1PETERU 4

Thed" Yu Shau" Da" Kangso' Dei Khyoo:

1Khristu gi nya: da" gung du: moo kyi" khyeug shen" yhen zi kham' bye: nghoid rigi nanu" we' Aseing: yhang: ti" kham' ca" boem wa nghoid- khasu" wim ga: ri gung du: moo kyi" khyeug kham' yu" bye: su: hang" we' yooboo yo' ci: asen: loo. 2Hougsu" nghoid yoomo akhid" mo he: mougmyid' moo nanu" kangso' dei nyid wa deing shi" da" bidnyid gu: moo byu yi da" myo, no, vhoo: bo da" khyoo:- jhu, phyo' khyoo: moo abo cang loo" looza- 3Mangsoo vho: da" khyoo: moo cang loo" ge'. Lai loo bye: da" ayo, moo tungbau byumyu" yi lang" koid nau da" moo"- nanu" koid lo zigi soung myang" bye- tarha" ri anau, cang khyo" - youg: shoo: go" khyo" yhid: shug shoo" zo: khyo" pyo: da" khyoo: moo cang lho: zoo: pui" shug pui" koid ziyo' aco' ajhoid da' soolhoo: no" khyoo: ri bo vang zei: khyo" kangso' dei lid lo boem bye. 4Akhid" koem nanu" gi nyang: nu' yo' dage" aco' ajhoid koid zoo: pyoo: shug pyo: nyid a' khyoo: moo abo cang lo' boem loo: yoomo nanu" ri nyangnu" gi gye" mau" lho: gei sang: nyid boem bye. 5Nghoid loug we' nyangnu" gi dei nyid mo, yo' shid: loo" mo, ri tarha" dang: phyed' byid: wa jen" jen" nghoid da" Mangso shid' khoin" moo nyangnu" da" kangso' dei da" zhayen" ri toin" shed' ca" boem wa nghoid. 6Hougsu" nghoid yoomo nyangnu" da" gung du: moo dei nyid ri byu yi gootu: ri yhang: ti"- dang: phyed' zi shau" lho: shid: byug bye: mo, ri we' ngei bu: lu dang: ri kho" kyoo" bye. hau" ngei bu: lu dang: ri kho" kyo" da" khyoo: gi nyangnu" da" venyi khyo" kangso' dei jang" moo Mangsoo gi dei nyid ti"- nyangnu" dei nyid wa shid re" nghoid.

Mangso Byid: Da" Jeju" Jhung" Shug Ri- Ge, Da" Zi Jung Mo,

7Ziyoo jo, moo jo, thang loo" wa ayo, ju" bye: yoomo nanu" gi akyu" mho' wa shid re" nyang: nya: da" nheigloem: ri zed" lhed' lho: nheig boo ung: gyeung" nyid loo: ge'. 8Je" wigi nyang: cang" nyang:- gyeung" da" jheddab myid' yo' jheddab go" nyid ge, khasu" wim ga: ri jheddab da" nheigloem: gi yooboo myoo" sho' ri yo" nghoeb, pyam byid. 9Nanu" gi nheig yoo: nheig jhug akoid loo: za: nyang: cang" nyang:- being" did' go" nyid ge'. 10Dangain" bang: gi venyi jhung: shug dayug daja: yo" kham: yu bang: za: nghoid nyid. Nanu" gi Mangso da" mainkaid jhung: shug aja: ja: ri zoem: ci: se' da" zi jung su: yhang: ti"- nyang: nya: shau' kham: yu bye: da"{ jeju" ri byu gooje akyu shid' re" we' bo ci: yhoung nyid ge'. 11Kho" kyo" nyid su: hang" we' Mangso da" mungdang: ri kho" kyo" nyid ca"- sube" dei zoo: koid nyid su: gi Mangsoo byid: to" da" yoem: so' yo' dakhyoo" ti"- deizoo: koid nyid ge'- houg: su" nghoid lang" she' zei: so' da" moo" zoo' dangain" jang" moo Aseing Yesu Khristu khyo" wigi phoo Mangsoo ge' wi coung" nghei tu: to' kaid' zi shau" wa nghoid. Yesu Khristu moo myonhoo: phung yoeb, bug thu' sheing" jhu" khyoo: gi pyaid didu moo dabo jo, baja" o" - Amen.

Khritain Byu Dayug Khyo" Noo Kham' Ca" Khyoo:

12Ngoo jheddab da" byen, cang" yi we"- gye" no, khyo" ca: yu" da" noo shau" nyid uri khanham we' abue" yu" shi" da" gooki" lid' zi daja: bue" loo bye: ein: amau" nyid goo. 13Mau" nyid wa shid' re" gi Khristu kham: yu bye: da" kyi" khyeug shen" yhen da" khyoo: ri Yesu yo' dage" bo shau" kham' zoo: yoomo gau, yi ngei pyo: nyid ge'- houg: su" nghoid lang" she' Yesu gi myonhoo: yoeb, bang zeing yo' doem ju" gyoo" lo da' bidnyid moo nanu" gye" gau yi zi shau" boem wa nghoid. 14Nanu" gi Khristu da" thang: cang mo, bui' yoomo gei sang: shang pyang: zi shau" da" uri ngi lho, boem bye. Khasu" wim ga: ri houg: yhang: ti" thoung" shau" nyid da" uri Mangso venyi ein: da" myonhoo: phung" yoeb, yo' joeb byeung" da" venyi gi nanu' da" atho' moo ju" nyid bye: yoomo nghoid. 15Nanu" mo hang" nghoid loug we' byu dayug yug shen" yhen shau" nyid zigi hau: yug gi byu said' khyoo:- khau" da" khyoo: tarha" ri shoid yoomo houg: su anghoid lang gi sube" da" moozoo" moo bo lhu: phyo' yoomo dam kaid' dang: phyed' zi kham' zoo: mo, abui" goo. 16Nghoid loug we'-Khristain byu dayug nghoid yoomo shen" yhen zi shau" nyid nghoid rigi ce: sho' cang aboo. Khristu da" myeing voin, su: yo" bui' yoomo Mangsoo ri jeju" boin: nyid ge'.

17Tarha" dang: phyed' da" bidnyid gi ju" shed" lo nyid bye- Mangso da" yhoem: khau: byu yi ri xang: shed" tarha" dang: phyed' zi shau" wa nghoid wigi gyeing" nyang: ngoonu" gi xang: shed" tarha" dang: phyed' zi shau" boem nghoid rigi Mangso ngei bu: lu dang: ri aloem" ajeung" mo, gi khate' zi je" thoung" shau" boem wa lha". 18Jhoem: mungdang: moo tid to" ziyo' dakhyoo" ti"-

gyeing" nyang: byu gi, yi lang" khyoid yu zi shau" wa yau: nyid nghoid rigi

Mangsoo abo da" yooboo dab, da" byu yi tho' moo gi khasu" bue" loo wa lha". 19Hougsu" nghoid nyid yoomo Mangsoo byid: to" ziyo' dakhyoo" ti"- sho" jhen: jam jau shau" mo, gi ge da" moo" ri zei: lho: nya: dang: thang" cab, ri zei pyeing byid: su: da" lo, moo nyangnu" da" kangso' ri ab, pyam ca.

Currently Selected:

1PETERU 4: LCL

Highlight

Copy