ROM 14

Agok Pejatoh Hukom nu Sesedara Seiman

1Terima talehloh sengoi de pek memerip naiyaken tentang hal-hal de patot naipecaya. Agokloh bejawab ru enai tentang pendapat de nairasa betol atao pek betol. 2Mong mai de kipecaya buleh kicak ma taleh tapi mong juga mai de kicak had ha sayo taleh kerana pek memerip kipecaya. 3Mai de kicak ma taleh, agokloh kihina ha ilei de pek kicak ma taleh, ru ilei de pek kicak ma taleh, agokloh kipejatoh hukom nu mai de kicak ma taleh kerana Jenang ya Kiterima enai. 4Engkek ajeh bok, engkeha-hukom hambe mai kilek? Had tuan ilei sendiri taleh de layak kiurok ihambe ajeh ikerjak borka tok. Hambe ajeh doh bor kibeh ikerjak kerana Tuhan de bekuasa Kibeh hambe ajeh begei ajeh.

5Mong mai de kirasa begei adeh: Mong nuarik de lebeh suci daripade arik-arik de kilek. Tapi mong mai kilek de kirasa begei adeh: Tiap-tiap arik sama taleh. Jap-jap mai hodloh naibeh keputusan liknai sendiri de nairasa kena ru neyaken de mong ku ilei. 6Sengoi de kirasa mong arik de has untok kibeibadah, kibeh begei ajeh kaha-hormat ha TUHAN. Sengoi de kicak ma taleh kibeh begei ajeh kaha-hormat ha TUHAN kerana kibesyukor nu Jenang ha caknak ajeh. Begei ajeh juga, sengoi de had kicak caknak tetentu taleh kibeh begei ajeh kaha-hormat ha TUHAN ru kibesyukor nu Jenang. 7Pek mong numom pen de kisui ru kidat ha diri ilei sendiri. 8Amen hisui, suiloh ha Tuhan. Amen hidat, datloh ha Tuhan. Jadi, amen hisuika hidat, hik adeh hak Tuhan. 9Kristus Kidat ru Kibalek sui nij ha tujuan adeh: Supaye Kijadi Tuhan nu mai de lekat sui ru mai de ya dat. 10Jadi, engkek de engkecak had sayo taleh, agokloh engkepejatoh hukom nu sesedara seiman liengkek sendiri. Engkek de engkecak ma taleh, agokloh engkepandang hina ha enai. Ingatloh, dikdij lihik doh hijinjeg ku ngar Jenang supaye bipeadel. 11Ku kateh Alkitab mong bicot,

“TUHAN Kiurok, ‘Eng sebegei Jenang de sui Ngurok

jap-jap mai doh naisujod ru naisembah ha Eng

ru jap-jap mai doh naiaku Eng adeh Jenang.’ ”#Yes 45:23

12Jadi, jap-jap lihik doh hod hibetanggongjawab ru hijawab nu Jenang tentang dikdij kelaku de hibeh.

Agok Jadi Penyebab Sesedara Seiman Engkek Naibedosa

13Jadi, sudahloh agok engkepejatoh hukom nu sesama liengkek sesedara seiman. Tapi hodloh engkebeh keputusan pek engkeha-beh hal-hal de kibeh sesedara seiman liengkek naitades ru naibedosa. 14Kerana eng ngbenanek ru Tuhan Yesus, eng betol-betol ngyaken tentang hal adeh: Pek mong nenanek bende pen de haram. Tapi amen nenumom kianggap nenanek hal ajeh haram, jadi haramloh hal ajeh nu kek. 15Amen ma de engkecak ajeh kiperusak neyaken sedara seiman engkek tentang caknak, engkek ya pek lagi engkebekelaku ya haknok. Agokloh biar caknak kiperusak nenumom kerana Kristus Kidat ha kek juga. 16Jadi, agokloh biar hal de engkeyaken bor ajeh birasa sebegei jenghat ya mai kilek. 17Kerana, bile Jenang Kimemerintah sebegei Raja ku sinui hik, pek penteng hijoi hukom-hukom tentang caknak ru ngeknut ajeh, tapi de penteng ajehloh hibeh heknod Jenang, hisui damei ratak lihik, ru hisui sinui de kerakmik. Dikdij ajeh biog ya Kelog Santen. 18Sengoi de kisui ha Kristus begei ajeh doh naipesenang sengik Jenang ru bihargai ya mai kilek.

19Ajehloh isebab hik hod hikerekwat hibeh hal-hal de kien neaman ru hibeh hal-hal de kibeh hik sama-sama hiberaknak ku kateh iman nu Jenang. 20Agokloh perusak kerjak de ya bibeh ya Jenang ha kerana hal caknak. Dikdij caknak buleh bicak. Tapi amen ma de engkecak ajeh kibeh mai kilek naitades, engkejadi besalah. 21Lebeh bor amen pek engkecak sej atao engkengut teu wain atao engkebeh ma taleh de buleh kibeh sesedara seiman engkek naiyog. 22Jadi, ma taleh de engkepecaya tentang hal-hal ajeh, biarloh liengkek ru Jenang taleh de bepanei. Jenang Kiberkat sengoi de pek kirasa besalah bile kibeh hal-hal de kipecaya benar. 23Tapi nenumom de kicakcak ya perasaan ragu-ragu, kek kibesalah kerana ikelaku ajeh pek kijoi ma de kipecaya. Ma taleh de hibeh pek hijoi ma de hipecaya ajehloh dosa.

Currently Selected:

ROM 14: AEH

Highlight

Copy