Phŭn Blŭng 40

Yôsep bơblang klơi lơpơi

1Dơdơi mơ̆ng buă nŭn, hmâo mơnuih dua r̂ăng ngă glaĭ mơ̆ng pơtao čal Êjĭp khua gơñu, ha r̂ăng mơnuih ling pai tăm kơčok br̂ơi pơtao, ha r̂ăng dŏng mơnuih ŏm nŭmpăng br̂ơi pơtao mơ̆n. 2Pơtao Pharon hêl môt ngă buă dua r̂ăng nŭn, khua ling pai, dăp khua ŏm nŭmpăng, 3nŭn pơtao mă kr̂ĭ lôi gơñu tăm sang khŭk khua môt tơhan gak sang pơtao, sang khŭk nŭn yơh r̂ăng kr̂ĭ lôi Yôsep. 4Khua môt tơhan gak sang pơtao, ñu bơdŏ br̂ơi Yôsep dŏ jop hr̂ŏm môt dua r̂ăng nŭn, čiăng Yôsep dŏng ngă buă br̂ơi gơñu. Tơl dua gơñu dŏ mơ̆ng sang khŭk wĭ r̂ơi boih, 5nŭn mơnuih dŏ tăm sang khŭk dua r̂ăng nŭn, gơñu lơpơi ƀôh hr̂ŏm ha mlăm nŭn, pô ling pai, dăp pô ŏm nŭmpăng br̂ơi pơtao čal Êjĭp, klơi gơñu lơpơi ƀôh nŭn phar̂a mơ̆ng gŏp ñu. 6Mơ̆ng guah Yôsep nao pơ môt dua r̂ăng nŭn, ñu ƀôh ƀŏ pơta gơñu kơ-ŭ. 7Yôsep kơña môt khua dua r̂ăng nŭn#40:7 Yôsep kơña môt khua dua r̂ăng nŭn Hêbrơ laĭ «Yôsep kơña môt khua ngă buă Pharon môt dŏ hr̂ŏm ñu mơ̆ng sang khŭk khua ñu.»: «Yua yĕt r̂ơi ne ƀŏ pơta gô-ih bĭ ak nĭng nŭn lĕ?» 8Gơñu til glaĭ: «Mơi lơpơi ƀôh, plai bĭ hmâo lơi thâo bơblang br̂ơi klơi lơpơi ƀôh nŭn ôh.» Jr̂ŏng nŭn Yôsep laĭ: «Hmâo ha tô̆ Ơi Adai đơč thâo bơblang br̂ơi klơi lơpơi ƀôh. Dueh mơ̆ng gô-ih r̂ă br̂ơi kâo wŏ.»

9Jr̂ŏng nŭn khua ling pai r̂ă r̂oi br̂ơi Yôsep klơi ñu lơpơi ƀôh nŭn, ñu laĭ: «Klơi kâo lơpơi ƀôh nŭn, hmâo phŭn wĕ boh ƀâo ha phŭn dŏ gah năp kâo. 10Phŭn nŭn hmâo than klâo ƀĕ, pah hla ñu ƀr̂ĕč, nŭn bơnga ñu blang đĭ, jr̂ŏng nŭn boh ñu să đĭ pĕn-tul-pĕn-tul pah anŭn he boih. 11Kơčok Pharon dŏ tăm ngan kâo, jr̂ŏng nŭn kâo pĕ boh ƀâo nŭn ñet tăm kơčok, jr̂ŏng nŭn kâo br̂ơi pơ ngan Pharon.» 12Jr̂ŏng nŭn Yôsep pơhiăp hr̂ŏm ñu: «Klơi ih lơpơi ƀôh nŭn luaĭ ne, than klâo ƀĕ nŭn, klâo r̂ơi. 13Dŏ klâo r̂ơi dŏng, Pharon ti iâo đĭ ih br̂ơi dŏ gah năp ñu, jr̂ŏng nŭn ñu ti bơdŏ glaĭ br̂ơi buă ih hađăp dŏng, nŭn ih ti br̂ơi kơčok pơ ngan Pharon, hla ti ih juăt ngă, pah ih dŏ ngă buă ling pai br̂ơi ñu ahlâo. 14Tơl ih biă mơ̆ng sang khŭk ne, dueh mơ̆ng ih kơčăng glaĭ mơ̆ng kâo he, dăp khăp-pap ngă hiam hr̂ŏm kâo hla ne, br̂ơi ih r̂ă r̂oi br̂ơi Pharon thâo mơ̆ng klơi kơnap-tap kâo, čiăng ñu#40:14 Čiăng ñu Hêbrơ laĭ «Čiăng ih.» ba biă kâo mơ̆ng sang khŭk ne. 15Yua r̂ăng mă kâo mơ̆ng ƀon môt sô̆n-sat Hêbrơ dŏ. Tơl pơ ane dŏng, kâo bĭ ngă glaĭ nŏ yĕt ôh, dai r̂ăng mă čĕ lôi kâo tăm sang khŭk ne.»#40:15 Sang khŭk Hêbrơ laĭ «Luh.» Yôsep hiăp pơyap mơ̆ng sang khŭk ñu dŏ nŭn hla ti luh. An Phŭn 39:20.

16Tơl khua ŏm nŭmpăng ƀôh laĭ klơi lơpơi nŭn hiam,#40:16 Klơi lơpơi nŭn hiam Hêbrơ laĭ «Klơi ñu bơblang nŭn hiam.» nŭn ñu pơhiăp hr̂ŏm Yôsep: «Kâo lơpơi ƀôh mơ̆n, hmâo i klâo boh dŏ mơ̆ng kŏ kâo, mơ̆ng i nŭn hmâo nŭmpăng tih. 17I gah ngŏ hmâo nŏ ƀŏng tơgr̂ư̆ neo r̂ăng ŏm čr̂oh br̂ơi Pharon, plai čĭm pŏl r̂ai čoh ƀŏng lôi hnă tăm i mơ̆ng kŏ kâo nŭn.» 18Jr̂ŏng nŭn Yôsep til glaĭ: «Klơi ih lơpơi ƀôh nŭn luaĭ ne, i klâo boh nŭn, klâo r̂ơi. 19Dŏ klâo r̂ơi dŏng, Pharon ti iâo đĭ ih br̂ơi dŏ gah năp ñu, jr̂ŏng nŭn tr̂ĕ lôi tơkoi ih, nŭn r̂ăng ti ba nao tol lôi dr̂ơi ih mơ̆ng kơyâo, jr̂ŏng nŭn čĭm pŏl ti r̂ai čoh ƀŏng lôi săl ih.»

20Klâo r̂ơi dơdơi mơ̆ng anŭn dŏng, djơ̆ r̂ơi hơdŏl glaĭ r̂ơi a pơpôn Pharon, nŭn Pharon pơkr̂a klơi ƀŏng mơñŭm br̂ơi bih-tih môt khua ngă buă ñu, jr̂ŏng nŭn ñu iâo đĭ khua ling pai dăp khua ŏm nŭmpăng, br̂ơi gơñu dŏ gah năp môt ngă buă ñu. 21Ñu bơdŏ glaĭ khua ling pai buă ñu hađăp, čiăng ñu br̂ơi kơčok pơ ngan Pharon dŏng. 22Plai khua ŏm nŭmpăng dŏng, pơtao tol lôi ñu, hla ti klơi Yôsep bơblang dơdi. 23Plai dŏng, khua ling pai, ñu bĭ kơčăng glaĭ mơ̆ng Yôsep ôh, ñu wĕč lôi klĕng.

Currently Selected:

Phŭn Blŭng 40: JKB

Highlight

Copy