh Kipebuleh hik hicereg Jenang ajeh, “Abba,#8:15 Abba: Adeh engrok Ibrani imaksod, apak. Menek!” 16Kelog Jenang Kipeyaken kelog lihik tentang hal adeh: Hik adeh kekenon Jenang. 17Kerana hik adeh kekenon Jenang, hik besama-sama ru Kristus doh hiwares berkat de bisedia ya Jenang ha Ikekenon. Hik juga doh hiterima kemuliean Jenang besama-sama ru Kristus. Tapi amen hiha-terima kemuliean ajeh, hik hod hitesiksa besama-sama ru Kek juga.

Hunen Hitesiksa, Doh Hik Bipemulie

18Eng betol-betol ngyaken tentang hal adeh: Seniksa de hirasa hunen langsong pek ma-ma amen hibandeng ru ikemuliean de hirasa doh. 19Dikdij de bicipte pek sabar naipoj imase Jenang Kaha-perneng Ikekenon 20kerana Jenang Kibeh dikdij de bicipte adeh ya pek mampu naicapai itujuan sebenar enai bicipte. Enai naijadi begei ajeh apeka ya heknod liknai sendiri, tapi ya heknod Jenang. Hamapen begei ajeh, mong neharap de begei adeh: 21Nuarik doh dikdij de bicipte ajeh doh biterlas ju kuasa de kipehancor enai, ru enai doh nairasa kebebasan ru kemuliean de birasa ya kekenon Jenang.

22Hik ya hipanei tentang hal adeh: Dikdij de bicipte naitesiksa lei hunen begei numom kerdor de kiterhan ipenghod kaha-peryos ikenon. 23Apeka dikdij de bicipte ajeh taleh de tesiksa tapi hik de ya hiterima Kelog Jenang juga hitesiksa. Kelog Jenang ajeh jenamin hik doh hikep dikdij de ya bijanji ya Jenang. Kerana ajehloh, ya penoh yaken ru keremmik, hik higu-poj ha imase Jenang Kiog hak de sepenoh nu hik sebegei sengoi-sengoi de Kiangkat hijadi Ikekenon. Ku mase ajeh juga, doh berog hik biterlas ju kuasa dosa ru danan. 24Neharap ajeh biog nu hik mase hik bipeselamat ya Kristus. Tapi hik pek hibeharap nu neharap de ya hiterima kerana pek mong mai de naibeharap nu neharap de ya naiterima. 25Tapi kerana hibeharap nu hal de pekseg hiterima, hik hod sabar hipimpoj.

26Begei ajehloh juga, Kelog Jenang juga Kitulog ha hik de lemah adeh. Hik pek hipanei ma de patot hisemanj nu Jenang bile hibedoa tapi Kelog ajeh sendiri Kibedoa ha hik ya penghod ru jengnam de pek mampu biungkap ya bengwal. 27Jenang de Kipanei sengik manusia Kipanei juga sengmanj IKelog ajeh kerana IKelog ajeh Kisemanj nu Ilei ha Isengoi-sengoi kena begei ha Iheknod.

28Hik ya hipanei tentang hal adeh: Jenang Kiator dikdij hal ha bernor dikdij mai de naihok ha Ilei. Enai ajeh mai de bicereg kena ru nerancang Jenang. 29Jenang Kikenal enai sejak ju imemula. Jenang juga Kipetentu enai naijadi begei ha IKenon supaye IKenon ajeh Kijadi Ilei de sulog, ru enai ajeh naijadi Iberadek. 30Sengoi-sengoi de ya Kipetentu sejak ju imemula, Kicereg. Sengoi-sengoi de Kicereg ajeh, Kipejadi benar ku mat Ilei. Ru sengoi-sengoi de naijadi benar ku mat Ilei ajeh, Kipemulie.

Haknok Jenang nu Hik melalui Kristus

31Jadi, maloh de buleh hiurok ha dikdij hal ajeh? Jenang ya mong ku pihak hik, jadi bokhentok de dapat belawan ha hik. 32Kenon Ilei sendiri pen pek Kidek ru sanggop Kiog Kek sebegei korban kerana Kaha-peselamat ha dikdij hik. Jadi, tentu Kek doh sanggop Kiog ma taleh nu hik. 33Bok imai de berani betudoh ha sengoi-sengoi de ya bipileh ya Jenang? Bokhentok! Kerana, Jenang Sendiri de Kiurok hik pek hibesalah. 34Jadi, bokloh de dapat naipesalah ha hik? Pek mong bok-bok pen kerana Kristus Yesus Kibele ha hik! Kek ya dat tapi lebeh nij, ya Kikos ju Idanan ru Kigei ku kedudukan de tehormat ku englag kentop Jenang ru Kibele ha hik. 35Hal ma de dapat kicerlah hik ju haknok Kristus? Pek mong ma-ma pen ihal de dapat kicerlah hik ju haknok Kristus, baik senusah, seniksa, penganiayean, cengwag, nehajap, bahaye, ataopen danan. 36Begei de bicot ku kateh Alkitab,

“Ha Enjen, jik biancam baha-perdat ju pegelap leiloh nu kelem.

Jik bianggap begei ha dombe de baha-goj.”#Mzm 44:23

37Hamapen hal-hal de begei ajeh tejadi nu hik, hik hikep mennang de entoi melalui Ilei de Kihok ha hik! 38Eng betol-betol ngyaken tentang hal adeh: Baik danan atao sinui, baik malikat atao kelog jehat, baik hal de tejadi hunen atao pigoi doh, baik ma-ma pen kuasa, 39baik de tinggi ku langit atao de jerek ku kerop bumi, baik ma-ma taleh de mong bicipte ku dunia adeh - pek mong ma-ma pen de dapat naicerlah hik ju haknok Jenang de biperneng nu hik melalui Kristus Yesus Tuhan hik.

Currently Selected:

ROM 8: AEH

Highlight

Copy