ROM 15

Pesenang Sengik Mai Kilek, Apeka Sengik Lihik Sendiri

1Hik de betol-betol yaken tentang ma de hipecaya hodloh hitulog gulap nyahneh beban ku mai de pek memerip yaken, ru agokloh beh hal de hiha-pesenang ha sengik lihik taleh. 2Jap-jap lihik hodloh hipesenang sengik sesedara seiman hik ha bernor enai sendiri supaye iman enai gumaken kuat. 3Kerana, Kristus pen pek Kipesenang ha sengik Ilei sendiri, begei de bicot ku kateh Alkitab, “Dikdij nehina de bituju nu Enjen ya kena nu Eng.”#Mzm 69:10 4Dikdij de bicot ku kateh Alkitab biha-ajar ha hik supaye neajar de hiterima ju Alkitab ajeh kibeh hik sabar ru kuat lei buleh hibeharap nu Jenang. 5Semoge Jenang de bahbeh hik sabar ru kuat Kibeh dikdij liengkek engkesui benanek sengik begei ha Kristus Yesus 6supaye ru nanek sengik engkek buleh besama-sama engkepemulie ha Jenang. Kek ajeh Menek nu Tuhan hik Yesus Kristus.

Gah Bor ha Mai Pek Yahudi

7Kerana ajeh, sama begei Kristus de ya Kiterima engkek, engkek hodloh engketerima ratak liengkek supaye Jenang bipateh. 8Ingatloh, Kristus ya Kijadi hambe nu mai Yahudi supaye Kiperneng Jenang ajeh setie nu Ijenanji de Kibeh ru jenang rak enai. 9Kristus Kibeh begei ajeh juga supaye mai pek Yahudi naipemulie ha Jenang kerana Jenang Kiyayak ha enai. Begei mong bicot ku kateh Alkitab,

“Kerana ajeh, eng ngpateh Enjen

ku engkap mai pek Yahudi.

Eng ngdindang lagu ngha-pateh muh Jen.”#2 Sam 22:50; Mzm 18:50

10Mong juga de bicot,

“Engkek mai pek Yahudi, kerakmikloh besama-sama ru sengoi-sengoi Ilei!”#Ul 32:43

11Mong juga nij de bicot,

“Dikdij mai pek Yahudi, patehloh TUHAN.

Dikdij mai, patehloh Ilei.”#Mzm 117:1

12Nabi Yesaya pen mong kiurok,

“Reis ju Isai#15:12 Reis ju Isai: Reis ku padeh imaksod kenon-cenok. Ru, Isai adeh apak Raja Daud. doh Kihol.

Kek doh Kimemerintah mai pek Yahudi.

Nu Kekloh doh naibeharap.”#Yes 11:10

13Semoge Jenang de Kiog hik neharap Kiterbeg sengik engkek ya keremmik ru neaman kerana engkepecaya nu Ilei. Semoge Jenang Kibeh begei ajeh supaye kuasa ju Kelog Santen kibeh engkek gumaken engkebeharap nu Jenang.

Sebab-sebab Paulus Kibetegas

14Sesedara seiman, lieng sendiri ngyaken tentang hal adeh: Engkek ajeh tebeg ya bernor, ya penanei, ru dapat engkebenasihat ratak liengkek. 15-16Hamapen begei ajeh, eng ngcot surat nu engkek ru tegas kerana ngha-peingat engkek nij tentang memerip hal. Ngcot begei ajeh kerana Jenang Kiog tugas has supaye ngjadi pekerjak Kristus Yesus nu mai pek Yahudi. Jenang Kiog tugas has ajeh ya Ibernor sengik. Kek Kiog tugas ngperlei Gah Bor ju Kek nu mai pek Yahudi. Ngmelayani begei ha imam supaye mai pek Yahudi buleh naijadi pesembahan de bipesuci ya Kelog Santen, de kipesenang Isengik. 17Jadi, kerana eng ngbenanek ru Kristus Yesus, eng ngbangge ha kerenjak eng ha Jenang. 18Eng pek berani ngha-belwal ma-ma kecuali hal de ya bibeh ya Kristus melalui eng supaye mai pek Yahudi naijoi ha Jenang. Kek Kibeh hal ajeh melalui bengwal eng, melalui bahneh eng, 19melalui kuasa tanda-tanda ajaib, melalui kuasa hal-hal de luar biasa, ru melalui kuasa Kelog Jenang. Eng ya ngperlei Gah Bor ajeh nu dikdij tempat, mula ju kote Yerusalem leiloh nu lengrik Ilirikum. 20Eng ihad nghod ngha-perlei Gah Bor nu tempat-tempat de pekseg naicerngai ha Kristus supaye eng pek ngbeh kerjak ku tempat de bimula ya mai kilek. 21Begei de bicot ku kateh Alkitab,

“Mai de pekseg naicerngai gah tentang Kek doh naibakek

ru mai de pekseg naigerteg doh naipaham.”#Yes 52:15

Nerancang Paulus Kaha-sueg Kote Rom

22Kerana ngperlei Gah Bor nu tempat-tempat begei ajeh, ya jeoi kali eng bikerlag ngha-sueg ha engkek. 23Tapi hunen, kerjak-kerjak eng ku kawasan-kawasan ajeh ya selesei. Ya betahut-tahut eng ngha-sueg ha engkek. 24Ku kateh ceknip eng nu lengrik Sepanyol, eng ngrancang ngha-singah nu engkek. Eng ngbeharap buleh ngbakek engkek ku kateh ceknip eng mase nglalu kawasan engkek. Telas ya ngnikmati nggei besama ru engkek memerip iluniu, eng ngharap engketulog eng ngpeteros ceknip eng nu lengrik Sepanyol. 25Tapi hunen, eng ngha-et nu kote Yerusalem ngha-ngeng duet derme ha tenulog sengoi-sengoi Jenang ku pajeh. 26Kerana, jemaah-jemaah ku lengrik Makedonia ru lengrik Akhaya ya naibeh-keputusan ru senang sengik naiha-og duet derme ha sesedara seiman de hajap ku engkap sengoi-sengoi Jenang ku kote Yerusalem. 27Ru senang sengik naibeh begei ajeh, ru mimang sebenarnye naianggap tenulog ajeh tanggongjawab enai. Kerana, mai pek Yahudi ya naiterima berkat rohani melalui mai Yahudi, jadi ya mimang patot naitulog mai Yahudi ya berkat kebendean. 28Jadi, telas ya ngpesiap tugas ajeh ru ngpasti ya naikep duet derme ajeh, eng doh ngcip nu lengrik Sepanyol ru ngsingah nu engkek ku kateh ceknip eng nu majeh. 29Bile eng nghol nu engkek doh, eng ngpanei eng doh nghol ya berkat de melimpah-limpah ju Kristus.

30Sesedara seiman, ya Tuhan Yesus Kristus ru ya haknok ju Kelog Jenang, eng ngsemanj nu engkek supaye betol-betol engkebedoa besama ru eng nu Jenang ha diri eng. 31Doaloh supaye eng selamat ju sengoi-sengoi de pek pecaya ku lengrik Yudea, ru supaye duet derme de ngen nu kote Yerusalem ajeh biterima bor ya sengoi-sengoi Jenang ku pajeh. 32Telas ajeh, amen Jenang Kibekenan, eng doh nghol nu engkek ru keremmik, ru sengik eng doh kijadi segar bile eng nggei besama ru engkek. 33Semoge Jenang de Kiog hik neaman Kibeserta ru dikdij liengkek. Amin.

Currently Selected:

ROM 15: AEH

Highlight

Copy