Phŭn Blŭng 38

Yuđa dua ñu Tamal

1Pah anŭn Yuđa biă đuĕ mơ̆ng yŏng dơi ñu, nao dŏ jĕ đahkơi ha r̂ăng nă plơi Ađulam a iâo ƀŏ ñu Hira. 2Pơ anŭn Yuđa ƀôh đahmơi ha r̂ăng, ma ñu a iâo Su-a, sô̆n-sat Kanan, nŭn Yuđa tô̆ ñu ngă bơnai, jr̂ŏng nŭn mŭt nao jĕ jiăm hr̂ŏm ñu. 3Nŭn bơnai ñu dŏ năp, pơpôn r̂ai nă đahkơi ha r̂ăng, nŭn Yuđa iâo ƀŏ nă nŭn “Ơ.” 4Dơdơi mơ̆ng anŭn, bơnai ñu dŏ năp, pơpôn r̂ai nă đahkơi ha r̂ăng dŏng, bơnai ñu iâo ƀŏ nă nŭn “Ônăn.” 5Jr̂ŏng nŭn, bơnai ñu pơpôn r̂ai nă đahkơi ha r̂ăng dŏng, nŭn bơnai ñu iâo ƀŏ nă nŭn “Sêla.” Yuđa dŏ mơ̆ng plơi Kêsơp pah bơnai ñu pơpôn Sêla.

6Jr̂ŏng nŭn Yuđa sem br̂ơi bơnai Ơ nă phŭn ñu, đahmơi nŭn a iâo ƀŏ ñu Tamal. 7Plai Ơ nă phŭn Yuđa, ñu mơnuih set ti năp Yêhôwa, jr̂ŏng nŭn Yêhôwa pơdjai lôi ñu. 8Pah anŭn Yuđa pơhiăp hr̂ŏm Ônăn: «Djơ̆ ih yơh ti nao dŏ bơnai yŏng ih, yua ih adơi sang ñu, čiăng yŏng ih hmâo djuoi r̂ai mơ̆ng ih.»#An Juăt 25:5. 9Plai Ônăn dŏng, ñu thâo kr̂ăn laĭ djuoi nŭn bĭ djơ̆ djuoi ñu ôh, nŭn r̂ĭm wŏt ñu mŭt nao jĕ jiăm hr̂ŏm bơnai yŏng ñu, ñu ngă pơƀlĕ lôi pơkŏn,#38:9 Ñu ngă pơƀlĕ lôi pơkŏn Hêbrơ laĭ «Ñu ngă bơr̂ăm lôi pơ kơnah.» yua ñu git br̂ơi yŏng ñu hmâo djuoi ôh. 10Buă ñu ngă nŭn set ti năp Yêhôwa, jr̂ŏng nŭn Yêhôwa pơdjai lôi ñu dŏng. 11Jr̂ŏng nŭn Yuđa pơhiăp hr̂ŏm Tamal nă pơtâo ñu: «Br̂ơi ih glaĭ ngă gơdr̂ô dơdăng tăm sang ma ih, tơl Sêla nă kâo dŭt ƀơĭ.» Yua Yuđa khư̆t tăm bŭt ñu: «Kâo huĭ Sêla ti djai hla ti môt yŏng ñu mơ̆n.» Nĭng nŭn yơh, Tamal glaĭ dŏ pơ sang ma ñu.

12Wĭ r̂ơi mơ̆ng anŭn dŏng, nă đahmơi Su-a, bơnai Yuđa ñu djai lôi. Tơl Yuđa huai lôi mơ̆ng klơi ñu kơ-ŭ-kơ-uăn boih, ñu đĭ nao pơ môt yuă blâo triw ñu pơ plơi Thimna, dăp gop ñu Hira sô̆n-sat Ađulam nao hr̂ŏm ñu mơ̆n. 13Jr̂ŏng nŭn hmâo r̂ăng r̂ă thâo br̂ơi Tamal: «Nêne khma ih pah đĭ nao ti yuă blâo triw ñu pơ plơi Thimna.» 14Nŭn Tamal ñu toh lôi bĕn ao gơdr̂ô ñu, jr̂ŏng nŭn klŭm seng gom lôi ƀŏ ñu, dăp ôm lôi dr̂ơi-jĕn ñu, nŭn ñu nao dŏ ben r̂ok glan a nao pơ plơi Thimna ti mneh plơi Ênem, yua Tamal ƀôh laĭ Sêla dơdăm boih, plai Yuđa bĭ br̂ơi Tamal nao ngă bơnai Sêla ôh. 15Tơl Yuđa ƀôh ñu, Yuđa khư̆t laĭ ñu đahmơi ƀuo pô, yua ñu gom lôi ƀŏ ñu. 16Nŭn Yuđa weh nao pơ ñu r̂ok glan, dăp laĭ: «Br̂ơi kâo đih hr̂ŏm ih wŏ,» yua ñu bĭ thâo kr̂ăn ôh đahmơi nŭn nă pơtâo ñu. Jr̂ŏng nŭn đahmơi nŭn kơña: «Hiư̆m, nŏ yĕt ih ti br̂ơi kâo, jơ̆ ih đih hr̂ŏm kâo?» 17Ñu til glaĭ: «Kâo ti pơđơi r̂ăng ba r̂ai nă be ha dr̂ơi pơ ih mơ̆ng phung be kâo.» Đahmơi nŭn laĭ: «Br̂ơi ih čr̂oh dr̂ăm bơguăn hr̂ŏm kâo ƀơĭ, khă tơl ih br̂ơi r̂ai nă be nŭn.» 18Nŭn ñu til glaĭ: «Hiư̆m, dr̂ăm yĕt ih čiăng kâo bơguăn hr̂ŏm ih?» Đahmơi nŭn til glaĭ: «Tr̂a ih hr̂ŏm wĕ ñu, dăp gai jr̂a ih djă mơ̆ng ngan ih nŭn.» Nŭn ñu mop br̂ơi hĕ dr̂ăm nŭn pơ ñu, jr̂ŏng nŭn ñu mŭt nao đih hr̂ŏm đahmơi nŭn. Dơdơi mơ̆ng anŭn, đahmơi nŭn dŏ năp yua mơ̆ng ñu. 19Đahmơi nŭn gŭ đĭ biă đuĕ toh lôi seng, jr̂ŏng nŭn buh glaĭ bĕn ao gơdr̂ô ñu dŏng.

