ROM 5

Hijadi Benar ku Mat Jenang

1Jadi, hik ya hijadi benar ku mat Jenang ya iman hik. Kerana ajehloh, hik ya hibedamei ru Ilei melalui Tuhan hik Yesus Kristus. 2Hik ya hikep bernor sengik Jenang ajeh kerana hipecaya nu Kristus, ru ku kateh Ibernor sengik ajehloh hik hisui hunen. Hikerakmik kerana hik mong neharap untok hikep kemuliean de bikungsi ya Jenang. 3Pek ajeh taleh, tapi hik juga hikerakmik tentang seniksa de hitanggong kerana hipanei seniksa ajeh kibeh hik gulebeh sabar. 4Senabar hik ajeh kibeh hik tahan bile biuji, ru tenahan hik ajeh kibeh hik mong neharap. 5Neharap hik ajeh kibeh hik pek kecewe kerana Jenang ya Kitup Ihaknok nu kateh sengik hik melalui Kelog Santen de ya Kiog nu hik.

6Ku mase de ya bipetetap ya Jenang, mase hik pek lalu hiha-beh ma-ma, Kristus Kidat ha hik mai de jehat. 7Ihad jarang mong sengoi de sanggop kaha-dat ha mai de benar. Mungken mong sengoi de sanggop kaha-dat ha mai de bor. 8Tapi Jenang Kiperneng ihad entoi Ihaknok nu hik melalui hal adeh: Kristus Kidat ha hik ku mase hik lekat mai bedosa. 9Hunen hik ya hijadi benar ku mat Jenang ya behip Kristus ajeh. Kerana ajehloh, sudah pasti hik doh bipeselamat ju bengal Jenang melalui Kristus. 10Ku mase hibemusoh ru Jenang pen hik hibedamei ru Ilei ya danan IKenon. Jadi, sudah pasti hik doh bipeselamat kerana Kristus Kisui nij. 11Apeka ajeh taleh, tapi hik juga hikerakmik kerana hik mong hubungan istimewe de ihad bor ru Jenang melalui Tuhan hik Yesus Kristus. Kristusloh de Kibeh hijadi benar ku mat Jenang.

Hikep Danan melalui Adam tapi Hikep Sinui melalui Kristus

12Dosa ya kimuj nu dunia adeh melalui numom sengoi. Ilei ajeh Adam. Ru danan kimuj nu dunia adeh sebegei benalas bahneh dosa. Jadi, dikdij mai naidat kerana pek mong numom pen de pek kibedosa. 13Dosa mong sebelom Hukom Taurat mong, tapi Jenang pek Kikira ha dosa manusia kerana pekseg mong hukom de kipasal bahneh enai ajeh dosa. 14Hamapen begei ajeh, sejak ju jaman Adam lei nu jaman Nabi Musa, dikdij mai ya naidat, temasok mai de pek naibeh dosa begei Adam de kilanggar ernor Jenang. Adam ajeh kilambang Yesus de Kihol keknit doh.

15Tapi ennog de pecume ju Jenang ihad laen ju dosa de bibeh ya Adam. Nelanggar dosa ya numom sengoi ajeh kibeh jeoi mai naidat. Tapi bernor sengik Jenang ru Iennog Kaha-peselamat manusia kiog kesan de lebeh entoi nij nu jeoi mai. Ibernor sengik ru Iennog ajeh Kiog melalui Numom Sengoi. Ilei ajeh Yesus Kristus. 16Ennog Jenang ajeh ihad laen ju dosa ya numom sengoi kilek. Ilei ajeh Adam. Kerana, telas nenumom sengoi ajeh kibedosa, dikdij mai ya besalah ku mat Jenang. Tapi telas ya jeoi nelanggar dosa bibeh ya manusia, Jenang Kiog Iennog de kibeh manusia naijadi benar ku mat Ilei. 17Danan kibekuasa nu dikdij mai melalui numom sengoi de bedosa. Tapi lebeh entoi nij hal de bibeh ya Numom de kilek. Ilei ajeh Yesus Kristus! Kerana melalui Kek, Jenang Kiog Ibernor sengik de pek dij-dij nu mai. Ru pecume Kek Kibeh enai naijadi benar ku mat Ilei. Enai doh naisui ru naimemerintah melalui Yesus Kristus.

18Jadi, sama begei nanek nelanggar dosa ya numom ajeh kibeh dikdij mai bihukom, begei ajehloh juga nanek bahneh de benar ya Numom Sengoi kibeh dikdij mai dapat naijadi benar ku mat Jenang. 19Sama begei numom sengoi de pek kitaat nu Jenang kibeh jeoi mai naijadi mai bedosa, begei ajehloh juga Numom Sengoi de Kitaat nu Jenang Kibeh jeoi mai naijadi benar ku mat Jenang.

20Hukom Taurat biog ya Jenang supaye manusia naisedar ihad jeoi dosa enai. Tapi, bile gumaken jeoi dosa bibeh ya manusia, bernor sengik Jenang pen gumaken jeoi nij. 21Jenang Kibeh begei ajeh supaye sama begei dosa kibekuasa ru kien danan nu manusia, begei ajehloh juga bernor sengik Jenang kibekuasa ru kibeh mai naijadi benar ku mat Ilei. Amen begei ajeh, enai doh naisui lei ditehjeh melalui Yesus Kristus Tuhan hik.

Currently Selected:

ROM 5: AEH

Highlight

Copy