1 KORINTUS 1

1Surat adeh ju eng Paulus de ngjadi rasul#1:1 Rasul: Perkataan adeh kirujok nu sengoi-sengoi de bilantek ha tugas has pelayanan. Icuntohjeh: Paulus, Barnabas, 12 urag pengikot Yesus, ru mai kilek juga. Kristus Yesus kerana heknod Jenang. Surat adeh juga ju sedara seiman hik Sostenes.

2Surat adeh ngtuju nu jemaah-jemaah ku kote Korintus de bicereg ya Jenang untok jadi Isengoi-sengoi kerana engkebenanek ru Kristus Yesus. Surat adeh juga ngtuju nu dikdij mai ku belok taleh de naisembah Tuhan hik Yesus Kristus. Kek ajeh Tuhan dikdij lihik.

3Semoge Jenang Menek hik ru Tuhan Yesus Kristus Baiog berkat ru neaman nu engkek.

Neucap Syukor Paulus

4Eng selalo ngbesyukor nu Jenang tentang engkek kerana engkek ya engkekep bernor sengik Jenang melalui Kristus Yesus. 5Ibukti, engkek ya engkejadi kaya kateh dikdij hal, baik ku kateh hal bengwal ru hal penanei. Dikdij hal ajeh kitejadi kerana engkebenanek ru Yesus. 6Hal ajeh kiperneng penasal tentang Kristus ya kimuj nu kateh sengik engkek 7lei engkek pek kurang nanek berkat pen mase engkepoj Tuhan hik Yesus Kristus Kihol nij. 8Kristus doh Kipekuat engkek lei ipenyudah supaye ku arik helnol Tuhan hik Yesus Kristus doh engkek pek engkebesalah. 9Jenang hik ajeh setie. Kekloh de Kicereg engkek supaye engkebenanek ru IKenon Yesus Kristus Tuhan hik.

Ceraklah ku Engkap Jemaah-jemaah Kote Korintus

10Sesedara seiman! Ngbesat nu engkek ya kuasa Tuhan hik Yesus Kristus. Bepakatloh ku kateh nanek bengwal ru agokloh mong mai naiceraklah ku engkap engkek tapi hodloh engkebenanek ku kateh sengik ru peniker. 11Sesedara seiman, eng ngbual begei ajeh kerana mong memerip urag ju peringak Kloe de naipasal nu eng mong jenawab ratak liengkek. 12De ngmaksodjeh, mong numom kiurok ilei pengikot eng, numom de kilek kiurok ilei pengikot Apolos, numom nij kiurok ilei pengikot Petrus, ru numom kilek nij kiurok ilei pengikot Kristus. 13Hodloh engkepanei Kristus pek dapat bibahagi! Lagi, apeka Paulus de bisaleb ha engkek! Engkek juga pek bibaptis ku kateh muh Paulus!

14Eng ngbesyukor nu Jenang kerana pek mong numom pen ju engkap engkek de bibaptis ya eng kecuali Krispus ru Gayus taleh. 15Jadi, pek mong mai de buleh kiurok kek bibaptis ku kateh muh eng ru kijadi pengikot eng. 16(Hooh, eng juga ngbaptis Stefanus ru iperingak tapi selaen ju kenjeh enggamakjeh eng tok pek ngbaptis mai kilek nij.) 17Kristus Kingeng eng pek untok ngbaptis sengoi tapi untok ngperlei Gah Bor. Kek pek Kihod ngperlei Gah Bor ngguna bengwal ju penanei manusia supaye kuasa ju danan Kristus ku jehuk kalag pek kijadi sie-sie.

Cerendeg Jenang ru Cerendeg Manusia

18Nu sengoi-sengoi de doh naibinasa, neajar tentang danan Kristus ku jehuk kalag ajeh neajar de budoh. Tapi nu hik de bipeselamat ya Jenang, neajar ajeh kiperneng ha kuasa Jenang. 19Ku kateh Alkitab Jenang Kiurok,

“Eng doh Ngpebinasa cerendeg mai de cerdeg

ru doh Ngpernyep penanei mai de panei.”#Yes 29:14

20Jadi, ya jelas. Mai de cerdeg pek beguna. Mai de pakar Hukom Taurat pek beguna. Mai de panei bedebat ku jaman adeh pen pek beguna. Kerana, Jenang ya Kipejadi penanei manusia pek beguna!

21Kerana Jenang ajeh cerdeg, Kek Kibeh manusia pek dapat naikenal ha Kek ya cerendeg liknai. Tapi Jenang ya Kipetetap hal adeh: Kek Kaha-peselamat manusia de naipecaya nu Gah Bor de jiperlei de bianggap budoh ya mai kilek. 22Mai Yahudi pek naipecaya amen pek naineng jibeh tanda-tanda ajaib. Mai Yunani nij pek naipecaya amen jik pek jibelwal jiguna penanei manusia. 23Hamapen begei ajeh, jik adeh jiajar tentang hal Kristus de bisaleb. Hal de jiajar ajeh kibeh mai Yahudi naibelig. Nu mai Yunani nij, neajar ajeh hal de budoh. 24Tapi nu mai de ya bicereg ya Jenang sebegei Isengoi-sengoi, pek kira nu mai Yahudika mai Yunani, neajar tentang Kristus ajeh kiperneng kuasa ru cerendeg Jenang. 25Mai kilek naianggap neajar tentang danan Kristus ku jehuk kalag ajeh benudoh Jenang, tapi sebenarnye hal ajeh cerendeg de lebeh cerdeg ju penanei manusia. Enai juga naiurok danan ajeh kiperneng Jenang ajeh lemah tapi sebenarnye hal ajeh lebeh bekuasa daripade dikdij ma de buleh bibeh ya manusia.

26Sesedara seiman! Kenangloh ha keadaan liengkek mase engkek bicereg ya Jenang sebegei Isengoi-sengoi entem. Amen hijoi penilaian manusia, jeoi ju engkek bianggap pek cerdeg, pek entoi, ru pek tehormat. 27Tapi Jenang sengaje Kipileh sengoi-sengoi de bianggap budoh ya dunia adeh kerana Kaha-peselsel mai de cerdeg. Jenang juga saja Kipileh mai de bianggap lemah ya dunia adeh kerana Kaha-peselsel mai de mong kuasa. 28Jenang Kipileh mai de bipandang rendah, mai de bianggap hina, ru mai de bianggap pek beguna ya dunia adeh. Kek Kibeh begei ajeh supaye ma de bianggap penteng ya dunia adeh kijadi pek beguna. 29Jenang Kibeh begei ajeh supaye pek mong numom pen manusia kibelagak ku ngar Jenang. 30Tapi Jenang ya Kipejadi engkesui benanek ru Kristus Yesus. Jenang Kiguna Icerendeg Kaha-pejadi Yesus ajeh Peselamat hik. Kristus Kibeh hijadi benar ku mat Jenang. Kek juga Kibeh hijadi suci ru Kiterlas hik ju dosa. 31Jadi, hik hod hibeh begei de bicot ku kateh Alkitab: “Amen numom kaha-belagak, kek hodloh kibelagak tentang hal de ya bibeh ya Tuhan.”#Yer 9:24

Currently Selected:

1 KORINTUS 1: AEH

Highlight

Copy