20Nŭn Yuđa pơđơi gop ñu sô̆n-sat Ađulam ba nao nă be, čiăng song glaĭ dr̂ăm bơguăn mơ̆ng đahmơi nŭn, plai gop ñu sem đahmơi nŭn bĭ ƀôh ôh. 21Nŭn ñu kơña môt dŏ ƀon nŭn: «Pơ pă đahmơi ƀuo pô? Ahlâo ñu dŏ ben ti mneh plơi Ênem.» Gơñu til glaĭ: «Pơ ƀon ne bĭ hmâo đahmơi ƀuo pô ôh.» 22Nŭn yơh ñu wŏt glaĭ pơ Yuđa dŏng, ñu laĭ: «Kâo sem bĭ ƀôh ôh, wŏt môt dŏ ƀon nŭn dŏng, gơñu laĭ, “Pơ ane bĭ hmâo ôh đahmơi ƀuo pô.”» 23Jr̂ŏng nŭn Yuđa laĭ: «Čr̂oh br̂ơi ñu tô̆ dr̂ăm bơguăn nŭn wŏ, r̂ăng huai klao pơmat ta. Ep wŏ, kâo br̂ơi ih ba nao nă be ne, plai ih sem ñu, bĭ ƀôh ôh.»

24Ai-ñu, klâo blan dơdơi mơ̆ng anŭn, hmâo r̂ăng r̂ă br̂ơi Yuđa: «Tamal nă pơtâo ih, ñu ngă đahmơi ƀuo pô. Nêne dŏng ñu dŏ năp r̂ai mơ̆ng buă ñu ƀuo pô nŭn yơh.» Yuđa laĭ: «Ba biă ñu gah ia-wang, jr̂ŏng nŭn čuh lôi ñu wŏ!» 25Pah r̂ăng ba biă Tamal, nŭn Tamal pơđơi r̂ăng nao r̂ă thâo br̂ơi khma ñu: «Kâo dŏ năp r̂ai mơ̆ng pô dr̂ăm ne.» Jr̂ŏng nŭn ñu laĭ dŏng: «Tr̂a hr̂ŏm wĕ, dăp gai jr̂a ne, hiư̆m, ih thâo kr̂ăn mơ̆n, dr̂ăm lơi ne?» 26Yuđa thâo kr̂ăn dr̂ăm nŭn, ñu laĭ: «Kâo ngă glaĭ yơh, yua kâo bĭ br̂ơi ñu nao ngă bơnai Sêla nă kâo. Nĭng nŭn yơh, ñu kơpă hloh mơ̆ng kâo.» Yuđa bĭ jĕ jiăm hr̂ŏm Tamal dŏng tah.

27Tơl r̂ơi Tamal ti đih phui, nŭn r̂ăng thâo kr̂ăn laĭ ñu hmâo nă dua r̂ăng dŏ tăm čian ñu. 28Pah ñu wă čian ti đih phui, nă ha r̂ăng biă r̂ai ngan ñu, nŭn yă ƀoi tô̆ wĕ mr̂ai myah kă ngan ñu, dăp pơhiăp laĭ: «Nă ne biă hlâo.» 29Tơl nă nŭn dui mŭt glaĭ ngan ñu, nŭn ƀôh yŏng ñu biă r̂ai. Jr̂ŏng nŭn yă ƀoi laĭ: «Ƀưh! Yĕt ŏng blŭng biă r̂ai hlâo?» Yua nŭn yơh r̂ăng mơ̆ng iâo ƀŏ nă nŭn “Pêreh.”#38:29 Ƀŏ Pêreh tui tam Hêbrơ čiăng laĭ blŭng biă. 30Jr̂ŏng nŭn adơi ñu biă r̂ai mơ̆n, ngan ñu a kă wĕ mr̂ai myah, nŭn a iâo ƀŏ nă nŭn “Sêrah.”

Currently Selected:

Phŭn Blŭng 38: JKB

Highlight

Copy