Phŭn Blŭng 39

Yôsep hr̂ŏm bơnai Pôtipha

1Gah Yôsep dŏng, r̂ăng ba ñu tr̂ŭn nao pơ čal Êjĭp, nŭn Pôtipha sô̆n-sat Êjĭp ñu blơi tô̆ Yôsep mơ̆ng ngan môt sô̆n-sat Ismael, gơñu mơnuih ba nao Yôsep tăm čal nŭn. Pôtipha nŭn pô ngă buă pơtao Pharon, ñu khua môt tơhan gak sang pơtao. 2Yêhôwa dŏ hr̂ŏm Yôsep, nŭn yơh bih buă Yôsep ngă mơ̆ng sang khua ñu sô̆n-sat Êjĭp jr̂ŏng soh-sel. 3Nŭn khua ñu ƀôh laĭ Yêhôwa dŏ hr̂ŏm Yôsep, wŏt tơgr̂ư̆ buă ngan ñu ngă, Yêhôwa ngă br̂ơi jr̂ŏng soh-sel. 4Pôtipha bŏ bŭt mơ̆ng Yôsep, nŭn yơh Yôsep dŏ jop hr̂ŏm Pôtipha, dŏng ngă buă br̂ơi ñu. Jr̂ŏng nŭn Pôtipha bơdŏ br̂ơi Yôsep ep sang ñu, dăp mop br̂ơi bih dr̂ăm-gơnăm ñu hmâo mơ̆ng ngan Yôsep mơ̆n. 5Tô̆ mơ̆ng Pôtipha bơdŏ br̂ơi Yôsep ep sang ñu, wŏt bih dr̂ăm-gơnăm ñu hmâo, nŭn Yêhôwa pha br̂ơi klơi nŭk-nua sang Pôtipha sô̆n-sat Êjĭp nŭn, yua mơ̆ng Yôsep, klơi nŭk-nua Yêhôwa pha br̂ơi nŭn dŏ hr̂ŏm tơgr̂ư̆ nŏ yĕt-yĕt Pôtipha hmâo, tăm sang, dăp tăm hua ñu he mơ̆n. 6Nŭn yơh ñu čr̂oh br̂ơi bih nŏ yĕt-yĕt ñu hmâo mơ̆ng ngan Yôsep, ñu bĭ wŏn-wai mơ̆ng nŏ yĕt-yĕt ôh, ñu khư̆t ha tô̆ hnă ñu ƀŏng đơč. Yôsep, dr̂ơi-jĕn ñu hiam dăp ƀŏ ñu hr̂ăl mơ̆n.

7Dơdơi mơ̆ng anŭn, bơnai khua Yôsep pel Yôsep kơtă-kơtă, jr̂ŏng nŭn pơhiăp laĭ: «Đih hr̂ŏm kâo wŏ!» 8Plai Yôsep ñu laĭ, «Git ôh.» Nŭn ñu pơhiăp hr̂ŏm bơnai khua ñu: «Ep wŏ, gơi kâo r̂ai dŏ ha ane, khua kâo ñu bĭ wŏn-wai mơ̆ng nŏ yĕt-yĕt mơ̆ng sang ne ôh, dăp ñu mop br̂ơi bih-tih nŏ yĕt-yĕt ñu hmâo tăm ngan kâo mơ̆n. 9Bĭ hmâo lơi pr̂ŏng hloh mơ̆ng kâo tăm sang ne ôh, wŏt khua kâo ñu bĭ r̂ă-kă mơ̆ng nŏ yĕt kâo yua le, ha tô̆ ih đơč ñu čr̂oh ñu pô, yua ih bơnai ñu. Nĭng nŭn yơh, hiư̆m kâo thâo ngă klơi set pr̂ŏng hla ne, dăp ngă glaĭ mơ̆ng Ơi Adai?» 10Wŏt bơnai Pôtipha pơhiăp hr̂ŏm Yôsep r̂ĭm r̂ơi, plai Yôsep ñu git hmĭ tui bơnai khua ñu jak đih hr̂ŏm ôh, dăp bĭ dŏ jĕ ñu le. 11Hmâo ha r̂ơi Yôsep mŭt nao ngă buă tăm sang, pah anŭn bĭ hmâo mơnuih dŏ tăm sang ôh, 12nŭn bơnai Pôtipha mă ao Yôsep, ñu laĭ: «Đih hr̂ŏm kâo wŏ!» Plai Yôsep toh klaih lôi ao ñu tăm ngan bơnai Pôtipha, jr̂ŏng nŭn tă đuĕ gah ia-wang. 13Tơl ñu ƀôh Yôsep toh klaih lôi ao tăm ngan ñu, dăp tă đuĕ gah ia-wang, 14nŭn ñu iâo yô mơnuih ngă buă tăm sang ñu, ñu r̂ă laĭ: «Ep wŏ, kơi kâo ba r̂ai mơnuih sô̆n-sat Hêbrơ ne r̂ai ngă pơmat môt ta! Ñu mŭt r̂ai čiăng đih hr̂ŏm kâo, plai kâo ôl đĭ kr̂aih. 15Tơl ñu hmĭ kâo ôl đĭ, ñu klaih lôi ao ñu pơ kâo, jr̂ŏng nŭn ñu tă đuĕ gah ia-wang.» 16Nŭn ñu čr̂oh ao Yôsep jĕ ñu, khă tơl khua Yôsep glaĭ r̂ai pơ sang, 17nŭn ñu r̂ă thâo br̂ơi kơi ñu, tui klơi pơhiăp hađăp nŭn, ñu laĭ: «Hlŭn sô̆n-sat Hêbrơ ih ba r̂ai nŭn, ñu mŭt r̂ai čiăng ngă pơmat kâo. 18Pah kâo ôl, ñu klaih lôi ao ñu hr̂ŏm kâo, jr̂ŏng nŭn tă đuĕ gah ia-wang.»

19Tơl khua Yôsep hmĭ klơi bơnai ñu r̂ă br̂ơi ñu: «Nĭng nŭn yơh hlŭn ih ngă hr̂ŏm kâo.» Nŭn ñu hêl kơtang jat. 20Nŭn khua Yôsep ba nao Yôsep čĕ khŭk, pơ ƀon r̂ăng čr̂oh kr̂ĭ mơnuih ngă glaĭ mơ̆ng pơtao, jr̂ŏng nŭn Yôsep dŏ tăm sang khŭk nŭn yơh. 21Plai Yêhôwa dŏ hr̂ŏm Yôsep, dăp khăp-pap ngă hiam hr̂ŏm ñu mơ̆n, nŭn Yêhôwa ngă br̂ơi khua sang khŭk bŏ bŭt mơ̆ng Yôsep. 22Nŭn khua sang khŭk jao br̂ơi bih-tih mơnuih djơ̆ khŭk mơ̆ng ngan Yôsep, dăp buă yĕt a ngă tăm sang khŭk, buă nŭn Yôsep phĕn-kan br̂ơi soh. 23Khua sang khŭk bĭ wŏn-wai ôh mơ̆ng nŏ yĕt ñu mop mơ̆ng ngan Yôsep, yua Yêhôwa dŏ hr̂ŏm Yôsep, dăp buă yĕt Yôsep ngă, Yêhôwa ngă br̂ơi jr̂ŏng soh-sel.

Currently Selected:

Phŭn Blŭng 39: JKB

Highlight

Copy