ROM 16

Salam Peribadi

1Eng ngha-pekenal sedara seiman hik imuh Febe. Kerdor ajeh penulog jemaah-jemaah ku kote pelabuhan Kengkrea.#16:1 Kote pelabuhan Kengkrea: Adeh kote pelabuhan, pintu miknuj ru helnol ju laot nu kote Korintus. Kote adeh inyaknak kira-kira 11 kilometer ku englag timur kote Korintus. 2Eng ngsemanj engketerima kek sebegei sedara seiman kerana sengoi-sengoi Jenang patot naiterima sesama liknai. Ru tulogloh kek amen kek perlu bitulog kerana kek ya kitulog jeoi mai temasok lieng juga.

3Perlei salam eng nu Priskila ru Akwila. Ubai ajeh kawat-kawat sekerjak eng de sama-sama jikerakjak ha Kristus Yesus. 4Ubai ajeh sanggop baiog nyawe liubai ha eng. Eng ngbeterima kaseh nu ubai ajeh tapi apeka had eng taleh. Dikdij jemaah mai pek Yahudi pen naibeterima kaseh nu ubai juga. 5Perleiloh salam eng nu jemaah-jemaah de selalo naibecatuk ku deg ubai. Perleiloh salam eng juga nu Epenetus de nghok. Kekloh sengoi de mula-mula sekali de pecaya nu Kristus ku lengrik Asia.

6Perlei salam eng juga nu Maria de ya kibekerjak kuat ha engkek. 7Perlei salam eng nu Andronikus ru Yunias. Ubai ajeh sedara lieng sendiri de bijel besama-sama ru eng entem. Ubai ajeh terkenal ku engkap rasul-rasul ru ubai ya canuk baipecaya nu Kristus sebelom eng lagi.

8Perleiloh salam eng nu kawat ru sedara seiman eng Ampliatus de nghok. 9Perleiloh salam eng nu Urbanus. Kek ajeh kawat sekerjak hik ha Kristus. Perleiloh juga salam eng nu kawat eng Stakhis de nghok. 10Perleiloh salam eng nu Apeles. Kek ya tebukti setie nu Kristus. Perleiloh salam eng nu peringak Aristobulus 11ru nu sedara lieng Herodion juga. Perleiloh salam eng nu sesedara seiman de mong ku kateh peringak Narkisus.

12Perleiloh salam eng nu Trifena ru Trifosa. Kekerdor ajeh baibekerjak kuat ha Tuhan. Perleiloh salam eng juga nu Persis de nghok. Kek ajeh numom nij kerdor de ya bekerjak keras ha Tuhan. 13Perleiloh salam eng nu Rufus de bipileh ya Tuhan, ru nu iamek de kiterima eng begei ha kenon ilei sendiri. 14Perleiloh salam eng juga nu Asinkritus, Flegon, Hermes, Partroba, Hermas, ru sesedara seiman kilek de mong besama-sama ru enai. 15Perleiloh salam eng nu Filologus ru Yulia, nu Nereus ru imenang kerdor, nu Olimpas, ru nu dikdij sengoi-sengoi Jenang de mong besama-sama ru enai.

16Besalamloh ratak liengkek ya penoh haknok.#16:16 Ya penoh haknok: Atao, ru nyinui de suci. Ku jaman ajeh, ‘nyinui de suci’ ajeh care senalam antare kekawat. Dikdij jemaah Kristus naiperlei salam nu engkek.

Bengsat Ipenyudah

17Sesedara seiman, eng betol-betol ngsemanj nu engkek supaye engkebehati-hati nu sengoi-sengoi de naibeh engkek engkeceraklah ru naipekeliru iman engkek ya neajar de betentangan ru neajar de ya engketerima. Pernyakloh diri liengkek ju sengoi-sengoi de begei ajeh. 18Kerana, sengoi-sengoi de begei ajeh pek naibekerjak ha Kristus Tuhan hik tapi naiha-perwas ha heknod sengik liknai taleh. Enai nailenglod ha mai de luros bendol ya bengwal de lembot ru sendap iceringai. 19Dikdij mai ya naipanei engketaat nu Tuhan Yesus, jadi eng ngkerakmik kerana engkek. Tapi eng nghod engkecerdeg bepanei tentang hal de bor ru pek engkepanei langsong tentang hal de jehat. 20Jenang de Kiog hik neaman doh deras Kipehancor Ibles ru Kibeh kek bijebat ya engkek.

Semoge Tuhan Yesus Kiberkat engkek.

21Kawat sekerjak eng Timotius kiperlei isalam nu engkek. Begei ajeh juga Lukius, Yason, ru Sosipater. Enai ajeh sesedara lieng sendiri.

22Eng Tertius de cekcot surat adeh ha Paulus ngperlei salam sebegei sesedara seiman nu engkek.

23Gayus de kiog tumpang nu eng ru nu jemaah-jemaah kilek ku ipadeg juga kiperlei isalam nu engkek. Erastus bendehara kote adeh ru sedara seiman hik Kuartus baiperlei salam nu engkek. [24Semoge Tuhan hik Yesus Kiberkat engkek. Amin.]#16:24 Ayat adeh pek mong ku kateh memerip salinan Alkitab manah.

Penateh ha Jenang

25Beiloh hipemulie ha Jenang! Kekloh de bekuasa Kipekuat iman engkek kena begei Gah Bor tentang Yesus Kristus de ngperlei. Gah de ngperlei ajeh kena begei rahsie de pek bipanei ya mai sejak ju manah entem. 26Tapi ya ernor Jenang de lei ditehjeh, hunen rahsie ajeh bipanei melalui ceknot nabi-nabi supaye dikdij bangse naipecaya ru naitaat nu Jenang.

27Nu Jenang de cerdeg ru nek nanek, hod hiog kemuliean lei ditehjeh melalui Yesus Kristus. Amin.

Currently Selected:

ROM 16: AEH

Highlight

Copy