1 KORINTUS 2
2
Neajar tentang Yesus de Bisaleb
1Sesedara seiman! Mase eng nghol nu engkek entem untok ngperlei nerancang de birahsie ya Jenang canukjeh, eng pek ngguna penanei dunia atao bengwal de susah biha-faham. 2Eng ngbeh begei ajeh kerana mase eng besama ru engkek entem, eng ngkot keputusan ngha-ajar tentang Yesus Kristus taleh, lagi-lagi ha Idanan ku jehuk kalag. 3Mase eng besama ru engkek entemjeh, eng lemah ru berog eng kerog kerana ngsengoh. 4Ku mase ngajar ru ngperlei Gah Bor nu engkek entem, eng pek ngbelwal begei ha mai de panei belwal tapi eng ngbelwal melalui kuasa Kelog Santen de Kiperneng neajar eng ajeh benar. 5Kerana ajeh, engkejadi pecaya nu Kristus pek kerana cerendeg manusia tapi kerana kuasa Jenang.
Cerendeg Jenang
6Hamapen begei ajeh, jik jiperlei tentang hal cerendeg nu mai de ya matang secare rohani. Cerendeg de jiperlei ajeh enyuk pek cerendeg dunia adeh atao cerendeg de kihol ju mai de memerintah dunia adeh. Kuasa enai ajeh doh bipernyep. 7Tapi cerendeg de jiperlei ajeh kihol ju Jenang. Cerendeg ajeh nerancang Jenang ha kemuliean hik. Nerancang ajeh ya bisedia ya Jenang sebelom dunia adeh bibeh ru birahsie lei hunen. 8Pek mong numom pen ju mai de memerintah dunia adeh de naipanei nerancang Jenang ajeh. Amen naipanei Inerancang ajeh, ya tentu enai pek naisaleb Tuhan de mulie. 9Begei de bicot ku kateh Alkitab,
“Pek mong manusia de pernah naineng atao
naicerngai
atao naiserngik ma de ya bisedia ya Jenang ha sengoi-sengoi de naihok ha Ilei.”#Yes 64:4
10Tapi Jenang Kipasal Inerancang ajeh nu hik melalui Kelog Santen. IKelog ajehloh de bepanei dikdij hal lei nu nerancang-nerancang Jenang de paleng cenem pen. 11Ma de mong ku kateh sengik nenumom, had kelog sengoi ajeh taleh de bepanei. Begei ajeh juga, ma de mong ku kateh sengik Jenang, had Kelog Jenang taleh de bepanei. 12Hik pek hiterima kelog ju dunia adeh tapi Kelog ju Jenang supaye hipanei dikdij ma de biog ya Jenang nu hik.
13Bile jibeajar, jik pek jiguna bengwal ju cerendeg manusia tapi ju Kelog Santen. Begei ajehloh jiguna cerendeg ju Kelog Santen untok jiajar hal-hal rohani. 14Mai de pek mong Kelog Santen pek dapat naipecaya neajar ju Kelog Santen kerana naianggap neajar ajeh hal de budoh. Enai pek dapat naipaham neajar ju Kelog Santen ajeh kerana hal ajeh had dapat bipaham ya mai de ya bitulog ya Kelog Santen. 15Bok imai de mong Kelog Santen dapat naipaham dikdij hal Jenang. Tapi bok imai de pek mong Kelog Santen pek dapat naipaham peniker mai de mong Kelog Santen. 16Hal ajeh kena bagei ma de bicot ku kateh Alkitab,
“Bokka de bepanei peniker TUHAN
lei dapat kinasihat ha Kek? Bokhentok!”#Yes 40:13
Tapi hik de mong Kelog Santen hipaham ma de bipiker ya Kristus.
Currently Selected:
1 KORINTUS 2: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
